Nyuwo Amambali, Munowakamihedha Aninyu Ofiyedha Ttarho ya Wubatiziwani?

1. Amambali a Akristu ankanela nni efunelo ya oziwa deretu akala anawa ahigana-wene obatiziwa?

“MYERI dhivirile miyo ddannimwaddela papa na mama wi ddinfuna ddibatiziwe; makani aba awene anloga na miyo malabo otene. Awene afuna anonelemo akala miyo ddali-wene womala na wale wi ddibatiziwe. Labo na 31 mweri wa Dezemburu yaka ya 1934, ntti nali labo na ttima vaddiddi mwigumini mwaga.” Aba mazu alogile Blossom Brandt sabwa ya ejile empadduweli venevo vobuweliye obatiziwa. Masaka abano ahikalawo ababi ana efunelo ya wakamihedha aniwa osakula na malago dha mwigumini mwawa. Akala aima anottigirigela obatiziwa s’ohikaana mwahaya, ottigirigawa onela watotela ngovi y’oputtula mandano awa na Yehova. (Tiago 4:17) Ababi a malago anowavuza anawa deretu ahinatti obatiziwa, apo anilela wi akaane ebaribari akala anawaya anela okala-wene anamafwara a Kristu.

2. (a) Txini yonile nameddelela milogo dhahi? (b) Txini enasunzihu mwari mwa mutoma obu?

² Nameddelela milogo dhahi wahoona wi ahikalawo azombwe anfiyedha okaana vyaka 20 ahinatti obatiziwa, mbwenye anleliwa mwibaribarini. Masaka menjene azombweya aba anodhowa omatugumanoni, mmabasani olaleya, vina anovona ninga Anamoona a Yehova. Mbwenye akala kanatti omperhekela Yehova egumi yawa wi abatiziwe, enkala ninga ekana enubuwelani anya. Mwa mpaddi mwina eji empadduwaga sabwa yawi amambali a azombweya anowoona wi anawaya kanavisasanyedha deretu wi abatiziwe. Mwari mwa mutoma obu iyo ninela ologa dhilobo nai dhinakosiha amambali wattigirigiha anawa wubatiziwani.

VYAKA DHA MWANAGA DHIHIMALA WAKWANA?

3. Txini yobuwela amambali a Blossom?

³ Amambali a Blossom, alogiwe ddima yoroma, annubuwela akala mwanawa wahikaana vyaka dhawakwanela wi abatiziwe, vina awene annubuwela akala mwanawaya wanziwa ttima ya obatiziwa. Ababi anawodhe dhavi ozinddiyela akala anawa ahimala ovisasanyedha wi amperhekele Yehova egumi yawa?

4. Nlamulo na Yezu nili va nivuruni na Mateu 28:19, 20 ninwodha dhavi wakamihedha amambali masaka abano?

⁴ Kengesa Mateu 28:19, 20. Bibilia kanloga vyaka dhinfuniwana muttu okaana wi abatiziwe. Mbwenye ababi anofuniwana winanela deretu wi anonelemo txini eniwanana na wakosa anamasunza. Elogelo ya Egregu, mazu aba awi “wakosa anamasunza” alogiwe va Mateu 28:19 antapulela omusunziha muttu na efunelo ya omukamihedha wi akale namafwara. Namafwara muttu onsunza vina onnonelamo dhisunzihile Yezu agamala bagewelela. Muttu agakala mwanene, amambali aye anofwanyela omusunziha na efunelo ya omukamihedha mwanaya omperhekela Yehova egumi yaye wi musogorho akale namafwara wa Kristu. Mbwenye, enoziweya wi ayima ang’ono-ng’ono kanrumelihiwa obatiziwa. Masiki dhawenevi Bibilia onolagiha wi ayima aba ahikaana ewodhelo ya ononelamo vina okwela ebaribari.

5, 6. (a) Dhinloga Bibilia mwaha wa Timóteo dhinnittukulela ononelamo eni mowiwanana na obatiziwa waye? (b) Merelo gani alí ofuneya wi ababi akamihedhena anawa?

⁵ Timóteo wali namafwara omperhekele Yehova egumi yaye muzombweni-mwene. Murumiwi Paulo wahiloga wi Timóteo oromile osunza ebaribari ya Mazu a Mulugu “vohimáni.” Babi wa Timóteo kamulabela Yehova, mbwenye maye na bibe ahimukamihedha okaana elemelelo ya wedda na Mazu a Mulugu. Musunzeliye malebo okoddela bali mwana, nroromelo naye nihiwarala. (2 Timóteo 1:5; 3:14, 15) Txino wahittigiriga muzombweni mwaye mbwenye mwari mwa vyaka 20, wahivilibihedha ofiyedha ottomeliwa mabasa a mmulogoni.​—Merelo 16:1-3.

⁶ Ayima anottiyana. Kahiyo otenevi ammaguvela wunuwa mpaddi womuyani. Akalawo ayima ena annonelamo ebaribari, agamala bagana-wene weddana, anofiyedha vina okaana efunelo ya obatiziwa bali azombwene. Ena anovonana ohakwana wa obatiziwa, yubuwelo yawa jawi ajedhe wi onuwe vang’onovi. Amambali a malago kanamagelela anawa obatiziwa. Ottiya wamagelela, awene anokosa guru dhotene wi akamihedhe anawa odhowa vasogorho anyene. Amambali anohagalala anawa agavirihamo malago ali nivuru na Gano 27:11. (Kengesa.) Mbwenye aweneya kadduwale wi mabasa attomeliwani ba wakamihedha anawa wi akale anamafwara a Yezu. Mowiwanana na mabasa aba, awene anofuniwana ovivuza, ‘Mwanaga ohikaana eziwelo yawakwana ya omperhekelana Mulugu egumi yaye wi abatiziwe?’

MWANAGA OHIKAANA EZIWELO YAWAKWANA?

7. Muttu onfuna obatiziwa enfuneyela eni ononelamo deretu magano a Bibilia ahinatti obatiziwa? Katapulela.

⁷ Amambali anowakamihedha vina wasunziha aniwa, ofiyedha ononelamo ebaribari. Eziwelo eji enela wattukulela ayima omperhekela Mulugu egumi yawa. Ababi kakaane muyubuweloni wila anawa anofwanyela oziwa dhotedhene dhilebiwe mBibiliani, ahinatti omperhekela Yehova egumi yaye wi abatiziwe. Anamafwara otene a Kristu anofuniwana osunzagavi, masiki agamala obatiziwa. (Kengesa Kolosi 1:9, 10.) Kito muttengo gani weziwelo onfuniwana muttu okaana ahinatti obatiziwa?

8, 9. Txini epadduwile na mwang’aneli wa elabo y’Ofilipi, vina yopadduwa eji ennisunziha nni?

⁸ Dhotagiha dha anamudhi a wale dhinowodha wakamihedha amambali a masaka abano. (Merelo 16:25-33) Yaka ya 50, Paulo wahidhowa kwatti y’Ofilipi, oku wali oleddo waye wanawili mmabasani a omisionario. Mfiyedhiye wenewale, iyene vamodha na Sila ahimagedhiwa, ahiwasuliwa vina ahifugeliwa mukambura. Vari va mattiyu ohiweya ottekenyeya wa mattaka odhile ofugula misuwo dhotedhene dha mukamburamwa. Namang’anela wa afugeliwi ohirurumuwa, vina wobuwela wi afugeliwi otene amala ottawamo, noona wobuwela ovipa. Mbwenye Paulo ohimuttidda. Mmalelani venevo, Paulo vamodha na Sila ahimusunziha namang’anela na amudhaye otene ebaribari ya Yezu. Awene ahirumeela dhotene dhisunzihiwani vina ahonamo ttima ya omwiwelela Kristu. Mmalelani ahibatiziwa. Yopadduwa eji ennisunziha nni?

⁹ Enkala ninga namang’anela oddu wali munyakoddo wa akadda Roma. Iyene kaziwa Mazu a Mulugu. Mbwenye wi akale Mukristu yanfuneya osunza niparha na ebaribari ya mBibiliani, ononelamo txini enfuniwana mulabeli wa Yehova, vina wanfuniwana ovirihamo masunziho a Yezu. Esile dhisunziliye mudhidhi obule mung’onovi dhahimukosiha iyene okaana efunelo ya obatiziwa. Iyo kanimbasiya osunza mazu a Mulugu ninele odhowavi banigasunza. Mwanawo agowaddela wi ofuna abatiziwe sabwa yawi onomukwela Yehova vina onfuna amwiwelele, txini enakosiwe? Omuttiye mwinya aloge na anddimuwa a mmulogoni abuwene anona akala muttuya okaana yeddelo enimuttukulela wubatiziwani.a (Koona yawenjedhedha.) Agamala obatiziwa, iyene onela odhowa bagasunza dila dha Yehova mwigumini mwaye mwetemwene, dhahene ninga munkosela Akristu ena.​—Roma 11:33, 34.

MASUNZIHO GANI A TTIMA ANFWANYELA MWANAGA OTTIDDELA?

10, 11. (a) Amambali ena ankanaga dhubuwelo gani? (b) Txini enawodhihe aima okala obareleya?

¹⁰ Ababi ena ahikaana dhubuwelo dhawi anawa abatiziwe agagomiha masunzo oskola, obe ogakaana ganyo ya muhaku wawila-ndditti. Yubuwelo eji enkala ninga kahiye yotowa malago, mbwenye ababiya aba arome ovivuza dhahi: ‘Esidha dhinela omukamihedha mwana ofwanya mperhe mwigumini mwaye? Dhubuwelo esi dhinowiwanana na masunziho a mBibiliani? Yehova onfuna wi neddihe dhavi egumi yehu?’​—Kengesa Kohelét 12:1.

¹¹ Kanidduwaleni wi elabo ejino na dhotedhenedhamo dhinogudulana na efunelo vina yubuwelo ya Yehova. (Tiago 4:7, 8; 1 Joau 2:15-17; 5:19) Mwana agandana na Yehova onobareleya mmirhakoni mwa Satana, kamfilela mento dh’elabo vamodha na vimanyadha dhilimo. Akala ababi anomukokomeza mwanawa weka vamburoni woroma masunzo obe ganyo ya muhaku, mwanaya onodha wubuwela wi dhamwilaboni silitxi dha ttima opitta wandana na Yehova. Porhe-porhe na dh’elabo. Nyuwo muli ababi okwela, munfuna-wene wi elabo eji yadhalihedhe aninyu dhubuwelo dhotowa basa, dhigonani wi dhinela wawagalaliha? Mperhe na wagalalawa webaribari onttiddiwa na abale aneedda na Yehova mwigumini mwawa.​—Kengesa Masalmo 1:2, 3.

KI MWANAGA AGADHA OMUTTEGELA YEHOVA?

12. Ababi ena ankaanela nni yubuwelo ya omuttigirigiha mwanawa wubatiziwani?

¹² Mambali dhahi ohitapulelamo enimukoddiha omulibihedha mwanaye wubatiziwani. Mazu alogiliye baba, “Ttimarima yanddittamaga ddigobuwela makani a omwaddela mwanaga wi muttuya agamuttegela Mulugu onoburutxiwa mmulogoni.” Moligana na murogora oddu, ababi ena anfuna wi aniwa ajeedhe ofiyedha okaana vyaka dhinonani wi dhiwakwanela obatiziwa, apo yotene ejo anova mwanawaya anadhe omuddawela Mulugu. (Wita 8:21; Gano 22:15) Ababi aba anila mwanawa agabatiziwe, kamburutxiwa omulogoni. Veneva yabureyavo jivi?​—Tiago 1:22.

13. Akala muttu kanatti obatiziwa, eji enlagiha wi kanziwiwa na Yehova? Karoma ononihedhamo.

¹³ Joziweya wi ababi kanfuna wi mwanawa abatiziwe nakulu kanatti omperhekela Yehova egumi yaye. Yabureyavo ja wubuwela wi mwana onroma oziwiwa na Yehova agamala obatiziwa; kahiye mwenemo. Ole onnona dhapama, attiya wira onottega, noona mwana oroma oziwiwa na Yehova venevo vanromiye oziwa dhapama (Kengesa Tiago 4:17.) Amambali a malago kanttiya omulibihedha mwanawa ttarho ya wubatiziwani. Masiki akala muttuya muzombwe, awene amuziwihe dhinloga Yehova wi esi dhitakala esi dhikoddela, dhahene ninga musunzilani. (Luka 6:40) Mwanawo agamukwelaga Yehova, onela osutuwa muttegani, sabwani iyene onela okaana efunelo ya okosa enimuruma Yehova.​—Izaiya 35:8.

ONELA OKAMIHEDHIWA NA ABALI ENA

14. Anddimuwa a mmulogoni anakamihedhe dhavi amambali?

¹⁴ Anddimuwa a mmulogoni anowakamihedha amambali, venevo vanlogani dhogana dha mmabasani a Yehova. Murogora dhahi wana vyaka tanu na modha onowubuwela emwaddele Mbali Russell. Iyene bela, “nihiloga mwari mwa mitala 15 addivuzaga dhiganilemi okosa mmabasani a Mulugu.” Txini edhile opadduwa? Musogorhomwa murogora oddule ohidha okala pionera, vina iyene ohilaba mabasa aba okwaranya vyaka 70! Mohaganyedha mazu olibiha vina owaraliha anowimetxa egumi ya muttu. (Gano 25:11) Anddimuwa a mmulogoni akaanege elemelelo ya wawoba amambali vamodha na anawa wi akamihedhege mabasa-mabasavi Onumbani ya Omwene. Awene akumbirhege aima okosa mabasa anonani wi awene anela owodha.

15. Abali ena a mmulogoni anawodhe dhavi wakamihedha azombwe?

¹⁵ Nikamihedho gani ninfwanyela ovaha abali ena mmulogoni? Mwa olagiha wi anowakwela aimaya. Ninga motagiha, muzombwe ona omarho na Yehova. Muzombweya onowakula deretu omatugumanoni, obe okaana mpaddi wokosa mwari mwa matugumano a vari va sumana? Iyene onowalaleya akwaye oskola, obe wahiroma orabela obure labo nakwekwetteliwiye okosa yotakala? Akala eso dhihipadduwa omuziwihe wila ekosiliye ekala vaddiddi! Nikaane elemelelo ya ologa na ayima matugumano ahinatti obe bamale. Nigakosa dhawene aima anela wona wi awene vina anokosa mpaddi wa ‘mutugumano munddimuwa.’​—Masalmo 35:18.

KAMUKAMIHEDHE MWANAWO WI AFIYEDHE TTARHO YOBAZIWA

16, 17. (a) Ekalele nni yofuneya vaddiddi ayima obatiziwa? (b) Wagalala gani onfwanyela okaana ababi Akristu? (Koona foto eli omaromo.)

¹⁶ Gari enddimuwa evahiwe ababi ja wasunziha anawa omuziwa Yehova. (Masalmo 127:3; Éfeso 6:4) Masaka a nlogo na Izrayel, mwana agabaliwa mohigoneela wamperhekeliwa Yehova. Mbwenye ovanene anihu kankosiwana esuwene. Amambali kobuwele wi aniwa anela omukwela Yehova sabwa ya awene omukwela vina. Mwana agabaliwa-wene, yogana ya amambaliya aye ekale ya omweddiha ofiyedha okala namafwara wa Yezu, wi amperhekele Yehova egumi yaye vina abatiziwe. Ekalawo yina ya ttima empitta okosa ejene? Nsaka na goi enddimuwa anavuniwe babale animperhekela Yehova egumi yawa vina bagamulaba na nroromelo notene.​—Mateu 24:13.

¹⁷ Labo na obatiziwa wa Blossom Brandt, ababe ahikaana efunelo ya oziwa akala iyene wahimala ovisasanyedha-wene. Muziwelani wi wali womala-nawale, awene ahirumeela wi abatiziwe. Blossom ohiloga emwaddele babe omattiyu obule ahinatti odhowa obatiziwa: “Iyene ohinikokoriha notene iyo, mmaleliye ohikosa nlobelo. Munlobelonimwa ohimwaddela Yehova wagalala waniye sabwa ya efunelo yanimi yobatiziwa vina ya omperhekela egumi yaga iyene.” Mmaleliye obatiziwa dhivira vyaka 60, musogorhomwa Blossom ohiloga: “Mwa ologa ebaribari, miyo txipo kaddinadduwale omattiyu obule!” Amambali, kakanani wagalala wakakene mugawonaga aninyu bagamperhekela egumi yawa Yehova vina bagabatiziwa.