Kanfiyedhe Mulugu Na Nlobelo

1, 2. Ninfanyeelela eni woona nlobelo ninga gari enddimuwa, nanda ninfanyeelela eni oziwa ejile ensunziha Bibilia mwaha wa ejene?

ELABO ya vati egaladdanihiwa na erimu yotapuwa, eji eng’ono vaddiddi. Txibarene, wa Yehova, ‘Namakosa wa odhulu na elabo ya vati,’ dhilabo dhili ninga nttotto na manje mu mpikani. (Masalmo 115:15; Izaiya 40:15) Masiki dhahene, Bibilia onloga dhahi: ‘Yehova onowawaddamela etene animwittana, animunnlela na murima webaribari. Onowira dhinunlela abale animuriha, onovuruwana kutto dhawa, onowavuna.’ (Masalmo 145:18, 19) Kobuwela txini entapulela ejene! Muttanddi wa guru dhotene oli vakukuvi na iyo vina onela oniwa akala iyo ‘ninomutxemerha iyene na ebaribari.’ Nihikaana gari enddimuwa vaddiddi ya olobela!

² Nigafuna wila Yehova avuruwane malobelo ehu, txibarene ninofanyeela olobela wa iyene na mukalelo onrumeeliye. Ninakose dhavi eji s’ohinonelamo ejile ensunziha Bibilia mwaha wa nlobelo? Jaderetu iyo oziwa ejile enloga Malebo mwaha wa ejene, sabwani nlobelo ninonikamiha onfiyedha Yehova.

NINFANYEELELA ENI OLOBELA WA YEHOVA?

3. Jivi sabwa modha ya makamaka enfanyeelelihu olobela wa Yehova?

³ Sabwa modha ya makamaka enfanyeelelihu olobela wa Yehova jawila iyene ononiwobelela okosa ejene. Nzu naye ninonilibiha dhahi: ‘Kamuzuzumele elobo wene, mbwenye mwa dhotene, na nlobelo vina osembezerha, vamodha na ntamaalelo, kamuziwiheni Mulugu dhokumbirha dhenyu; nanda murenddele wa Mulugu, obwene ompitta mubuwelo wotene, onela okoya mirima dhenyu vina mirugu dhenyu modheela Kristu Yezu.’ (Filipi 4:6, 7) Txibarene, kaninafune opwaza mvaho obu okoseliwihu na Mulamuleli Munddimuwa wa elabo yotene!

4. Olobelaga wili wili wa Yehova onlibiha dhavi omarho wehu na iyene?

⁴ Sabwa yina ya olobela jawila olobelaga wa Yehova wili wili bu mukalelo wa olibiha omarho wehu na iyene. Amarho atxibarene kampangana bahi agafunaga elobo. Mbwenye, amarho aderetu anotanaalana, vina omarho wawa onoliba agapanganaga esile dhinubuwelani, esile dhinazuzumiha, vina esile dhiniwani. Na mikalelo dhiina, eji enoladdana na omarho wehu na Yehova Mulugu. Na nikamihedho na nivuru ntti, weyo ohisunza vaddiddi mwaha wa esile dhinsunziha Bibilia mwaha wa Yehova, omuttu waye, vina dhifunelo dhaye. Weyo ohifiyedha omuziwa iyene ninga Muttu wa txibarene. Nlobelo ninowuvaha mudhidhi wa ottwanyutxa wa Babi wawo wa odhulu dhubuwelo dhawo vina dhiwelo dha vati va murima wawo. Ogakosaga eji, pananfiyedhitxiwe Yehova.​—Tiago 4:8.

MAGANO GANI ANFANYEELIHU OSORIHA?

5. Txini enlagiha wila Yehova kanvuruwana malobelo otene?

⁵ Yehova onovuruwana malobelo otene? Koona ejile yapangiliye Aizraeli abale aasadduwile mmasikuni a namavuhula Izaiya: “Mugaddoddobelelaga malobelo enyu gwè, miyo kaddinvuruwana. Mada enyu amala otakala na nikame.” (Izaiya 1:15) Noona, merelo meena poddi omukosiha Mulugu okoodda ovuruwana malobelo ehu. Wila malobelo avuruwaniwe deretu na Mulugu, ninofanyeela osoriha magano a makamaka.

6. Wila Mulugu avuruwane malobelo ehu, nigano na makamaka ttivi, nanda niwodhe dhavi osoriha?

⁶ Nigano na makamaka ttawila iyo nilagihe nroromelo. (Kengesa Marko 11:24.) Murumiwi Paulo wahileba dhahi: ‘S’ohikaana nroromelo kinwodheya omuhagalaliha Mulugu deretu, sabwani oddule oninfiyedha Mulugu onofanyeela orumeela wila iyene ohikalawo nanda yawila iyene onokala namaliva wa abale animutamela iyene.’ (Ahebreu 11:6) Okaana nroromelo na txibarene kayo okalela oziwavi wila Mulugu ohikalawo vina yawila iyene onovuruwana nanda onowakula malobelo. Nroromelo ninlagihiwa na mabasa ehu. Ninofanyeela olagiha deretu yawila nihikaana nroromelo modheela mukalelo onkalihuwo siku na siku.​—Tiago 2:26.

7. (a) Ninfanyeelela eni okaana nriho nigalogaga na Yehova na nlobelo? (b) Nigalobelaga wa Mulugu, niwodhe dhavi okala ooviyeviha vina ologa na murima wotene?

⁷ Yehova vina onofuna wila abale aninfiyedha na nlobelo akosege ejene na oviyeviha vina murima wotene. Kanina sabwa ya oviyeviha nigalogaga na Yehova? Attu agakaana gari ya ologa na mwene obe prezidenti, awene ankosa na nriho, bagaziwa mpaddo wottukuwa wa mulamuleliya. Nigalobelaga, iyo vina ninofanyeela omuriha Yehova vaddiddi! (Masalmo 138:6) Txibarene, iyene ddi ‘Mulugu Wa Guru Dhotene.’ (Wita 17:1) Nigalobelaga wa Mulugu, mukalelo oninfiyedhihuna onofanyeela olagiha yawila na nriho, ninoziwa yimelelo yehu vamentoni vaye. Oviyeviha oku onela vina onikosiha olobela ovenyedha mmirimani mwehu na murima wotene, banigarabela okosaga wili-wili malobelo akakene.​—Mateu 6:7, 8.

8. Niwodhe dhavi okosa dhilobo mowiwanana na ejile enlobelelihu?

⁸ Okosa dhilobo dhiniwanana na malobelo ehu, tti nigano niina wila iyo nivuruwaniwe na Mulugu. Yehova onjeedhela wila nikose dhotene esile dhinwodhihu wila nikosege mowiwanana na esile dhinlobelelihu. Motagiha, akala ninolobela dhahi: ‘Kanivaheni yoja yehu ya siku nttino,’ ninofanyeela olaba na guru ganyo ganyovi ejuwene eliwo enwodhihu olaba. (Mateu 6:11; 2 Tesalónika 3:10) Akala ninlobelela nikamihedho na onyanyala dhowobana dha omaningoni, ninofanyeela okala pasope wila nirabele mikalelo vina merelo abene aganittukuleli mmanyengettoni. (Kolosi 3:5) Mowenjedhedha magano aba a makamaka, ohikala mavuzo mwaha wa nlobelo abene anfanyeelihu wakuliwa.

MAVUZO ANKOSIWA MWAHA WA NLOBELO

9. Ninfanyeelela omulobelela ani, nanda modheela ani?

⁹ Nimulobelele ani? Yezu wahasunziha anamafara aye wila alobelege wa ‘Baba wehu muli odhulu.’ (Mateu 6:9) Dhahene, malobelo ehu anofanyeela okoseliwa bahi Yehova Mulugu. Mwa dhahene, Yehova onfuna wila iyo niziwe mpaddo wa Mwana waye wa nammodha, Yezu Kristu. Ninga musunzelihu mu Kapitulu 5, Yezu wahirumiwa velaboni ya vati ninga yobolo wila anivune mwa yottega vina okwa. (Joau 3:16; Roma 5:12) Iyene ddi Namakutta Munddimuwa ottomiwe vina Mwene. (Joau 5:22; Ahebreu 6:20) Dhahene, Malebo anonipanga wila nikosege malobelo ehu modheela Yezu. Iyene mwinyene wahiloga dhahi: ‘Miyo ddili dila, ddili ebaribari, na egumi. Kawo onfiya wa Baba ahivirile mwa miyo.’ (Joau 14:6) Wila malobelo ehu avuruwaniwe, ninofanyeela olobelela bahi wa Yehova modheela Mwana waye.

10. Sabwa yani kanimmageleliwa wimela, okokora obe ogilati nigalobelaga?

¹⁰ Nigalobelaga ninomageleliwa wimela, okokora obe ogilati? Nne. Yehova kanlogosa mukalelo mukalelovi wa wimela, wa okokora, wa ogilati, masiki vina wa mada obe wa maningoya a muttu. Bibilia onsunziha wila kayo yabure olobela na mikalelo dhottiyana ttiyana. Eji enotaganyiheya na ogilati, oworoma, okokora vina wimela. (1 Otadiwa wa Mapadduwo 17:16; Nehemiya 8:6; Daniyel 6:10; Marko 11:25) Elitxi ya makamaka txibarene, kayo mukaleloya wimelile weyo, okokorile weyo, obe ogilatile weyo, mbwenye eli ya makamaka bu mukalelo waderetu wa murima. Txibarene, nigakosaga mabasa ehu a siku na siku obe nigapadduweliwa elobo yorurumutxa, txino iyo poddi okosa nlobelo na mwari mwari bari venevo valihu. Yehova onovuruwana malobelo aba masiki akala kanooneya na attu eena abuwene anirijile.​—Nehemiya 2:1-6.

11. Mazuzumiho gani meena anfanyeelihu olobelela?

¹¹ Nilobelele dhilobo gani? Bibilia onotapulela wila: ‘Peno elobo gani enimukumbirhihu mowiwanana na efunelo yaye, iyene [Yehova] ononivuruwana.’ (1 Joau 5:14) Noona ninofanyeela olobelela elobo elobovi eniwanana na efunelo ya Mulugu. Ji efunelo yaye wila iyo nilobelelege esile dhinnizuzumiha? Indde, ji efunelo yaye. Olobela wa Yehova poddi okala ninga ologa na marho wofiyedhana vaddiddi. Ninofanyeela ologa na murima wotapuwa, ‘banigamukuttulela Mulugu murima wehu.’ (Masalmo 62:8) Jaderetu iyo okumbirha muya wokoddela, sabwani muya obu onela onikamiha okosa ejile eli yaderetu. (Luka 11:13) Iyo vina poddi okumbirha mweeddihedho mwa ogana dhilobo na zelu vina guru dha wakwanihana makattamiho. (Tiago 1:5) Nigattega, ninofanyeela okumbirha nlevelelo modheela mukutto wa Kristu. (Éfeso 1:3, 7) Txibarene, kayo dhilobovi dhehu bahi dhinfanyeelihu wika mmalobeloni ehu. Ninofanyeela vina walobelela attu eena. Attu a murala wehu vina anamebedha akwihu.​—Merelo 12:5; Kolosi 4:12.

12. Mmalobeloni ehu, niwodhe dhavi ovaha mburo woroma dhilobo dha Babi wehu wa odhulu?

¹² Mmalobeloni ehu dhilobo dhiniwanana na Yehova Mulugu dhinofanyeela ovahiwa mburo woroma. Txibarene iyo nihikaana sabwa ya omutamaalela na murima wotene mwaha wa oderetu waye wotene. (1 Otadiwa wa Mapadduwo 29:10-13) Yezu wahivaha nlobelo na nlagiho, nilebiwe va Mateu 6:9-13, nttene ninisunzihiliye olobelaga yawila nzina na Mulugu nikoddelihiwe. (Kengesa.) Yawila Omwene wa Mulugu odhe vina efunelo yaye ekosiwege velaboni ya vati ninga munkoseliwani odhulu enoromoliwa vasogorhova. Mumaleliye ologa dhilobo esi dha makamaka dhiniwanana na Yehova pa venevo valogile Yezu dhilobo dha muttu yeka. Na mukalelo wakakene nigamwika Mulugu va mburoni wa makamaka vaddiddi mmalobeloni ehu, ninolagiha wila ninotanaala ohagalala wehu vina waye.

13. Malebo antonyihedha eni mwaha wa olapa wa malobelo anrumeeliwa?

¹³ Malobelo ehu anfanyeela ogoneela mudhidhi mungasi? Bibilia kanvaha muttengo ofanyeela ogoneela malobelo a muttu yekavo obe a vamentoni va anamwinji. Malobelo poddi ottiyana. Motagiha, nlobelo ningoneela tti nttile na muttu yekavo nttene ninimukuttuleliye Yehova murimaye. Nlobelo nihingoneela tti nttile ninkosiwa mudhidhi wa oja. (1 Samuwel 1:12, 15) Mwa dhahene, Yezu wahakona attu avittittimiha abene aakosa malobelo oogoneela, oovittukula vamentoni va attu eena. (Luka 20:46, 47) Yehova kansiba malobelo ninga aba. Eli ya makamaka jawila iyo nilobele ovenyedha mmirimani mwehu. Dhahene, olapa wa malobelo anrumeeliwa onottiyana mowiwanana na esile dhinfuneya vina mikalelodha.

14. Bibilia onaddana eni aganilibihaga wila ‘mulobelegevi,’ vina eji empangarhaza dhavi?

¹⁴ Ninfanyeela olobela dila ngasi? Bibilia ononilibiha wila ‘mulobelegevi,’ ‘kadidelani mu nlobeloni,’ vina ‘kalobelagani s’ohilemana.’ (Mateu 26:41; Roma 12:12; 1 Tesalónika 5:17) Txibarene, mazu aba kantapulela wila ninofanyeela olobelaga wa Yehova mudhidhi wotene wa kadda siku. Mbwenye, Bibilia ononilibiha olobelaga wili wili, omutamaalelaga Yehova sabwa ya oderetu onnikoseliye vina nitamelege mweeddihedho waye, nipangarhazo naye, vina guru dhaye. Kimpangarhaza oziwa yawila Yehova kambarela nlobelo peno nilape na mukalelo gani obe dila ngasi dhinimulobelelihu? Txibarene akala iyo ninotamaalela gari ya nlobelo, ninela ofanya midhidhi dhinji dha olobela wa Babi wehu wa odhulu.

15. Ninfanyeelela eni ologa ‘Amen’ omagomelo wa nlobelo na muttu yeka vina malobelo a vamentoni va anamwinji?

¹⁵ Omagomo wa nlobelo ninfanyeelela eni ologa ‘Amen’? Nzu ntti ‘amen’ nintapulela ‘pu mwenemo’ obe ‘ekale dhahene.’ Dhotagiha dha Malebo dhinlagiha wila jofanyeela ologa ‘Amen’ omagomelo wa nlobelo na muttu yeka vina malobelo a vamentoni va anamwinji. (1 Otadiwa wa Mapadduwo 16:36; Masalmo 41:13) Modheela ologa ‘Amen’ omagomelo wa malobelo ehu, ninologa wila esile dhilogilihu dhikosiwe na murima wotene. Omagomelo wa nlobelo vamentoni va anamwinji nigaloga ‘Amen,’ masiki mwari mwari obe na lizu nowiweya, ninotonyihedha wila ninorumeela dhubuwelo esile dhilogiwe.​—1 Korinto 14:16.

MUKALELO ONAKULA MULUGU MALOBELO EHU

16. Nikuluvelo gani ninfanyeelihu okaana mowiwanana na nlobelo?

¹⁶ Txibarene Yehova onowakula malobelo? Indde, iyene onowakula! Iyo nihikaana mwaha wa okaana nikuluvelo nawila ‘Namewa nlobelo’ onowakula malobelo ankosiwa na murima wotene, abene ankosiwa na attu matxikwi na matxikwi. (Masalmo 65:2) Yehova poddi wakula malobelo ehu na makalelo ottiyana ttiyana.

17. Sabwa yani poddi ologiwa wila Mulugu aakule malobelo ehu iyene onowalabihedha angelo aye vina adhari aye a velaboni ya vati?

¹⁷ Wila Yehova aakule malobelo, iyene onowalabihedha angelo aye vina adhari aye a velaboni ya vati. (Ahebreu 1:13, 14) Onokalaga dhotagiha dhinjidhene dha attu abene aalobeli wa Mulugu bagakumbirha nikamihedho na omunonelamo Bibilia nanda vasogorhova s’ohigoneela bafiyedhiwa na mmodha mwa adhari a Yehova. Dhotagiha ninga esene dhinovaha onamoona wa mweeddihedho wa angelo mmabasani a olaleya Omwene. (Ovuhulela 14:6) Wila aakule malobelo ehu abene ankosiwa mmidhidhini dha osegedheya txibarene, Yehova poddi omukosiha Mukristu mukwihu odha onivaha nikamihedho.​—Gano 12:25; Tiago 2:16.

18. Yehova onlabihedha dhavi muya waye wokoddela vina Nzu naye wila aakule malobelo a adhari aye?

¹⁸ Vina wila Yehova Mulugu aakule malobelo a adhari aye, onolabihedha muya waye wokoddela vina Nzu naye, Bibilia. Iyene poddi wakula malobelo ehu a okumbirha nikamihedho wila nakwanihena dhoweha modheela onivaha mweeddihedho na guru bagalabihedha muya waye wokoddela. (2 Korinto 4:7) Wili wili dhowakula dha malobelo ehu a okumbirha mweeddihedho dhindela mBibiliani, mwenemwa munnivaha Yehova nikamihedho na ogana dhilobo na zelu. Iyo poddi ofanya malebo annikamiha nigakosaga nsunzo na Bibilia na muttu yeka vina nigengesaga manivuru a Okristu, ninga nivuru ntti. Mitoma dha malebo dhinfunihu opepesa poddi ottwanyutxiwa modheela esile dhinlogiwa va mutugumanoni wa Okristu obe modheela dhologa dha anddimuwa a mmulogoni abene ana nzuzumelo.​—Galásia 6:1.

19. Ninfanyeela wubuwelaga eni akala dila dhiina malobelo ehu ankala ninga kanakuliwa?

¹⁹ Akala Yehova onkala ninga onogoneela wakula malobelo ehu, eji txipo kayo sabwa yawila iyene kanwodha wakula malobeya. Ottiya eji, ninofanyeela wubuwela yawila Yehova onakula malobelo mowiwanana na efunelo yaye vina mudhidhi onfuniye. Iyene onoziwa esile dhinfunihu vina mukalelo wa osasanyedhawa deretu opitta mpule munkosela iyo. Wili wili iyene ononittiya ‘odidela okumbirha, odidela otamela, vina odidela okopela.’ (Luka 11:5-10) Odidela oku onomulagiha Mulugu yawila efunelo yehu ja guru vaddiddi vina yawila nroromelo nehu tta txibarene. Mowenjedhedha, Yehova poddi wakula malobelo ehu na mukalelo onkooddihu woona. Motagiha, iyene poddi wakula nlobelo nehu mowiwanana na yoweha yowehavi, kayo modheela ogomiha nikattamihona, mbwenye modheela onivaha guru wila nakwanihe.​—Kengesa Filipi 4:13.

20. Ninfanyeelela eni opura mowakwanela gari yotene yong’animela ya olobela?

²⁰ Ninofanyeela otamaalela yawila Muttanddi wa erimu yotapuwa oli vakukuvi na attu otene anlobela wa iyene mofanyeelela! (Kengesa Masalmo 145:18.) Ninofanyeela opura mowakwanela gari yotene yong’animela ya olobela. Nigakosa ejene, ninela okaana njeedhelo na ohagalaliha na onfiyedha Yehova, Namewa nlobelo.