Enowodheya Ovilela Masiki Oganyimuwa

1. Ekalele nni yapama okosa mpaddi wa nikuru na Yehova?

JAPAMA okosa mpaddi wa nikuru na Yehova masaka aba omariha ali orutxa vaddiddi. Oku dha mwilaboni dhittabwagavi, Yehova ononivaha anamudhi omuyani, abali na arogora ali owiwanana. (Masal. 133:1) Yehova ononikamihedha okana murala woliba vina wowagalala. (Ef. 5:33–6:1) Iyene ononivaha zelu wi niwodhe owanana makattamiho annidhugudha vina okana wagalala.

2. Txini enfwanyelihu okosa nanda sabwaya jani?

² Enofuneya ovilibihedha wi nidhowegevi nimulabelaga Yehova n’ororomeleya. Sabwaya? Sabwani ninodhaga onyimuwa na dhokosa vina dhologa dha attu ena. Vina enodhaga orutxa owanana dhovonya dhehu, ttabwa-ttabwa nigakosa yovonya yakakene dila dhinjene. Mu nsunzoni ntti ninele osunza dhipaddi ttaru dhinfuniwana iyo ovilela (1) mbali aganinyimula, (2) niganyimuwa na dhokosa dha mwadhihu obe dha mamunihu, vina (3) niganyimuwa sabwa ya dhovonya dhehu. Ottiya ejo ninele osunza dhotagiha dha attu araru anlogiwa mBibiliani adhowilevi amulabelaga Yehova nororomeleya masiki vagumanilanina makattamiho oladdana.

KAVILELA AKALA MBALI ONOWUNYIMULA

3. Dhorutxa gani dhinwanana iyo notene?

³ Ekalelani yorutxa. Abali ena ahikana elemelelo ehinnizivela. Ena anodhaga okosa dhilobo dhinninyimula obe oneddiha n’ohifwanyelela. Anddimuwa a mmulogoni vina anovonya. Dhilobo ninga esi dhigapadduwa ena anowaganyedha akala ntti nikuru na Yehova. Ottiya odhowagavi amulabelaga Yehova na abaliwa, awene txino anottiya ologa na abale anyimulile bafiyedha ottiya odhowa mmatugumanoni. (Sof. 3:9) Eji ja malago? Ndowe none enasunzihu na attu anlogiwa mBibiliani agumanilena makattamiho oladdana.

4. Dhorutxa gani dhigumanilena Paulo?

⁴ Yotagiha ya mBibiliani. Murumiwi Paulo wanziwa wi abalaye ali ohiligana. Motagiha, abalaye o Jeruzalemi karumela wi iyene wali namafwara wa Yezu. (Mer. 9:26) Txini epadduwile vasogorhova? Ena ahimuloga bure wi apigidhe nzina naye. (2 Kor. 10:10) Dila dhahi Paulo wahimona munddimuwa wa mulogo akosaga yogana egadhile waputtula ena. (Gal. 2:​11, 12) Marho waye wokweleya Marko wahimunyimula. (Mer. 15:​37, 38) Makattamiho abo agahimukosiha Paulo watxatxama abale amunyimula. Mbwenyi kakosile ejuwene, iyene wahizuzumela dhilobo dhapama dhakosa abalaye. Wahidhowavi azuzumelaga mabasa a Yehova. Paulo owodhile dhavi ovilela?

5. Txini yamukamihedhile Paulo ohanyanyala abalaye? (Kolosi 3:​13, 14) (Koona vina foto.)

⁵ Paulo wannakwela abalaye. Okwela wana Paulo na abalaye wahimuttukulela wona mikalelo dhawa dhapama ottiya ozuzumela dhovonya dhawa. Okwela oku ohimuttukulela iyene ovirihamo esile dhilebiliye va Kolosi 3:​13, 14. (Kengesa.) Paulo ohimulevelela Marko, masiki Marko vamuttawileye muleddoni mwaye wa omisionario, iyene kamukoyile yammirimani. Mudhidhi mung’onovi musogorho, àlebelaga karta akadda Kolosi, iyene wahimutamalela Marko sabwa ya ompangarhaza venjene. (Kol. 4:​10, 11) Vafugeliwiye o Roma, iyene wamukumbirhile Marko bahi wi adhowe amukamihedhe. (2 Tim. 4:11) Eji enowoniha kakamwe wi iyene kànyanyalile abalaye. Txini ensunzihu na Paulo?

6-7. Txini enanikamihedhe wakwela abalihu masiki na dhovonya dhawa? (1 Joau 4:7)

⁶ Ensunzihu. Yehova onfuna wi nidhowegevi nakwelaga abalihu. (Kengesa 1 Joau 4:7.) Akala mbali kanneddiha dhahene ninga munfuniwana Mukristu, nikuluvele wi iyene kaganile oninyimula, iyene onovilibihedha okosa dhilobodha ninga munfunela Yehova. (Gano 12:18) Yehova onowakwela adhari aye ororomeleya masiki na dhovonya dhinkosani. Iyene onodhowavi anikwelaga se onikoyela ya mmirimani. (Masal. 103:9) Ninomutamalela venjene Yehova sabwa ya ononilevelela, mwa dhahene ninofwanyela omutagiha modhela walevelela ena!—Ef. 4:32–5:1.

⁷ Kanidduwale wi nili vakuvi na ogoma wa elabo ejino, nona ninofwanyela okala ofiyedheya na abalihu. Enodhaga opadduwa ofwarafwariwa ottidda motto ofiyedha ofugeliwa mukamburha sabwa ya nroromelo nehu. Ejo egapadduwa, ninele ofuna venjene nikamihedho na abalihu. (Gano 17:17) Koona epadduwile na José,a munddimuwa wa mulogo wo Espanha. Iyene na abali ena ahifugeliwa mukamburha sabwa ya ohikosa mpaddi wa elabo. José ohiloga: “Vowi mukamburha nakala mburho mmodhene kiyarutxa onyimulana muttu na mukwaye. Yanfuneya ovilelana vina olevelelana. Eji yahinikamihedha okana wiwanana vina obarelana muttu na mukwaye. Iyo nakala mumodhani na attu ena ahamulabela Yehova. Labo nimodha ddahivoreheya mono, sabwa ya ejuwene kaddawodha ottidda mabasa. Mbali dhahi wahiddikamihedha ofula guwo dhaga vina oddittiddela mabasa mena. Mudhidhi obule worutxa ddihona okwela wa txibarene.” Eji enowoniha wi jofuneya ologela mowaguva-mwene magudulano-magudulanovi anihuna na mbalihu!

OVILELE AKALA MWADHIWO OBE MAMUNO ONOWUNYIMULA

8. Dhorutxa gani dhingumanana atelani?

⁸ Ekalelani yorutxa. Matelo otene anogumanana dhorutxa. Bibilia kampipirhiha agaloga wi abale antelana “anowona makathamiho vamuralani vawa.” (1 Kor. 7:28) Sabwaya? Sabwani matelo anowagumaniha attu eli ohiligana muttu-muttu na dhofuna dhaye vina dhubuwelo dhaye. Vamateloni txino muttu mwina dda elabo yina vina oleliwe na mweddelo wottiyana. Nona, na mudhidhiya oheli anele owodha wona dhimanya dha mukwaye dhahawodhilani wona eddelelagana. Dhilobo-dhene esi dhinodhaga otota magudulano. Atelani ena ottiya ologela makaniya wi agomihe, anopwattelihana muladdu muttu na mukwaye, masiki aziwaga wi oheli ahivonya. Ena anofiyedha wubuwela, wi agomihe makaniya japama omwalana obe ofudha matelo. Ejiya ja malago?b Nne, ninele wona yotagiha ya muttu onlogiwa mBibiliani ovilelile masiki vaniye matelo orutxa.

9. Makattamiho gani agumanilena Abigaili?

⁹ Yotagiha ya mBibiliani. Abigaili wateliwe na Nabal, Bibilia onologa wi Nabal wali muttu wotakala murima. (1 Sam. 25:3) Yali yorutxa Abigaili okala na mulobwana oddu. Abigaili agahitamela mwaha wa omuttawa Nabal? Ndde, nsaka nalamulela Davidi, bagana ompa Nabal na amudhaye sabwa ya omuruwana Davidi na alobwanaye. (1 Sam. 25:​9-13) Abigaili agahimuttawa Nabal bapiwa na Davidi, mbwenyi kahiye ejuwene yakosiliye, iyene wahiloga na Davidi wi anampe Nabal. (1 Sam. 25:​23-27) Iyene onvuneli nni Nabal?

10. Txini emukamihedhile Abigaili ovilela masiki vaniyena matelo orutxa?

¹⁰ Sabwa ya omukwela Yehova Abigaili wanriha matelo aye dhahene ninga munonela Yehova. Kinaganyedheya wi iyene wanziwa ejile yawaddeli Yehova atelani oroma, Adamu na Eva. (Wita 2:24) Abigaili wanziwa wi matelo anofwanyela orihiwa, sabwa ya ejuwene iyene wanfuna omwagalaliha Yehova. Txino jijuwene emuttukuleli okosa muli-mwetemwene wi àvune attu otene akala vatakulu vaye vina mamune. Nona bamutximiha Davidi wi anampe mamuné ofiyedha okumbirha nlevelelo mwa dhilobo dhahakosiliye. Txibarene Yehova wannimukwela muyana oddu woliba murima. Ateli na ateliwi ansunzavo nni na yotagiha ya Abigaili?

11. (a) Txini enjedhela Yehova mwa abale atelanile? (Éfeso 5:33) (b) Txini esunziliwe na guru ekosile Carmen wi abarele murala waye? (Koona vina foto.)

¹¹ Ensunzihu. Yehova onfuna wi atelani adhowegevi akalaga vamodha masiki akala muttu mmodha onorutxiha mateloya. Yehova onowagalala venjene akala muteli obe muteliwi onologela makani a vamuralani vaye vina onolagiha okwela na nriho. (Kengesa Éfeso 5:33.) Koona yotagiha ya Carmen. Muvirile vyaka tanu na modha bamalile oteliwa iyene wahiroma omusunza Bibilia na Anamoona a Yehova, mbwenyi dhihivira vyaka 50, Carmen alagihaga ovilela vina nriho vamuralani vaye. Iyene onologa dhahi: “Vakalile miyo Munamoona wa Yehova mamunaga kaziveliwe nne vang’ono. Iyene wahiddikanela nrima sabwa ya okala Munamoona wa Yehova. Wanloga mazu oddinyimula vina wandditxutxa wi onele oddimwala.” “Mwa ovira wa mudhidhi ddahitamela ononelamo mukalelo waviwamo mamunaga vina ddanloga na iyene noderetu. Eddivahile guru ya obarela murala waga ja oziwa wi matelo bokoddela vamentoni va Yehova. Ddihidhowavi ddibarelaga murala waga sabwa ya omukwela Yehova.”c Akala weyo onogumanana makattamiho vamuralani vawo, kakana nikuluvelo wi Yehova onele wukamihedha odhowavi ovilelaga.

OVILELE OGANYIMUWA NA DHOVONYA DHAWO

12. Nigakosa yottega enddimuwa, nindaga ogumanana makattamiho gani?

¹² Ekalelani yorutxa. Sabwa ya okosa yottega enddimuwa, txino weyo onofiyedha wubuwela wi kuli elobwene, kunawodhe okosa dhilobo dhaderetu. Bibilia onologa wi dhottega dhehu dhinonikubanyiha vina dhinonikumula. (Masal. 51:17) Mbali onkuweliwa Robert ohivilibihedha mwa vyaka dhinjidhene wi akale mudhari worumeliwa wa mmulogoni. Nomala, okosa yottega enddimuwa, iyene ononelamo wi wahimunyimula venjene Yehova. Iyene ohiloga dhahi: “Mobuwelo waga wanddilemela.” “Ddakala ninga ddali mutxelani novaya vaddiddi. Miyo ddanunla oku ddimulobelelaga Yehova. Mbwenyi ddobuwela wi Yehova txipo kagakulile malobelo aga. Egamuttukuleli oddakula txini, oku miyo ddimalile omunyimula dhahene?” Nigakosa yottega enddimuwa, iyo ninokumuwa vaddiddi ofiyedha wubuwela wi Yehova omala oninyanyala vina kaninfwanyelela omulabela wili. (Masal. 38:4) Akala oniviwamo dhawene, karoma otanala nipadduwo na muttu onlogiwa mBibiliani, owodhile ovilela masiki na dhovonya dhaye.

13. Dhovonya gani dhikosile Pedro, nanda yottabwaya jivi?

¹³ Yotagiha ya mBibiliani. Mattiyu omariha Yezu ahinakwa, murumiwi Pedro wahikosa dhovonya dhofwarelana, eji ehimuttukulela okosa yovonya yottabwaya. Voroma, Pedro wali muttu wana ekalelo yovikuluvela, jijuwene emuttukuleli ologa wi txipo kagamunyanyalile Yezu masiki arumiwi ena komuttawa. (Mk. 14:​27-29) Vasogorhova, bali mmunddani w’o Jetsemani, dila dhinjidhene Pedro kawodhile ovyang’anela. (Mk. 14:​32, 37-41) Vasogorhova, mfiyele muttitti wadhile ommaga Yezu, Pedro wahimuttawa. (Mk. 14:50) Omamalelowa, Pedro omukodda Yezu dila ttaru, yottabwaya oddubelela egumi yaye alogaga kamuziwa. (Mk. 14:​66-71) Pedro oviwilemo dhavi muzinddiyeliye wi wahikosa yovonya enddimuwa vaddiddi? Murima wahimparuwa vina wahunla na okubanya vaddiddi, txino musorho wannimulemela sabwa ya wubuwela yovonya yakosiliye. (Mk. 14:72) Vina katanalela elobo ettabwihile okubanya waye muvirile mawora mang’onovi nomala Yezu bapiwa. Txino Pedro wahifiyedha wubuwela wi kalabela elobwene!

14. Txini emukamihedhile Pedro ovilela vina odhowavi omulabelaga Yehova? (Koona ya kapa.)

¹⁴ Dhikalawo dhilobo dhimukamihedhile Pedro ovilela vina odhowagavi amulabelaga Yehova. Iyene ohatamela anamafwara ena, awene ahimukamihedha vina ahimpangarhaza. (Lk. 24:33) Ottiya ejo, muvenyihiwe Yezu mukwani wahimuttwanyuwela Pedro, kavali waganyedha wi Yezu wahimpangarhaza. (Lk. 24:34; 1 Kor. 15:5) Ottiya ompambiha Pedro sabwa ya dhovonya dhaye, Yezu wahifwasiha murima waye vina wahimwaddela wi agahittomeliwa mabasa mena. (Jo. 21:​15-17) Pedro wahinonelamo wi wahikosa yovonya enddimuwa vaddiddi, mbwenyi katxelelile okosa dhilobo dhapama. Sabwaya jani? Pedro wanziwa wi Namasunziha waye Yezu, kamunyanyalile. Vina anamafwara ena a Yezu, ahidhowavi amukamihedhaga Pedro. Txini ensunzehu na yotagiha ya Pedro?

15. Yehova onfuna wi nikuluvelihe murima wehu na eni? (Masalmo 86:5; Roma 8:​38, 39) (Koona vina foto.)

¹⁵ Ensunzehu. Yehova onfuna wi iyo nihaganyedhe onikwela waye vina olevelela waye. (Kengesa Masalmo 86:5; Roma 8:​38, 39.) Ebaribari wi nigakosa yovonya, ninokubanya venjene. Ejo kahiye yabure. Dila dhina oviwamo dhawene enonikamihedha, mbwenyi txipo kanubuwele wi kaninfwanyela okweliwa na Yehova nne vina oleveleliwa na iyene. Ottiya wubuwelaga dhawene, momaguva-mwene nitamele nikamihedho. Robert, ologiwe mundduni onologa ekalelani yamakamaka otamela nikamihedho: “Eddittukuleli okosa yovonya, mubuwelo wovikuluvela, miyo ddobuwela wi ddali muttu wowarala vina kaddigattiyile yoweha oddittukulela okosa yottega. Muvedile miyo nikamihedho na anddimuwa a mmulogoni, ponilemi wi Yehova wanddikwela vina walabihedhile abali abo wi onihe oddikwela waye. Abali abo kaddinyanyalile vina ahiddikamihedha wona wi Yehova kaddinyanyalile.” Nikuluvele wi Yehova ononikwela venjene, onolevelela dhottega dhehu nigatxinuwa vina nigaveda nikamihedho, ottiya ejo, nigavilibihedha venjene wi ninakose wili dhovonya dhakene. (1 Jo. 1:​8, 9) Nigakuluveliha murima wehu wi Yehova ononikwela vina ononilevelela, ninele odhowavi nimulabelaga masiki nigakosa yottega.

16. Oganele nni odhowagavi omulabelaga Yehova novilela?

¹⁶ Yehova onovaha ttima guru enkosihu ya odhowavi nimulabelaga masiku aba omariha ali orutxa vaddiddi. Na nikamihedho naye enowodheya ovilela, masiki na dhilobo dhinninyimula. Nakwelege abalihu na arogora vina nalevelelege masiki aganinyimula. Ottiya ejo, enowodheya olagiha wi ninomuriha venjene Mulugu vina ninoriha matelo nigavilibihedha ogomiha magudulano ankanihu vamuralani na mwadhihu obe mamunihu. Akala ninokosa yottega enddimuwa, nitamela nikamihedho na Yehova, nirumela onilevelela waye vina okwela onnilagihiye, nikuluvele wi “[nigahilemena] wira dhapama” ninele orurihiwa venjene.—Gal. 6:9.