Kamutagihe Yezu Modhela Ozuzumela Mabasa a Olaleya

1. Nlogo na Yehova nittiyanile dhavi na ena anloga wi Akristu?

ADHARI a Yehova ahikana efunelo enddimuwa ya olaleya miselu dhapama vina anovilibihedha okosa ejuwene, eji enowattiyaniha na ena anloga wi Akristu. (Tit. 2:14) Txino masaka mena weyo onorutxiwaga wagalala na mabasa a olaleya. Dila dhina onodhaga oviwamo dhahene ninga mbali dhahi onlaba vaddiddi ninga munddimuwa wa mulogo, iyene ohiloga dhahi, “Masaka mena kaddinkanaga efunelo ya olaleya.”

2. Enkalela nni yorutxa odhowavi nizuzumelaga mabasa a olaleya?

² Txino ninodhaga oziveliwa venjene na mabasa mena a Yehova ottiya mabasa a olaleya. Sabwaya jani? Sabwani nigamagaga obe nigavenyihedhaga Nyumba dha Omwene, nigaakamihedhaga abalihu antabuwa na dhifoyo obe nigaalibiha na mikalelo dhina ninowona momaguva-mwene dhopurelamodha vina ejo enonittukulela oviwamo pama. Ottiya ejo, esi dhinkala midhidhi dhowagalaliha, ninowona okwela vina murenddele wa abalihu vina nihikana ebaribari wi awene anovaha ttima esile dhinakoselihu. Mwa mpaddi mwina txino ninodhaga olaleya mwari mwa vyaka dhinjene murudda wakakene mbwenyi attu ena kanna efunelo ya ovuruwana miselu dhinlaleyihu. Ninoziwa wi vandowihu naddamelaga ogoma wa elabo ninojedhela ofwara-fwariwa vaddiddi. (Mt. 10:22) Txini enanikamihedhe odhowavi nizuzumelaga mabasa a olaleya?

3. Txini ensunzihu mwaha wa Yezu na musibo onfwanyeya va Luka 13:​6-9?

³ Ninowodha osunza na yotagiha ya Yezu sabwa ya ozuzumela mabasa a olaleya. Bali velaboni a vati, Yezu kattiyile ovilibihedha walaleya attu miselu dhapama. Mwebaribari mwa ovira wa mudhidhi iyene wahenjedhedha mabasa aye. (Kengesa Luka 13:​6-9.) Dhahene ninga mwinya wa mundda walabile vyaka ttaru atamelaga olima mfigera wahabala milima, Yezu ohalaleya Ayuda mwari mwa vyaka ttaru vina enjiya wa abuwene karumela miselu dhalaleyiye. Masiki dhawene Yezu kattiyile walaleya miselu dhapama, iyene wali ninga mulobwana ole wajedhile wi mfigeraya obale milima. Yezu wahivilibihedha venjene walaleya Ayuda wi akamihedhe orumela miselu dhapama.

4. Dhilobo gani nayi dhinasunzihu na yotagiha ya Yezu?

⁴ Mu nsunzoni ntti ninele wona mukalelo ozuzumelile Yezu mabasa aye a olaleya makamaka mwari mwa myeri mitanu na mmodha dhomariha dha mabasa aye. (Koona nota de estudo “Depois disso” va Luka 10:1.) Osunza ejile esunzihiliye vina otagiha ejile ekosiliye enele onikamihedha odhowavi nizuzumelaga mabasa a olaleya masaka abano. Ninele osekeserha dhilobo nayi dhinwodhihu osunza na yotagiha ya Yezu: (1) Iyene wanfwaseyela efunelo ya Yehova, (2) wanfwaseyela mavuhulo a mBibiliani, (3) wankuluvela nikamihedho na Yehova vina (4) iyene wankuluvela wila ena agahinvuruwana.

IYENE WANFWASEYELA EFUNELO YA YEHOVA

5. Yezu olagihile dhavi wi wahifwaseyela okosa efunelo ya Mulugu?

⁵ Yezu ohizuzumela olaleya “miselu dhapama dha Omwene” sabwani wanziwa wi jijuwene yanfunana Mulugu. (Lk. 4:43) Mabasa a olaleya àli elobo yamakamaka mwigumini mwa Yezu. Masiki omagomo wa mabasa aye iyene wanedda “sidadi na sidadi, murudda na murudda,” àsunzihaga ena. (Lk. 13:22) Iyene vina wahashagiha anamafwara enjene wi alabe vamodha na iyene ninga anamalaleya.—Lk. 10:1.

6. Mabasa a olaleya aniwanana dhavi na mabasa mena a Omwene andaga iyo okana? (Koona vina foto.)

⁶ Masaka abano, olaleya miselu dhapama mabasa amakamaka anfuna Yehova vina Yezu wila nikose. (Mt. 24:14; 28:​19, 20) Vahikala wiwanana wa mabasa a olaleya na mabasa mena a Omwene. Motagiha, iyo ninomaga Nyumba dha Omwene wi attu analaleyihu amwebedhegemo Yehova vina mabasa ankosihu o Beteli na mimburo dhina dholaddana anokamihedha mabasa a olaleya. Vagapadduwa dhifoyo ninokosa muli-mwetemwene wi abalihu na arogora akele dhilobo dhinfunani, ejuwene enowakamihedha wiyelela otugumana vina olaleya wili. Nigobuwela wi mabasa a olaleya bamakamaka vaddiddi vina wi Yehova onfuna wi nikose mabasa aba, ninokana efunelo yolaleya mudhidhi wetene. János, munddimuwa wa mulogo w’o Hungria, ohiloga: “Kawo mabasa mena animuttiddelihu Yehova ampitta mabasa a olaleya; aba mabasa amakamaka anihu.”

7. Yehova onfunela nni wi iyo nidhowevi nizuzumelaga mabasa a olaleya? (1 Timóteo 2:​3, 4)

⁷ Ninowodha olibiha ozuzumela wehu mabasa a olaleya modhela wawona attu dhahene ninga munawonela Yehova. Iyene onfuna wi attu enjene avuruwane miselu dhapama vina arumele. (Kengesa 1 Timóteo 2:​3, 4.) Wi ejo ewodheye, iyene ononishagiha wi nikale attu a ttotto nigaalaleyaga attu ena miselu dhapama dhinvuna dhigumi dhawa. Motagiha, broshura Attu Okwela—Anowakosa Anamasunza ninovaha monelo dhottiddiyedha mabasa esuwene dhinanikamihedhe oroma makani na efunelo ya wakosa anamasunza. Masiki attuya akoddaga ovuruwana ovanene, musogorho awene txino anodhaga wubuwela dhilobo dhaalaleyelihu vina txino anele ofuna omulabela Yehova. Mbwenyi ejo enawodheye bahi nigadhowavi nilaleyaga.

IYENE WANFWASEYELA MAVUHULO A MBIBILIANI

8. Mavuhulo gani a mBibiliani amukamihedhile Yezu olabihedha mudhidhi waye na eziwelo?

⁸ Yezu wannonelamo mavuhulo a mBibiliani agakwanihedheyile. Iyene wanziwa wi mabasa aye a olaleya agagonelile vyaka ttaru na jiddiga bahi. (Da. 9:​26, 27) Iyene vina wanziwa wi yahimala ovuhuleliwa nsaka vina mukalelo ogakwiliye. (Lk. 18:​31-34) Vowi Yezu wanziwa dhilobo dhavuhuleliwe, ohilabihedha mudhidhi waye na mukalelo wapama. Yodhelavoyá, iyene wahilaleya na nttokoso, mpaka ogomiha mabasa attomeliwiye.

9. Ononelamo mavuhulo a mBibiliani ennikamihedha dhavi odhowavi nizuzumelaga mabasa a olaleya?

⁹ Nigatanalela mavuhulo a mBibiliani anakwanihedheya masaka abano vina anakwanihedheye mohigonela ninokana efunelo enddimuwa ya olaleya. Ninoziwa wi mohigonela elabo eji enele otolotxiwa. Ninoziwa vina wi mapadduwo a ovanene vina mikalelo dha attu a masaka abano dhinolagiha-wene esile dhalogile Bibilia dhigapadduwile masaka omariha. Ninozinddiyela owana-wana wa Potência Mundial Anglo-Americana na Rússia vamodha na akamihedhi aye, mukalelo onakwanihedhani nivuhulo ninloga mwaha wa owana-wana wa mwene w’o sul vina mwene w’o norte “nsaka nomariha.” (Da. 11:40) Ninononelamo vina wi Potência Mundial Anglo-Americana enozinddiyeliwa ninga manyalo a engamuttu enlogiwa va Daniyel 2:​43-45. Iyo ninokuluvela wi dhahene ninga munlogela nivuhulona, mohigonela—mohigonela-mwene—Omwene wa Mulugu onele otolotxa olamulela wetene wa attu. Mavuhulo aba otene anolagiha wi ninkalawo masaka anaddamela ogoma wa elabo, nona ninofwanyela olabihedha mudhidhi wehu na mukalelo onaniwodhihe olaleya miselu dhapama.

10. Na mikalelo gani dhina dhinnittukulela mavuhulo a mBibiliani odhowavi nilaleyaga miselu dhapama?

¹⁰ Mavuhulo a mBibiliani vina anologa muselu wa njedhelo obuwene onfunihu olaleya. Carrie murogora onkamihedha o República Dominicana ohiloga: “Ddigobuwela dhilobo dhapama dhipikirheli Yehova okosa musogorho ddinokanaga efunelo ya ologa na ena.” Iyene ohenjedhedha: “Ddigona makattamiho angumanana attu ovanene, ddinozinddiyela wi awene anofwanyela oziwa wi Yehova ohipikirhela wakosela dhilobo dha deretu.” Mavuhulo a mBibiliani anolagiha wi Yehova ononikamihedha okosa mabasa aba vina ejo enonittukulela odhowavi nilaleyaga. Leila, onkala o Húngria, ohiloga: “Izaiya 11:​6-9 onoddikamihedha ologa na ena miselu dhapama masiki na abaleya ankala ninga kanarumele. Ddinoziwa wi muttu-muttuvi onodhaga otxinja na nikamihedho na Yehova.” Vina Christopher, mbali onkala o Zâmbia, ohiloga: “Dhahene ninga mwavuhuleliwani va Marko 13:​10, miselu dhapama dhinolaleyiwa mwilaboni mwetemwene, miyo ddinotamalela venjene sabwa ya okamihedha wakwanihedheya wa nivuhulo ntti.” Mavuhulo gani a mBibiliani anuttukulela odhowavi olaleyaga?

IYENE WANKULUVELA NIKAMIHEDHO NA YEHOVA

11. Yezu wafwanyelela nni okuluvela nikamihedho na Yehova wi adhowevi alaleyaga? (Luka 12:​49, 53)

¹¹ Yezu wahikuluvela nikamihedho na Yehova wi adhowevi alaleyaga miselu dhapama. Mudhidhi walaleyiye, Yezu wanloga na nriho na attu ena, mbwenyi iyene wanziwa wi miselu dha Omwene dhigahasilidha attu ena nanda enjiya agahisadduwela miselu esi. (Kengesa Luka 12:​49, 53.) Sabwa ya mabasa a olaleya a Yezu, asogorheli a marelijiau ahitamela dila dhinjidhene ompa. (Jo. 8:59; 10:​31, 39) Mbwenyi Yezu wandowavi alaleyaga sabwani wanziwa wi Yehova wali na iyene. Iyene ohiloga: “Kaddili meka, mbwenyi Baba oddirumile oli na miyo. . . . Iyene kaddittiyile meka, sabwani ddinokosavi dhotene dhinimuzivela.”—Jo. 8:​16, 29.

12. Yezu washagihile dhavi anamafwara aye odhowavi alaleyaga masiki afwara-fwariwaga?

¹² Yezu wahawubutxedha anamafwara aye wi anfwanyela okuluvela nikamihedho na Yehova. Iyene wahakuluveliha dila dhinjidhene wi Yehova agahakamihedha masiki kofwara-fwariwaga. (Mt. 10:​18-20; Lk. 12:​11, 12) Mbwenyi iyene vina ohakokomeza okala txenjewa. (Mt. 10:16; Lk. 10:3) Yezu ohawaddela wi attu kuhirumela mazu alaleyani, awene kafwanyela wadidela. (Lk. 10:​10, 11) Iyene ohawaddela wi anfwanyela ottawa kuroma ofwara-fwariwa. (Mt. 10:23) Masiki Yezu azuzumelaga mabasa aye vina amukuluvelaga Yehova, iyene wanrabela ovika vang’ovini.—Jo. 11:​53, 54.

13. Onfwanyelela nni okuluvela wi Yehova onele wukamihedha?

¹³ Ninofuna nikamihedho na Yehova wi nidhowevi nizuzumelaga mabasa a olaleya masiki nifwara-fwariwaga. (Ovu. 12:17) Onfwanyelela nni okuluvela wi Yehova onele wukamihedha? Katanalela nlobelo na Yezu ninfwanyeya va Joau kapitulu 17. Iyene ohimukumbirha Yehova wi awang’anele arumiwi aye vina Yehova wahakula nlobelo ntti. Nivuru na Merelo ninologa mukalelo wakamihedhile Yehova arumiwi ozuzumela mabasa a olaleya masiki afwara-fwariwaga. Mu nlobeloni naye, Yezu vina wahimukumbirha Yehova wi awang’anele abale agaroromelile miselu dhapama dhalaleya arumiwi. Ejo vina enowupatta. Yehova kattiyile wakula nlobelo na Yezu; Iyene onele wukamihedha dhahene ninga mwakamihedhiliye arumiwi.—Jo. 17:​11, 15, 20.

14. Ninfwanyelela nni okuluvela wi enowodheya ozuzumela mabasa a olaleya masiki mmidhidhini dhorutxa? (Koona vina foto.)

¹⁴ Venevo vanaddamela ogoma wa elabo enodhaga okala yorutxa olaleya miselu dhapama, mbwenyi Yezu ohinikuluveliha wi ninele okana nikamihedho ninfunihu wi nidhowevi nizuzumelaga mabasa aba. (Lk. 21:​12-15) Dhahene ninga Yezu vamodha na anamafwara aye, iyo ninowattiya attuya ogana akala anele ovuruwana obe nne, vina ninorabela wakulana. Masiki mabasa ehu agakoddihiwa, abalihu anowodha odhowavi alaleyaga miselu dhapama sabwani anomukuluvela Yehova ottiya guru dhawa. Vyaka zana dhoroma Yehova ohavaha guru adhari aye, masaka abano iyene ononivaha guru wila ‘nilaleye mazu otene’ ninga munfuneliye. (2 Tm. 4:17) Nona omukuluvele Yehova, iyene onele wukamihedha odhowavi ozuzumelaga mabasa a olaleya.

IYENE WANKULUVELA WILA ENA AGAHINVURUWANA

15. Txini enlagiha wi Yezu wahikana moonelo wofwanyelela mwaha wa mabasa a olaleya?

¹⁵ Yezu wahikana monelo wofwanyelela mwaha wa mabasa a olaleya. Ejo ehimukamihedha wagalala na mabasa aye. Motagiha, omagomo wa yaka 30 N.K., Yezu wahoona wi enjene àli omala-nawale wi arumele miselu dhalaleyiye vina ohaladdaniha na mundda oli womala-nawale wi osinangiwe. (Jo. 4:35) Yaka modha musogorhomwa iyene ohawaddela anamafwara aye: “Mabasa a osinanga ahinjiva.” (Mt. 9:​37, 38) Osogorhowa iyene ottukulela vadhulu makaniya: “Mabasa osinanga ahinjiva . . . Nona mmulobe Mwinya wa munddayá wi àrume anamalaba ena mmunddani mwaye.” (Lk. 10:2) Yezu wandowavi akuluvelaga wi agahikalawo attu agavuruwanile miselu dhapama vina iyene wanagalala mwakoselani ejuwene.—Lk. 10:21.

16. Misibo dha Yezu dhilagihile dhavi monelo wofwanyelela mwaha wa mabasa a olaleya? (Luka 13:​18-21) (Koona vina foto.)

¹⁶ Yezu wahasunziha anamafwara aye okana monelo wofwanyelela mwaha wa miselu dhalaleyani, ejo egahakamihedha ozuzumela mabasa awa. Motagiha, katanalela misibo minli dhilogiliye. (Kengesa Luka 13:​18-21.) Mmusiboni mmodha, Yezu ohiladdaniha muselu wa Omwene na ttaga eng’ono ya mostarda edhile okala muri munddimuwa, ejo yatapulela wi attu enjene agahirumela miselu dhapama vina kigaliwo elo egatximihile wunuwawa oku. Musibo mwina iyene ohiladdaniha muselu wa Omwene na emela, ejo empadduwa sabwani muselu wa Omwene ogahilaleyiwa mmimburoni dhinjidhene orugunuwa elabo yotene vina egahattukulela attu okosa matxinjo mwigumini mwawa masiki ena ahiwodhaga wona matxinjoya momaguva-mwene. Nona Yezu ohakuluveliha anamafwara aye wi muselu walaleyani ogahakamihedha attu enjene.

17. Mwaha gani dhinnittukulela okana monelo wofwanyelela mwaha wa mabasa a olaleya?

¹⁷ Nigatanalela mukalelo onkamihedheya attu na miselu dhapama orugunuwa elabo yotene, iyo ninottukuleleya odhowavi nilaleyaga. Vyaka dhotene attu matxikwi na matxikwi anna efunelo anowona Muttupo wa Wubuwela Okwa wa Yezu vina anomusunza Bibilia na iyo. Matxikwi mazana a attu anobatiziwa vina anovitaganyiha na iyo mmabasani a olaleya. Iyo kaninziwa muttengo wa attu anarumele miselu dhinlaleyihu, mbwenyi ninoziwa wi Yehova onotugumaniha muttitti munddimuwa obuwene onaviluwe mu goyini enddimuwa. (Ovu. 7:​9, 14) Yehova ddi Munya wa mabasaya vina iyene onoziwa wi attu enjene anele orumela miselu dhapama, nona ninele odhowavi nilaleyaga miselu dhapama.

18. Elobo gani enfunihu wi attu azinddiyele?

¹⁸ Anamafwara a Yezu anoziwiwa sabwa ya ozuzumela olaleya miselu dhapama. Motagiha, arumiwi anzuzumela olaleya na oliba murima, venevo attuya ‘ahinonelamo wi anedda na Yezu.’ (Mer. 4:13) Iyo vina ninfuna nizuzumele mabasa a olaleya noliba murima, txino attuya anodhaga ozinddiyela wi iyo vina ninomutagiha Yezu.