NSUNZO 5

Efunelo ya Mulugu na Elabo Yavati Jivi?

1. Mulugu opaddutxeli eni elabo yavati?

Adamu na Eva mmunddani mwa Edeni musogorhomwa ahidha ottamagihiwa mmunddanimwa

Yehova ohavaha elabo yavati alobwana na ayana. Bu murala wehu. Noona atelani oroma, Adamu na Eva kaapaddutxeliwe wadhaaliha attu odhulu sabwani Mulugu wahimala wapaddutxa angelo wila akalege odhulu. (Job 38:4, 7) Mbwenye Mulugu wahimuttukula mulobwana woroma bamwika mparaizu mokoddela mwatxemerhiwa mundda wa Edeni. (Wita 2:15-17) Yehova wahinvaha iyene vamodha na odhuli waye ogadhilewo, njeedhelo na ojavo egumi yohigoma velaboni yavati.—Kengesa Masalmo 37:29; 115:16.

Omaromo-wene, mundda wa Edeni bahi bwali paraizu. Yafuneya jawila atelani oroma adhaalihe elabo yavati na odhuli wawa. Musogorhomwa yafuneya wila alamulelege elabo yotene vina asaddule ekale paraizu. (Wita 1:28) Elabo yavati txipo kinatolotxiwe. Enelegevi okala murala wa mukalakala wa nlogo na attu.—Kengesa Masalmo 104:5.

2. Sabwa yani ovanene elabo yavati kayo paraizu?

Adamu na Eva ahinvanya Mulugu, noona Yehova baaburutxamo mmunddani mpule. Paraizu ohiyeleeliwa nanda kuli muttu owodhile omukalihawo wili. Bibilia onloga dhahi: ‘Elabo enoperhekeliwa mmadani mwa attu abure.’ —Job 9:24.—Kengesa Wita 3:23, 24.

Attu bagamaga numba wila avenyihedhe paraizu velaboni ya vati

Yehova ohinyanyala efunelo yaye yoroma na nlogo na attu? Nne! Iyene ddowodha-wodha. Iyene kanvonya. (Izaiya 45:18) Onele ovenyihedha nlogo na attu nikale ninga mwapaddutxeliye. —Kengesa Masalmo 37:11, 34.

3. Paraizu onfuna ovenyihedhiwa dhavi?

Paraizu onavenyihedhiwe velaboni yavati nsaka ninfuna olamulela Yezu ninga Mwene wa Mulugu. Vakoddoni entxemerhiwa Harmageddo, Yezu onele waweeddiha angelo a Mulugu wila aatolotxe otene abale animpambiha Mulugu. Vasogorhova Yezu onele onfugela Satana mpaka vyaka 1.000. Attu a Mulugu anela oviluwa vamatolotxiwelo apo sabwani Yezu onele wasogorhela vina wabarela. Anele ojavo egumi ya mukalakala Mparaizu velaboni yavati.—Kengesa Ovuhulela 20:1-3; 21:3, 4.

4. Goi engoma mudhidhi gani?

Mulugu ongomiha obure velaboni yavati mudhidhi gani? Yezu ohivaha “ezinddiyelo” wila atonyihedhe mudhidhi ogaddameli ogoma wa goi. Makalelo a elabo ya ovanene anowika mowopiya okalawo wa attu nanda anlagiha yawila ninkalawo epaddi ya “ogoma wa elabo.”—Kengesa Mateu 24:3, 7-14, 21, 22.

Mwari mwa olamulela wa Yezu wa vyaka txikwi ovenyedha odhulu bagalamulela elabo yavati, onele ogomiha goi yotene. (Izaiya 9:6, 7; 11:9) Masiki bagalaba ninga Mwene, Yezu onele olaba ninga Namakutta Munddimuwa wila agomihe dhottega dha abale animukwela Mulugu. Dhaene, modheela Yezu, Mulugu onele ogomiha maredda, wuluvala na okwa.—Kengesa Izaiya 25:8; 33:24.

5. Onfuna okala Mparaizu mpo Bani?

Attu bagasunza mu Numbani ya Omwene — Va Numbani ya Omwene onele waziwa attu animukwela Mulugu vina anfuna osunza mukalelo wa omuhagalaliha

Anfuna okalamo ba attu animukwela Mulugu. (1 Joau 2:17) Yezu waharuma anamafaraye wila aatamele akurumuwi vina aasunzihe orumeeliwa na Mulugu. Nsaka na ovanene, Yehova onowasasanyedha attu matxikwi na matxikwi wila akalewo Mparaizu mpo velaboni yavati. (Sofoniya 2:3) Mmanumbani dha Omwene dha Anamoona a Yehova, attu anosunza okala amamuni vina ababi aderetu vina okala ateliwi na amambali aderetu. Aima, amambali na ababiya animwebedha Mulugu vamodha, bagasunza mukalelo wa opuramo miselu esi dhapama.—Kengesa Mikeya 4:1-4.

Ogafuna oziwavi, koona kapitulu 3 ya nivuru Txini Ennisunziha Bibilia?