Omwene Onalamulele Elabo Yotene

Weyo onowodha wubuwela omwene gani onloga iyo?— Indde, bu Omwene wa Mulugu, Omwene onakose elabo ya vati ekale paraizu dila ya nawili. Weyo ogahiziveliwa osunza venjivene modheela Omwene obu?—

Omwene wotene ohikaana mweneya. Kadda mwene onalamulela attu a elabo yaye. Weyo onomuziwa Mwene wa Omwene wa Mulugu?— Ddi Yezu Kristu. Iyene onkala wirimu. Momaguva iyene onele okala mwene wa attu otene a velaboni ya vati! Weyo onubuwela wi iyo ninele okaana wagalala Yezu agakala mwene wa elabo ya vati?—

Iyo ninele wagalala venjivene! Mparaizu, attu kanawane vina kanadhowege mukoddoni. Attu otene anelege okwelana muttu na mukwaye. Kavo onakale muredda obe onakwe. Aliba ohoona anelege woona, aliba ohiwa anelege wiwa, vina abale ahinwodha weedda anelege ottamaga vina olupa. Attu otene anele okaana oja wowinjiva. Vina dhinama dhinelege wandana awenevi vamodha na iyo. Attu abale akwile anele wiyelela okalawo. Attu owinjiva alobwana na ayana aasunzile weyo mbrochurani ntti ninga Rebeka, Raabe, Elias, vina David anele wiyelela okalawo! Weyo ogahiziveliwa ogumana na awene ageyelela okalawo?—

Yehova onowukwela onfuna wi weyo wagalale. Weyo ogadhowavi bugasunza bugamwiwelela iyene, onele okaana ewodhelo ya okalawo na mukalakala mparaizu! Jijuwene enfuniwe?—