Nsunzo 8
Egumi Yavamuralani Enziveliwa Mulugu
Mburo gani oli muteli vamuralani? (1)
Muteli onfanyela omweddyha dhavi muteliwi? (2)
Mabassa gani ali mwa babi? (3)
Mabassa gani ankosa muteliwi vamuralani? (4)
Mulugu onfuna nya wa ababi vamodha na ana? (5)
Enloga Bibilia jivi mwaha wa othiana na omwalana? (6, 7)
1. Bibilia onologa wi muteli ddi musorho, obe mwazambo, wa murala. (1 Korinto 11:3) Muteli onofanyela okana muteliwi mmodha bahi. Abene eli anofanyela olebiha matelo awa ninga munfunela nlamulo.—1 Timoteo 3:2; Tito 3:1.
2. Muteli onofanyela omukwela muteliwi na ekalelo envikweleyena. Onofanyela omweddiha ninga mukalelo onaweddiha Yezu anamasunza aye. (Efeso 5:25, 28, 29) Ananvade wene txipo ne omutabutxa muteliwi. Othiya eji, onofanyela onvaha nthithimiho na nriho.—Kolosi 3:19; 1 Peduru 3:7.
3. Babi onofanyela olaba vaddiddi wi athiddele murala. Onofuneya wi avede yoja, yabalo na vogona wa muteliwi vamodha na ana. Babi vina onofuneya wi añganele epaddi yomuzimuni yavamuralani. (1 Timoteo 5:8) Iyene onosongorhela na okamyedha murala wi asunze elobo eli yotene mwa Mulugu vina dhofuna Dhaye.—Deuteronomo 6:4-9; Efeso 6:4.
4. Muteliwi onofanyela okala mukamyedhi apama a muteli. (Wita 2:18) Iyene onofanyela omukamia muteli wasunziya na walela ana. (Vimarya 1:8) Yehova onofuna wi muteliwi akamyedhe murala na mukalelo wokweleya. (Vimarya 31:10, 15, 26, 27; Tito 2:4, 5) Iyene onofanyela okana nriho na thima wa mamunaye.—Efeso 5:22, 23, 33.
5. Mulugu onfuna wi ana awiwelele ababawa. (Efeso 6:1-3) Onojedha wi ababi asunzihe vina alage anawa. Ababi anofuneya wi akane mudhidhi na ana wila amusunze Bibilia nawene, bagakamyedha na dhofuna dhawa dhomuzimuni nomaningoni. (Deuteronomo 11:18, 19; Vimarya 22:6, 15) Txipo ababi kanfanyela wi alage anawa na mukalelo wonyandduwa obe wogudulana.—Kolosi 3:21.
6. Atelani agakana makathamio ohiwanana pama muthu na mukwaye, anofanyela oveda othiddiyedha mabassa dholaga dha Mbibiliani. Bibilia ononikokomeza wi nlagiye okwela vina nilevelele. (Kolosi 3:12-14) Nzu na Mulugu kaninruma othiana ninga mweddelo wothonga makani mañgono. Muteliwi mudhidhi mwina onoubuwela omuthiya muteli, akala (1) oddu nofuna waye akodda osapela murala, (2) akala iyene ddovoreya vaddiddi, bageka mowopya moyo na egumi yaye, obe (3) akala opambiya wothabwa waye onomugwadda omulabela Yehova.—1 Korinto 7:12, 13.
7. Atelani anofanyela okala ororomeleia muthu namukwaye. Oraruwa yothega wa Mulugu na wa mukwawo vina. (Aebreo 13:4) Ogonihana otakulo wa matelo bali wene nthuku na Bibilia nomariha na omwalana onfanyelela matelo mena. (Mateus 19:6-9; Roma 7:2, 3) Yehova onowidda wi athu amwalane s’okana nthuku ya Bibilia wi atelane na muthu mwina.—Malakiya 2:14-16.
[Mafoto vanikukuni 16, 17]
Mulugu onjedhela wi ababi asunziye anawa vina alage
[Foto vanikukuni 17]
Babi wokwela onokosa dhofuna dhomaningoni na omuzimuni wa murala waye