Ninrihelani Onddimuwa?

1, 2. (a) Onddimuwa gani onfwanyela iyo oriha? (b) Mavuzo gani anfuna iyo wakula mwari mwa kapitulu eji?

VALI weyo mwana, mohaganyedha amambali awo ahukumbirha okosa elobo yakodda weyo oziveliwana. Weyo wannakwela amambali awo vina wanziwa wi jofuneya wawiwelela. Masiki oziwaga, murima wawo wankodda wawiwelela.

² Iyo ninoziwa wi Baba wehu Yehova ononikwela. Iyene ononikoya vina onozuzumela efunelo yehu yokalawo namukalakala. Ononivaha malago aweddana annikamihedha. Dila dhina onowalabihedha attu ena wi anivahe malago oneddihana. Enofuneya wi nirihege onddimuwa wa Yehova. (Gano 24:21) Enrutxela eni wiwelela malago a Mulugu? Yehova onnikumbirela eni wiwelela malamulo aye? Ninonihe dhavi wi ninoriha onddimuwa waye?—Koona epaddi Ononelemo Deretu 9.

WIWELELA EKALELE ENI ELOBO YORUTXA?

3, 4. Elobo gani yatotile attu otene ottega? Elobo gani ennirutxiha omwiwelela Yehova vina attu ena?

³ Ninga attu ohiligana, nibaliwana efunelo ya ovuruvuru. Eji eromile mudhidhi ottegile Adamu na Eva. Voroma-vene Yehova wapaddutxile ninga attu oligana, mmalelani awene anya bakodda omwiwelela Mulugu. Ofiyedha awene oragaliha nlogo notene na attu. Ovano attu otene ambaliwa ottegene. Eji ji sabwa ennirutxiha omwiwelela Yehova. Elobo yina jawi attu analabihedha Yehova wi aneddihe, attu ohakwana.—Wita 2:15-17; 3:1-7; Masalmo 51:7; Roma 5:12.

⁴ Sabwa yokala attu ottega, dila dhina ninovittukulela. Ovittukulela onomukosiha muttu orutxiwa orumela malago a muttu mwina. Motagiha, Yehova wahimusakula Mizé wi akale musogoreli wa nlogo na Izrayel. Mbwenye vahibudduwa muttu wakuweliwa Koré waromilena monelo wokoodda omuriha Mizé, Koré wali mulabeli wororomeleya wa Yehova mwari mwa vyaka dhinjene. Mizé wahikaana mwaha wa ovittukulela sabwani wali musogoreli wa nlogo notene na Mulugu. Mbwenye Bibilia onloga wi wali muttu woviyeviha wa nsaka nttile. Koré wahikoodda wiwelela malago a Mizé. Iyene wahifiyedha wapupurutxa attu enjene a nlogo, baroma vina omusadduwela Mizé. Elobo gani yampadduweli Koré na asadduweli ena? Koré na attu etene ali mpaddi waye ahipiwa. (Olebeliwa 12:3; 16:1-3, 31-35) Bibilia onologa dhotagiha dhinjene dhinoniha wi ovittukulela ngovi yawopiha.—2 Mapadduwo 26:16-21; koona epaddi Ononelemo Deretu 10.

5. Yotagiha gani ya alobwana alabihedhe ettomo yawa mohifwanyelela?

⁵ Weyo txino onowona wi attu ena agavahiwa ettomo, anolabihedha mohifwanyelela. Mwilaboni mpuno attu enjene ankosa dhawene. (Kengesa Kohelét 8:9.) Koona Yotagiha ya mwene Sawul, voroma-vene mudhidhi wasakuliwe iyene wi akale mwene wa Izrayel wali muttu woviyeviha. Mbwenye mmaleliye wahidha okala muliba ovittukulela, mukumbela vaye, atamelaga ompa mwene David mulobwana wahana muladdu. (1 Samuwel 9:20, 21; 10:20-22; 18:7-11) Mmalelani David wahikala mwene waderetu vaddiddi wa nlogo na Izrayel. Iyene vina wahidha olabihedha ettomo yaye mohifwanyelela. David wahikosa mararuwo na Bat-sabé mwadhi Uriya. Moneliye wi dhikosiliye kadhikalile wahitamela ovita muladdu waye, wahiruma wi Uriya apiwe okoddoni.—2 Samuwel 11:1-17.

NINRIHELANI ONDDIMUWA WA YEHOVA?

6, 7. (a) Omukwela Yehova onnittukulela okosa elobo gani? (b) Ninsunzavo elobo gani na yotagiha ya Yezu?

⁶ Iyo ninomukwela Yehova opitta muttu mwina. Sabwa ya ejene, ninotamela omwagalaliha vina oriha onddimuwa waye. (Kengesa Gano 27:11; Marko 12:29, 30.) Oromana nsaka na Adamu na Eva, Satana kanziveliwa wi attu ewelelege olamulela wa Yehova. Iyene onfuna wila attu obuwelege wi Yehova kanfwanyela ottonga nlogo n’attu. Mbwenye iyo ninoziwa wi oku ottambi. Iyo ninorumeela mazu aba: “Nyuwo Nabuya Mulugu wehu muli mwinya, munofwanyela othithimihiwa, orihiwa, vowi mupaddutxa dhetedhene. Dhotene dhinkalawo n’ofuna wenyu.”—Ovuhulela 4:11.

⁷ Vali weyo mwana, ohisunza wi wanfwanyela wawiwelela amambali awo masiki ohifunaga. Na mukalelo woligana, kahiye elobo yovevuwa omwiwelela Yehova, mbwenye iyo, ninga alabeli aye, ninomuriha vina ninomwiwelela. Yezu ohinittiyedha yotagiha. Iyene ohimwiwelela Yehova mmasakani morutxa. Noona iyene wahiloga na Babe wi “Vano kireye enfunemi, yireye enddifunenyuna.”—Luka 22:42; koona epaddi Ononelemo Deretu 11.

8. Yehova onneddiha na mukalelo gani? (Koona kasha “Karumela Olagiwa.”)

⁸ Masaka abano, Yehova ononeddiha na mikalelo dhottiyana. Iyene onimulabihedha Bibilia na anddimuwa a mmulogoni. Nigariha attu aba analabihedha iyene wi aneddihe, kuloga ninoriha onddimuwa waye. Nigakodda wawiwelela attu aba, entapulela wi ninomukoodda Yehova. Mwakoddeli ana Izrayel omwiwelela musogoreli wawa Mizé, Yehova wawona ninga awene akodda omwiwelela iyene mwinyene, aba ali makani manddimuwa.—Olebeliwa 14:26, 27; koona epaddi Ononelemo Deretu 12.

9. Okwela onnikamihedha dhavi wiwelela malago? Kavaha yotagiha.

⁹ Akala iyo ninoriha onddimuwa eji enlagiha wi ninowakwela abali na arogora. Karoma wubuwela; egapadduwa ngovi, nikuru na nikamihedho ninorumiwa wi nidhowe n’akamihedhe abale apattiwe ngoviya momaguva. Wi niwodhe wavuna attu enjene momagava, onosakuliwa muttu wi akale musogoreli wa mataddelo a malago. Makuru otene anofwanyela wiwelela malagoya. Elobo gani enpadduwa akala muttu mmodha onokoodda wiwelela nanda okosaga dhinfuneye? Masiki akala ohikaana monelo waderetu, agahifware malago, vanokala makattamiho, txino attu ena mwari mwa nikuru nimodhanene anonyonyeya. Na mukalelo woligana, nigakoodda wiwelela malago a Yehova na attu analabihedha iyene, attu ena anotabuwa. Mbwenye akala ninomwiwelela Yehova, ninele olagiha wi ninowariha abali vina ninoriha meddihodho aye.—1 Korinto 12:14, 25, 26.

10, 11. Elobo gani enasunze iyo ovanene?

¹⁰ Dhilobo dhetene dhinnikumbira Yehova, onkosela oderetu wehu. Elobo yamakamaka oriha onddimuwa wa vamuralani, mmulogoni vina alamuleli. Nigera dhawene nlogo notene ninopurelamo.—Olibiha 5:16; Roma 13:4; Éfeso 6:2, 3; Ahebreu 13:17.

¹¹ Ononelamo sabwa ennifunelana Yehova wariha attu ena enele onikamihedha wiwelelawa. Ovano ndoweni noone mukalelo wa oriha onddimuwa wa vamuralani, mmulogoni vina alamuleli.

NRIHO NA VAMURALANI

12. Mamuni onooniha dhavi wi onoriha onddimuwa wa Yehova?

¹² Yehova muttanddi wa murala ohivaha malamulo wi muttu-muttu akosege epaddi yaye. Akala attu otene a vamuralani anoziwa vina anokosa ejile ettomeliwani, murala wotene onele opurelamo. (1 Korinto 14:33) Motagiha, Yehova ohimuttomela mulobwana okala musogoreli wa vamuralani. Iyene onfuna wi amweddihege deretu mwadhiye vina alagege aima na okwela. Yehova onowoona akala mamuni onokosa epaddi yaye obe akala kankosa. Mamuni onimulabela Yehova muttu ontonyihedha okwela, oderetu, onoweddiha murala waye na ekalelo yeddiha Yezu Mulogo. Mamuni onkosa dhawene onowoniha wi onomuriha Yehova.—Éfeso 5:23; koona epaddi Ononelemo Deretu 13.

13. Muteliwi ontonyihedha dhavi nriho vamuralani?

¹³ Muteliwi vina ohikaana nibasa namakamaka vamuralani. Iyene onomukamihedha mamune wi akale musogoreli waderetu. O’heli mamuni na mwadhiye ahikaana mabasa a walela aima. Mukalelo mmodha wa muteliwi wariha aima bwa omwiwelela mamune. (Gano 1:8) Iyene onomuriha mamune vina onovilibihedha wi dhinubuwela mamune dh’edde deretu. Akala kanrumela dhinubuwela mamune, onotapulelamo sabwaya enkooddeliye avahaga moonelo waye na nriho. Akala mamune kahiye munamoona wa Yehova, iyene onogumanana makattamiho. Mbwenye masiki dhawene onomwiwelela mamune na nriho, txino musogorho mamuneya onodha omulabela Yehova.—Kengesa 1 Pedro 3:1.

14. Aima anatonyihedhe dhavi nriho amambali awa?

¹⁴ Aima ahikaana ttima vamentoni va Yehova, awene anofuna nibarelo vina malago. Aima anotonyihedha nriho na onddimuwa agawiwelelaga amambali awa, okosa ejene enowawagalaliha amambali awa vina enomwagalaliha Yehova. (Gano 10:1) Mirala dhinjene aima anleliwa na mambali mmodha, babi obe mayi. Mambali agalelaga aima yeka vanokala makattamiho. Mbwenye akala aimaya anowiwelela ejo enokamihedha. Ebaribari wi kuli murala ona attu oligana. Murala wotene onohagalala akala anamudhi otene anowiwelela magano a Yehova. Ejo enomuttittimiha Yehova muttanddi wa mirala dhotene.—Éfeso 3:14, 15.

NRIHO MMULOGONI

15. Ninarihe dhavi onddimuwa mmulogoni?

¹⁵ Yehova ononivaha malago aye alabihedhega Akristu a mmulogoni, iyene ohimuttomela Yezu Kristu ewodhelo enddimuwa. (Kolosi 1:18) Yezu ohinvaha ‘mwimeleli wororomeleya wamalago’ ettomo ya weddiha nlogo na Mulugu nili vati apano. (Mateu 24:45-47) Masaka abano, Nikuru Nolamulela ninlaba ninga ‘mwimeleli wororomeleya wa malago’. Nikuru tti Nolamulela ninovaha esile dhinnijombela wi nilibihena nroromelo nehu. Nikuru Nolamulela nakene ninowavaha malago anddimuwa a mmulogoni, emeleli orumeliwa a vamulogoni na anameddelela milogo wi eddihege dhilobo dha mmulogoni. Abali aba ahivahiwa muttorho wa onag’anela, otene anowakulela vamentoni va Yehova mabasa attomeliwani. Nigarihaga abene entonyihedha wi ninoriha onddimuwa wa mulogo vina wa Yehova.—Kengesa 1 Tesalónika 5:12; Ahebreu 13:17; koona epaddi Ononelemo Deretu 14.

16. Ninlogela eni wi anddimuwa a mulogo na emeleli orumeliwa a mmulogoni anttomiwa na muya wokoddela?

¹⁶ Anddimuwa a mulogo na emeleli orumeliwa a mmulogoni anokamihedha oliba vina wiwanana wa mulogo. Nihiziwa wi awene attu anligana na iyo, kito ansakuliwa dhavi? Abali aba anofwanyiwana mikalelo esi dhinlogiwa mBibiliani. (1 Timóteo 3:1-7, 12; Tito 1:5-9). Yehova olabihedhi muya wokoddela beeka mikalelo esi mBibiliani. Anddimuwa a mulogo agafunaga omuttoma mbali wi akale munddimuwa wa mulogo obe mwimeleli worumeliwa wa vamulogoni, awene anolobela akumbirhaga nikamihedho na muya wokoddela. Dhetene esi dhinoniha wi Yehova na mwanaye Yezu anoweddiha mulogo. (Merelo 20:28) Alobwana aba attomiwe wi anikamihedhege, nvaho wa Yehova.—Éfeso 4:8.

17. Txini enfwanyela okosa murogora wi atonyihedhe nriho?

¹⁷ Enopadduwa dila dhina mmulogoni kuhikalamo anddimuwa a mulogo nee emeleli orumeliwa wi asogorelege mabasa a mmulogoni. Egapadduwa dhawene mbali obatiziwe ddinkamihedha mulogoya. Agahikalemo mbali wobatiziwa, murogora onurumeliwa osogorela mabasa anttomeliwa alobwana obatiziwa. Akala murogora onosogorela mmulogoni onofwanyela okunela musorho modhela omaga lenso obe wabala txapewa. (1 Korinto 11:3-10) Okosa ejuwene entonyihedha wi iyene onoriha onddimuwa wa Yehova na mabasa attomeliwe alobwana vamuralani obe mmulogoni.—Koona epaddi Ononelemo Deretu 15.

NRIHO NA ALAMULELI VINA ATTU ENA

18, 19. (a) Ninsunzavo elobo gani na nivuru na Roma 13:1-7? (b) Ninatonyihedhe dhavi nriho anamattonga a elabo na attu ena?

¹⁸ Alamuleli ahikaana onddimuwa onrumeeliwa na Yehova, noona iyo ninofwanyela wariha. Awene anosasanyedha dhilobo dha mwilaboni obe mmuruddani dhinkamihedha oderetu wehu ninga dhiskola na masipitale. Akristu anowiwelela malago a mBibiliani anfwanyeya nivuru na Roma 13:1-7. (Kengesa.) Iyo ninowariha abale “athomeliwe othonga elabo” vina ninowiwelela malamulo awa mmuruddani munkalihu. Malamulo aba txino anopatta mpaddi wa anamudhi, mabasa obe dhokaana dhehu. Motagiha, iyo ninoperheka musoko vina ninowavaha miselu dhinkumbirhani. Kito akala dhokumbirha dhawa kadhiniwanana na magano a Bibilia, ninakose dhavi? Egapadduwa dhawene ninkosa eji elebile murumiwi Pedro wi; “Enfuneya kumurumela Mulugu opitha athu.”—Merelo 5:28, 29.

¹⁹ Nigalogaga na attu ana ettomo ninga anamattonga, enofuneya otonyihedha nriho. Oskola, azombwe anofwnyela wariha anamasunziha awa na anamalaba ena. Omabasani, nimurihege muzugu wehu, masiki akala attu ena kankosa ejuwene. Nigera dhawene, ninomutagiha murumiwi Paulo. Iyene wanariha abale avahiwe onddimuwa masiki dila dhina vakalani elobo yorutxa. (Merelo 26:2, 25) Masiki akala attu ena anonipuja, enofuneya otonyihedha nriho.—Kengesa Roma 12:17, 18; 1 Pedro 3:15.

20, 21. Elobo gani empadduwa akala ninowariha attu ena?

²⁰ Mwilaboni mwetene attu anariha akwawa ali ang’onovi. Mbwenye nikuru na Yehova nihittiyana. Iyo ninowariha attu etene, nakwanihedhaga malago a murumiwe Pedro olebile wi: “Mwarihege athu etene.” (1 Pedro 2:17) Akala ninovilibedha otonyihedha nriho, merelo ehu apama anoziwiwa na attu. Yezu ohiloga wi: “Dhahene wariya omoneye vari va athu, wi onaga merelo enyu apama, amuthithimihe Mulugu Babinyu oli wirimu.”—Mateu 5:16.

²¹ Nigatonyihedha nriho vamuralani, mmulogoni vina attu etene, yeddelo yehu enele wakamihedha attu ena ofuna omuziwa Yehova, vina okosa ejuwene entonyihedha omuriha Yehova. Eji enomwagalaliga Yehova.