Pionero

Iyo ninolabihedha pama guru dhehu nigakana dhogana dhomuyani. (1Kor 9:26) Dhogana dhinonikamihedha olabihedha pama mudhidhi wehu, omagomo wa elabo ejino ohinafiya. (Ef 5:15, 16) Vawebedhani venyu vantakulu, munkoddelani osekeserha sabwa yokana yogana yaka ejo ya mabasa? Wi okamihedhe, munivuruni ntti munofwanyeya artigo munfwanyeya dhogana dhinji dhinawodhe weyo otanalela na nlobelo.—Tia 1:5.

Motagiha, onkoddelani wiwanana na amudhawo, wona akala muttu mmodha onele olaba ninga pionero wa mudhidhi wotene? Akala kuna ebaribari ya wi onele owodha wakwanihedha oradha, kaloga na apionero ena ana makattamiho oladdana na awo. (Gano 15:22) Txino omuwobe pionero wi akale va webedhani venyu vantakulu onvuze mukalelo onwodhiye wakanihedha mabasa aye. Ogamala olebele dhowakula dhaye. Akala weyo wahilabaga ninga pionero mundduni, katanalela makattamiho aniwe ovanene wone akala onele olaba wili ninga pionero.

Enowodheya attu angasi avamuralani vawo olaba ninga apionero okamihedha mwari mwa mweri mmodha obe dhinjidhene? Enowodheya olaba ninga pionero wokamihedha masiki akala kuna ewodhelo modhela olaba mudhidhi mung’onovi valaboni mmabasani olaleya. Akala kuna mudhidhi wodhowa omabasani wolaleya vari va sumana sabwa ya mabasa obe wa munaskola, kasakula myeri dhina maferiado obe olabege omamalelo wa sumana. Ninga murala kasakulani dhogana dhinfuninyu okana yogana yaka ejo ya mabasa. Va kalendariyuni okweretevo mweri enfuna weyo oroma olaba ninga pionero wokamihedha.—Gano 21:5.

KOONA VIDIYU LIBIHANI MURIMA NYUWO . . . APIONERO, OGAMALA WAKULE NIVUZO NTTI:

• Yehova omukamihedhile dhavi murogora Aamand? Nanda ejo enisunziha enni?