Mukalelo wa Wakamiha Abale Ahinwodha Wengesa
1. Wasunziha Bibilia attu ahinwodha wengesa ondana makattamiho gani?
1 Anamurala ahinwodha wengesa txino anofuna dhilobo dha omuyani, mbwenye aweneya podi omova Bibilia vamodha na manivuru meena. Onvaha muttu ninga oddu nivuru Ensunziha Bibilia, makamaka omaromo, poddi otowa yopurelamo. Niwodhe dhavi wakamiha attu aba mpaddi wa omuyani? Nihavuze anamalaleya a dhilabo dhottiyana okwaranya 20 wi ononelamo mukalelo onkosani ejiya. Dhologa dhawa sisi.
2. Dhitagano gani dhinlabihedheyaga deretu omukamihedhana muttu ohinwodhetxa wengesa?
2 Akala namasunza ohigomeliwa obe kana ttotto ya wengesa, weyo poddi oromana brochura, Kanvuruwane Mulugu, obe kanvuruwane Mulugu wi Okalewo na Mukalakala. Pionero dhahi wa Estados Unidos onoburutxa mabrochura omeeli bamulagiha muttuya agamala bamvuza onfuna nivi. Filiali ya Okeniya enloga wi dhitagano esi dhinolabihedheya deretu vaddiddivene mu Afrika, sabwani attuya a wenewo ansunzihiwetxa txirhapi ottiya makani a mavuzo na dhowakula. Oku muttu osunzile txino onorumeela mohirutxa wengesa na mavuzo, marhe aba anowodha omutotela manyazo muttu ohinwodha wengesa. Akala namasunzaya ohikaana ttotto ya wengesa, anamalaleya enji anziveliwetxa oromana brochura Miselu dha Pama Dha Mulugu obe Jowodheya Weyo Okala Marho Wa Mulugu! obe vina Nivuru Naga na Mapadduwo a Bibilia.
3. Ttotto gani dhinanikamihe wasunziha kakamwe abale ahinwodha wengesa?
3 Kamutamaalelege: Abale ahisunzile wengesa txino anokaana manyazo, vina enji kanivittittimiha. Wakamiha attu abo okala deretu mudhidhi wotene ji ttarho yoroma ya wasunzihana ebaribari. attu enjene ahinwodha wengesa ba zelu vina anowodha osunza. Kaarihege, vina kaattittimihege. (1 Ped 3:15) Anele olibiheya wi asunzegevi agonaga wi guru dhawa sapama vina agadhowaga vasogorho omuyani. Noona kaafewelege mada.
4. Ninakose dhavi wi nalibihe abale ahinwodhetxa wengesa wi avisasanyedhele nsunzo?
4 Masiki akala namasunzaya kanziwetxa wengesa, kamulibiyege wi asasanyedhelege nsunzona. Anamalaleya eena a elabo ya Afrika do Sul anowalibiha anamasunza awa omukumbirha munammudhi obe marho odduwene onziwa wengesa deretu wi amukamihege. Namalaleya dhahi wa elabo ya Inglaterra onowalibiha anamasunza aye ovisasanyedhela modheela wavaha nivuru naye omagomo ddima dhig’onovi dha nsunzona yawila oone wi kinrutxa ofanya dhowakuladha vina mazuya agakweretiwa. Mbali mwina wa elabo ya India onowalibiha anamasunza aye wag’anaga foto dha sumana endawo vina otanaalelaga na ottaga.
5. Niwodhe dhavi ovilela nigeeddihaga nsunzo?
5 Kavilelaga: Peno nivuru gani ninlabihedhiwe, kanyaalelaga mitoma dhamakamaka, nanda kamukamihe namasunza wawo wi anonolegemo deretu. Omaromowa, jaderetu okaana makani a mitala 10 mpaka 15. Omusunzihe ddima dhig’onovi dha kadda epaddi. Kavilelaga akala namasunzaya onotigiriga. Txibarene iyene onele olibiheya wenjedha ttotto yaye ya wengesa venevo vanimutamaleliye Yehova. Wi omukamihe namasunza wawo okosa ejuwene jaderetu omuwobela omatugumanoni oromana omaromo.
6. Ninakamihedhe dhavi attu wi asunze wengesa?
6 Akala namasunza wa Bibilia onowodha wengesa, onele wunuwa omuyani. (Masal 1:1-3) Enjene awakamihedha anamasunza awa alabihedhaga nivuru Kavilibihedhe Wengesa na Oleba mwa ottiyawo mitala mig’onovi omamalelo wa nsunzo. Akala namasunza ononyimuwa, txino weyo podi omulibiha mwaha omwaddela dhilobo dhisunzile iyene ninga okosa. Omukuluvelihe wi Yehova onele oruriha guru dhaye, vina omulibihe wi alobele akumbiraga nikamihedho (Gano 16:3; 1 Joau 5:14, 15). Anamalaleya eena a elabo ya Inglaterra anowalibiha anamasunza awa okaana dhofuna dha omuyani dha musogorho—txino omaromo amuziwe alfabetu, agamala ofanye vina wengese malebo osakuliwa, nanda omamalelowa wengese manivuru a Bibilia ahinrutxa wengesawa. Wakamihedha attu wengesa mudhidhi mwina enofanyeela walibiha ofuna okosa ejuwene, ottiya wasunzihavi bahi.
7. Sabwaya jani kaninfanyeela onyanyala wasunziha ebaribari abale ahinwodhetxa wengesa?
7 Yehova kanapwaza abale ahisunziletxe. (Job 34:19) Yehova onoona murima wa muttuya. (1 Mapadduwo 28:9) Mwadhahene kunyanyale wasunziha ebaribari abale ahinwodhetxa wengesa. Weyo ohikaana dhipano dhinji dhinaukamihedhe oromana osunziha. Ogamala, weyo poddi otxinja nsunzona na nivuruni Ensunziha Bibilia vina omusunzihe mazu owakwana a Mmaleboni.
[Mutoma wa nikuku 4]
Abale ahisunzile wengesa txino anokaana manyazo, vina enji kanivittittimiha. Wakamiha attu aba okala deretu mudhidhi wotene ji ttarho yoroma ya wasunzihana ebaribari.
[Kasha vanikukuni 4]
Mwanamurala ohinwodha wengesa, katagiha eji:
• Orome olabihedhaga Kanvuruwane Mulugu, obe kanvuruwane Mulugu wi Okalewo na Mukalakala, obe nivuru nina
• Kaarihege, vina kaattittimihege, vina kaafewelege mada
• Makaniya akale omaguva, vina omusunzihe ddima dhig’onovi dha kadda epaddi.
• Omukamihedhe wunuwiha ttotto yaye ya wengesa
Mudhidhi ontonyihedha iyene efunelo ya osunza podi otxinja na nivuru Ensunziha Bibilia.