NIPADDUWO 83
Marhinga A Yeruzalemi
KAÑGANA mabasa aba otene aneedda apa. Aizraeli ahidhaaleliwa mabasa a omaga marhinga a Yeruzalemi. Mwene Nabukoddonozori mwamutolotxeliye Yeruzalemi vyaka 152 mundduni, iyene wahigwiha marhingaya nanda wahiddumeya misuwo dha sidadiya. Aizraeli kamagile wili marhingaya bali ofiyawene mmudhi ovenyedha o Babilonia.
Weyo onoona ninga athu eewile dhavi okalaga veneva vyaka esi dhotene s’ohikaana marhinga ozugunuwa sidadi yawa? Awene keewile na muthiddeeleyo. Na ohirutxa amwiddani awa agahivolowa nanda baabuddugela awene. Mbwenye omagomelowa ovanene mulobwana oddu Neemia onowakamiha athu omaga marhingaya wili. Weyo onomuziwa Neemia bani?
Neemia ddi Muizraeli oddwene odhile o sidadi ya Suza, wenewo onkala Mordekai na Esteri. Neemia wahilaba mu numba ya mwene, noona txino waligi marho waderetu vaddiddi wa Mordekai vina musano Esteri. Mbwenye Bibilia kanloga wila Neemia wahimulaba mamuni wa Esteri, Mwene Asuero. Iyene wamulabile mwene onfareli, Mwene Aritaserse.
Kobuwela, Aritaserse ddi mwene waderetu oddule wanvahile Esdra kobiri esile dhotene dhadhowiliyena o Yeruzalemi wila akoddelihe mparha wa Yehova. Mbwenye Esdra kamagile marhinga a sidadi amalile ogomowa. Ndoweni noone mukalelo wadhilani okoseya wila Neemia akose mabasa aba.
Dhihivira vyaka 13 ovenya mudhidhi wanvahile Aritaserse kobiri Esdra wila akoddelihe mparha. Ovanene Neemia ddi namaperheka dhomwa munddimuwa wa Mwene Aritaserse. Eji entapulela wila iyene ddininvaha mwene vinyu, nanda ddinoona wila muthu muthuvi anatamele ommwiha mwene nddibwi. Aba mabasa a makamaka vaddiddi.
Dhaene, siku nimodha Hanani mbali wa Neemia na alobwana ena a elabo ya Izraeli ahidha omoona Neemia. Awene ahimpanga mwaha wa makathamiho ankaana Aizraeli, nanda mukalelo olivi marhinga a Yeruzalemi ogomowene. Eji ehimukosiha Neemia okubanya vaddiddi, nanda ohilobela wa Yehova mwaha wa eji.
Siku nimodha mwene ohoona wila Neemia onokubanya, nanda ohivuza: ‘Onkubanyelani dhawene vaddiddi?’ Neemia ohimpanga wila onkubanyela sabwani Yeruzalemi oli mmukaleloni wabure nanda marhingaya ahigomowa. Mwene ohivuza: ‘Kito onfuna eni?’
Neemia ohiloga wila: ‘Kaddithiyeni ddidhowe o Yeruzalemi, wila ddamage wili marhingaya.’ Mwene Aritaserse ddaderetu vaddiddi. Iyene ohiloga wila Neemia podi odhowa, nanda ohimukamiha ogumela matabwa a omagawa. Mohigoneela Neemia mumaleliye ofiya o Yeruzalemi, iyene ohapanga athu mwaha wa ejile enfuniye okosa. Awene ahiziveliwa yubuweloya, nanda ahiloga dhahi: ‘Ndoweni nirome omagawa.’
Amwiddani a Aizraeli moonelani wila marhingaya anowela, awene ahiloga dhahi: ‘Ninela odhowa nanda naape, vina nimetxe mabasaya a omaga.’ Mbwenye Neemia ohiwa mwaha wa eji, nanda ohavaha anamalabaya masupadda na myalago. Nanda ohiloga dhahi: ‘Kamwawove amwiddani ehu. Kaarabeleni koddo abali enyu, ana enyu, awadhi enyu, vina matakulu enyu.’
Athuya ahiliba murima vaddiddi. Awene ahetheka futhi dhawa mutana na mathiyu, nanda awene ahidhowavi bagamaga. Noona mwari mwa masiku 52 bahi marhingaya ahigomihiwa. Ovanene athuya podi wiwa muthiddeeleyo mwari mwa sidadi. Neemia na Esdra ahasunziha athu nlamulo na Mulugu, nanda athuya anohagalala.
Mbwenye dhilobo kayovi dhakakene ninga mwakalelani Aizraeli ahinathi othukuleliwa o Babilonia ninga afugeliwi. Athu anlamuleliwa na mwene wa Persia nanda awene anofanyeela omulaba iyene. Mbwenye Yehova wahiroromeliha wila iyene onela omuruma mwene muswa, nanda mwene oddo onela wadheelana murenddele athuya. Mwene oddo bani? Onadhena dhavi murenddele velaboni ya vati? Othamagela vyaka 450 dhihivira muthu muthuvi ahinathi oziwa mwaha wa eji. Mumalelani ohikala obaaliwa wa makamaka vaddiddi wa nyenye. Mbwenye eji yopadduwa yina.
Nehemiya makapitulu 1 mpaka 6.