Weyo Ohivisasanyedhela Goyi Enddimuwa?

1. Ekalele nni yamalago ovisasanyedhela dhifoyo?

OVISASANYEDHELA enovuna dhigumi. Motagiha, vagapadduwa efoyo, muttu ovisasanyedhile onowodha ovuna egumi yaye vina wakamihedha attu ena. Nikuru dhahi ninakamihedha attu o Europa nihiloga: “Ovisasanyedha pama enowodha ovuna dhigumi.”

2. Ninfwanyelela nni ovisasanyedhela goyi enddimuwa? (Mateu 24:44)

² “Goyi enddimuwa enele” ofiya mohijedheleya. (Mt. 24:21) Mbwenyi goyi enddimuwa enele ottiyana na dhifoyo dhinjidhene, sabwani iyo ninoziwa wi ejiya enele opadduwa. Vyaka 2.000 mundduni, Yezu ohawaddela anamafwara aye wi akale omala-nawale labo ntti nihinafiya. (Kengesa Mateu 24:44.) Akala iyo nihivisasanyedha enele okala yovevuwa ovilela mwari mwa mudhidhi obo vina wakamihedha ena okosa yakene.—Lk. 21:36.

3. Ovilela, ttagaraga na okwela dhinanikamihedhe dhavi ovisasanyedhela goyi enddimuwa?

³ Koona mikalelo miraru dhinanikamihedhe ovisasanyedhela goyi enddimuwa. Txini enakosihu nigàddeliwa wi nalaleye muselu wottonga oku nifwarafwariwaga na amwiddani ehu. (Ovuh. 16:21) Ninofwanyela ovilela wi nimwiwelele Yehova, nikuluvelaga wi iyene onele onibarela. Txini enakosihu akala abali ehu anoyelela dhilobo dhawa dhomaningoni? (Hab. 3:17, 18) Ttagaraga enele onittukulela wakamihedha na dhojombeliwa dhawa. Txini enakose iyo akala enofuneya okala kwartu modhene na abalihu sabwa ya ofwarafwariwa na alamuleli? (Ezek. 38:10-12) Wakwela abali ehu enele onikamihedha ovilela mudhidhi obo worutxa.

4. Bibilia ononiha dhavi wi ninofwanyela okana ovilela, ttagaraga vina okwela?

⁴ Nzu na Mulugu ninonilibiha odhowavi nikanaga ovilela, ttagaraga na okwela. Luka 21:19 onologa: Muvilele munele ovuneya. Kolosi 3:12 onologa: “Nona thukulaní meddelo a thagaraga.” Vina 1 Tesalónika 4:9, 10 onologa: “Vowi Mulugu mwinyene ousunzihani makalelo okwelana. . . . Mukwelani-mpu, amudhihu, ninowulobani: muthabwihe wirawá.” Versu esi dhotedhene dhilebeliwe anamafwara atonyihedha ovilela, ttagaraga vina okwela. Mbwenyi awene anfwanyela odhowavi atonyihedhaga mikalelo esi. Iyo ninofwanyela okosa yakene. Wi niwodhe okosa ejuwene ninofwanyela osunza mukalelo olagihile Akristu oroma mikalelo esi. Nigakosa dhawene ninele wona mukalelo onatagihe iyo anamafwara aba vina ninele woniha wi nivisasanyedhela goyi enddimuwa.

OLIBIHE OVILELA WAWO

5. Akristu a nsaka na Paulo avilele dhavi mwari mwa makattamiho?

⁵ Akristu a nsaka na Paulo anfwanyela ovilela. (Aheb. 10:36) Awene angumanana makattamiho angumanana attu a masaka ehu, mbwenyi awene ahipattiwa makattamiho mena sabwa ya okala Akristu. Enjene mwa awene anfwarafwariwa ottiya na anddimuwa a marelijiau a Ayuda vina alamuleli a akadda Roma bahi mbwenyi na anamudhi awa vina. (Mt. 10:21) Mmulogoni awene anfwanyela orabela opattiwa na masunziho onyengetta a asadduweli abuwene atamela ogawa mulogo. (Mer. 20:29, 30) Txibarene Akristu aba ahivilela. (Ovuh. 2:3) Dhavi? Awene ahisunza mofwaseya-mwene dhotagiha dhili mBibiliani dhinloga mwaha wa attu alagihile ovilela ninga Job. (Tia. 5:10, 11) Anlobela akumbirhaga oliba murima. (Mer. 4:29-31) Vina awene annubuwela wi kodhowavi avilelaga, Yehova agaharuriha.—Mer. 5:41.

6. Txini ensunza weyo na ekosile Merita wi avilele ofwarafwariwa?

⁶ Enowodheya iyo vina ovilela nigakana elemelelo yosunza dhotagiha dha attu atonyihedhile ovilela dhinlogiwa mBibiliani vina mapublikasau ehu, ottiya ejo ninofwanyela otanalela sabwa ya dhotagihadha. Murogora Merita onkala o Albania ohikosa ejuwene, nona ohiwodha ovilela ofwarafwariwa wottabwa wa amudhaye. Iyene ohiloga: “Nipadduwo na Job nili mBibiliani niddilibiha vaddiddi. Iyene ohitabuwa vaddiddi—ahiziwaga wadha dhowehadha—masiki dhawene iyene ohiloga: ‘Mpaka okwa waga, kaddinatxelele woniha okoddela waga murima!’ (Job 27:5) Makattamiho apattiwe Job ahittabwa opitta aga. Mottiyana na iyene, miyo ddinoziwa onda dhoweha dhaga.”

7. Akala kaninapattiwa makattamiho orutxa ovanene, txini enfwanyela iyo osunza okosa?

⁷ Enowodheya wunuwiha ovilela wehu modhela omulobelela Yehova nimwaddelaga dhotene dhinnisosa. (Fil. 4:6; 1 Tes. 5:17) Masiki akala kunapattiwa makattamiho orutxa ovanene, weyo onomulobelela Yehova ogakubanya, ogadhugudheya obe ogahiziwe yokosa? Ogakana elemelelo y’omulobelela Mulugu okumbiraga nikamihedho ogafwanyiwa makattamiho mang’ono ovanene, kinawurutxe okosa yakene ogafanyiwa makattamiho manddimuwa musogorho. Weyo onele okana ebaribari wi Yehova onoziwa mudhidhi vina mukalelo wa oukamihedha.—Masal. 27:1, 3.

8. Yotagiha ya Mira enoniha dhavi wi ovilela makattamiho masaka abano enele onikamihedha ovilela makattamiho a musogorho? (Tiago 1:2-4) (Koona vina foto.)

⁸ Ninele owodha oviluwa mwari mwa goyi enddimuwa nigakala ororomeleya vamentoni va Yehova nigafwanyiwa makattamiho masaka abano. (Rom. 5:3) Ninlogela nni dhahene? Abali enjene na arogora ahiloga wi ovilela makattamiho agumananina ehakamihedha ovilela makattamiho a musogorho. Awene agawodha ovilela makattamiho na nikamihedho na Yehova, anokana nikuluvelo wi Yehova onofuna wakamihedha. Vowi anomuroromela Yehova enowodheya awene ovilela yoweha enapatte. (Kengesa Tiago 1:2-4.) Murogora wa pionera onkuweliwa Mira, onkala o Albania ohiloga wi ovilela makattamiho mundduni ehimukamihedha ovilela makattamiho angumanana iyene ovanene. Iyene owenjedhedha wi dila dhina obuwela wi onetxa makattamiho ddi iyene bahi. Mbwenyi vasogorhova iyene ohiloga wi Yehova ohikosa dhilobo dhinjene mwari mwa vyaka 20 wi amukamihedhe, vina iyene ohiloga yeka: ‘Kala wororomeleya. Kuttiye omulabela Yehova ovanene, iyene owukamihedha ovilela makattamiho menjene.’ Weyo vina onofwanyela wubuwela mukalelo wukamihedhile Yehova ovilela. Okane ebaribari wi iyene onowona mudhidhi onvilela weyo dhorutxa vina onele wuttuva. (Mt. 5:10-12) Dhahene goyi enddimuwa egaroma, enele wufwanya bumalile osunza ovilela ottiya ejo onele okala womala-nawale wi odhowegevi ovilelaga.

KALAGIHA TTAGARAGA

9. Mulogo wo Antiokiya wo Asiriya olagihile dhavi ttagaraga?

⁹ Katanalela mudhidhi opattiwe Akristu akala o Judeya dala enddimuwa. Mmaleli wiwa mulogo wo Antiokiya wa Asiriya dala eji, awene s’owaganyedha awalagiha ttagaraga abaliwa akala o Judeya. Ottiya ejo awene ahikosavo elobo. Awenene “alaganela wakamyedha abalawa o Judeya, apitxaga muthu-muthu yawodhiye.” (Mer. 11:27-30) Masiki abaliya apattiwe dala akalaga wolapela, Akristu o Antiokiya ahikosa muli mwetemwene wi akamihedhe.—1 Jo. 3:17, 18.

10. Na mukalelo gani onalagihe iyo ttagaraga akala abalihu anopattiwa dhifoyo? (Koona vina foto.)

¹⁰ Enowodheya iyo vina olagiha ttagaraga masaka abano nigaziwa wi abalihu na arogora anotabuwa mwaha wa opattiwa efoyo. Momaguva-mwene ninowavuza anddimuwa mmulogoni akala enowodheya iyo oviperheka wi nakamihedhe modhela okosa mivaho dhinkamihedha mabasa ankosiwa mwilaboni mwetemwene obe walobelela otene apattiwe dhifoyo.b (Gano 17:17) Motagiha, yaka ya 2020, ahittomiwa Comição de Ajuda Humanitária okwaranya 950 wi akamihedhe otene apattiwe na eredda ya COVID-19. Iyo ninowatamalela venjene abali vina arogora attiddile mabasa aba. Sabwani awene ahalagiha ttagaraga abali vina arogora avahaga dhilobo dhomaningoni, awakamihedha awene odhowavi amulabelaga Yehova vina dila dhina awene ahisasanyedha vina ahivenyihedha nyumba na mimburo dhowebedha.—Kaladdaniha na 2 Korinto 8:1-4.

11. Merelo a ttagaraga animuttittimiha dhavi Babi wehu wa wirimu?

¹¹ Iyo nigalagiha ttagaraga vagapadduwa efoyo, attu ena anowona ovilibihedha wehu. Motagiha, yaka ya 2019, Furakau Dorian ohigujula Nyumba ya Omwene o Bahamas. Mudhidhi wavenyihedha abali, awene ahiloga na muttu ohili Munamoona wa Yehova anvuzaga muttengo wafuniye wi attidde mabasaya. Iyene ohiloga dhahi: “Miyo ddigahiziveliwa okosa nvaho wa . . . anamalaba, dhipano na dhilobo dhomagana. . . . Miyo ddinfuna ddikamihedhe nikuru nenyu. Miyo ddihitikina venjene na mukalelo onakwelinyu akwinyu.” Attu enjene mwilaboni kanimuziwa Yehova. Mbwenyi enjene anowawona Anamoona a Yehova. Iyo ninowagalala vaddiddi oziwa wi olagiha wehu ttagaraga onowakamihedha attu enjene ofuna omuziwa Yehova oli Mulugu “wodhala thagaraga”!—Ef. 2:4.

12. Wunuwiha olagiha ttagaraga ovanene onanikamihedhe dhavi olagiha ttagaraga goyi enddimuwa egaroma? (Ovuhulela 13:16, 17)

¹² Ninawodhe dhavi olagiha ttagaraga goyi enddimuwa egaroma? Bibilia onologa wi otene ahinakamihedhe makuru a politika anele ofwanyiwa makattamiho—ovanene vina mwari mwa goyi enddimuwa. (Kengesa Ovuhulela 13:16, 17.) Abali ehu na arogora anele ofuna nikamihedho wi akane dhilobo dhinafune awene wi akalewo. Mwene wehu Yezu Kristu, agadha wattonga attu, iyo ninfuna wi iyene anifwanye nilagihaga ttagaraga vina aniwobe wi nakele Omwene.—Mt. 25:34-40.

WUNUWIHE OKWELA

13. Ninga munloga Roma 15:7, Akristu oroma alagihile dhavi okwelana?

¹³ Otene anziwa wi Akristu oroma ankwelana muttu na mukwaye. Mbwenyi yali elobo yovevuwa olagiha okwela? Katanalela ottiyana wali mmulogoni w’o Roma. Mmulogoni w’o Roma kamwali Ayudavi, abuwene asunzihiwe oromana muhimani Malamulo a Mizé, mbwenyi mwahikalamo vina Amalabo ana dhilemelelo dhottiyana na Ayuda. Akristu ena ali adhari oku ena ali afuru—txino vina ena ahikana adhari. Na dhottiyana esi, Akristu aba agawodhile dhavi olagihana okwelana muttu na mukwaye? Murumiwi Paulo ohawaddela “mwakelane.” (Kengesa Roma 15:7.) Eji entapulela nni? Nzu ntti “mwakelane” entapulela omwakela muttu na opama obe okala namakela aleddo, dhahene ninga omwakela muttu vatakulu vehu obe omwakela mwari mwa amarho ehu. Motagiha, Paulo ohimwaddela Filémon mukalelo ogamwakeliliye mudhari waye wamuttawile wakuweliwa Onézimo: “Mwakelé Onézimo ninga ddi miyo-wene.” (Filé. 17) Vina Prisila na Ákila ahimwakela vani vawa Apolo, odduwene wana eziwelo eng’onovi mwaha wa Kristu mottiyana na awene. (Mer. 18:26) Akristu aba kattiyile wi ottiyana wakana awene watotele ogawana vina wakelana mmatakulu mwawa.

14. Ana na mamunaye alagihile dhavi okwela?

¹⁴ Enowodheya iyo vina walagiha okwela abalihu na arogora modhela wawakela mmatakulu mwehu. Eji enele wattukulela olagiha onikwela wawa. (2 Kor. 6:11-13) Katanalela yotagiha ya Ana na mamunaye. Mmalile awene ottomiwa mabasa maswa a omisionario o Oeste wa elabo ya Afrika, ezini ya COVID-19 yahiroma. Sabwa ya ezini eji, kawodhile ogumana na abali awa a mmulogoni mwawa muswa kove na kove vina kiyali yovevuwa waziwa abali na arogora. Atelani aba alagihile dhavi okwela wawa? Awene ahilabihedha vidioconferência wi awodhe ologa na abali vina arogora a wenewale vina wawaddela efunelo enddimuwa yana awene ya waziwa pama. Anamudhiya ahitamalela venjene okwela olagihile amisionario aba, vina ahiroma waligarela vina walebela mensagem. Atelani aba aviwilemo dhavi? Ana ohiloga: “Miyo txipo kaddinadduwale okwela olagihiwe miyo vamodha na amudhaga mmidhidhini dhapama vina dhorutxa, dhotagiha dhawa dhiddittukulela olagiha okwela.”

15. Yotagiha ya Vanessa ennisunziha eni mwaha wa walagiha okwela abali na arogora? (Koona vina foto.)

¹⁵ Enji mwa iyo ninotugumana mmulogoni muli abali na arogora ottiyana-ttiyana vina ana mikalelo dhottiyana. Enowodheya iyo wunuwiha wakwela wehu modhela ozuzumela mikalelo dhawa dhapama. Murogora onkuweliwa Vanessa onkala o Nova Zelândia, wanrutxiwa okana mandano apama na attu ena mmulogoni mwaye. Mbwenyi iyene ohigana ohizuzumela mikalelo dhahaziveliwiye, iyene ohitamela mudhidhi wokala na abali aba. Okosa eji ehimukamihedha iyene wona enimuttukulela Yehova wakwela awene. Iyene ohiloga: “Mamunaga mukaleliye nameddelela milogo iyo nankala mudhidhi mwinjene na abali vina arogora ana mikalelo dhottiyana-ttiyana eji ehiddikamihedha omaga mandano na awene. Ovano miyo ddinoziveliwa na attu ottiyana-ttiyana. Yehova vina onowakwela attu ottiyana sabwani ohinikukusela wi nikose mpaddi wa nikuru muli attu ottiyana-ttiyana.” Iyo nigasunza wawona attu ena dhahene ninga munawonela Yehova ninolagiha wi ninowakwela.—2 Kor. 8:24.

16. Ninfwanyelela nni wakwela abali na arogora mwari mwa goyi enddimuwa? (Koona vina foto.)

¹⁶ Okwela enele ofuneya mwari mwa goyi enddimuwa. Goyi enddimuwa egaroma, ninafwanye wuvi nibarelo? Katanalela yawaddeli Yehova nlogo naye okosa ahinatti olupeliwa na akadda Babilónia: “Nyuwo athu a nlogo naga, volowani mba mwenyu, fugani misuwodhá, kalaní mwenemo; vitalaní mudhidhi muñgonovi mpaka vanagome osilidheya wa Nabuya.” (Iza. 26:20) Txino iyo ninele ofwara malago aba mwari mwa goyi enddimuwa. Nzu tti “mba” ninlogiwa versu eji enaddiwana mmulogoni mwehu. Mu goyini enddimuwa Yehova ohipikirhela wi onele onibarela akala ninodhowavi nimulabelaga iyene vina nakwelaga abali na arogora. Nona ninofwanyela ovilibihedha wunuwiha okwela onihu na abali vina arogora. Ninele ovuneya nigakosa ejuwene!

OVISASANYEDHE OVANENE

17. Akala ninovisasanyedhela ovanene txini enawodhe iyo okosa mwari mwa goyi enddimuwa?

¹⁷ “Siku ninddimuwa na Nabuya [Yehova]” ninele okala norutxa mwa attu otene. (Sof. 1:14, 15) Nlogo na Yehova vina ninele ofwanyiwa makattamiho. Mbwenyi akala ninovisasanyedha ovanene ninele owodha okala ofwasa vina ninele wakamihedha attu ena. Iyo ninele ovilela makattamiho ananipatte. Abalihu agatabuwaga ninele okosa muli mwetemwene wi nakamihedhe modhela waweddela ttagaraga vina wavaha dhinajombela. Vina akala ninovilibihedha wakwela abalihu na arogora ovanene kinanirutxe watonyihedha okwela musogorho. Yehova onele onittuva na egumi yamukalakala mwilaboni muhinakale dhifoyo vina munadduwaliwe makattamiho otene.—Iza. 65:17.