Mbali—Weyo Onovilibihedha wi Okale Mudhari Wokamihedha?

1. Txini yobuwela Paulo mwaha wa adhari okamihedha?

ADHARI okamihedha anokamihedha venjene milogo. Murumiwi Paulo wanavaha ttima vaddiddi alobwana aba oweddeyana. Elobo modha enlagiha ejuwene jawi, valebeliye Akristu o Filipi, iyene ohalejela adhari okamihedha vamodha na anddimuwa a mmulogoni.—Fil. 1:1.

2. Mbali dhahi onkuweliwa Luis oniviwamo dhavi sabwa ya okala mudhari wokamihedha?

² Abali enjene abatiziwe na vyaka dhottiyana-ttiyana anowagalala venjene sabwa ya okamihedha mulogo ninga adhari okamihedha. Motagiha, Devan wana vyaka 18 vattomiwiye ninga mudhari wokamihedha. Oku mbali onkuweliwa Luis, ottomiwe ninga mudhari wokamihedha na vyaka dhokwaranya 50. Iyene ohiloga, “Mwa miyo gari enddimuwa vaddiddi okamihedha mulogo ninga mudhari wokamihedha, makamaka ddigatanalela okwela onddilagiha abali!” Adhari enjene okamihedha anoviwamo na mukalelo wakakene.

3. Txini enone iyo mu nsunzoni ntti?

³ Akala weyo ohibatiziwa mbwenyi kuli mudhari wokamihedha, enowodheya okana yogana eji? Txini enawukamihedhe okosa ejuwene? Txini enloga Bibilia enfwanyeliwe okosa wi okale mudhari wokamihedha? Mu nsunzoni ntti ninele wona dhowakula dha mavuzo aba. Mbwenyi vamaromo ninfuna none mabasa gani ankosa mudhari wokamihedha.

TXINI ENKOSA ADHARI OKAMIHEDHA?

4. Mabasa gani ankosa adhari okamihedha? (Koona vina foto.)

⁴ Adhari okamihedha anozuzumela murudda wolaleya vina mapublikasau anlabihedhihu mmabasani a olaleya. Ena anokamihedha okuputta vina ovenyihedha Nyumba dha Omwene. Awene vina anodhaga ottomiwa ninga indikador vina ozuzumela dhipano dha audiyu-vidiyu mudhidhi wa matugumano. Mabasa aba otene bamakamaka, mbwenyi abali aba vina alobwana oliba mpaddi womuyani; animukwela venjene Yehova vina ankalawo mowiwanana na ejile enloga Bibilia. Awene anowakwela venjene abali na arogora a mmulogoni. (Mt. 22:​37-39) Txini enfwanyela okosa mbali obatiziwe wi akale mudhari wokamihedha?

5. Txini enawukamihedhe wakwaniha yogana yawo ya okala mudhari wokamihedha?

⁵ Bibilia onolagiha mikalelo dhinfuneya wi mbali attomiwe ninga mudhari wokamihedha. (1 Tim. 3:​8-10, 12, 13) Ononamo dhavi osunza mikalelo esi vina ovilibihedha ovirihamo mwigumini mwawo? Ejo enele wukamihedha wakwaniha yogana eji. Mbwenyi vamaromo, onofwanyela otanalela deretu mwahaya onuttukulela ofuna okala mudhari wokamihedha.

ONFUNELA NNI OKALA MUDHARI WOKAMIHEDHA?

6. Elobo gani enfwanyela wuttukulela okosa elobo-txilobo wi wakamihedhe ena? (Mateu 20:28; koona vina ya kapa.)

⁶ Yezu Kristu yotagiha yapama enihu, dhotene dhakosiye weddihiwa na okwela—okwela waniye na Babe vina wakwela attu. Okwela omuttukulela Yezu ovilibihedha wi akamihedhe ena ofiyedha okosa mabasa oviyeviha. (Kengesa Mateu 20:28; Jo. 13:​5, 14, 15) Akala dhotene dhinkosiwe onkosa nokwela, Yehova onele wururiha vina wukamihedha wakwanihedha yogana yawo ya okala mudhari wokamihedha.—1 Kor. 16:14; 1 Ped. 5:5.

7. Sabwaya jani mbali kaninfwanyelela okala namavittukulela vina namakumbela vaye?

⁷ Mwilaboni mwetemwene, enjene anowasiba attu ali anamakumbela vawa vina antamela ovittittimiha. Mbwenyi ejo kimpadduwa na nlogo wa Yehova. Mbali onalabela ena sabwa ya okwela dhahene ninga Yezu, kantamela ottittimihiwa, ovahiwa ettomo vina kanubuwele wi ddamakamaka opitta ena. Mulobwana oli mukumbela vaye kottomiwa ninga mudhari wokamihedha, iyene txino agankodda okosa mabasa oviyeviha abuwene ali ofuneya wi azuzumele mabila a Yehova. Txino agobuwela wi ddamakamaka vaddiddi wila akose mabasa aba. (Jo. 10:12) Yehova txipo kanaruriha attu ankosa dhilobo na ovittittimiha obe anfuna woniwa ninga amakamaka.—1 Kor. 10:​24, 33; 13:​4, 5.

8. Nlago gani navahile Yezu arumiwi aye 12?

⁸ Masaka mena akwaye ofiyedheya a Yezu ahitamela okana dhittomo na efunelo yabure. Koona epadduwile na arumiwi eli a Yezu—Tiago na Joau. Awene ahimukumbirha Yezu wi akane mburo wamakamaka Mumweneni. Yezu kasibile sabwa ya efunelo eji ya okala amakamaka opitta ena. Ottiya ejo, iyene ohiloga dhahi na arumiwi aye 12: “Onfuna okalamo munddimuwa, avikose mwimeleli wa etene; onfuna okala musogorheli, avikose mudhari wa etene.” (Mk. 10:​35-37, 43, 44) Mbali agatamela okala mudhari wokamihedha na efunelo yofwanyelela—ya walabela ena—iyene onokala nruriho na mulogo.—1 Tes. 2:8.

ONAWODHE DHAVI WUNUWIHA EFUNELO YAWO YA OKALA MUDHARI WOKAMIHEDHA?

9. Onawodhe dhavi wunuwiha efunelo yawo ya walabela ena?

⁹ Kavali waganyedha wi onomukwela venjene Yehova vina onofuna walabela ena. Masiki dhawene, txino kuna efunelo ya okala mudhari wokamihedha sabwani onoziwa wi ejo enele wudhelana mabasa menjene. Ki onawodhe dhavi wunuwiha efunelo yawo ya walabela ena? Mukalelo mmodha bwa otanalela wagalala onkanihu nigakamihedhaga abali na arogora? Yezu ohiloga: “Ovaha onothabiha opitha ovahiwa.” (Mer. 20:35) Egumi ya Yezu yotagiha enoniha ejuwene. Iyene wahikana wagalala webaribari sabwani wanalabela ena vina jakakene enapadduwe na weyo.

10. Txini enoniha wi Yezu wanagalala sabwa ya walabela ena? (Marko 6:​31-34)

¹⁰ Koona yotagiha enoniha mukalelo wagalala Yezu sabwa ya walabela ena. (Kengesa Marko 6:​31-34.) Nsaka dhahi Yezu na arumiwe aye ahilema vaddiddi. Awene ahidhowa mburo wofwaseya na efunelo ya ovuma. Mbwenyi muttitti ohifiya awene ahinatti vina ahikala venevo amujedhaga Yezu. Awene anfuna ovuruwana masunziho aye. Yezu agahikodda wasunziha, sabwani iyene vamodha na arumiwe aye kakana mudhidhi nne woja. Txino Yezu agahasunziha elobo modha obe bili venevo baaruma wi adhowege. Mbwenyi Yezu wanakwela attu nona “oroma wasunziha dhinjidhene.” Vina iyene ohidhowavi akosaga ejuwene mpaka vati oriba. (Mk. 6:35) Yezu kakosile ejuwene sabwa ya odideliwa, mbwenyi sabwani wanaweddela ttagaraga attuya. Iyene wanfuna wasunziha sabwani wanakwela. Okosa ejo yanimwagalaliha venjene Yezu.

11. Elobo gani ekosile Yezu wi akamihedhe muttitti obule? (Koona vina foto.)

¹¹ Ottiya wasunzihavi dhilobo dhinjene, Yezu vina okamihedha muttitti obule na mukalelo mwina. Iyene ohizuzumela dhojombeliwa dhomaningoni dha attu abale, mudhidhene obule iyene ohenjedhedha muttengo wa pawu vina oba na mukalelo wotikiniha vina ohawaddela anamasunza aye wi agawele attuya. (Mk. 6:41) Dhahene, Yezu ohasunziha anamafwara aye walabela ena. Iyene vina ohilagiha ttima ya wakamihedha ena na dhinfunani—jijuwene enfwanyela okosa adhari okamihedha. Katanalela mukalelo wagalalile arumiwi a Yezu sabwa ya omukamihedha iyene ogawa dhoja esile mpaka otene oja bakwanana! (Mk. 6:42) Kahiye dila eji bahi yekile Yezu dhifunelo dha attu ena vamburoni voroma. Iyene ohikosa ejuwene mwari mwa egumi yaye yotene velaboni ya vati. (Mt. 4:23; 8:16) Wasunziha ena vina okosa dhilobo dhovevuwa wi akamihedhe yanimwagalaliha venjene Yezu. Se waganyedha weyo vina onele wagalala venjene ogeka dhojombeliwa dha attu ena vamburoni voroma vina ogavilibihedha okala mudhari wokamihedha.

12. Sabwaya jani muttu kanfwanyela ologa wi kana ewodhelo ya okamihedha mulogo?

¹² Attu ena anubuwela wi kana ewodhelo egadhile olabihedhiwa mmulogoni. Akala weyo oniviwamo dhaheni kukumuwe, mwebaribari weyo ohikana mikalelo dhinakamihedhe venjene abali na arogora. Ononamo dhavi wengesa mazu a Paulo anfwanyeya va 1 Korinto 12:​12-30 vina olobela sabwa ya makani aba. Va versuni eji Paulo onologa wi mudhari ddi mudhari wa Yehova—ejo vina enowupatta—ddamakamaka vaddiddi vina onofuneya mmulogoni. Nona akala ovanene kunwodha wakwaniha mikalelo dhinuwodhiha okala mudhari wokamihedha, kuwiyelele mundduni. Ottiya ejuwene kakosa muli-mwetemwene wi omulabele Yehova vina wakamihedhe abalawo. Okuluvele wi anddimuwa a mmulogoni anele wuwona vina anele wuvaha mabasa anawodhiwe wakwanihedha.—Rom. 12:​4-8.

13. Elobo gani ennitikiniha nigalogaga mwaha wa mikalelo dhinfwanyela okana mbali onfuna okala mudhari wokamihedha?

¹³ Koona mwaha mwina onawuttukulele ovilibihedha wi okale mudhari wokamihedha: Mikalelo dhinjene dhinfwanyeliwe okana sakakene dhinfwanyela okana Akristu otene. Motagiha, Akristu otene anofwanyela wunuwiha mandano awa na Yehova, okala omala-nawale wi alabele ena nowagalala vina okala yotagiha yapama modhela mweddelo wawa. Txino weyo owunuwiha mikalelo esi dhinfuneya wi okale mudhari wokamihedha, kito txini enfuneya wi mbali attomiwe ninga mudhari wokamihedha?

TXINI ENFWANYELIWE OKOSA WI OKALE MUDHARI WOKAMIHEDHA

14. Txini entapulela okala muttu wa nriho? (1 Timóteo 3:​8-10, 12)

¹⁴ Ninele osunza mikalelo dhing’onovi dhinloga Bibilia va 1 Timóteo 3:​8-10, 12. (Kengesa.) Adhari okamihedha anofwanyela okala “anriho.” Mazu aba vina anotapuleliwa ninga “onfwanyela orihiwa na ena,” “okala wa malago,” obe “okosa dhilobo dhinattukulele ena omuriha.” Ejo kintapulela wi weyo kunfwanyelela okala muttu woteyiha obe wovega. (Koh. 3:​1, 4) Moneloya bwawi, weyo onofwanyela ovaha ttima dhittomo dhiniwena. Ogahiziwiwe ninga muttu onivilibihedha vina wokuluveleya, kinawodheye orihiwa na otene a mmulogoni.

15. Txini entapulela ohikala muttu wa malumi meli vina ohitamela opura àjelaga attu ena?

¹⁵ Ohikale wa malumi meli entapulela wi kunzivala, oli muttu wokuluveleya vina dila dhotene onologa ebaribari. Weyo onovirihamo dhimpikirheliwe vina kunazivalela ena. (Gano 3:32) “Ahitamele opura àjelaga athu” entapulela wi onokuluveleya ogakosaga marhondda na attu ena vina mukalelo onlabihedhiwe kobiri. Weyo txipo kugamputtulile akwawo a mmulogoni wi okane kobiri yinjene.

16. (a) Txini entapulela ohikala namalezela? (b) Txini entapulela okana mubuwelo wotxena?

¹⁶ “Ahikale anamalezela” entapulela wi weyo kumpittiha ogamwaga dhomwa dholezeliha vina kunziwiwa ninga mulezeli. Okana mubuwelo wotxena entapulela wi weyo onoriha enloga Yehova wi japama vina jabure. Ebaribari wi weyo kuli muttu woligana, mbwenyi ohikana mandano oliba na Yehova sabwa ya ejuwene onokana murenddele.

17. Txini entapulela opepesiwa akala onofwanyela? (1 Timóteo 3:10; koona vina foto.)

¹⁷ Apepesiwe akala anofwanyelela ejo entapulela wi anddimuwa a mmulogoni ahona wila weyo onoweddiha pama mabasa anttomeliwiwe vina anowukuluvela. Mwadhahene, akala anddimuwa a mmulogoni anowukumbirha wi okose mabasa, kafwara malago anvahiwiwe na nikuru na Yehova, katamela ononelamo dhotedhene dhinfwanyeliwe okosa vina mudhidhi onfwanyeliwe ogomiha mabasaya. Akala weyo onoweddiha pama mabasa anttomeliwiwe, otene a mmulogoni anele wona vina anele otamalela ovilibihedha wawo. Anddimuwa a mmulogoni, kamuttiye washagiha abali amalile obatiziwa. (Kengesa 1 Timóteo 3:10.) Mmulogoni mwawo ahikalamo abali abatiziwe na vyaka kumi na ttaru, kumi na nayi obe dhohifiya? Awene anokosaga nsunzo nomwinya vina anosasanyedhaga deretu matugumano? Anovaha dhowakula mmatugumanoni vina anozuzumela mabasa a olaleya? Akala yowakula ya mavuzo aba jawi ndde, kavahe mabasa anawodhani okosa masiki akalaga azombwe. Dhahene azombwe aba anele opepesiwa akala anofwanyelela. Venevo agakana vyaka 17 obe 18, txino enowodheya ottomiwa ninga adhari okamihedha.

18. Txini entapulela ohikana yosumuleliwana?

¹⁸ Ahina yosumeliwana ejo entapulela wi kawo muttu ona mwaha wawusumela sabwa wa dhilobo dhohifwanyelela. Ebaribari wi txino attu anodhaga wumagedhana dhilobo dhihikosiliwe. Ejo yahimpadduwela Yezu, iyene vina wahawaddela anamafwara aye wi agahigumanana dhilobo dhakakene. (Jo. 15:20) Mbwenyi akala weyo ohikana mweddelo wapama dhahene ninga Yezu, onele ologiwa pama na abali a mmulogoni.—Mt. 11:19.

19. Txini entapulela okala muttu omutelile muyana mmodha?

¹⁹ Muttu omutelile muyana mmodha. Vakosile Yehova matelo oroma, iyene ohiloga wi matelo anofwanyela okala—mulobwana na muyana. Jijuwene enfwanyela okosa Akristu otene. (Mt. 19:​3-9) Mukristu txipo kanfwanyela okosa mararuwo. (Aheb. 13:4) Ottiya ejuwene, weyo onofwanyela okala woweddeyana na mwadhiyo vina txipo kunfwanyela wagayela ayana ena.—Job 31:1.

20. Mulobwana onwodha dhavi “weddiha pama [murala waye]”?

²⁰ “Aziwe walela anawa, vina weddiha pama [murala waye].” Akala wa mwazambo wantakulu, onofwanyela wakwaniha muttorho wawo. Kujombihege webedha wantakulu. Egawodheya kadhowaga mmabasani a olaleya na mwadhiyo vina anawo. Wakamihedhe anawo wunuwiha mandano awa na Yehova. (Ef. 6:4) Mulobwana onzuzumela deretu murala waye onolagiha wi onowodha ozuzumela mulogo.—Kaladdaniha na 1 Timóteo 3:5.

21. Txini enfwanyeliwe okosa akala kunattomiwa ninga mudhari wokamihedha?

²¹ Mbali, akala kunattomiwa ninga mudhari wokamihedha, ninowukumbirha, kafwaseyela osunza mutoma obu vina olobele sabwa ya makani aba. Osunze mikalelo dhinlogiwa mBibiliani dhinawukamihedhe okala mudhari wokamihedha vina ovilibihedhe wakwaniha mikalelodha. Katanalela omukwela wawo Yehova vina abali na arogora a mmulogoni mwawo. Ejo enele wunuwiha efunelo wawo ya walabela awene. (1 Ped. 4:​8, 10) Ogakala mudhari wokamihedha onele okana wagalala onddimuwa onda sabwa ya walabela abalawo na arogora a mmulogoni. Vina okuluvele wi Yehova onele oruriha guru dhinkosiwe wi okale mudhari wokamihedha!—Fil. 2:13.