Wanziwa?

Sabwaya jani jibo yali elobo yamakamaka mwa ana Izrayel?

JIBO yali elobo yamakamaka mwa ana Izrayel. Dila dhinjene Bibilia onowaloga attu ooba dhipano dhowibana obe eba jibo. Dhipaddi dhinjene dha Bibilia, jibo. Motagiha, nivuru na Masalmo, Jibo ya Aliba Okwelana vina Enthothobelana. Nivuru dhahi ninloga mwaha wa egumi ya masaka a Bibilia onologa wi Bibilia “onolagiha mowakwana-mwene wi ana Izrayel anlabihedha jibo agakosaga mabasa ottiyana-ttiyana mwigumini mwawa.”

Jibo siku na siku. Ana Izrayel anniba jibo wi alagihe mukalelo waviwamo awene. (Iza. 30:29) Ayana annoba masekere, anniba jibo dhowagalala vina antxetta vamattangani, motagiha, mudhidhi wasakuliwa mwene, anyakoddo agapemberha koddo obe vamattangani a webedha. (Anam. 11:34; 1 Sam. 18:​6, 7;1 Amwe. 1:​39, 40) Ana Izrayel vina anniba wi alagihe wiwa opa wakanani sabwa ya omuyelela muttu mukwani. (2 Map. 35:25) Dhahene ninga munlogela nivuru dhahi, “kavali waganyedha, Ahebreu àli nlogo naziveliwa wiba.”

Amwene a mw’Izrayel anziveliwa jibo. Amwene a mw’Izrayel anziveliwa jibo. Motagiha Mwene Saul wahimukumbirha Davidi wi awobe kasasi. (1 Sam. 16:​18, 23) Musogorhomwa, Davidi mukaliliye mwene, ohisasanya dhipano dhowibana jibo, wahita jibo dhokoddela vina wahikosa masasanyedho wi nikalewo nikuru na anameba amwibela Yehova mumparhani. (2 Map. 7:6; Am. 6:5) Mwene Salomau wahikana anameba a ayana vina alobwana eba varuwani vaye.—Koh. 2:8.

Jibo vawebedhani. Yamakamakaya jawi ana Izrayel anniba jibo wi amwebedhe Yehova. Wi nitanalele, ahikalawo alobwana owakwana, 4.000 ooba dhipano dhowibana mumparhani o Jeruzalemi. (1 Map. 23:5) Awene anooba bangwe, masekere, thangarhí na siribu. (2 Map. 5:12) Mbwenyi kaali awenevi amwebedha Yehova na jibo. Ana Izrayel enjene anniba mudhidhi wadhowani o Jeruzalemi oja mattanga. Jibo esi dhina dhinoziwiwa ninga Jibo Dhowelana. (Masal. 120-134) Mowiwanana na dhopepesiwa dhifwanyiwe dhiniwanana na Ayuda, ana Izrayel anniba Masalmoa mang’onovi mudhidhi wajani mattanga a Paskwa.

Jibo enodhowavi ekalaga yamakamaka mwa nlogo na Yehova. (Tia. 5:13) Wiba onokosa mpaddi wa webedha wehu. (Ef. 5:19) Vina iyo ninokala ofiyedheya na abalihu na arogora nigamwibelaga Yehova vamodha. (Kol. 3:16) Ottiya ejo, nigagumanana makattamiho orutxa jibo enonikamihedha venjene. (Mer. 16:25) Kavali waganyedha wi jibo mukalelo mmodha wa olagiha omuroromela wehu Yehova vina omukwela wehu.