Azombwe Muvikome wi Muwodhe Owana na Ddiabo

1, 2. (a) Txini enakamihedha azombwe ompemberha mwiddani wawa Satana? (Koona foto eli omaromo.) (b) Mwari mwa mutoma obu ninasunzemo eni?

MURUMIWI PAULO ohaladdaniha Akristu na anyakoddo. Iyo nili mukoddoni, mwiddani wehu ddwebaribari! Mbwenye koddoya ninwana na Satana vina adomonyo, awene kahiyo attu ninga iyo. Adomonyo aromile owana wale vina akaana eziwelo ya mukoddoni. Ninodha wubuwela wi kaninawodhe opemberha koddoya makamaka akala nili azombwe. Jowodheya azombwe opemberha koddo na mwiddani oddu wa ewodhelo? Ndde awene anowodha, awene anompemberha! Sabwaya? Sabwani awene anowakela nikamihedho na Yehova. Ottiya ejo awene ali ninga anyakoddo oswagihiwa vina ‘ahikaana dhipano dhowanana dhavahile Mulugu’ wi awodhe oraba koddo.​—Kengesa Éfeso 6:10-12.

² Mudhidhi ologile Paulo nladdaniho ntti, iyene wakosa nladdaniho na yabalo ya anyakoddo o Roma. (Merelo 28:16) Mwari, mwa mutoma obu ninele otxokotxela mowakwana makani aba. Ninele otanaalela dhologa dha azombwe ena sabwa ya makattamiho vina mareliho dholabihedha vipano dhawa dha koddo yomuyani.

‘PAPASEKO WA EBARIBARI’

3, 4. Ebaribari enkala dhavi ninga papaseko wa munyakoddo?

³ Kengesa Éfeso 6:14. Papaseko wa munyakoddo wa Roma wansasanyiwana muttove otakuluwa wi abarelege muyununi mwa munyakoddo, yanimukamihedha otxima vina ottukuwa wa peto. Papasekoya wankana topela yottukiha mbeni vina mwego mowarakaka supadda. Munyakoddo agamwabala papaseko wanwodha wimela na ekuluvelo.

⁴ Moligana na papaseko, ebaribari ensunza iyo ya Nzu na Mulugu enonibarela na masunziho onyengetta. (Joau 8:31, 32; 1 Joau 4:1) Venevo vandowa iyo banigasunza ebaribari ya Nzu na Mulugu, ninowodha weddiha egumi yehu na magano a Mulugu obe nabale ‘ebarelo yavapetoni.’ (Masalmo 111:7, 8; 1 Joau 5:3) Ottiya ejuwene nigaziwa ebaribari ninele owodha ovibarela na amwiddani ehu.​—1 Pedro 3:15.

5. Enfuneyela nni ologaga ebaribari mudhidhi wotene?

⁵ Vowi Nzu na Mulugu elobo yamakamaka wa iyo, ninorumeela esile dhinlogani nanda dila dhotene ninologa ebaribari, kahiyo nigalaleyaga bahi. Odhivala futti ya Satana ena ewodhelo. Odhivala onowaporeya attu vina na abale anrumeelela yodhivalaya. (Joau 8:44) Masiki nikalaga attu ohakwanela, ninovilibihedha ologa ebaribari. (Éfeso 4:25) Elobo yorutxa. Abigail bana vyaka 18 wahiloga: “Ologa ebaribari elobo yorutxa, makamaka akala onfuna ologe elobo enoniwe wi ogahidhivale enele ohutotela makattamiho.” Kito nintamelelani ologa ebaribari mpaddi wotene? Iyene ohakula: “Miyo ddigaloga ebaribari, ddinokaana yubuwelo yotxena vamentoni va Yehova. Amudhaga na akwaga anowodha oddikuluvela.” Victoria ona vyaka 23, ohiloga: “Ologa ebaribari onowamelela dhorumeela dhehu masiki attu eena autxutxe. Mbwenye onele wakela dhopurelamo dhofanyelela: Anokaana nikuluvelo vina onowodha omwaddamela Yehova, attu eena anele ouriha.” Kito weyo onowodha wona yopurelamo ya wabala ‘papaseko webaribari’ mudhidhi wotene?

‘OLIGANA MURIMA YABALO YA MUJILA’

6, 7. Oligana murima onladdanihedhiwani na ebarelo ya vamurimani?

⁶ Munyakoddo wa Roma dila dhinjene wankaana yabalo ya mujila yakunela vapetoni na ondduni. Yabaloya yakala ninga mattego aluwiwa na mujila otaganyiha na safuri vina mabotau a mitxeka vabani. Dhitturi dhaye dhankuneleya na mattego ovadda a yabaloya. Yabaloya kamuttiya okosa dhilobo dhinjene mbwenye yanimukoma emukamihedhaga wimela vamburoni naye. Mbwenye yabalo yambarela murima waye vina vyano dhiina wi dhinatoroliwe na nyambusa na mwalago!

⁷ Magano oligana a Yehova anobarela “murima,” wehu obe omuttu wehu wa mwari eladdanihiwaga na yabalo ejile ya vapetoni. (Gano 4:23) Munyakoddo txipo katxinja yabalo yaye na yabalo yina yotowa ttima. Na mukalelo wakakene, iyo kaninsaddula magano oligana a Yehova na meena anoona iyo wi bofwanyelela. Iyo kanina eziwelo yowakwana yobarelana murima wehu. (Gano 3:5, 6) Noona enofuneya wi mudhidhi-na-mudhidhi nombezege embarela murima wehu.

8. Sabwaya jani ya iyo wiwelela magano a Yehova?

⁸ Weyo onokaanaga masaka anoniwe wi magano a Yehova anobarela ofuru wa okosa dhinfuniwe? Daniyel, ona vyaka 21 ohiloga: “Namasunziha waga vamodha na akwaga a oskola anddiliga sabwa yawi Miyo ddanfwara magano a mBibilia. Noona, ddahifiyedha orimeliwa nroromelo naga vina ddakala wokubanyene.” Ovano iyene onivyona dhavi? Iyene ohiloga: “Ddhihona yopurelamo endhana weddiha egumi mowiwanana na magano a Yehova. ‘Akwaga’ eena ahiroma oja mirobwe; ena ahibudduwa oskola. Yali elobo yokubanyiha woona otolowa wa egumi yawa. Yehova onibarela txibarene.” Madison ona vyaka 15 ohiloga: “Elobo yorutxa vaddiddi ofwara magano a Yehova ottiya ofwara esile dhinkosa akwaga ninga ovega na maredhelo meena.” Kito iyene onkosa elobo gani? “Miyo ddinoziwa wi ddinottukula nzina na Yehova mandano abale emezo enlabihedha Satana wi addikwekwette. Ddigapemberha koddo ya odideliwa ddinoziveliwa vaddiddi.”

“OLALEYA OUKALELENI SAPATHO DHOTHAMAGANA MUKODDONI”

9-11. (a) Sapatto dhamukoddoni dha Mukristu entapulela eni? (b) Dhipano gani dhina iyo dhinwodha onikamihedha mmabasani a olaleya?

⁹ Kengesa Éfeso 6:15. Munyakoddo wa Roma kadhowa mukoddoni ahabalile sapatto. Dhasasanyiwana ttebe yovadda, muttuya agabaala kadhapiha manyalo. Munyakoddoya wanwodha weddana deretu ahiteredhuwaga.

¹⁰ Vowi sapatto dha munyakoddo wa Roma dhannimukamihedha oraba koddo, na mukalelo wakakene sapatto dha nladdaniho dhabalile iyo dhinonikamihedha “olaleya muthaka wa murenddele.” (Izaiya 52:7; Roma 10:15) Masiki egalivi dhawene, olaleya onofuna oliba murima. Bo, wa vyaka 20, ohiloga: “Ddanova walaleya akwaga a oskola. Miyo ddankaana manyazo. Ddigang’ana mundduni kaddinziwa egali miyo. Ovano ddinowagalala walaleya akwaga.”

¹¹ Azombwe enjene ahoona wi anowodha oliba mmalaleyoni akala ahivisasanyedha na mutanene. Onakose nni wi ovisasanyedhe na mudhidhene? Julia, muzombwe ona vyaka 16, ohiloga: “Miyo ddinottukula manivuru aga a wengesa mbudduni na oskola nanda ddinovuruwana makani anloga akwaga. Mwavenevo miyo ddinoziwa elobo enfwanyela miyo okosa wi ddakamihedhena. Ddigakala womala-nawale ddinoziwa elobo enwodha wakamihedha.” Makenzie, ona vyaka 23, ohiloga: “Akala weya wa muttu onwodha ovuruwana, weyo onele owodha ottidda moonelo wa makani anloga akwawo. Kazuzumela wengesa manivuru otene ana miselu dha azombwe. Weyo onele owodha wakamihedha kakamwe na makani a Bibilia olabihedhaga site jw.org.” Ovisasanyedha mwapama-mwene enkala ninga wabala “sapatho” ennuwakwanela dereto.

“NROROMELO NUKALELENI EBARELO”

12, 13. “Matterhe” mena anlabihedha satana txini?

¹² Kengesa Éfeso 6:16. Munyakoddo wa roma wantteba ebarelo enddimuwa yolemela. Ejo yanwodha obarela ovenyana mudhitturini ofiyedha mboddoni, yannimbarela olatiwa na supadda, nyambusa na matterhe.

¹³ Ovano Satana onvaviha “matterhe” gani wi awutorolena? Iyene onlabana ottambi wa ommagedha Yehova. Satana onfuna wi wubuwelege wi Yehova kanukwela vina kawo onziveliwa na weyo. Ida, ona vyaka 19 ohiloga: “Dila dhinjene miyo ddona wi Yehova oli wolapela vaddiddi na miyo, vina kanfuna wi miyo ddikale mukwaye.” Iyene onkosaga nni agavonaga dhawene? “Mattugumano elobo enlibiha nroromelo naga. Miyo ddigafiyawo ddangilati bahi kaddavaha yowakula ddubuwelaga wi kavo ogaziveliwe na dhowakula dhaga. Ovano miyo ddinosasanyedha deretu matugumano ddinowakula dila bili obe ttaru. Enorutxa mbwenye miyo ddinoziveliwa vaddiddi. Abalaga anoddilibiha vaddiddi. Dila dhotene ddimbudduwa mmatugumanoni ddiziwaga wi Yehova onoddikwela.”

14. Nisunzilevo nni na yotagiha ya Ida?

¹⁴ Ebarelo ya munyakoddo enkaana munuwelo mmodhene. Ninga musunzele iyo na yotagiha ya Ida, nroromelo nehu nili dhawene. Nroromelo nehu ninowunuwa obe ninoyeva, nikalaga noliba vaddiddi obe nowobana. Ejo ji yosakula yehu. (Mateu 14:31; 2 Tesalónika 1:3) Wi ‘nroromelo enikalele nibarelo’ ninofwanyela odhowa banigavaddavi!

“OVULUMUTXIWA ONOUKALELANI TXAPEWA”

15, 16. Njedhelo nehu ninladdana dhavi na txapewa?

¹⁵ Kengesa Éfeso 6:17. Munyakoddo wa Roma wanabala txapewa wi abarelana musorho. Dila dhina txapewa wankana fita wila agafuna amuttiddele mmadani.

¹⁶ Moligana na ‘txapewa wa nivuno’ ombarela ogogo wa munyakoddo, njedhelo na ofuneya ninobarela dhubuwelo dhehu. (1 Tesalónika 5:8; Gano 3:21) Njedhelo ninonikamihedha ozuzumela dhogana dha Mulugu nikoddaga wobana na masoso annigwela. (Masalmo 27:1, 14; Merelo 24:15) Mbwenye akala ninofuna wi njedhelo nehu ninivune, enofwanyela okala elobo yebaribari mwa weyo. Nimwabale “txapewa” wehu wa nivuno mmusorhoni, ottiya omuttiddela mmadani!

17, 18. (a) Satana agawodhile dhavi onirulamo txapewa? (b) Ninawodhe dhavi olagiha wi kaninyegettiwe na Satana?

¹⁷ Satana agawodhile dhavi omurulamo txapewa wehu? Kobuwela yafuniye omukosana Yezu. Satana wanziwa wi Yezu wahikaana ewodhelo yokala mulamuleli wa nlogo na ttu. Mbwenye vamaromo yanfuneya wi Yezu atabuwe vina akwe. Iyene wanfanyeela ojeedhela mudhidhi ogamuttomile Yehova ninga Mwene. Venevo Satana wahinvaha gari ya onvaha omwene mutanene. Satana wahilibela wi Yezu komukokorela, iyene agahikala mwene w’elabo momaguva. (Luka 4:5-7) Satana ohiziwa wi Yehova ohilibelela onivaha dhilobo dhotikiniha mwilaboni eswa. Mbwenye enofuneya wi nirome ojyedha mpaka okala ebaribari, vari va ojyedha oku ninofwanyiwa masoso gwé. Mbwenyi Satana ononivaha gari ya ojavo dhilobo dhoziva ovanene. Iyene onfuna wi nike dhilobo dha mwilaboni vamburoni voroma dha Mulugu vamburoni waniwili.​—Mateu 6:31-33.

¹⁸ Azombwe enjene karumelile onyengettiwa na Satana. Motagiha, Kiana, ona vyaka 20, ohiloga: “Miyo ddinoziwa wi njedhelo nebaribari ninwodha ogomiha makattamiho ehu bu omwene wa Mulugu.” Njedhelo naye nimpakela dhavi mukalelo oneeddiha iyene egumi yaye? Ejo enowodha omukamihedha ononelamo wi dhilobo dha elabo ejino dhinovira. Ottiya ozuzumela ononga guru dhaye na dhilobo dhovira, iyene mudhidhi waye onimulabelana Yehova.

NZU NA MULUGU “SUPADDA NA MUYA WOKODDELA”

19, 20. Ninawodhe dhavi olabihedha Nzu na Mulugu?

¹⁹ Munyakoddo wa Roma wanttukula supadda na centimetro 50. Anyakoddo abale ahikaana ewodhelo ya olabihedha supaddana sabwani malabo otene awene anivilibihedha olabana.

²⁰ Murumiwi Paulo ohiloga wi Nzu na Mulugu eli ninga supadda. Yehova ohinivaha. Iyo ninofanyeela osunza olabihedha mazu otene wi nibarelena nroromelo nehu obe nisasanyedhe dhubuwelo dhehu. (2 Korinto 10:4, 5; 2 Timóteo 2:15) Onawodhe dhavi wogolela ewodhelo yawo? Sebastian ona vyaka 21, ohiloga: “Ddihileba maverso a kapitulo dhinengesa miyo Mbibiliani. Dhahene ddinosasanyedha maversu anziveliwa miyo vaddiddi.” Ekosa ejuwene enoddikamihedha oziwa mobuwelo wa Yehova. Daniel ohenjedhedha: “Ddigakosaga wengesa waga wa Bibilia, ddinosakulela maversu anoona miyo wi anele wakamihedha attu anaziwa miyo. Ddihifiyedha oziwa wi attuya anowakula deretu agaziwa wi weyo onoziveliwa miselu dhili mBibilian vina onovilibihedha wi wakamihedhe.”

21. Ninkoddela nni omova Satana na amwiddani aye?

²¹ Ninga mumalele iyo osunza dhotagiha dha azombwe, iyo kaninfwanyela omova Satana na adomonyo. Ebaribari wi awene ahikaana ewodhelo, mbwenye ewodhelo yawa kinligana na ya Yehova. Awene kanawodhe okalawo na mukalakala. Awene enele ofugeliwa ofiyedha vyaka txikwi dha olamulela wa Kristu, agamala venevo anele otolotxiwa. (Ovuhulela 20:1-3, 7-10) Iyo ninomuziwa mwiddani wehu, dhimanya dhaye vina dhofuna dhaye. Na nikamihedho na Yehova ninele owodha owanana!