Nunuwihaga Ewodhelo Yehu Mmabasani a Omwene—Nisasanyedhaga Mazu Ehu Oroma

Ekalele Eni Yamakamaka: Akala mazu ehu oromana kanddinginya murima, mwanamurala onele omaguvela okoodda nihinatti onvaha onamoona. Noona, anamalaleya enjene aneka ttima mazu awa oroma nigalaleyaga. Masiki dhotagiha dhiina dha olaleya dhinofanyeya mu Mabasa Ehu A Omwene vina munivuruni Raciocínios, aweneya kanlagiha olaleya wowakwana, wi anivahe omaguva. Masiki akala yotagihaya ya olaleyana jowakwana, namalaleya podi osakula osadduwa obe osasanyedha yayene. Mwadhahene, iyo ninele okaana ewodhelo akala ninosasanyedha na ofwaseya mazu ehu oromana ottiya ologa elobo txilobo eli mmusorhoni mwehu venevo vanfugula musuwo mwanamurala.​—Gano 15:28.

Ninakose Dhavi:

• Osakule makaniya awo. Makaniya anofanyeela okala owiwanana na nivuru ninvahiwe vina dhinele okala dhoddiginya mirima dha attu a muruddaya.

• Osasanyedha na ofwaseya ddima yoroma obe yanawili ejuwene enaloge weyo ogamala olejela. Weyo podi oroma ologaga: “Miyo ddili veneva sabwa yawi . . . ,” “Attu enjene ali ozuzuma na . . . ,” “Miyo ddigahiziveliwa oziwa yubuwelo yawo odheela . . . ,” obe elobo yina. Dhologa dhohirutxa, dhohilapa dhinodha dhopurelamo dhaderetu. Anamalaleya ena onosakula okweya mmusorhoni mazu oromana.

• Kobuwela nivuzo nigamuttukulele mwanamurala orumeela makaniya. (Mt. 17:25) Kobuwela wi mohaganyedha iyeneya wobuwela dhilobo dhiina weyo ohinafiya, noona mavuzoya kafanyeela okala orutxa, obe egamukosihile wubuwela dhilobo dhorutxa.

Kakosa Ejuwene Mwari mwa Mweri:

• Kasakula mudhidhi wa webedha wa murala wi okose masasanyedho a oroma makani.

• Buli mmabasani a olaleya mugawelane na namalaleya onlaba na weyo esile dhinfuna nyuwo ologa. (Gano 27:17) Akala dhologa dhawo dhofugulana kadhina dhopurelamo dhaderetu kaveda dhina.