Jeremiya Kamaalile Ologa Miselu Dha Yehova

Mudhidhi mwina attu anoniteya obe anosilidhiwa na iyo nigalogaga na awene modheela wa miselu dha Yehova. Ejo podi onimaaliha ologa dha Mulugu. Ejoya yahiromaga oupadduwela?— Bibilia ononaddela modheela muzombwe wamukwela Yehova mbwenye wafuna omaala ologa dha iyene. Nzina naye nali Jeremiya. Ndoweni nisunze dhilobo dhinjene modheela iyene.

Jeremiya valiye muzombwe, Yehova wahimwaddela wi iyene wanfanyeela wawaddela attu wi attiye okosa dhilobo dhabure. Ejo yali yorutxa vaddiddi wa Jeremiya, vina iyene wahittiddiwa wova. Iyene wahiloga na Yehova: ‘Miyo kaddina yologa. Miyo ddili mwanamulobwana mug’ono’. Mbwenye Yehova wahimpanga: ‘Kuwove. Miyo ddinele oukamihedha.’

Venevo Jeremiya wahiroma wawaddela attu wi agahisosottiwa kohikosa masadduwo. Weyo onubuwela wi attu abale ahisadduwa?— Nne. Awene annimuteya obe ahisilidhiwa na iyene. Enaguya afuna ampe! Weyo onubuwela wi Jeremiya woonamo dhavi?— Iyene wahova vina wahiloga: ‘Miyo kaddinalogevina miselu dha Yehova.’ Mbwenye iyene wahimaala?— Nne, iyene kattiyile. Iyene wannimukwela Yehova vaddiddi vina kawodha omaala ologa miselu dhaye. Mwaha wa Jeremiya okoodda omaala, Yehova wahinvuna iyene.

Motagiha, mudhidhi dhahi alobwana a otabala ahinvokela Jeremiya muttoloni novaya mwadhaalile marove. Iyene kaana yoja nne manje. Alobwana abale afuna amuttiye Jeremiya mwenemwale wi akwelemo. Mbwenye na nikamihedho na Yehova, iyene ahivuneya!

Weyo onsunzavo eni mwa yotagiha ya Jeremiya?— Mudhidhi mwina iyene wahova, mbwenye kaamaalile ologa miselu dha Yehova. Weyo ogalogaga miselu dha Yehova, attu eena txino anouteya obe anosilidhiwa na weyo. Weyo txino onokaana manyazo obe wova. Mbwenye txipo kumaale ologa miselu dha Yehova. Iyene onele oukamihedha, ninga mwakoseliye na Jeremiya.