Ofanye Dhavi Relijiau Ya Ebaribari

Ogafuna okala marho wa Mulugu, weyo onofanyela okana relijiau enrumela Mulugu. Yezu ohiloga wila “anamebedha a ebaribari” agahimwebedha Mulugu mowiwanana na “ebaribari”. (Joau 4:23, 24) Mukalelo waderetu wa omwebedha Mulugu oli mmodha bahi. (Efeso 4:4-6) Relijiau ya ebaribari enothukulela wigumini ya mukalakala, nanda relijiau ehili ya ebaribari enothukulela omatolotxiwelo.—Mateus 7:13, 14.

Weyo onela owodha ozinddiyela relijiau ya ebaribari na wawañgana abale ana relijiau eji. Vowila Yehova ddaderetu, anamebedha aye a ebaribari anofanyela vina okala athu aderetu. Dhaene ninga muraranja waderetu onobala mararanja aderetu, relijiau ya ebaribari enowabala athu aderetu.—Mateus 7:15-20.

Amarho a Yehova anomuriha Bibilia vaddiddi. Ahiziwa wila Bibilia dda Mulugu. Anothiya wila esile dhinlogiye dheddihe egumi yawa, dhigomihe makathamiho awa vina dhakamihe osunza dhilobo dha Mulugu. (2 Timoteo 3:16) Anotamela othiddihedha mabasa esile dhinlaleyani.

Amarho a Yehova anolagiha wila anokwelana muthu na mukwaye. Yezu wahilagiha wakwela athu modhela wasunziha dhilobo dha Mulugu, na wavulumutxa aredda. Abale ana relijiau ya ebaribari anolagiha vina wila anowakwela athu ena. Dhaene ninga Yezu, awene kanapwaza ayelegi obe athu a ziza nina. Yezu wahiloga wila athu agahaziwa anamasunza aye na okwela ogakanile aba na athu akwawa.—Joau 13:35.

Amarho a Mulugu anothithimiha nzina Naye, Yehova. Muthu muthuvi kokodda oromola nzina nawo, koddi oddu agahikala marho wawo wofiyedhana vaddiddi? Ne! Nigakana marho, ninoromola nzina naye vina ninomuloga iyene deretu wa athu ena. Mwa dhaene, abale anfuna okala amarho a Mulugu anofanyela oromola nzina naye vina wapanga athu ena. Yehova onfuna wila nikose eji.—Mateus 6:9; Roma 10:13, 14.

Dhaene ninga Yezu, amarho a Mulugu anowasunziha athu Omwene wa Mulugu. Omwene wa Mulugu thi nlamulelo na odhulu ninasaddule Elabo ya vati ekale paraizu. Amarho a Mulugu anowapanga athu ena muthaka obu wapama sabwa ya Omwene wa Mulugu.—Mateus 24:14.

Anamona a Yehova anotamela okala amarho a Mulugu. Anomuriha Bibilia vina anokwelana mukalelani. Anolabihedha vina anothithimiha nzina na Mulugu nanda anowasunziha athu ena Omwene wa Mulugu. Ovanene apa Anamona a Yehova anofara relijiau ya ebaribari Velaboni ya vati.