Dhotene Esi Dhintapulela Eni?

YEZU KRISTU walogile dhahi: “Magomelo a elabo” agahizinddiyeliwa na koddo, otuweya wa dhoja, dhizini, vina othekenyeya wa elabo.​—Mateus 24:1-8; Lukas 21:10, 11.

Ovenya yaka ya 1914 egumi enotolotxiwaga na koddo vari va dhilabo vina vari va makuru a maziza, dila dhinjidhene sabwa ya nikuru na anamakutha ovolowa mpolitikani nanda ovanenevi modheela omwadheya wa obuddugela wa otimbwini.

Masiki na odhowa vasogorho wa olima dhoja, othabwa wa otuweya dhoja onowafanya athu mazana a matxikwi ozugunuwa elabo yotene ya vati. Kadda yaka matxikwi na matxikwi a athu anokwa na sabwa ya otuweya wa dhoja.

Ezini, eji vina epaddi ya ezinddiyelo evahile Yezu. Bigafarela Koddo Yoroma ya Elabo Yotene, eredda ya nanguddumula yahaapa okwaranya athu 21.000.000. Mothiyana na milili esile dhafanyile mirudda dhiñgonovi bahi nsaka na mundduni, obu ohifiyedha dhilabo ozugunuwa elabo ya vati vina suwa dha wolapela vaddiddi. Ovanene SIDA onoseela elabo yotene, vina milili ninga okotomola, malaria, maranya, vina kolera dhihikalawovi mu dhilabo dhoreela.

Mowiwanana na dholebiwa, kadda yaka ohikala makumi a matxikwi a othekenyeya wa elabo wa guru dhothiyana thiyana. Masiki vakalilaniwo dhipano vina marhe maswa a olebelana othekenyeya wa elabo, ngovi mmiruddani mugumanile athu gwe sabwa ya othekenyeya wa elabo dhihidha okala miselu dhinlogiwa wili wili.

Vina Bibilia wahithaga ologa wila: “Kaziwa eji, yawila mmasikuni oomariha onela okala midhidhi dhorutxa dhoyima weeddanawa. Sabwani athu anela okala anamavikwela anya, anamakwela kobiri, oopanela, oovikonya, aliba kambo, oohawiwelela ababi awa, oohitamaalela, oohiroromeleya, oowuma mirima, oohilaganeyana wene, anamaruwana, oohiziwa oviwañganela, owopiya, oohiziwa okwela elobo yaderetu, anamaguliha akwawa, aliba ntidi, oojeya na ovithukula, anamakweletxa dhoziva opitha omukwela Mulugu, ookaana ekalelo ninga ya ofuna omulaba Mulugu mbwenye bagalagiha wila kantanaala ewodhelo yaye; noona kaarabele athu abene.”​—2 Timoteo 3:1-5.

Weyo kunrumeela yawila ninkalawo “mmasakani oorutxa ooyima weeddanawa”?

Weyo ohimala woona wila athu, muthengo munddimuwene, anamakwela anya, anamakwela kobiri, nanda aneeddihiwa na ovithukula?

Bani agakooddile yawila elabo ehidhaala athu anvaddana dhifunelo dhawa mbwenye kana ntamaalelo, oohilaganeyana, oohiroromeleya?

Weyo onowoonaga wila ohawiwelela ababi vamodha na wuma murima wa wumiha milomo onowinjivaga vaddiddi, kayo mburo dhiñgonovi mbwenye ozugunuwa elabo yotene?

Mohaganyedha weyo ohizinddiyela yawila ninkalawo mwilaboni epuranyiwe na okwela dhoziva mbwenye yotuwa oziwa okwela elobo yaderetu. Ji ejene enloga Bibilia mwaha wa mukalelo ogakalilewo “mmasikuni oomariha.”

Enofuneya onamoona wina wila nizinddiyele nsaka ninkalihuwo? Yezu vina wahithaga ologa yawila vari va nsaka nthi nakakene, bili yaderetu ya Omwene wa Mulugu egahilaleyiwa mwilaboni yotene ya vati enkaliwa. (Mateus 24:14) Eji enokosiwa?

A Sentinela, revista nodheela mBibiliani nthene ninsasanyedhiwa olaleya bili yaderetu ya Omwene wa Yehova, ninopidiwa wili wili mu dhilogelo dhinjidhene opitha revista revistavi niina.

Kadda yaka, Anamona a Yehova anoperheka okwaranya biliau modha ya mawora mwa wavaha onamoona athu ena mwaha wa Omwene wa Mulugu.

Manivuru animutapulela Bibilia anokosiwa ovanene na awene othamagela dhilogelo 400, masiki na dhilogelo dhinlogiwa na makuru mañgono a nlogo na wolapela. Anamona a Yehova ahimala ofiyedha dhilabo dhotene na bili yaderetu; awene vina ahilaleya mu suwa dhinjidhene vina mirudda dhiyevile vaddiddi dhihili elobo mmooneloni mwa elabo eji ya politika. Mu dhilabo dhinjidha, awene anoweeddiha ddima ya nlelo na Bibilia wili wili.

Mohaganyedha, bili yaderetu ya Omwene wa Mulugu enolaleyiwa mwilaboni yotene ya vati enkaliwa, kayo wila elabo esadduliwe, mbwenye wila ovahiwe onamoona. Athu mpaddi wotene anovahiwa mudhidhi wa olagiha akala anomutanaala oddule othanddile odhulu na elabo ya vati nanda akala anela oriha malamulo aye vina omukwela mwaddamani wawa.​—Lukas 10:25-27; Ovuhulela 4:11.

Ovanene apa, Omwene wa Mulugu onela okuputha va elabo ya vati obure wotene vina osaddule ekale paraizu wa elabo yotene.​—Lukas 23:43.

[Kasha vanikukuni 6]

Masiku Oomariha A Eni?

Kayo masiku oomariha a nlogo na athu. Sabwani abale ankosa efunelo ya Mulugu, Bibilia onowavaha njeedhelo na okalawo na mukalakala.​—Joau 3:16, 36; 1 Joau 2:17.

Kayo masiku oomariha a elabo ya vati. Nzu na Mulugu ninororomeliha wila elabo ya vati enkaliwa enela okalawovi na mukalakala.​—Salmo 37:29; 104:5; Izaia 45:18.

Othiya eji, aba ba masiku oomariha a elabo eji ya otimbwini, yotuwa okwela vina masiku oomariha a abale anwadelela dhimanya dha elabo eji.​—Vimarya 2:21, 22.

[Kasha/Foto vanikukuni 7]

Bibilia Thi Nzu Na Mulugu Txibarene?

Wili wili, anamavuhula a Bibilia ahileba: “Eji jilogile Yehova.” (Izaia 43:14; Jeremia 2:2) Masiki Yezu Kristu, Mwana Mulugu, wahithukulela vadhulu yawila iyene ‘kaloga dhilobo dhadheela wa iyene.’ (Joau 14:10) Bibilia onologa mowooneya: “Malebo otene avudheeleliwe na Mulugu.”​—2 Timoteo 3:16.

Kuli nivuru niina nimpidiwa mu dhilogelo dhinjidhene​—okwaranya 2.200, ninga mulogeliwani na United Bible Societies. Kuli nivuru niina ninga nthene nimpakiwa vaddiddivene​—ovanene opitha biliau nai dha manivuru. Kayo ejene egajeedheli weyo mwaha wa muselu odheeli wa Mulugu obwene oli wa nlogo notene na athu?

Akala onofuna oziwa mowakwanela dhowooneya dhawila Bibilia ovudheeleliwe na Mulugu, koona nivuru A Bíblia​—Palavra de Deus ou de Homem?, nikosiwe na Anamona a Yehova.

Weyo ogamwengesa Bibilia na ntamaalelo na sabwa yawila txibarene nthi Nzu na Mulugu, weyo onela opuramo vaddiddivene.

[Kasha/Mafoto vamakukuni 8]

Omwene Wa Mulugu Txini?

Nthi nlamulelo na odhulu ninlamuliwa na Mulugu wa ebaribari, Yehova, Muthanddi wa odhulu na elabo ya vati.​—Jeremia 10:10, 12.

Bibilia onomutonya Yezu Kristu ninga oddule ovahiwe na Mulugu ewodhelo eji ya olamula. (Ovuhulela 11:15) Bali velaboni ya vati, Yezu wahilagiha wila iyene wahimala okaana olamula wa wumiha milomo wavahiwiye na Mulugu​—olamula wanwodhihile othonga pevo vina nyaza, ovulumutxa makalelo otene a maredda, masiki vina wavenyiha akwile. (Mateus 9:2-8; Markos 4:37-41; Joau 11:11-44) Mavuhulo oovudheeleliwa a Bibilia aahithaga ologa wila Mulugu agahinvaha vina “olamula vina ethomo vina omwene, yawila malogo, makuru a dhilabo vina dhilogelo dhigahimulaba vina iyene.” (Danieli 7:13, 14) Nlamulelo nthile nintxemerhiwa Omwene wa odhulu; ovanene Yezu Kristu onlamula ovenyedha odhulu.

[Mafoto vanikukuni 7]

Olaleyiwa wa bili yaderetu elabo yotene