Kapitulu Modha
Webedha Wowiwanana Mu Nsaka Nehu—Eji Entapulela Eni?
1, 2. (a) Mabasa gani oohagalaliha abene ankosiwa mu nsaka nehu? (b) Njeedhelo gani notikiniha nina athu a murima wororomeleya?
VELABONI yotene ya vati vahikala mabasa oohagalaliha a webedha wowiwanana. Mabasa aba anowagumaniha matxikwi na matxikwi a athu a dhilabo dhotene, maziza otene, vina dhilogelo dhotene. Athu enjene anogumanihiwa kadda yaka. Athu aba anoziweya mBibiliani ninga “anamona” a Yehova vina antxemerhiwa ninga “muthithi munddimuwa.” Awene anomulaba Mulugu “amwimelelaga iyene mathiyu na mutana.” (Izaiya 43:10-12; Ovuhulela 7:9-15) Awene ankosela eni ejene? Sabwani awene ahifiyedha omuziwa Yehova ninga Mulugu mmodha bahi webaribari. Eji enowalibihedha awene wiwananiha egumi yawa na magano aye ooligana. Vina, awene ahisunza yawila ninkalawo mu “masaka omariha” a elabo eji yabure ya ovanene, vina yawila mohigoneela Mulugu onela otolotxa elabo eji, vina yawila onela otxinja elabo eji na elabo eswa ya paraizu.—2 Timóteo 3:1-5, 13; 2 Pedro 3:10-13.
2 Nzu na Mulugu ninolibela dhahi: “Mudhidhi muñgonovi mvuti oner’orimela . . . vano akurumuwi aner’okala anya a elabo, aner’ojavo murenddele munddimuwa.” (Masalmo 37:10, 11) “Athu apama aner’okala anya a elabo akalegemo masiku etene.” (Masalmo 37:29) “[Mulugu] oner’okuputha muntori bu muntori wa mmentoni mwawa. Kunakale vina okwa, kutho, obulela, segedho, vowi dhamwilaboni yawale dhivira.”—Ovuhulela 21:4.
3. Webedha wowiwanana wa ebaribari onwodheya dhavi?
3 Aba aniwananihiwa ovanene mu webedhani wa ebaribari anokosa epaddi ya anamakalamo ooroma a elabo eswa. Awene ahisunza efunelo ya Mulugu txini, vina anokosa efunelo eji mpaka apale vanwodha thotho dhawa. Bagalagiha ofuneya wa osunza efunelo ya Mulugu vina okosaga, Yezu walogile dhahi: “Egumiyá yamukala-kala, jiji: ouziwani nyuwo Mulugu mmodha, webaribari; omuziwa vina Yezu Kristu, omurumilenyu.” (Joau 17:3) Murumiwi Joau olebile dhahi: “Elabo na dhowunlela dhaye dhetene, dhinovira; onira enimfunana Mulugu, onokalawovi.”—1 Joau 2:17.
Ejile Entapulelani Txibarene
4. (a) Ogumanihiwa oku wa athu gwe vaddiddi mu webedhani wowiwanana mu nsaka nehu, ontapulela eni txibarene? (b) Bibilia ontapulela dhavi ogumanihiwa oku wa athu?
4 Ogumanihiwa oku wa athu gwe vaddiddi mu webedhani wowiwanana mu nsaka nehu, ontapulela eni txibarene? Eji ezinddiyelo yohipambiheya yawila nihaddamela vaddiddi omagomo wa elabo eji yabure, waddamela wa elabo eswa ya Mulugu ejene enfuna oroma omagomo wene wa elabo eji yabure. Iyo nili anamoona a mento a osoriheya wa mavuhulo a Bibilia abene aathagile ologa ogumanihiwa oku onddimuwa vaddiddi. Nimodha mwa mavuhulo aba ninloga dhahi: “Omagomelo wa masaka, [masiku aba omariha] enapadduwe dhahi: Mwango vamagiwe mparha wa Nabuya [webedha waye wa ebaribari okwene othukuwile] oner’okala wolapa opitha mwina, [vadhulu va mukalelo mukalelovi mwina wa webedha], . . . malogo etene anere othamagelavo. Muthithi oner’ofiyavo, eraga: ‘Dhawunoní, niwele mwango wa Nabuya vankala Mulugu wa Yakobi. Iyene oner’onisunziha dila dhaye; ninere wedda mmikwasuni mwaye.’”—Mikeya 4:1, 2; Masalmo 37:34.
5, 6. (a) Ekalile dhavi ebaribari yawila malogo anomwiyelela Yehova? (b) Mavuzo gani anfanyeelihu ovivuza?
5 Oku malogo antero vankooddani odhowa o numbani ya omuyani ya Yehova wila eebedhe, athu matxikwi na matxikwi a dhilabo dhotene anokosa ejene. Venevo vansunzani mwaha wa dhifunelo dhokwela vina omuthu wozivela wa Yehova Mulugu, mirima dhawa dhinolibiheya vaddiddi. Na oviyeviha awene anotamela ononelamo ejile enafunana Mulugu. Nlobelo nawa nili ninga nthile na munasalmo oddwene ologile dhahi: “Ddisunzihení ovirihamo dhinrumenyu, vowi muli Mulugu waga.”—Masalmo 143:10.
6 Weyo onoviwoona buli mwari mwa muthithi obu munddimuwa wa athu obwene ongumaniha Yehova ovanene mu webedhani wowiwanana? Wakula wawo mwa masunziho abene asunziliwe ovenyedha mu Nzu naye onolagiha yawila weyo onotamaalela txibarene wila Yehova ddi Mwinyaya? Na muthengo gani onfuniwe “wedda mmikwasuni mwaye”?
Mukalelo Onwodheya Webedha Wowiwanana
7. (a) Na muthengo gani onawodheye wiwanana wa webedha? (b) Ekaleli eni ya omaguva okala namebedha wa Yehova ovanene, vina niwodhe dhavi wakamiha athu ena okosa ejene?
7 Ofuna wa Yehova kwa wila dhothanddiwa dhotene dhina zelu dhiwanane mu webedhani wa ebaribari. Ninojeedhela vaddiddi siku ntho ninfuna athu otene ankalawo omwebedhaga bahi Mulugu mmodha webaribari! (Masalmo 103:19-22) Mbwenye eji ehinathi opadduwa, Yehova onofanyeela watolotxa otene abale ankoodda okosa efunelo yaye yoligana. Na thagaraga, iyene onothagela ologa ejile enfuniye okosa, wila athu a mpaddi wotene awodhe okaana mudhidhi wa osaddula mukalelo wawa wa okalawo. (Izaiya 55:6, 7) Dhaene, mu nsaka nehu, athu a “vilabo dhotene, a mahimo, a vilogelo, a malogo etene,” anokoseliwa nikokomezo nthi na omaguva: “Murihení Mulugu, mmuthithimihe iyene, vowi nifiya nsaka naye n’othonga. Mwebedhení Ole opaddutxile erimu, elabo, bara na fukuwa dha manje!” (Ovuhulela 14:6, 7) Weyo ohimala orumeela niwobelo nthi? Akala ohimala, weyo ohikaana gari ya wawobela vina athu ena wila amuziwe vina amwebedhe Mulugu webaribari.
8. Nigamala osunza masunzo a makamaka a Bibilia, odhowa gani vasogorho wowenjedhedha onfanyeelihu okosela guru na murima wotene?
8 Kayo ofuna wa Yehova wila ebedhiwege na athu anloga wila anomuroromela, mbwenye bagakosavi esile dhinfunani. Mulugu onfuna wila athu akaane “gari yononelamo ofuna waye” vina alagihege eziwelo eji mwigumini yawa. (Kolosi 1:9, 10) Dhaene, athu ana ntamaalelo abene asunzile masunziho a makamaka a Bibilia anofuna ovilibihedha owaralagavi wa Okristu. Ofuna wawa kwa ofiyedha omuziwa Yehova na wandana vaddiddi, otapula vina ovayiha ononelamo wawa Nzu naye, vina othiddihedha mabasa nzu nthi mowakwanela vaddiddi mwigumini yawa. Awene anotamela wooniha mikalelo dha Babi wehu wa odhulu vina woonaga dhilobo ninga munoonela iyene. Eji enowakosiha awene otamela makalelo a okamihedha mabasa a ovuna egumi abene ankosiye velaboni ya vati mu nsaka nehu. Efunelo yawo ji ejene vina?—Marko 13:10; Ahebreu 5:12–6:3.
9. Wiwanana wa txibarene onwodheya na mikalelo gani ovanene?
9 Bibilia onlagiha wila abale animulaba Yehova anofanyeela okala athu owiwanana. (Éfeso 4:1-3) Wiwanana oku onofanyeela okalawo ovanene, masiki vankalihuwo mwilaboni yogaweya vina vanwanihuvi na dhohakwana dhehu. Yezu wahilobela na murima wotene wila anamasunza aye akale mmodha, akaane wiwanana wohagalaliha. Eji egatapuleli eni? Voroma, wila awene agahandana na Yehova vina Mwana waye. Va nawili, wila awene agahiwanana muthu na mukwaye. (Joau 17:20, 21) Wila eji ekoseye, mulogo wa Okristu onolaba ninga musasanyedho obwene onlabihedha Yehova wila asunzihe nlogo naye.
Dhilobo Gani Dhinkamihedha Wiwanana?
10. (a) Txini enunuwihihu nigamulabihedhaga Bibilia wila nitanaalele dhowakula dha mavuzo annipatha? (b) Kapepesa dhilobo dhinkamihedha wiwanana wa Okristu modheela wakula mavuzo alebiwe va ddimani apa.
10 Dhilobo tanu na biili dha makamaka dhinkamihedha wiwanana wa webedha dhilebiwe mutxiddo. Venevo vanakuligiwe mavuzo owenjedhedha, katanaalela mukalelo ompakela kadda mutoma wandana wawo na Yehova vamodha na Akristu akwawo. Otanaalelaga mitoma esi vina otamelaga maleboya atonyiwe mbwenye akooddile olebiwa onela okamihedha wunuwiha wawo zelu ya Mulugu, “zelu dhotene, na ononelamo”—mikalelo dhene esi dhinfuna iyo notene ovanene. (Gano dh’olelana 5:1, 2; Filipi 1:9-11) Koona dhilobo esi modha modha.
(1) Ninorumeela ofanyeela wa Yehova wa wimetxa magano a ejile eli yaderetu vina yabure. “Omuroromele Nabuya na murima wawo wotene, kunyinddele malago. Vego pa vego vanedda weyo, omonegevo Nabuya.”—Gano dh’olelana 3:5, 6.
Ninfanyeelela eni otamela nlago na Yehova vina mweeddihedho waye nigaganaga dhilobo? (Masalmo 146:3-5; Izaiya 48:17)
(2) Nihikaana Nzu na Mulugu wila nineeddihege. “Valaleyilehu nzu na Mulugu vari venyu, nyuwo kamwakelile ninga mazu a muthu, mwakelilé muziwagawene wi nzu na Mulugu. Txibarene thinthi-wene, ninlaba mmurimani mwenyu, nyuwo athu anroromela.”—1 Tesalónika 2:13.
Wopiya gani oliwo, iyo nigakosaga ejile “enoonihu” wila ehikala? (Gano dh’olelana 14:12; Jeremiya 10:23, 24; 17:9)
Akala kaninziwa nlago gani ninvaha Bibilia mwaha wa elobo elobovi, ninfanyeela okosa eni? (Gano dh’olelana 2:3-5; 2 Timóteo 3:16, 17)
(3) Iyo notene nimpuramo ddima yakakene ya oja wa omuyani. “Miyo ddinere osunziha nlogo nawo.” (Izaiya 54:13) “Nubuwelanege wi nilibihe okwela, othidda mabasa apama. Kanitxelele matugumano ehu, ninga eniraga ena; nilibihanege thabwa-thabwa apa vanziwehu wi siku na Nabuya [na otolotxiwa] nli vakuvi.”—Ahebreu 10:24, 25.
Dhopuramo gani dhinkaana abale anlabihedha mowakwanela dhilobo esile dhinsasanyedha Yehova wila nikaane oja wa omuyani? (Izaiya 65:13, 14)
(4) Yezu Kristu, othiya muthu wa omaningoni, ddili Musogorheli wehu. “Nyuwo muhirumele withaniwa ‘Anamasunziha’, vowi namasunziha wenyu ddi mmodha bahi; nyuwo motene muli obalinyu. Vati apano muhimwithane muthu na nzina na baba, vowi babinyu ddi mmodha bahi, ole oli wirimu. Muhirumele wiriwa asogorheli, vowi musogorheli wenyu ddi mmodha bahi: Muthikitheliwi.”—Mateu 23:8-10.
Muthu muthuvi wa iyo onofanyeela orumeela yawila nili a makamaka vaddiddi opitha athu ena? (Roma 3:23, 24; 12:3)
(5) Iyo ninkuluvela nlamulelo na Omwene wa Mulugu ninga njeedhelo nimodha bahi na nlogo na athu. “Nona mulobelaga muloge dhahi: ‘Baba wehu muli odhulu, nzina nenyu nithithimihiwe; omwene wenyu odhele iyo, ofuna wenyu okosiwege vati apano ninga odhulu.’ Tamelaní voroma Omwene wa Mulugu na wira enfuna iyene.”—Mateu 6:9, 10, 33.
‘Otamela voroma omwene’ onkamihedha dhavi okoya wiwanana wehu? (Mikeya 4:3; 1 Joau 3:10-12)
(6) Muya wokoddela onowunuwiha mwa anamebedha a Yehova mikalelo dhaderetu dha wiwanana wa Okristu. “Dhinbala Muya, sisi: okwela, othaba, murenddele, ovilela, murima wapama, wofewa, wowiwananeyana, wokurumuwa, wovipimelela mwetemwene.”—Galásia 5:22, 23.
Txini enfanyeelihu okosa wila muya wa Mulugu wunuwihe mwa iyo esile dhinbala muyaya? (Merelo 5:32)
Okaana muya wa Mulugu ompakela dhavi wandana wehu na Akristu akwihu? (Joau 13:35; 1 Joau 4:8, 20, 21)
(7) Anamebedha otene a ebaribari a Mulugu anokamihedha olaleya bili yaderetu ya Omwene waye. “Muthaka wapama onere olaleyiwa mwilaboni mwetemwene, wi malogo otene ewe. Ngamalá panafiye ogoma wa elabo.”—Mateu 24:14.
Txini enfanyeela onilibihedha ofuna okosa mowakwanela mabasa aba a olaleya? (Mateu 22:37-39; Roma 10:10)
11. Nigathiddihedhaga mabasa ebaribari ya Bibilia mwigumini yehu, txini enfuna opadduwavo?
11 Omwebedha Yehova mwa wiwanana ononaddamaniha vaddiddi na iyene vina ononiwodhiha ojavo wandana woridhiha murima na Akristu akwihu. Masalmo 133:1 onloga dhahi: “Moone oziva onjavo anamudhi, anedda mumodhani!” Joridhiha vaddiddi murima obudduwa mwilaboni mpu, onyanyala nrimana notene nilimo, mararuwo otene, vina otimbwini, nanda otugumanaga na abale animukwela Yehova txibarene vina aniwelela malamulo aye!
Karabela Makalelo A Ogawana
12. Ninfanyeelela eni orabela ekalelo ya ovilamulelaga wamwinya?
12 Wila nihinonge wiwanana wehu wa elabo yotene, ninofanyeela orabela makalelo a ogawana. Emanyaya modha ja ekalelo ya okoodda olamuleliwa na Mulugu vina malamulo aye. Yehova ononikamiha orabela ekalelo eji modheela onvuhula oddule witile, Satana Ddiabo. (2 Korinto 4:4; Ovuhulela 12:9) Satana ddi oddule wamukosihile Adamu na Eva opwaza ejile yalogile Mulugu vina ogana dhilobo mothiyana na efunelo ya Mulugu. Yapadduwilevo yali ngovi wa awene vina wa iyo. (Wita 3:1-6, 17-19) Elabo eji ehidhaala ekalelo ya okoodda olamuleliwa na Mulugu vina malamulo aye. Noona, ninofanyeela ovirabeliha ekalelo eji.
13. Txini enalagihe wila txibarene ninovisasanyedhela okalawo mwilaboni eswa yoligana ya Mulugu?
13 Motagiha, koona nlibelo nohagalaliha na Yehova na otxinja elabo eji yabure na odhulu oswa vina na elabo ya vati eswa mwenemo “muneddege dhetedhene ninga munfuneliye.” (2 Pedro 3:13) Eji kinfanyeela onilibihedha oroma ovisasanyedhela okalawo mudhidhi obule onakalewo oligana? Eji entapulela ovuruwanaga nlago na Bibilia nowiweya: “Kamufilele mento elabo na dhilimo! Onfilela mento elabo, okwela wa Mulugu Baba kulí na iyene.” (1 Joau 2:15) Dhaene, iyo ninokoodda muya wa elabo eji—ekaleloya ya ovilamulelaga wamwinya, vina ovizuzumela vaddiddi, ogonihana wonyakuwa vina otimbwini. Ninokosa deretu onvuruwana Yehova vina omwiwelela na mirima dhehu, masiki na dhifunelo dhifunelovi dhabure dha maningo ohakwana. Okalawo wehu wotene onovaha onamoona wawila yubuwelo yehu vina dhifunelo dhehu dhineeddihiwa na okosa efunelo ya Mulugu.—Masalmo 40:8.
14. (a) Ekaleli eni ya makamaka opura mudhidhi ovanene wila nisunze dila dha Yehova vina ofaraga esene mwigumini yehu? (b) Malebo atonyiwe mu ddimani eji antapulela eni wa kadda muthu wa iyo?
14 Ogafiya mudhidhi othomiwe, wila Yehova atolotxe elabo eji yabure vamodha na otene abale anfuna meeddeloya, iyene kanayeluwe. Iyene kanajombihe mudhidhi obo, obe osaddula magano aye wila aathiye abale antamelavi owadelela elabo eji oku bagasunza vina bagakosa efunelo ya Mulugu na mirima mili. Obu mudhidhi wa okosa elobo! (Luka 13:23, 24; 17:32; 21:34-36) Noona, johagalaliha vaddiddi, woona wila muthithi munddimuwa onopura gari eji ya thima, bagatamela na guru nsunziho ninvaha Yehova modheela Nzu vina nikuru naye, vina anoweedda mu dila dhaye na wiwanana bagadhowa mwilaboni eswa! Venevo vansunzihu vaddiddi mwaha wa Yehova, panamukwelitxihu vaddiddi vina panafunitxihu omulaba iyene.
Osakulela
• Efunelo ya Yehova jivi mowiwanana na webedha?
• Vamalilihu osunza masunzo a makamaka a Bibilia, odhowa gani vasogorho wowenjedhedha onfanyeelihu okosela guru na murima wotene?
• Txini enfanyeela kadda muthu wa iyo okosa wila niwanane na anamebedha ena a Yehova?
[Foto vanikukuni 4]
“Vano akurumuwi aner’okala anya a elabo, aner’ojavo murenddele munddimuwa”