Mavuzo Ankosa Anamengesa

Gano 24:16 onloga: “Muthu woligana murima masiki agwe, onovenyavi.” Koddi versikulu eji enimutonya muttu onttega dila dhinjidhene bagaleveleliwa na Mulugu?

Kahiye mwenemo, versu eji kintapulela ejuwene. Nzu ntti ogwa nintapulela ogumana na makattamiho dila dhinjene, oku nzu ntti ovenya nintapulelaga ovira mmakattamihonimwa.

Ndoweni nitanaalele mukalelo onroma versikulu eji Gano 24:15-17 onloga dhahi: ‘Kumugane muthu wororomeleya, kunonge murala waye. Muthu woligana murima masiki agwe onovenyavi, ohina magano goyi dhinomuja. Mwiddani wawo agafwanyiwa segedho kuthabe, ntowa nigamugwela kuteye.’—Gano 24:15-17.

Attu ena anubuwela wi mazu anfwanyeya versu 16 animutonya muttu onttega nanda musogorhomwa bafiyedha ovulumuwa. Asogorheli eli a marelijiau a Gra-Bretanya alogile dhahi “anamalaleya a wale vina a masaka abano ahilabana vaddiddi nlebo ntti.” Anddimuwa aba a marelijiau ahiloga wi “muttu wapama onogwela . . . muttegani mottabwamwa, mbwenye iyene txipo kanrimeliwa merelo a omukwelana waye Mulugu, mudhidhi wetene oniriye yotakala onotxinuwa.” Mobuwelo obu onodha wazivela abale ankosa dhottega ahifunaga otxinuwa, txino awene anowubuwela wi masiki akose dhottega dhinjidhene. Vowi Mulugu onolevelela, onela waweddela ttagaragha.

Mbwenye kahiye ejuwene enfuna ologa versu 16.

Mazu aba anfwanyeya versu 16, na 17 “ogwa” na “ogweliwa” na elogelo ya Ebrahiko, antapulela ogwa na mukalelo wottiyana. Motagiha, muri ohigwela mudila, muthu omottile odhulu obe mwana-gorhomonddo nigwele vati. (Olib. 22:4, 8; Am. 9:9) Mazu aba akakene na elogelo y’ebrayiko anolabihedhiwa na mukalelo w’oladdaniha ninga munlogela nlebo na Masalmo 37:23, 24, “Nabuya ddinlibiha tharho dha muthu, ddininvelela muneddiye. Agadederuwa, kangwa; vowi Nabuya onomuttiddela nlada.”—Gano 11:5; 13:17; 17:20.

Katanalela elogile Edward H. Plumptre Namasunziha wa Universidade de Teologia. Iyene bela mazu aba ogwa na elogelo ya Ebrahiko, “kantapulela ogwela muttegani.” Namasunza mwina ohigwadda mazu a versu esi alogaga dhahi: “Ja vayovi otabutxa nlogo na Mulugu, sabwani awene anela oviluwa, oku attu abure kanavuneye.”

Nona mazu aba a Gano 24:16, kantapulela “ogwa” na ekalelo ya okosa yottega, mazu aba antapulela ogweliwa makattamiho, obe owanana dhilobo dhorutxa dila dhowinjiva. Mwilaboni mpuno mudhalile dhilobo dhotakala vaddiddi, muttu woligana onowanana makattamiho menjene; ninga oredda na matabuwo mena. Ofwarafwariwa na asogorheli a elabo obe owanana makattamiho-makathamihovi. Mbwenye masiki dhawene Mukristu onokaana ebaribari wi Yehova onele omukamihedha opemberha makattamiho-makathamihovi angumaniyena. Kavivuze, ‘Ddahiromaga omoona mulabeli wa Yehova akosaga dhosakula dhihinimweddela deretu?’ Ejoya empadduwelani? “Nabuya onowavenyiha etene angwa onowalibiha onddeyile guru.”—Masal. 41:1-3; 145:14-19.

‘Muthu woligana murima kanttaba agawonaga attu ena atabuwaga, ottiya ejo iyene onopangarhazeya sabwa ya oziwa wi onimukurumuwela Mulugu, vowi dhotene dhiniriye s’omyala.’—Koh. 8:11-13; Job 31:3-6; Masal. 27:5, 6