Kasunza Dhotagiha dha Anamalaleya Owarala
Iyo txibarene ninovaha ttima dhotagiha dha anamalaleya a mmilogoni. Eena anolabaga mabasa a Yehova na nroromelo mwari mwa vyaka dhinjene. Eena ali aswa anowakelaga nikamihedho naderetu mmabasani a omwene. Anamalaleya aba anowoonaga mukalelo oneeddiha Yezu milogo dha Okristu masaka abano omariha modheela wunuwiha mabasa a olaleya vina wakosa anamafara. (Mt. 28:19, 20) Modheela olaba vamodha mmabasani aba a olaleya, awene anowakela ‘guru dhopitta’ mudhidhi ongumanana awene makattamiho. (2 Kor. 4:7) Dhihikalawo dhologa dhinjene dhinfanyeela iyo osunza modheela anamalaleya aba. Agawobiwa wi akamihedhe, awene anowagalala modheela wasunziha eena esile dhisunzilani. (Masal. 71:18) Mwadhahene iyo ninowakela gari ya osunza na awene. Ninakose dhavi ejoya?
Mmabasani a olaleya. Wi akale owarala mmabasani a olaleya, anamalaleya anofanyeela osunza dhotagiha dhing’onovi obe dhiswa. Dhikalawo dhilobo dhinjene dhinfanyeela anamalaleya aswa okalela txenjewa awang’anaga anamalaleya owarala mmabasani a olaleya. (Koona mutoma oli mu A Sentinelani 15 wa Fevereiro 2015, onloga: “Mantenha o Seu Zelo Pela Pregação”. Ddima yanoraru enlogiwa mutxiddo mwa mwanamusorho “Ajude os Menos Experientes.”) Weyo ompurelagamo dhavi ogalabaga na muttu owarala mmalaleyoni?
Weyo poddi omuwoba namalaleya wowarala wi mulabe vamodha mmalaleyoni? Akala namalaleyaya muredda onofanyeela omuttukula namasunza wawo wi mudhowe mwasunze vatakulu vaye. Nsunzona nigamala, kanvuze namalaleya wowarala wi awulage vanfanyeeliwe wogoleliwa.
Otamelege Mudhidhi Wokala na Awene: Kasunza dhotagiha dha anamalaleya owarala modhela oveda mudhidhi wokala vamodha na awene. Kamuwobe wi one nsunzo nawo na webedha wa ntakulu vina omukose mavuzo anawulibihe. Akala namalaleyaya wowarala muredda, ogahiwodha okosa masasanyedho wi wakose nsunzona vanivaye? Vina katamela oziwa mukalelo owodhile iyene ofanya ebaribari. Mareliho gani anjavo iyene? Onoonaga dhavi wunuwa wa mabasa a olaleya vamuruddani vaye? Wagalala gani ofanyiliye sabwa ya omulaba Yehova?
Ziwá wi iyene kanwodha okamihedha mpaddi wotene, noona okale wopimeleleya. Moligana na iyo notene, anamalaleya ankosa guru wi akaane eziwelo yinji, anowakela mivaho dhottiyana-ttiyana mmabasani a Mulugu. (Rom. 12:6-8) Eena ahikaana makattamiho a wuluvala, ejuwene enakosiha awene ohiwodhetxa olaleya mudhidhi mwinjene ninga enwodha iyo. Mwadhahene iyo poddi osunza modheela dhotagiha dha eena owarala animulaba Yehova na nroromelo.