Onowubuwela?

Ohengesa mitoma dha Mwang’aneli wa yaka ejino? Akala pumwenemo, katagiha wakula mavuzo aba:

Yotagiha gani enittiyedhi Yehova enoniha mukalelo wa waweddiha ayana?

Iyene onowaweddiha ayana se nsakulano, vina kanavaha ttima alobwana opitta ayana. Mulugu onowavuruwana ayana, onotamela oziwa mukalelo oniviwanimo vina dhinazuzumiha. Iyene vina onokuluvela wi awene anele owodha wakwaniha mabasa-mabasavi anakelani.—w24.01, nikuku 15-16.

Ninawodhe dhavi ovirihamo nlebo na Éfeso 5:​7, ninloga: “Nyuwo kamwiwananege na awene”?

Murumiwi Paulo wela onitxenjeriha wi kaninfwanyela wandana na attu ananittukulele ohiwelela magano a Yehova. Kahiyo bahi orabela okala na attuya aba kove na kove mbwenyi vina mu redes sociais.—w24.03, nikuku 22-23.

Ninofwanyela ovibarela mwa miselu dhottambi?

Ninofwanyela okala txenjewa na miselu dhihina matibelo dhinakelihu na abalihu obe akwihu, na e-mails dhinakelihu na attu ahinaziwihu vina asadduweli anvita ejile elani modhela olagiha wi anofuna oziwa ebaribari ya mBibiliani.—w24.04, nikuku 12.

Txini enziwihu vina ehinziwihu mwaha wa mukalelo onamuttonge Yehova Mwene Salomau vina attu akwile o Sodoma na Gomora vina mu Mpuloni Munddimuwa?

Iyo kaninziwa akala Yehova ohattongela attu aba otolotxiwa namukalakala. Mbwenyi nihikana ebaribari wi iyene onoziwa dhetene vina Mulugu wa ttagaraga. —w24.05, nikuku 3-4.

Nikuluvelo gani ninkanihu sabwa ya Mulugu okala “Mwango”? (Olib. 32:4)

Enowodheya omukosa Yehova ttawela yehu. Iyene ddokuluveleya, onowakwaniha mapikirhelo aye. Iyene kantxinja, txipo kansaddula omuttu waye nne vina efunelo yaye.—w24.06, nikuku 26-28.

Txini enawukamihedhe wagalala na mulogo muswa?

Okuluvele wi Yehova onele wukamihedha dhahene ninga mwakamihedhiliye adhari aye a masaka a wale. Orabele oladdaniha mulogo muswa na mulogo wawo wawale. Ozuzumele mabasa a mulogoya muswa vina ovilibihedhe okana mandano maswa.—w24.07, nikuku 26-28.

Txini ensunzihu na misibo miraru dhinfwanyeya mu nivuruni na Mateu kapitulu 25?

Musibo wa mabila na mbuzi onottukulela vadhulu ttima ya okala ororomeleya vina oweddeyana. Musibo wa anamwali a malago vina otowa malago ononisunziha wi ninofwanyela okala ovisasanyedhene vina txenjewa. Vina musibo wa matalentu ononisunziha ttima ya olaba na nttokoso vina okosa mpaka munwodhelihu.—w24.09, nikuku 20-24.

Mulapelo gani wana esusu ya mparha wa Salomau?

Va 2 Mapadduwo 3:​4, malebo mena a nsaka na wale anloga “120 côvados,” kuloga meturu 53 ya elapi. Mbwenyi Malebo mena okuluveleya anloga “20 côvados,” kuloga meturu 9 ya elapi. Ejuwene enligana na otalama wa virugu dha mparhaya.—w24.10, nikuku 31.

Mazu aba mudhari wokamihedha onofwanyela omutela muyana mmodha, antapulela eni? (1 Tim. 3:12)

Antapulela wi iyene omutelile muyana mmodha bahi vina kanfwanyela olupa matelo. Ottiya ejo iyene vina txipo kanfwanyela omugayela muyana mwina. —w24.11, nikuku 19.

Ninlogela nni wi Joau 6:53 kaloga dhafwanyela okosiwa va Siyarini ya Nabuya?

Joau 6:53 onologa ofuneya wa oja maningo a Yezu vina omwa nikami naye. Yezu ologile mazu aba o Galileya yaka ya 32 Kristu babaliwe na Ayuda ahamuroromela. Oku Siyari ya Nabuya okosiwe yaka modha musogorhomwa, o Jeruzalemi. Mudhidhi obu Yezu ologile mazu aba na abale agalamuleli na iyene wirimu.—w24.12, nikuku 10-11.