Novipimelela Orumele Esile Dhihinziwa Weyo

1. Ewodhelo gani enivahile Yehova vina sabwaya?

YEHOVA ohinipaddutxa na ewodhelo ya wubuwela, yosunza dhilobo dhiswa vina ononelamo mukalelo onawodhihu ovirihamo esile dhinsunzihu. Iyene onipaddutxelini dhahene? Wi niwodhe ofwanya eziwelo ya Mulugu vina olabihedha ewodhelo yehu yotanalela.—Gan. 2:​1-5; Rom. 12:1.

2. (a) Ebaribari gani enfwanyelihu ononelamo? (Job 37:​23, 24) (Koona vina foto.) (b) Ejo ekalele nni yapama mwa iyo?

² Ebaribari wi Yehova ohinipaddutxa na ewodhelo ya osunza, mbwenyi dhikalawo dhilobo dhinji dhihinziwihu. (Kengesa Job 37:​23, 24.) Katanalela yotagiha ya Job. Yehova wahimukosa mavuzo menjene Job alagiha wi dhahikalawo dhilobo dhinjene dhahaziwiye. Makani aba ahimukamihedha Job okala woviyeviha vina osisigula mukalelo waye wa wubuwela. (Job 42:​3-6) Na mukalelo wakakene japama iyo okala attu ovipimelela vina ononelamo wi kaninziwa dhotedhene. Dhahene ninowodha okuluvela wi Yehova onele onaddela txibarene ejile enfwanyelihu oziwa wi nikose dhogana dhapama.—Gan. 2:6.

3. Txini enone iyo mu nsunzoni ntti?

³ Mu nsunzoni ntti, ninele wona dhilobo dhing’onovi dhihinziwihu vina dhorutxa dhindaga iyo ogumanana sabwa ya ohiziwa miselu dhotedhene. Vina ninele wona ekalelani yapama ohiziwa dhilobo dhina. Osunza makani aba enele olibiha okuluvela wehu wi Yehova, Oddule onna eziwelo yoligana, ononivaha miselu dhili dhofuneya-wene.—Job 37:16.

KANINZIWA MUDHIDHI ONAFIYE OGOMA WA ELABO

4. Mowiwanana na Mateu 24:​36, elobo gani ehinziwihu?

⁴ Kengesa Mateu 24:36. Iyo kaninziwa mudhidhi onafiye ogoma wa elabo. Yezu vina valiye velaboni ya vati kaziwa ‘sikuna vina mudhidhiya.’a Musogorhomwa iyene ohatapulelamo arumiwi aye wi Yehova ddinfwanyelela ogana mudhidhi onapadduwe dhilobodha. (Mer. 1:​6, 7) Yehova ohigana mudhidhi onafiye ogoma wa elabo, mbwenyi kanina ewodhelo ya oziwa mowakwana-mwene mudhidhi onafiyani.

5. Ohiziwa mudhidhi onafiye ogoma wa elabo ennipatta dhavi?

⁵ Mowiwanana na ejile elogile Yezu, iyo kaninziwa mudhidhi onajedhele iyo ogoma wa elabo ohinafiya. Sabwa ya ejuwene ninodhaga ottiya okala attu ovilela obe okumuwa makamaka akala ninojedhela labo na Yehova mwari mwa mudhidhi mwinjene. Vina enodhaga okala yorutxa akala anamudhi ehu obe attu ena anonibedda sabwani omagomo wa elabo kunafiya. (2 Pe. 3:​3, 4) Txino ninodhaga wubuwela wi egahikala yovevuwa ojedhela vina ohinyimuwa attu ena aganibeddaga koziwa labo nigafiyile ogoma wa elabo.

6. Ekalele nni yapama ohiziwa mudhidhi onafiye ogoma wa elabo?

⁶ Mwebaribari sabwa ya ohinaddela siku ninafiye ogoma wa elabo, Yehova ononivaha gari ya olagiha wi ninimulabela iyene sabwa ya omukwela vina omukuluvela. Ninfuna nimulabele Yehova namukalakala, ottiya mpaka ogoma wa elabo bahi. Ottiya ozuzumela mudhidhi onafiye “siku na Yehova” egahikala yaderetu otanalela dhilobo dhapama dhinapadduwe siku ntti nigafiya. Dhahene ninele owodha okalavi wofiyedheya na Yehova, wunuwiha omukuluvela wehu vina okosa mpaka munwodhelihu wi nimwagalalihe.—2 Pe. 3:​11, 12.

7. Dhilobo gani dhinziwihu?

⁷ Jamakamaka ofwaseyela ejile enziwihu—wi malabo omariha aromile yaka ya 1914. Mbibiliani Yehova ohinivaha mavuhulo anlagiha wi malabo omariha aromile yaka ya 1914 vina onologa mowakwana-mwene mukalelo ogali elaboya oromana yakeneji. Nona ninokuluvela wi “siku ninddimuwa na Nabuya [Yehova] nili vakuvi.” (Sof. 1:14) Vina ninoziwa mabasa gani annifunana Yehova wi nikose, walaleyela attu enjene “miselu dhapama dha Omwene.” (Mt. 24:14) Miselu esi dhinolaleyiwa dhilabo vina mirudda dhowakwana 240 na dhilogelo okwaranya 1.000. Kili yofuneya iyo oziwa “siku ntto vina mudhidhi obo” wi nikose mpaka munwodhelihu mmabasani aba amakamaka.

IYO KANINZIWA MOWAKWANA-MWENE MUKALELO ONANIKAMIHEDHE YEHOVA

8. Mazu aba “mabasa a Mulugu” antapulela eni? (Kohelét 11:5)

⁸ Iyo kaninwodha ononelamo “mabasa a Mulugu.” (Kengesa Kohelét 11:5.) Mazu aba antapulela ejile enkosa Yehova vina ejile enrumeliye opadduwa wila akwanihedhe efunelo yaye. Iyo kaninziwa dhotedhene dhinimuttukulela Yehova ottiya elobo opadduwa obe mukalelo onanikamihedhiye. (Ms. 37:5) Bibilia onoladdaniha ononelamo “mabasa a Mulugu” na munuwelo wa mwana mbani mwa maye. Aziwitxi kanawodha ononelamo mowakwana-mwene munuwelo wa mwana mbani mwa maye. Na mukalelo wakakene, iyo kaninziwa mowakwana-mwene mukalelo onakose Yehova dhilobodha.

9. Sabwa ya ohiziwa mukalelo onanikamihedhe Yehova, txini endhaga opadduwa?

⁹ Sabwa ya ohinonelamo mukalelo onanikamihedhe Yehova ninodhaga ohiziwa enfwanyelelihu okosa. Txino ninodhaga wova okosa muli-mwetemwene wi nimulabele Yehova, ninga ovevutxa egumi yehu obe omwalela murudda ojombeliwa anamalaleya. Ninodhaga oroma wubuwela wi Yehova ohittiya oniruriha akala kaninwodha wakwanihedha dhogana dhehu, kaninona dhopurelamo dha mabasa ehu olaleya obe akala ninogumanana makattamiho mmabasani anttiddihu mu nikuruni na Yehova.

10. Mikalelo gani dhamakamaka dhinwodhihu wunuwiha sabwa ya ohiziwa mukalelo onanikamihedhe Yehova?

¹⁰ Ohiziwa mukalelo onanikamihedhe Yehova, enonikamihedha wunuwiha mikalelo ninga ovyeviha vina ovipimelela. Ninowodha ozinddiyela wi Yehova onoziwa ejile eli yapama mwa iyo. (Iza. 55:​8, 9) Ninowunuwiha omukuluvela wehu Yehova vina ninosunza wi dhilobodha dhineddele pama ninofwanyela omukuluvela iyene. Nigakana dhopurelamo dhapama mmabasani a olaleya obe mmabasani a mu nikuruni na Yehova, ninonvaha nttittimiho notene ole onfwanyelela, Yehova. (Ms. 127:1; 1 Ko. 3:7) Vina dhilobodha dhigahineddele ninga mwajedhelihu, ninofwanyelela wubuwela wi Yehova onoziwa dhotedhene. (Iza. 26:12) Iyo ninokosa mpaddi wehu vina ninokuluvela wi Yehova onele okosa mpaddi waye. Kaninaganyedha wi iyene onele oneddiha masiki ahikosaga na matikiniho ninga mwakoseliye masaka awale.—Mer. 16:​6-10.

11. Dhilobo gani dhamakamaka dhinziwihu mwaha wa Yehova?

¹¹ Iyo ninoziwa wi Yehova ddokwela, ddoligana vina ddeziwelo. Elobo yina vina enziwihu jawi Yehova onovaha ttima vaddiddi ejile enimukoselihu vina enakoselihu abali na arogora. Kaninaganyedha wi Yehova onowattuva mudhidhi wotene abale ali oweddeyana na iyene.—Ahe. 11:6.

KANINZIWA ENAPADDUWE MANGWANA

12. Txini ensunzihu na nlebo na Tiago 4:​13, 14?

¹² Kengesa Tiago 4:​13, 14. Elobo modha ehinaganyedhihu jawi kaninziwa enanipadduwele mangwana. Mwilaboni munkalihu iyo ninopattiwa na mudhidhi na dhohijedheleya. (Ko. 9:11) Sabwa ya ejuwene kaninziwa akala matadelo ehu anele wedda pama, nne vina akala ninele okalawo wi nakwanihedhe dhitadelihu.

13. Dila dhina niniviwamo dhavi sabwa ya ohiziwa dhilobo dhotedhene dhinapadduwe musogorho?

¹³ Enodhaga okala yorutxa iyo ovilela sabwani kaninziwa mowakwana-mwene ejile enapadduwe mangwana. Dhavi? Txino ninodhaga okala ozuzumene na enapadduwe mangwana ofiyedha orimeliwa wagalala. Egumi yehu enodhaga otxinja mohijedheleya, ejo enodhaga onitotela wiwa opa vina odhugudheya. Vina dhilobodha dhigahipadduwe ninga mwajedhelihu, ninodhaga okala okumuwene vina orimeliwa wagalala.—Gan. 13:12.

14. Wagalala wehu oniwanana na eni? (Koona vina mafoto.)

¹⁴ Kintanala empadduwa mwigumini mwehu, ninowodha olagiha wi ninimulabela Yehova sabwani ninomukwela. Bibilia ononilagiha wi kaninfwanyela ojedhela wila Yehova onele onibarela mmakattamihoni mwetemwene vina iyene kangana nottaga dhilobo dhinanipadduwele mwigumini mwehu. Yehova onoziwa wi wagalala wehu kunda sabwa ya oziwa dhotene dhinapadduwe musogorho. Mwebaribari, wagalala wehu ondha sabwa ya weddihiwa na Yehova vina omwiwelela. (Jer. 10:23) Nigatamela nikamihedho na Yehova wi nikose dhogana, kaninakale ozuzumene nitanalelaga ejile enapadduwe musogorho. Enkala ninga ninloga dhahi: “Yehova agafuna, ninele okalawo vina ninele okosa eji obe ejile.”—Tia. 4:15.

15. Txini enziwihu sabwa ya musogorho?

¹⁵ Ebaribari wi kaninziwa ejile enapadduwe musogorho, mbwenyi ninoziwa wi Yehova onikipirhela egumi yohimala—mwa ena egumi eji enakale wirimu oku mwa ena enakale velaboni ya vati. Ninoziwa wi Yehova kanzivala vina kayiwo elobo enambarele wakwanihedha mapikirhelo aye otene. (Tit. 1:2) Ddi iyene bahi onwodha ologa dhinfuna opadduwa vina ombaza ologa dhihinatti-wene opadduwa. Dhotene dhalogile Yehova wi dhigahipadduwa masaka awale, dhihakwanihedheya vina dhotene dhilogiliye wi dhinele opadduwa musogorho dhinele wakwanihedheya. (Iza. 46:10) Iyo ninokuluvela wi kayiwo elobo enamutximihe Yehova onikwela. (Rom. 8:​35-39) Kintanala empadduwa mwigumini mwehu, iyene onele onivaha eziwelo, nipangarhazo vina guru enfunihu wi nivilele. Kaninaganyedha wi Yehova onele onikamihedha vina oniruriha.—Jer. 17:​7, 8.

KANINWODHA ONONELAMO MOWAKWANA-MWENE MUKALELO ONNIZIWA YEHOVA

16. Txini enziwa Yehova mwaha wehu, nanda weyo onviwamo dhavi? (Masalmo 139:​1-6)

¹⁶ Kengesa Masalmo 139:​1-6. Muttanddi wehu ononiziwa pama, iyene onoziwa esile dhinubuwelihu vina mukalelo oniviwamo iyo. Iyene onoziwa dhilobo dhinlogihu na esile dhili mmurimani mwehu. Onoziwa dhinkosihu vina sabwaya enkoselihu. Mwene Davidi ohiloga wi Yehova oli womala-nawale wi anikamihedhe vina Iyene onowodha okosa ejuwene. Weyo oniviwamo dhavi sabwa ya oziwa wi Namadhulu-dhulu wa elabo yotene, Mpaddutxi wa erimu vina wa elabo ya vati onomuzuzumela muttu-muttu wa iyo? Kahiyo yotikiniha? Davidi ohiloga dhahi: “Oziwa oku wenyu onodditikiniha, othabwile bure, kaddinfiyedha-wene.”—Ms. 139:6.

17. Sabwaya jani enodhaga okala yorutxa orumela wi Yehova ononiziwa deretu?

¹⁷ Sabwa ya mukalelo oleliwehu, mweddelo wehu obe esile dharumelihu nihinatti osunza ebaribari, enodhaga okala yorutxa omoona Yehova ninga Babi onnikwela vina onnitanala. Obe txino ninowubuwela wila dhovonya dhehu dha wale sabure vaddiddi, nona Yehova txipo kanafune okala marho wehu vina oli wolapelana na iyo. Dila dhina Davidi waniviwamo dhahene. (Ms. 38:​18, 21) Obe txino muttu onivilibihedha okana egumi enimwagalaliha Yehova, onovivuza, ‘Akala Mulugu onoddiziwa pama onfunelani wi ddinyanyale mweddelo onkala ninga bwa pama mwa miyo?’

18. Ekalile nni yapama orumela wi Yehova ononiziwa deretu opitta iyo nanya? (Koona vina mafoto.)

¹⁸ Jamakamaka orumela wi Yehova ononiziwa pama opitta iyo nanya vina onowona dhilobo dhapama mwa iyo esuwene dhinwodhihu wona. Masiki onaga dhovonya dhehu, Yehova onoziwa wi ninovilibihedha okana mikalelo dhapama vina iyene ononikwela vaddiddi. (Rom. 7:15) Niganonelamo wi Yehova txibarene onowona ewodhelo yehu, ninokana guru enfunihu wi nimulabele nororomeleya vina nowagalala.

19. Txini enziwihu mwaha wa Yehova?

¹⁹ Ninoziwa wi Yehova okwela. Kaninaganyedha ejuwene. (1 Jo. 4:8) Ninoziwa wi dhotedhene dhinnikumbirhiye onkosela sabwa ya onikwela, iyene vina ononifunana dhilobo dhapama. Vina ninoziwa wi Yehova onfuna wila nikane egumi yamukalakala. Wi ejo ewodheye ohinivaha yobolo. Mvaho obu ononikuluveliha wi masiki na ohiligana wehu enowodheya omwagalaliha Yehova. (Rom. 7:​24, 25) Vina ninoziwa wi “Mulugu munddimuwa opitta murima wehu vina onoziwa dhilobo dhotedhene.” (1 Jo. 3:​19, 20) Yehova onoziwa dhotedhene mwaha wa iyo vina ohikana ebaribari wi ninele owodha okosa ejile ennikumbirhiye.

20. Sabwaya jani kaninfwanyelela okala wozuzumene na esile dhihinziwihu?

²⁰ Yehova txibarene ononaddela dhotene dhinfwanyelihu oziwa. Nona kaninfwanyela ozuzuma na esile dhihinziwihu, ottiya ejo ninofwanyela ozuzumela ejile eli yamakamaka. Dhahene ninolagiha wi nili attu oviyeviha vina ninomukuluvela kakamwe Yehova, Oddule onna eziwelo yoligana. (Job 36:4) Ebaribari wi kaninnonelamo dhilobo dhina ovanene, mbwenyi ninoziwa wi Yehova onele odhowavi anisunzihaga namukalakala. Ejo japama sabwani kaninattiye osunza dhilobo dhiswa mwaha wa Mulugu wehu wotikiniha.—Ko. 3:11.