Kakumbirha Nikamihedho na Anddimuwa a Mmulogoni

1. Ninziwa dhavi wi Yehova onowavaha ttima alabeli aye?

YEHOVA onowakwela otene animulabela vina onowazuzumela dhahene ninga munzuzumela mukumbuzi mabila aye. Iyene ohimperheka Mwanaye ninga mukutto wila afurule vina ohattoma anddimuwa a mmulogoni wi aweddihe. (Mer. 20:28) Yehova onfuna wi alabeli aye eddihiwege na okwela. Yehova omuttoma Yezu wi akale musorho wa mulogo. Awene anfuna wi anddimuwa a mmulogoni eddihege mabila aye na oderetu. Anddimuwa a mmulogoni anolagiha wi anomutagiha Yezu modhela okamihedha mabilaya okana mandano ofiyedheya na Yehova.—Iza. 32:​1, 2.

2. Mowiwanana na Ezekiyel 34:15, 16 Yehova onazuzumeletxa ani?

² Yehova onowazuzumela alabeli aye otene, mbwenyi onazuzumeletxa abale antabuwa. Ena anotabuwa sabwa ya dhovonya dhikosilani, nona Yehova onowalabihedha anddimuwa a mmulogoni wi àkamihedhe. (Kengesa Ezekiyel 34:​15, 16.) Yehova onofuna onikamihedha, ttabwa-ttabwa nigatamelaga nikamihedho naye. Mudhidhi onfuna iyo nikamihedho ottiya olobelavi na murima wehu wotene nikumbiraga nikamihedho na Mulugu, iyo ninofwanyela otamela nikamihedho na “akumbuzi vina anamasunziha” a mmulogoni.—Ef. 4:​11, 12.

3. Nsunzo ntti nikalile nni namakamaka mwa iyo notene?

³ Mu nsunzoni ntti, ninele wona mukalelo onalabihedha Yehova anddimuwa a mmulogoni wi àkamihedhe abale antamela nikamihedho nomuyani. Ninele wona vina dhowakula dha mavuzo aba: Mudhidhi gani onfwanyelihu okumbirha nikamihedho na anddimuwa a mmulogoni? Ninfwanyelela nni okumbirha nikamihedho na anddimuwa a mmulogoni? Vina anddimuwa a mmulogoni annikamihedha dhavi? Dhowakula dha mavuzo aba, anele onikamihedha iyo notene na abaleya anna mandano oliba na Yehova, wenjedhedha otamalela mukalelo onalabihedha Yehova anddimuwa a mmulogoni vina oziwa enfwanyelihu okosa nigafunaga nikamihedho nawa.

MUDHIDHI GANI ONFWANYELIHU OKUMBIRHA NIKAMIHEDHO NA ANDDIMUWA A MMULOGONI?

4. Ninziwa dhavi wi mazu anfwanyeya va Tiago 5:​14-16, 19, 20 anloga oredda womuyani? (Koona vina mafoto.)

⁴ Murumiwi Tiago otapulelamo mukalelo onalabihedha Yehova anddimuwa a mmulogoni wila anikamihedhe. Tiago ohileba dhahi: “Okalavo muttu oli muredda vari venyu? Oddoyá akuwele anddimuwa a mmulogoni.” (Kengesa Tiago 5:​14-16, 19, 20.) Apa Tiago onimulogavo muttu, oli muredda mpaddi womuyani. Tiago onologa wi muttuya atamele nikamihedho na anddimuwa mmulogoni, ottiya nikamihedho na mediku. Tiago vina onotapulelamo wi muttu oli muredda mpaddi womuyani wila avulumuwe, onofwanyela oleveleliwa dhottega dhaye. Mwa mpaddi mwina, muttu oli muredda mpaddi womanigoni wila avulumuwe, onofwanyela odhowa wa mediku vina omwaddela ejile eniwiye. Ottiya ejo, iyene onofwanyela ofwara ejile enamwaddele medikuya. Na mukalelo wakakene akala ninofuna okana mandano ofiyedheya wili na Yehova, ninofwanyela ologa na anddimuwa a mmulogoni, wawaddela makattamiho ehu vina ofwara malago ananivahe awene andela mBibiliani.

5. Ninaziwe dhavi akala ninowobana mpaddi womuyani?

⁵ Va Tiago kapitulu 5, Tiago ononikokomeza watamela anddimuwa a mmulogoni mudhidhi wotene onzinddiyelihu wi ninowobana mpaddi womuyani. Mbwenyi, egahikala ya malago otamela nikamihedho nihinatti ononga mandano ehu na Yehova! Bibilia onologa wi nigahikale txenjewa ninodhaga wubuwela wila nikana mandano ofiyedheya na Yehova, oku ehili ejuwene. (Tia. 1:22) Jijuwene epadduwile na Akristu ena akala o Sardes. Mbwenyi Yezu wahawaddela wi dhakosani kadhamuzivela Yehova. (Ovu. 3:​1, 2) Ninaziwe dhavi wila nikana mandano oliba na Yehova? Modhela oladdaniha mukalelo wamukwelihu Yehova mmalelihu obatiziwa na mukalelo onimukwelihu ovanene. (Ovu. 2:​4, 5) Ninofwanyela ovivuza dhahi: ‘Ddinoziveliwa omwengesa Bibilia vina ddinotamela mudhidhi wotanalela ninga mwakoselimi wale? Ddigadhowa omatugumanoni ddinovaha dhowakula obe ddinosasanyedha matugumanoya? Ddinozuzumela mabasa olaleya ninga wale, obe ddinononga mudhidhi waga na dhilobo dhina? Ovano ddinzuzumeletxa okana kobiri opitta wale?’ Dhowakula dha mavuzo aba egakala ndde, ejo enodhaga olagiha wi mandano ehu na Yehova kalibile. Nigahikose elobo wila nilibihe ejo enodhaga ottabwa. Akala kaninwodha olibiha mandano ehu na Yehova nokihu obe akala nihikosa elobo enziwihu wila enomunyimula Yehova, ninofwanyela otamela nikamihedho na anddimuwa a mmulogoni.

6. Txini enfwanyela okosa muttu okosile yottega enddimuwa?

⁶ Ebaribari wi muttu okosile yottega enddimuwa egamuttukuleli oburutxiwa mmulogoni, onofwanyela watamela anddimuwa a mmulogoni. (1 Ko. 5:​11-13) Muttu-muttuvi onkosa yottega enddimuwa, onofuna nikamihedho wi onuwihe mandano aye na Yehova. Wila Yehova amulevelele modhela yobolo, muttegiya onofwanyela olagiha ‘merelo anoniha otxinuwa waye.’ (Mer. 26:20) Merelo aba anowiwanana na wawaddela anddimuwa a mmulogoni yottega ekosiliye.

7. Ena anfuna nikamihedho na anddimuwa a mmulogoni bani?

⁷ Anddimuwa a mmulogoni kanakamihedha bahi abale akosile yottega enddimuwa, mbwenyi awene anowakamihedha vina abale obanile mpaddi womuyani. (Mer. 20:35) Motagiha, txino weyo onozuzuma wubuwelaga wi kunwodha owanana dhifunelo dhawo dhabure. Ejo enodhaga okala yorutxa makamaka akala ohinatti osunza ebaribari wanja mirobwe dhinnonga ogogo, wanawona attu bali yovi obe wankosa ogonihana wonyakuwa. Weyo kunfwanyela owanana weka dhifunelo esi dhabure. Enowodheya ologa na munddimuwa wa mmulogoni mmodha onimukuluvela weyo, iyene onele ouvuruwana, ouvahaga malago vina onele wukuluveliha wila Yehova oli wowagalalene sabwa ya owanana dhifunelo dhawo dhabure. (Ko. 4:12) Txino onodhaga okala wokumuwene sabwa ya okana dhifunelo dhabure, anddimuwa a mmulogoni anele owubutxedha wi Yehova oli wowagalalene sabwa ya weyo okumbirha nikamihedho. Eji enotonyihedha wi oli muttu woviyeviha, onofuna wunuwiha mandano awo na Yehova vina omwagalaliha iyene.—1 Ko. 10:12.

8. Koddi ninofwanyela wawaddela anddimuwa a mmulogoni dhovonya dhotene dhinkosihu? Katapulela.

⁸ Kaninfwanyela watamela anddimuwa a mmulogoni dila dhotedhene dhinkosihu dhovonya. Motagiha, katanalela dhahi, weyo osilidhiwa vaddiddi ofiyedha omulogela mbali obe murogora mazu osuva. Ottiya onveda munddimuwa wa mmulogoni kafwara mazu a Yezu a otehiyana na mbalawo. (Mt. 5:​23, 24) Enowodheya weyo opepesa mwaha wa ovilela, okurumuwa na ovipimelela wi owodhe otonyihedha mikalelo esi musogorho. Ebaribari wi ogahiwodhe otehiyana na mbalawo, onofwanyela okumbirha nikamihedho na anddimuwa a mmulogoni. Mukartani nalebelile murumiwi Paulo akadda Filipi, iyene ohimukumbirha mbali mmodha wila amukamihedhe Evódia na Síntike ogomiha ohiwanana wawa. Na mukalelo wakakene enowodheya munddimuwa wa mmulogoni wuvaha nikamihedho nakakene.—Flp. 4:​2, 3.

NINFWANYELELA NNI OKUMBIRHA NIKAMIHEDHO NA ANDDIMUWA A MMULOGONI?

9. Sabwaya jani kaninfwanyela ottiya manyazo onitximiha wawaddela anddimuwa a mmulogoni dhovonya dhehu? (Gano 28:13)

⁹ Ninofwanyela okana nroromelo vina oliba murima wi nikumbire nikamihedho, nigakosa yottega enddimuwa obe nigoona wi kaninwodha owanana dhifunelo dhabure. Kaninfwanyela ottiya manyazo onitximiha ologa na anddimuwa a mmulogoni. Sabwaya jani? Sabwani Yehova ohinivaha anddimuwa a mmulogoni wila anikamihedhe okana nroromelo noliba vina mandano oliba na iyene. Nona nigaatamela anddimuwa a mmulogoni, ninolagiha wi ninokuluvela mukalelo onubuwela Yehova vina ninomwiwelela. Ottiya ejo, ninotonyihedha wi ninofuna nikamihedho naye wi nihigwele munyengetteyani vina nidhowegevi nikosaga ejile eli yapama. (Ms. 94:18) Nigakosa yottega enddimuwa, ninele wakela ttagaraga ya Yehova nigawaddela anddimuwa a mmulogoni yottega ekosilihu vina nigattiya okosa yottegaya.—Kengesa Gano 28:13.

10. Txini enapadduwe nigavita dhottega dhehu?

¹⁰ Iyo ninokana mareliho menjene nigawaddela anddimuwa a mmulogoni dhottega dhehu; mwa mpaddi mwina, nigavita dhottega dhehu ninodhaga ottabwiha makaniya. Mwene Davidi wahivita dhottega dhaye. Sabwa ya ejuwene, iyene wankubanya vina murima wanimpa sabwani mandano aye na Yehova kali deretu. (Ms. 32:​3-5) Elodda egagonela osasanyiwa enopa vaddiddi, na mukalelo wakakene nigakosa yottega enddimuwa vina nigahakele nikamihedho na anddimuwa a mmulogoni ninoyelela mandano ehu na Yehova. Iyene kanfuna wila ejo epadduwe, nona aganaddela wi navede anddimuwa a mmulogoni abuwene analabihedhiye wila anikamihedhe okana mandano oliba wili na iyene.—Iza. 1:​5, 6, 18.

11. Nigavita dhottega dhehu dhinddimuwa dhinapatte dhavi ena?

¹¹ Nigavita yottega enddimuwa ekosilihu, attu ena anodhaga otabuwa. Motagiha, mulogo kugakelile muya wokoddela ninga mwafuneyelani vina nigahidha wika vangovini murenddele wa abali na arogora. (Ef. 4:30) Na mukalelo wakakene, nigaziwa wi mbali ohikosa yottega enddimuwa vina nigavita yottegaya iyo ninokana muladdu ninga iyene.a Nona ninofwanyela omukokomeza muttuya wi awaddele anddimuwa a mmulogoni yottega ekosiliye. (Ona. 5:1) Mwa ovira wa mudhidhi agahikose ejuwene, okwela vina weddeyana wehu na Yehova onele onittukulela wawaddela anddimuwa a mmulogoni makaniya. N’eji ninokosa mpaddi wehu, ninottiya mulogoya wokoddelene vina ninomukamihedha muttuya wiyelela wili okana mandano na Yehova.

ANDDIMUWA A MMULOGONI ANNIKAMIHEDHA DHAVI?

12. Anddimuwa a mmulogoni anakamihedha dhavi abale obanile mpaddi womuyani?

¹² Bibilia onologa wi anddimuwa a mmulogoni anofwanyela wakamihedha abale obanile mpaddi womuyani. (1 Te. 5:14) Akala weyo okosa yottega, awene txino anele wukosa mavuzo wi aziwe ejile enubuweliwe. (Gan. 20:5) Ejo txino enodhaga ohikala yovevuwa mwa weyo, sabwa ya mburo wunuweliwe, mukalelo wawo obe sabwa ya manyazo mwaha wa ejile ekosiliwe. Mbwenyi enowodheya wakamihedha anddimuwa a mmulogoni modhela ohivita makaniya. Kuwove akala onologa mazu ohifwanyelela. (Job 6:3) Anddimuwa a mmulogoni kanamaguvele wuttonga sabwa ya ejile elogiliwe, ottiya ejo anele wuvuruwana na ofwaseya ahinatti wuvaha malago andela mBibiliani. (Gan. 18:13) Anddimuwa a mmulogoni anoziwa wi omukamihedha muttu onottukula mudhidhi vina wi kinawodheye onvaha nikamihedho ninfuneya dila yoroma enimwaredhelani muttuya.

13. Malobelo a anddimuwa a mmulogoni vina malago awa andela mBibiliani ananikamihedhe dhavi? (Koona vina mafoto.)

¹³ Anddimuwa a mmulogoni kanfuna wupwatteliha muladdu sabwa ya ejile epadduwile. Ottiya ejo, awene anolobela vamodha na weyo. Onodhaga otikina ewodhelo ena malobelo awa. Muttu agakumbirha nikamihedho na anddimuwa a mmulogoni awene ‘anomuttikittela makura na nzina na Yehova.’ (Tia. 5:​14-16) “Makura” aba anaddiwana ebaribari ya Nzu na Mulugu. Anddimuwa a mmulogoni anele olabihedha malebo a mBibiliani anawukamihedhe okala ofwaseyene, anawupangarhaze vina anowukamihedha okana mandano oliba wili na Yehova. (Iza. 57:18) Malago awa andela mBibiliani anowuvaha guru ya odhowagavi okosaga ejile eli yapama. Modhela anddimuwa a mmulogoni, weyo onele ovuruwana lizu na Mulugu nilogaga: “Dila jiji: vira ejene.”—Iza. 30:21.

14. Mowiwanana na Galásia 6:1 anddimuwa a mmulogoni animukamihedha dhavi muttu oromile “wedda dila yabure”? (Koona vina mafoto.)

¹⁴ Kengesa Galásia 6:1. Mukristu oromile “wedda dila yabure” kanedda mowiwanana na magano oligana a Yehova. Iyene txino onokosa dhogana dhabure obe onokosa yottega enddimuwa. Anddimuwa a mmulogoni na okwela anotamela “omwiyihedha mudilani yebaribari; . . . na murima wofwaseya vina wokurumuwa.” Nzu ntti ninlogiwa na Egrego “omwiyihedha” nanlabihedhiwa wi nimutonye mediku oniyihedha vamburoni nigogoddo nundeyile wi naguve ovola. Mediku wa ttotto onovilibihedha wiyihedha nigogoddo valani ahimutotelaga wiwa opa vaddiddi muttuya, anddimuwa a mmulogoni agamukamihedhaga muttuya awene kanfuna wi mbaliya atabuwe. Ottiya ejo, na oderetu anokosa muli-mwetemwene wi amukamihedhe mbaliya. Bibilia onologa wi anddimuwa a mmulogoni anofwanyela oviyang’anela. Anddimuwa a mmulogoni agamukamihedhaga muttu wiyelela wedda mudilani yebaribari, awene anononelamo wi attu ohiligana vina anokosa dhovonya. Awene kanubuwela wi balitxi amakamaka opitta ena, ottiya ejo awene anovilibihedha okala oviyeviha vina watanala ena.—1 Pe. 3:8.

15. Nigakana makattamiho txini enfwanyelihu okosa?

¹⁵ Iyo ninofwanyela wakuluvela anddimuwa a mmulogoni. Yehova ohasunziha anddimuwa a mmulogoni ohawaddela attu ena makani ehu omwinya, onivaha malago andela mBibiliani ottiya monelo dhawa vina odhowagavi anikamihedhaga ottukula mittorho dhehu. (Gan. 11:13; Gal. 6:2) Anddimuwa a mmulogoni ahikana mikalelo dhottiyana, ena adhile alabaga mwawale ninga anddimuwa a mmulogoni oku ena aswa. Mbwenyi kaninfwanyela wova ologa na awene. Ebaribari wi kaninadhowe wakumbirha malago anddimuwa otene nitamelaga onfwanya oddule analoge ejile enfunihu wiwa. Kukosa ejuwene, nigali ninga attu abale anfuna wiwa esile dhinziveliwani ottiya esile dhinsunziha Yehova mu Nzuni naye. (2 Tm. 4:3) Ahinatti onivaha malago txino munddimuwa wa mmulogoni onele onivuza akala nihiloga na anddimuwa ena a mmulogoni vina malago gani anivahilani. Ottiya ejuwenevi, sabwa ya okala ovipimelela onele onvuza munddimuwa wa mmulogoni mwina mwaha wa makaniya.—Gan. 13:10.

MUTTORHO WEHU

16. Muttorho gani onna muttu-muttu wa iyo?

¹⁶ Masiki anddimuwa a mmulogoni anang’anelaga ninga mabila a Yehova, awene kannaddela elobo gani enfwanyelihu okosa. Muttu-muttu wa iyo onofwanyela omutonyihedha Yehova na merelo vina dhologa dhehu dha siku na siku wila ninomukwela vina ninofuna omwagalaliha. (Rom. 14:12) Na nikamihedho naye ninele owodha okalavi ororomeleya. Ottiya anddimuwa a mmulogoni onaddela ejile enfwanyelihu okosa, awene anonikamihedha ononelamo ejile enubuwela Yehova mwaha wa makaniya vina anonittiya okosa dhogana dhehu nanya. Nigatanalela magano a mBibiliani annivaha anddimuwa a mmulogoni vina nigalabihedha ninele oshagiha ‘mubuwelo wehu’ wi nikose dhogana dha malago.—Ahe. 5:14.

17. Yogana gani enfwanyelela iyo notene okosa?

¹⁷ Gari enddimuwa okala alabeli a Yehova! Yehova ohimuruma “mukumbuzi wapama” Yezu, wi anipitxele yobolo vina okana gari ya okalawo namukalakala. (Jo. 10:11) Ottiya ejo, Yehova ohinivaha anddimuwa a mmulogoni annikamihedha dhahene ninga mwapikirheliye: “Ddinere ouvahani akumbuzi analabe bari munfunela murima waga, ausapiyegeni na malago na ononelamo.” (Jer. 3:15) Nigobana mpaddi womuyani, momaguva-mwene ninofwanyela okumbirha nikamihedho na anddimuwa a mmulogoni. Iyo notene niganeni opura mvaho obu wa Yehova, anddimuwa a mmulogoni.