Mbibiliani munofwanyeya dhotagiha dha attu enjene alagihile ovilela. Vansunzoni nawo nomwinya, onkoddelani okosa masasanyedho a osunza dhotagiha esi? Motagiha, mmaleli Davidi ottikitteliwa wi akale mwene wa Izrayel, iyene ohijedhela vyaka dhinjene wi arome olamulela. Simeau na Ana ahimulabela Yehova nororomeleya oku ajedhelaga odha wa Mesiya. (Lk. 2:​25, 36-38) Ogasunzaga mapadduwo aba, katamela ofwanya dhowakula dha mavuzo aba: Txini emukamihedhile muttu oddu owodha ovilela? Dhopurelamo gani dhikaniliye sabwa ya ovilela? Ddinawodhe dhavi omutagiha? Ottiya osunzavi dhotagiha dha abale alagihile ovilela, kasunza vina dha abale ahilagihile. (1 Sam. 13:​8-14) Ogamala ovivuze: ‘Txini emuttukuleli muttu oddu, ohiwodha ovilela? Makattamiho gani agumaniliyena?’ w23.08 25 ddima 15

Murumiwi Pedro wali muttu woweddeyana iyene kattiyile nne muttu obe elobo omutximiha onfwara Yezu. Motagiha, nsaka dhahi iyene ohilagiha weddeyana waye mudhidhi wahanonelimo deretu anamafwara ena elobo yalogile Yezu. (Jo. 6:68) Anamafwara enjene a Yezu ahittiya wedda na iyene nne vina kajedhile Yezu watapulelamo yafuniye ologa. Mbwenyi Pedro kakosile ejuwene. Iyene wali woweddeyana vina wahiloga wi “onna mazu andhana egumi yohimala” ddi Yezu bahi. Yezu wanziwa wi Pedro na anamafwara ena agahimuttawa. Masiki dhawene, Yezu wahimwaddela Pedru wi iyene agahikalavi ororomeleyene. (Lk. 22:​31, 32) Yezu wanziwa wi “murima onofuna, maningo bobanile.” (Mk. 14:38) Nona Yezu kamunyanyalile Pedro, masiki valogiye wi kamuziwa Yezu. Vina mmaleliye ovenyihiwa mukwani enoneya ninga iyene wahimuttwanyuwela Pedro mudhidhi waliye yeka. (Mk. 16:7; Lk. 24:34; 1 Kor. 15:5) Eji yahimulibiha vaddiddi Pedro odduwene wali wokumuwene sabwa ya dhikosiliye mundduni! w23.09 22 ddima 9-10

Mulugu onolevelela dhottega dha abale animuroromela. Iyene onolevelela kakamwe vina kanubuwela dhovonya dhikosile muttuya. (Masal. 32:​1, 2) Mwa iyene muttu oddo ddoligana vina se yottega sabwa ya nroromelo naye. Ebaribari wi Abrahamu, Davidi na adhari ena ororomeleya ahikuweliwa aligani, masiki dhawene awene andhowavi akalaga attu ohiligana vina attegi. Mbwenyi sabwa ya nroromelo nanani wawona ninga kahana yovirigana, ttabwa-ttabwa agáladdaniha na attu ahamwebedha. (Ef. 2:12) Karta nalebeliye akadda Roma, murumiwi Paulo ohitapulelamo wi akala ninfuna nikale amarho a Mulugu ninofwanyela okana nroromelo. Nona, dhahene ninga Abrahamu na Davidi, nigamuroromela Yehova enowodheya okala amarho aye. w23.12 3 ddima 6-7