Iyo kaninawodhe-wene wiwelela mazu a Yezu nigatonyihedhaga okwela abalihu ena a mmulogoni oku ena nihakwelaga. Enoziweya wi ninodhaga okala ofiyedheya na attu ena dhahene ninga yapadduwa na Yezu na arumiwi ena. (Jo. 13:23; 20:2) Mbwenyi murumiwi Pedro ononubutxedha wi ninofwanyela ovilibihedha okana okwelana wenamudhi—okana ofiyedheya na abalihu—dhahene ninga ofiyedheya onkanihu na amudhihu. (1 Ped. 2:17) Pedro ohoniha wi ja ttima okwelana muttu na mukwaye na murima wotene. (1 Ped. 1:22) Mazu aba okwelana-wene na murima wotene, antapulela omukwela muttu masiki akala kahiye yovevuwa omutonyihedha okwela muttuya oddo. Motagiha, txini egakosiliwe kowiliwa mbali wile wunyimula obe wukosela elobo yabure? Yubuwelo yehu egali ya omwiyihedha obure na obure ottiya omutonyihedha okwela. Mbwenyi Pedro ohisunza na Yezu wi ekalelo ejo kinimwagalaliha Yehova. (Jo. 18:​10, 11) Pedro ohileba dhahi: “Onuwirelani yabure, kammwirele yakene; onuruwanani, kammuruwane. Omwakula wenyu okale omuddoddobelela dhapama.” (1 Ped. 3:9) Ogakwelaga abali na murima wotene onele okala muttu wa pama vina onele otamela waziwa. w23.09 28-29 ddima 9-11

Jotikiniha mukalelo onunuwa mwana mwa mudhidhi mung’onovi. Aima anowunuwa na mukalelo wohirutxa vina se okosela guru. Mbwenyi wunuwa wawa mpaddi womuyani onottiyana. (1 Kor. 13:11; Aheb. 6:1) Wi muttu akane mandano oliba na Yehova, onofwanyela ovilibihedha. Ottiya ejo onofwanyela okana nikamihedho na muya wokoddela wi awodhe okana mikalelo dhapama vina wunuwiha ewodhelo ya ovisasanyedhela mabasa anattiddiye musogorho. (Gano 1:5) Yehova ohattandda alobwana na ayana. (Wita 1:27) Joziweya wi alobwana na ayana guru dhawa dhinottiyana, mbwenyi ahikana dhilobo dhina dhinattiyaniha. Motagiha, Yehova ohattandda alobwana vina ayana, bavaha mabasa ottiyana, vina ohavaha ttotto na dhiwodhelo dhigakamihedhile wakwaniha mabasa awa.—Wita 2:18. w23.12 18 ddima 1-2

Kito Yezu wanfuna wi attu ena attittimihege nzina na Babe? Kaninaganyedha. Asogorheli ena a marelijiau anrumela wi ologa nzina na Mulugu yali otowa nriho, mbwenyi Yezu kattiyile wi elemelelo eji yahanna matibelo a mBibiliani emutximihe ottittimiha nzina na Babe. Dila modha Yezu wahinvulumutxa mulobwana wavolowiwe adomonyo wakala elabo y’o Jerazeno. Attuya ahidha omova Yezu, venevo ahimukumbirha wi attiye murudda obule. (Mk. 5:​16, 17) Masiki dhawene, Yezu wanfuna wi attu a murudda obule aziwe nzina na Mulugu. Nona iyene wahimwaddela mulobwana ole wavulumutxiwe awaddele attu ena wila wanvulumutxile ddi Yehova, ottiya Yezu. (Mk. 5:19) Mpaka ovanene Yezu onofunavi wi—nzina na Babe niziwiwe mwilaboni mwetemwene! (Mt. 24:14; 28:​19, 20) Iyo vina nigakosa ejuwene, ninomwagalaliha Mwene wehu, Yezu Kristu. w24.02 10 ddima 10