Amambali—Mwakamihedhe Aninyu Omukwela Yehova

1-2. Magano a Bibilia ankalelani amakamaka mwigumini mwehu dhilobo dhigatxinja?

LABO NAWA na otelana, muteli na muteliwi anofwaseyela ovuruwana diskursu enkosa munddimuwa wa mmulogoni alabihedhaga Bibilia. Malebo anlogiwa va diskursuniva awene ahiziwa. Mbwenye ovano, malebo aba anokala amakamaka mwa awene. Sabwaya? Sabwani awene anofwanyela ovirihamo ninga atelani.

² Jakene empadduwa na atelani ali Akristu ankala ababi. Mwa vyaka dhinjene ahiwa madiskursu owinjiva aloga mwaha wa walela aima. Mbwenye magano aba ewalani mmadiskursuni etene ovano bamakamaka mwigumini mwawa. Awene ahikana mwana onfwanyelani omulela. Muttorho wowagalaliya vaddiddi! Mwebaribari, dhilobo mwigumini mwehu dhigatxinja magano a Bibilia anokala amakamaka mwigumini mwehu. Nona ninofwanyela omwebedha Yehova nengesaga Malebo masiku otene dhahene ninga yarumiwe amwene a Mwizrayel okosa, “malabo otene” a okalawo wawa.—Olib. 17:19.

3. Txini enasekeserihu mwari mwa nsunzo ntti?

³ Amambali, nyuwo mukana gari enddimuwa ya wasunziya aninyu mwaha wa Yehova. Mbwenye munofwanyela okosa elobo yina opitta wasunziyavi mwaha wa Mulugu. Nyuwo munofwanyela wasunziha aninyu omukwela iyene. Onawodhe dhavi wakamihedha anawo omukwela Yehova? Mwari mwa nsunzo ntti, ninele wona magano a mBibiliani anakamihedhe amambali. (2 Tim. 3:16) Ninele wona vina dhotagiha dha amambali apurelimo sabwa ya ovirihamo malago a mBibiliani.

MAGANO MANAYI ANAKAMIHEDHE AMAMBALI

4. Magano gani anakamihedhe amambali wasunziha anawa omukwela Yehova na murima wawa wotene? (Tiago 1:5)

⁴ Nigano 1: Otamele malago a Yehova. Omukumbire Yehova wi awuvahe eziwelo enfuniwe wi omukamihedhe mwanawo omukwela iyene. (Kengesa Tiago 1:5.) Yehova ddi muttu wofwanyelela wi awuvaye malago. Ninele wona mwaha minli dhinnivaha ebaribari eji. Woroma, Yehova ddiromile okala babi. (Masal. 36:9) Yanawili, malago anvaha iyene bopureleyamo.—Iza. 48:17.

5. (a) Nikuru na Yehova ninavaha nikamihedho gani amambali? (b) Ninga munlagihedha vidiyu, txini esunziliwe na mbali vina murogora Amorim sabwa ya mukalelo walelilani aniwa?

⁵ Modhela Nzu naye vina nikuru naye, Yehova onowavaha amambali oja womuyani ondela mBibiliani wi alelena aniwa omukwele iyene. (Mt. 24:45) Motagiha, weyo onele ofwanya malago menjene muserie ya artigu “Ajuda para Familia” vyaka dhinjene yabudduwa mu revista Despertai! ovano enfwanyeya mu saiti. Ottiya ejo mavidiyu na maentervista ambudduwa mu jw.org anowakamihedha amambali walela aniwa na malago a Yehova.b—Gano 2:4-6.

6. Atelani dhahi ewilemo dhavi sabwa ya nikamihedho nakelilani munikuruni na Yehova?

⁶ Amambali enjene anotamalelaga sabwa ya nikamihedhe ninavaha Yehova alabihedhaga nikuru naye. Babi dhahi onkuweliwa Joe ohiloga: “Walela mwibaribarini aima araru kiyali yovevuwa. Miyo na mwadhaga ninolobelaga nimukumbiraga Yehova wila anikamihedhe. Dila dhetedhene ninowonaga wi mutoma wa artigu obe vidiyu edhile mudhidhi wofwanyelela wi enikamihedhe owanana makattamiho angumanihuna. Iyo ninodhowavi nikuluvelaga magano annivaha Yehova.” Joe na mwadhiye anofwanyaga malago anakamihedha walela aniwa wi akale ofiyedheya na Yehova.

7. Enfuneyelani wi amambali akose muli mwetemwene wi akale yotagiha yapama wa aniwa? (Roma 2:21)

⁷ Nigano 2: Osunzihe na yotagiha yawo. Aima anofwaseyela wawang’ana amambali awa vina anotagiha esile dhinonani. Enoziweya wi kawo amambali oligana. (Rom. 3:23) Masiki dhawene, amambali a malago anokosa muli mwetemwene wi akale yotagiha yapama wa aniwa. (Kengesa Roma 2:21.) Nilogaga sabwa ya aima, babi mmodha ohiloga dhahi: “Awene ali ninga esponja anowuta dhilobo dhetene dhinonani.” Iyene ohenjedhedha: “Awene anele onaddela wi yotagiha yehu kiniwanana na ejile enfunihu wasunziha.” Akala ninfuna wi anihu amukwele Yehova, omukwela wehu Yehova onofwanyela okala woliba vina wowoneya.

8-9. Txini esunziliwe na dhologa dha Andre vina Emma?

⁸ Dhihikalawo mikalelo dhinjene dhinawodhe amambali wasunziya aniwa omukwela Yehova. Koona elogile mbali onkuweliwa André ona vyaka 17 dhobaliwa: “Amambali aga anloga na iyo dila dhinjene sabwa ya ttima ya olobela. Na mattiyu, babani wanlobela na miyo mpaka ofiya mudhidhi wawodha miyo okosa nlobelo naga. Amambali aga aninubutxedhavi: ‘Enowodheya nyuwo omukumbira Yehova elobo enfuninyu mudhidhi-mudhidhivi.’ Nikokomezo ntti na olobela niddipatta venjene, ovano miyo kaddinkana manyazo a omulobelela Yehova vina omona ninga Babi wokwela.” Amambali, kamudduwale wi omukwela wenyu Yehova onele wattukulela aninyu omukwela Iyene vina.

⁹ Katanalela vina yotagiha ya Emma. Babe vanyanyaliliye anamudhi, wahimuttiyana mangawu menjene maye. Emma ohiloga: “Dila dhinjene mmani wangumanana makattamiho a ofwanya kobiri, masiki dhawene iyene wannaddela mukalelo onazuzumela Yehova emeleli aye vina onasapeliye. Miyo ddahona wi okalawo wetene wa mmani wanrumela ejuwene. Vina wanvirihamo esile dhasunzihiye.” Txini ensunzehu? Amambali, enowodheya wasunziha aninyu na yotagiha yenyu masiki mudhidhi wa makattamiho.—Gal. 6:9.

10. Gari gani yana amambali a mw’Izrayel ya ologa na aniwa? (Olibiha 6:6, 7)

¹⁰ Nigano 3: Ologege na anawo mudhidhi wotene. Yehova wahakokomeza ana Izrayel wasunziha aniwa sabwa yaye mudhidhi wotene. (Kengesa Olibiha 6:6, 7.) Amambali abale ahikana mudhidhi mwinjene valaboni wa ologa na aniwa vina wasunziha omukwela Yehova na murima wawa wotone. Motagiha, muzombwe wa mw’Izrayel wankala mudhidhi mwinjene amukamihedhaga babe mabasa a osinanga vina ottuttela vatakulu esile dhasinagiwa. Oku murogoriye wankala mudhidhi mwinjene vatakulu amukamihedhaga maye mabasa a osona, oluwa na mabasa mena a vatakulu. Venevo valaba amambali vamodha na aniwa, anloga sabwa ya mitoma dhinjene. Motagiha, awene anloga sabwa ya opama wa Yehova vina mukalelo onakamihedhiye ninga anamudhi.

11. Amambali ali Akristu ana gari gani ya ologa vamodha na aniwa?

¹¹ Masaka a ovanene ahittiyana na awale. Dhilabo dhina valaboni, amambali kankana mudhidhi wa ologa na aniwa. Amambali andowa omabasani, oku aniwa andowa oskola. Bili dhawene, amambali anofwanyela otamela mudhidhi wa ologaga na aniwa. (Ef. 5:15, 16; Fil. 1:10) Webedha wa ntakulu onokalaga mudhidhi wa okosa ejuwene. Mbali dhahi wa muzombwe onkuweliwa Alexandre ohiloga: “Dila dhotene babani onokosa masasanyedho a webedha wa ntakulu vina kanttiya elobo-txilobo ozuzumiha mudhidhi obo wokala mumodhani. Nsunzona nigamala, ninokanaga mudhidhi wa ologa vamodha.”

12. Va webedhani wa ntakulu txini enfwanyela mwazambo wa ntakulu okana muyubuweloni?

¹² Akala weyo wa mwazambo wa ntakulu txini enfwanyeliwe okosa wi webedha wa ntakulu wazivelege anawo? Onkoddelani osunza na anawo nivuru niswa Kajavo Egumi Yamukalakala! Nsunzo ntti ninele wuvahani gari ya ologa makani apama na anawo. Weyo onfuna wi anawo akale otapuwa awaddelege esile dhinubuwelani vina dhinakubanyiha nona kulabihedhe mudhidhi obo wa webedha wa ntakulu wi wasisigule anawo obe wapambihege. Akala monelo wawa kuniwanana na magano a Bibilia, ottiya wapambiha walibihe vina wakokomeze anawo ologa na murima wawa wotene esile dhinubuwelani vina dhinakubanyiha. Weyo onawodhe wakamihedha pama oganonelamo esile dhinubuwelani.

13. Gari gani ena amambali yowakamihedha aniwa okala ofiyedheya na Yehova?

¹³ Amambali, katamelani mudhidhi valaboni wi mwakamihedhe aninyu okala ofiyedheya na Yehova. Kamujedhele bahi wasunziha aninyu sabwa ya Mulugu wehu wokwela mugakana manivuru andhela mBibiliani. Koona elogile mambali onkuweliwa Lisa: “Iyo ninolabihedha elobo-elobovi eli vakuvi na iyo wi nasunzihena anihu sabwa ya Yehova. Motagiha, mwanabwa wehu agakosa elobo enattukulela aima oteya, iyo ninolabihedha ejuwene wi nanohihedhemo wi Yehova Mulugu, ddowagalala vina iyene onfuna wi iyo nikane wagalala.”

14. Ekaleleni yamakamaka amambali wakamihedha aniwa wasakula amarho na malago? (Gano 13:20)

¹⁴ Nigano 4: Wakamihedhe anawo osakula mandano apama. Nzu na Mulugu ninologa s’ohipipiriha wi mandano anonittukulela okosa dhilobo dhapama obe dhilobo dhabure. (Kengesa Gano 13:20.) Amambali, nyuwo munowaziwa amarho a aninyu? Munotamelaga mudhidhi wa ovega na aninyu vamodha na amaro awa? Txini enakosinyu wi mwakamihedhe aninyu wandana na abale animukwela Yehova? (1 Kor. 15:33) Wakamihedhe anawo okana mandano apama modhela wawoba abale ana mandano ofiyedheya na Yehova ovitaganyiha na nyuwo wi mukose elobo-txilobo.—Masal. 119:63.

15. Amambali anawodhe dhavi wakamihedhe aniwa okana mandano apama?

¹⁵ Katanalela yotagiha ya babi onkuweliwa Tony. Iyene na mwadhiye ahakamihedha aniwa okana mandano apama, Tony ohiloga: “Mwa ovira wa vyaka miyo na mwadhaga ninowawobelaga vanivehu abali na arogora a yimo dhottiyana vina a dhilabo dhottiyana-ttiyana. Ninovitaganyihaga na awene wi nije elobo-txilobo vina nikale vawebedhani wa ntakulu. Obu mukalelo wapama wowaziwa abale animukwela vina animulabela Yehova nowagalala. Iyo nihakela mareliho sabwa ya wawakela vanivehu anameddelela milogo, amisiyonario na abali ena. Dhotagiha dhawa, na ovingela wawa mabasa, dhihakamihedha anihu okala ofiyedheya na Yehova.” Amambali, kavilibihedheni wakamihedha aninyu okana mandano apama.

KUYELELIWE NJEDHELO!

16. Txini enfwanyela weyo wubuwela akala mwanawo onologa wi kanfuna omulabela Yehova?

¹⁶ Ki akala na guru yotene enkosiwe, mwanawo mmodha onologa wi kanfuna omulabela Yehova? Kumaguvele wubuwela wi guru yawo ninga mambali kittiddile mabasa. Yehova ohinivaha iyo notene—otaganyiha na mwanawo—nvaho wa ofuru wa osakula, omulabela Mulugu obe nne. Akala mwanawo onogana omuttiya Yehova kuyeleliwe njedhelo labo nimodha onele wiyela. Kobuwela sabwa ya nipadduwo na mwana wopawula. (Lk. 15:11-19, 22-24) Muzombwe oddule wahikosa dhilobo dhinjene dhabure mbwenye omamalelowa wahiyela. Attu ena txino anofiyedha ologa wi “obo wali musibo.” “Eji enopadduwa-wene mwigumini mwa muttu?” Ndde enopadduwa! Jijuwene epadduwile na muzombwe wa mwana mulobwana onkuweliwa Elie.

17. Yotagiha ya Elie enulibiha dhavi?

¹⁷ Elie ohiloga dhahi sabwa ya amambali aye: “Awene ahikosa muli mwetemwene wi ddimukwele Yehova vina Nzu naye, Bibilia. Baddina vyaka kumi, ddahikala vuruvuru.” Elie wahiroma okosa dhilobo dhabure muviteyani, amambali aye ahimukamihedha okala wofiyedheya na Yehova, mbwenye iyene karumelile nikamihedho navahiwiye. Vasogorhova wahibudduwa vatakulu, venevo baroma ottukula mweddelo wabure. Masiki dhawene, dila dhina wanloga na akwaye sabwa ya Bibilia. Elie ohiloga: “Venevo vadhowa miyo ddilogaga sabwa ya Yehova na akwaga ddanubuwela venjene esile dhasunzilemi sabwa ya Yehova. Vang’ono-vang’ono beu ya ebaribari —yalile amambali aga mmurimani mwaga—yahiroma wunuwa.” Na ovira wa mudhidhi, Elie wahiyelela mwibaribarini.c Karoma otanalela wagalala wana amambali aye sabwa ya omusunziha bali mwana omukwela Yehova!—2 Tim. 3:14, 15.

18. Weyo oniwamo dhavi sabwa ya guru enkosa amambali wi asunzihe aniwa omukwela Yehova?

¹⁸ Amambali, nyuwo muhivahiwa gari enddimuwa vaddiddi, yowalela aninyu wi akale alabeli a Yehova. (Masal. 78:4-6) Aba kahiye mabasa mang’ono, iyo ninowutamalelani venjene sabwa ya guru enkosinyu yo wakamihedha aninyu! Mukane ebaribari wi Babi wehu wa wirimu Yehova, onele wagalala mugadhowavi mwakamihedhaga aninyu omukwela Yehova vina mwalelaga na malago animuzivela.—Ef. 6:4.