Kapitulu Tanu
Ofuru Onkaana Anamebedha A Yehova
1, 2. (a) Mukalelo gani wa ofuru wavahile Mulugu atelani ooroma? (b) Karomola malamulo mena abene aalamulela mabasa a Adamu na Eva?
YEHOVA mwamuthanddeliye mulobwana na muyana woroma, awene ahikaana ofuru, opitha obule ona athu ovanene. Murala wawa wali Paraizu, Mundda wokoddela wa Edeni. Nne maredda kaakathamiha ohagalala wawa na egumi, vowila awene ahikaana mubuwelo na maningo owakwana. Awene kajeedhela okwa ninga munkoseyelani na athu ena adhile musogorhomwa. Vina awene kaali ninga makina abene asasanyedhiwe oloddaga mweeddihedho mweeddihedhovi, mbwenye aahikaana mvaho wa thima wa ofuru wa osakula, ewodhelo ya osakula dhogana dhawa. Wila ajegevovi ofuru obule, txibarene awene anfanyeela oriha malamulo a Mulugu.
2 Motagiha, koona malamulo aneeddiha dhothanddiwa abene akungile Mulugu. Awene kela opangiwa malamulo aba, mbwenye Adamu na Eva aathanddiwe na mukalelo wewelelani malamulo aba ninga epaddi ya egumi yawa. Dala yatonyihedha wila anfuna oja; nthona, natonyihedha wila anfuna omwa manje; oddowela wa nzuwa, watonyihedha wila bu mudhidhi wa ogona. Yehova vina wahathomela mabasa. Mabasa aba aali txibarene nlamulo, sabwani aba agahilamulela merelo awa. Awene anfanyeela wabaala ana, vina olamulela dhothanddiwa dhiina dhinjidhene dha velaboni ya vati, vina otapula maddile a Paraizu mpaka wakwanela elabo yotene ya vati. (Wita 1:28; 2:15) Nthi nali nlamulo nohagalaliha, vina nopureyamo vaddiddi! Eji yahavaha awene mabasa owakwanela vina ohagalaliha, ejene yawodhiha olabihedha mowakwanela mirugu dhawa na mukalelo wopureyamo. Awene vina aahikaana ofuru mwinjene wa ogana dhilobo mwaha wa mukalelo ogasorihilani mabasa awa. Elobo gani yina egafunilani?
3. Adamu na Eva aziwile dhavi olabihedhaga na zelu ofuru wawa wa wila aganege dhilobo?
3 Txibarene, Adamu na Eva mwavahedhiwani gari ya oganaga dhilobo, eji kiyatapulela wila elobo ji elobo yaganani egahakalela deretu. Ofuru wawa wa oganaga dhilobo wanfanyeela okosiwa s’ohilupa maddile a malamulo vina magano a Mulugu. Awene agawodhile dhavi oziwa malamulo na magano a Mulugu? Modheela onvuruwanaga Mpaddutxi wawa vina modheela woonaga mabasa aye. Mulugu wahinvaha Adamu na Eva zelu yafuneya wila athiddihedhege mabasa esile dhaziwilani. Vowila awene aathanddiwe owakwanene, ekalelo yawa ya obaaliwa egahilagiha mikalelo dha Mulugu agaganaga dhilobo. Txibarene, awene agahikala pasope okosaga ejene akala awene txibarene antamaalela eji yakoseli Mulugu vina ejile yafuniye wila amuhagalalihe.—Wita 1:26, 27; Joau 8:29.
4. (a) Nlamulo navahiwe Adamu na Eva na okoodda oja musapo wa muri dhahi nannakathamiha okaana ofuru? (b) Nthi nakaleli eni nlamulo nofanyeela?
4 Mofanyeelamwene, musogorhomwa Mulugu wahifuna waweha wila oone oviperheka wawa vamentoni vaye ninga Namavaha Egumi, vina ofuna wawa wa okalavi mwari mwa maddile a ofuru wavahile Mulugu. Yehova wahinvaha Adamu nlamulo nthi: “Kewa, onothiyiwa oja milima dha miri dhetene dhili muddebe mpuno; vano ohije-wene milima dha muri onziwiha opama n’obure, vawi siku ntho ninaje weyo, onere okwa.” (Wita 2:16, 17) Mwamaleli othanddiwa Eva, iyene vina wahipangiwa nlamulo nthi. (Wita 3:2, 3) Nlamulo nthi nannakathamiha okaana ofuru? Nne. Awene ahikaana dhoja gwe dhoziva dha mikalelo dhotene, s’ohija musapo wa muri obule mmodha. (Wita 2:8, 9) Eji yali dhaene wila awene anonelemo yawila elabo ya vati mwinyaya ddi Mulugu, vowila ddi iyene wathanddile. Noona iyene wanfanyeela ogwiha malamulo abene ewanana na efunelo yaye vina akaliha deretu nlogo na athu.—Masalmo 24:1, 10.
5. (a) Adamu na Eva ayeleeli dhavi ofuru wothithimiheya wananina? (b) Txini yahali vamburoni va ofuru wajavo Adamu na Eva, ki iyo nipakeleyi dhavi?
5 Ki txini yapadduwile? Sabwa ya ofuna mpaddo, mungelo mmodha wahilabihedha mwabure ofuru waye wa osakula, venevo bakala Satana, ejene entapulela “Namapambiha.” Iyene wahimunyengetha Eva modheela omuroromeliha elobo yothiyana na efunelo ya Mulugu. (Wita 3:4, 5) Adamu vina wahivitaganyiha na Eva mwa olupa nlamulo na Mulugu. Modheela otamela okaana ejile yahaali yawa, awene aahiyeleela ofuru wawa wothithimiheya. Dabi yahiroma walamulela, vina ninga mwalageli Mulugu, omagomelowa ahikwa. Yohalana yathiyedhani ana awa ji dabi—ejene enooneya na efunelo yawa yobaaliwana ya okosa obure. Vina sabwa ya dabi maningo a athu aahiroma wobana, okwene ototile obulela, wuluvala, vina okwa. Emanya ya ofunaga okosa obure, ethabwihiwe na nipakelo na Satana, ehikosiha nlogo na athu odhaala owogo, opanga, olamulela wa otabala, vina koddo esene dhapile athu matxikwi na matxikwi. Vahikala othiyana vaddiddi na ofuru obule wavahile Mulugu nlogo na athu omaromo!—Olibiha 32:4, 5; Job 14:1, 2; Roma 5:12; Ovuhulela 12:9.
Okule Onfanyeya Ofuru
6. (a) Ofuru watxibarene onfanyeya wuvi? (b) Yezu waddana ofuru gani?
6 Sabwa ya dhilobo dhabure esene dhili mpaddi wotene ovanene, kintikiniha wila athu anosilila okaana ofuru munddimuwa. Ki ofuru watxibarene onfanyeya wuvi? Yezu walogile dhahi: “Mugavirihamo mazu aga, munokala-wene anamasunza aga, munonona ebaribari; ebaribariyá jinaufuruleni.” (Joau 8:31, 32) Ofuru obu kayo ninga obule onjeedhelaga athu agamukoodda mulamuleli obe mukalelo wa olamulela nanda bamusakula mulamuleli mwina. Othiya eji, ofuru obu onofiyedha nipara na makathamiho a athu. Yezu waddana ofuru mwa odhari wa yothega. (Joau 8:24, 34-36) Dhaene, akala muthu onokala namasunza watxibarene wa Yezu Kristu, iyene onokosa masadduwo manddimuwa mwigumini yaye, onokaana nifuruleyo!
7. (a) Na mukalelo gani onwodhihu ofuruleya mwa yothega ovanene? (b) Wila nikaane nifuruleyo nthi, ninfanyeela okosa eni?
7 Eji kintapulela wila ovanene Akristu a ebaribari kaniwa esile dhintota emanya yobaaliwana ya okaana mweddelo wothega. Vowila awene ahibaaliwana yothega, ahikaanavi makathamiho sabwa ya yothega eji. (Roma 7:21-25) Mwa dhaene, akala muthu onokalawo txibarene mowiwanana na masunziho a Yezu, iyene kankala viina mudhari wa yothega. Yothega kinamukalele viina ninga mulamuleli waye oddwene onimugwihedha malamulo abene anfanyeeliye ofara bure bure. Iyene kanapupuruwele mu dila ya egumi yohikaana ntapulelo vina ejene enamuthiye na mubuwelo wodhugudheya. Iyene onela ohagalala na mubuwelo wotxena vamentoni va Mulugu sabwani dhothega dhaye dha wale dhihimala oleveleliwa sabwa ya ororomela mukutho wa Kristu. Txino dhimanya dha othega dhinotamela omulamulela, mbwenye agakoodda okosaga esene sabwa ya wubuwela masunziho okoddela a Kristu, iyene onolagiha yawila yothega kinimulamulela viina.—Roma 6:12-17.
8. (a) Ofuru gani onnivaha Okristu wa ebaribari? (b) Ninfanyeela wawoonaga dhavi alamuleli a mwilaboni?
8 Katanaalela ofuru onihuna sabwa ya okala Akristu. Nihifuruliwa mmasunzihoni oohikala a ebaribari, nihifuruliwa mu kangani ya ororomela magano abure, vina nihifuruliwa okala adhari a dabi. Ebaribari enddimuwa mwaha wa mukalelo wa abale akwile vina ebaribari mwaha wa ovenya mu okwani ehimala onifurula wova wohikaana ntapulelo wa okwa. Oziwa wila alamuleli a omuthu mohigoneela enela otxinjiwa na Omwene woligana wa Mulugu ononifurula mwa otuwa njeedhelo. (Daniyel 2:44; Mateu 6:10) Mwa dhaene, ofuru obu kunnikosiha otuwiwa nriho na alamuleli a mwilaboni vamodha na malamulo awa.—Tito 3:1, 2; 1 Pedro 2:16, 17.
9. (a) Yehova onnikamiha dhavi na okwela wila nijevo muthengo munddimuwa vaddiddi wa ofuru onwodheya ovanene na athu? (b) Niwodhe dhavi ogana dhilobo na zelu?
9 Yehova kannithiya ozinddiyela mukalelo okaliletxe wa okalawo modheela otagiha vina ovonya. Iyene onoziwa mukalelo othanddiwihu, ejile ennihagalaliha txibarene, vina ejile eli ya okala deretu wehu wa mukalakala. Iyene onokalela txenjewa dhubuwelo vina mweddelo onwodha ononga wandana wa muthu na Iyene vina na athu akwaye, masiki vina omukathamiha muthu ovolowa mwilaboni eswa. Sabwa ya onikwela, Yehova ononipanga mwaha wa dhilobo esi modheela Bibilia vina nikuru naye nowooneya. (Marko 13:10; Galásia 5:19-23; 1 Timóteo 1:12, 13) Venevo eji eli na iyo othiddihedhaga mabasa ofuru wa osakula onivahile Mulugu wila nigane mukalelo onfunihu wakulela. Othiyana na Adamu, nigavuruwana na murima wotene esile dhinnipanga Bibilia, ninela ogana dhilobo na zelu. Ninela olagiha wila wandana waderetu na Yehova ji yozuzumela yehu ya makamaka mwigumini yehu.
Ofuna Ofuru Wa Mukalelo Mwina
10. Mukalelo gani wa ofuru onkosela guru Anamoona ena a Yehova?
10 Midhidhi dhiina azombwe abene ali Anamoona a Yehova—vina anddimuwa—txino anoona ninga anofuna ofuru wa mukalelo mwina. Txino elabo podi okalaga ninga yokoddela vina yohagalaliha, nanda venevo vantanaaleletxani eji panromani osilila vaddiddi okosa dhilobo dhohikala dha Okristu esene dhidhaalile mwilaboni. Athu aba txino kanubuwela oja mirobwe dhinnonga mubuwelo, omwa bure, obe oraruwa. Mbwenye awene anoroma wandana na athu ena abene ahili Akristu a ebaribari, bagafuna orumeeliwa na awene. Txino awene vina podi oroma otagiha mulogelo na mweddelo wawa.—3 Joau 11.
11. Dila dhiina munyengetho wa okosa dhabure onda wuvi?
11 Dila dhiina munyengetho wa omothela mmereloni ahili a Okristu onda mwa muthu onloga wila onomulaba Yehova. Ejene yahapadduwela Akristu ena ooroma, nanda podi opadduwa mu nsaka nehu. Athu aba anofuna okosa dhilobo esene dhinoonani wila dhinela wahagalaliha, mbwenye dhilobo esi dhinovirigana na malamulo a Mulugu. Awene anowakokomeza athu ena wila “ahagalale.” Awene “anowaroromelihedha ofuru, oku awene anya akalaga adhari a dhoviriganadhá.”—2 Pedro 2:19.
12. Sivi dhili dhodhavo dhokubanyiha dha mweddelo wothiyana na malamulo vina magano a Mulugu?
12 Esile dhinoona athu enjene ninga ofuru mudhidhi wotene dhinotota makathamiho, vowila eji entapulela ovanya malamulo a Mulugu. Motagiha, ogonihana wonyakuwa podi omutotela muthu mubuwelo wonyonyeya, maredda, okwa, yari yohifuna, vina podi ofudha matelo. (1 Korinto 6:18; 1 Tesalónika 4:3-8) Oja mirobwe dhinnonga mubuwelo podi otota ohirutxa oludduwa, ologa dhohiweya, sisinya, eviravira, mabefu, woona dhitagano dhihiliwo, vina okwa. Eji podi otota edhivi-dhivi, ejene entota opanga wila muthu akaane mirobwedha. Omwa bure podi otota makathamiho akakene. (Gano dh’olelana 23:29-35) Athu anthukula mweddelo obu podi wubuwelaga wila awene ahikaana ofuru, mbwenye vasogorhova anowoona wila adhari a dabi. Dabi nabuya wa otabala! Otanaalela mwaha obu ovanene podi onikamiha orabela mapadduwo aba.—Galásia 6:7, 8.
Apale Vanroma Makathamiho
13. (a) Edhivi-dhivi entota makathamiho enrometxa wuvi? (b) Wila ninonelemo txini “wandana wabure,” ninfanyeela okaana moonelo wa ani? (c) Ogakulaga mavuzo alebeliwe mu ddima 13, kathukulela vadhulu moonelo wa Yehova.
13 Kobuwela apale vanrometxa makathamiho. Bibilia ontapulela dhahi: “Muthu-muthu onehiwa na vidhivi-dhivi dha mmurimani mwaye, dhinimukwekwetha, dhinimugwihedha vamuregani. Dhahene mónlelo abure anobala yothega; yothega eli mmurimani, enobala okwa.” (Tiago 1:14, 15) Edhivi-dhivi enroma dhavi? Modheela ejile envolowa mmusorhoni. Dila dhinjidhene eji empadduwela sabwa ya wandana na athu ahinthiddihedha mabasa magano a Bibilia. Txibarene, notene ninoziwa yawila ninofanyeela orabela “wandana wabure.” (1 Korinto 15:33) Ki wandana gani oli wabure? Yehova onoona dhavi mwaha obu? Otanaalela mwaha wa mavuzo aba anda mutxiddo vina wengesa malebo atonyiwe onofanyeela onikamiha okaana dhowakula dhofanyeela.
Masiki athu ena vankalani ninga a ethomo, entapulela wila awene amarho aderetu? (Wita 34:1, 2, 18, 19)
Makani awa, txino dhipali dhawa, dhinotonyihedha wila awene podi okala amarho vaddiddi ehu? (Éfeso 5:3, 4)
Yehova oniwa dhavi nigasakula wandana vaddiddi na athu ahinimukwela iyene? (2 Mapadduwo 19:1, 2)
Masiki txino vanlabihu obe vandowihu oskola na athu ahinrumeela esile dhinrumeela iyo, okaleli eni ofuneya wa iyo okala txenjewa? (1 Pedro 4:3, 4)
Woona televizau na mafilme, olabihedha Interneti, vina wengesa manivuru, marevista, vina majornale, esi mikalelo dha wandana na athu ena. Dhitagano gani dhili mwari mwa dhilobo esi, esene dhinfanyeelihu okala pasope? (Gano dh’olelana 3:31; Izaiya 8:19; Éfeso 4:17-19)
Osakula wehu wa amarho onimpanga eni Yehova mwaha wa mukalelo wa athu olihu? (Masalmo 26:1, 4, 5; 97:10)
14 Vasogorho vehu vahikala elabo eswa ya Mulugu. Modheela nlamulelo na Omwene wa odhulu wa Mulugu, nlogo na athu ninela ofuruliwa mwa nipakelo na Satana vamodha na elabo eji yaye yotene yabure. Vañgono vañgono, esile dhitotiwe na yothega dhinela ofudhiwa mmaningoni mwa nlogo na athu aniwelela, vakalaga wakwana wa mubuwelo vina maningo, venevo ninela owodha ojavo egumi ya mukalakala mParaizu. Omamalelowa, dhothanddiwa dhotene dhinela ojavo ofuru wowiwanana kakamwe na “muya wa Nabuya.” (2 Korinto 3:17) Egahikala ya zelu oyeleela dhotene esi sabwa ya opwaza nlago na Nzu na Mulugu ovanene? Modheela othiddihedha mabasa ofuru wehu wa Okristu nsaka na ovanene, ndoweni notene nilagihe mowooneya deretu yawila ejile enfunihu txibarene ku “ojavo ofuru, nthithimiho ninakele ana Mulugu.”—Roma 8:21.
Osakulela
• Mukalelo gani wa ofuru wakaanile atelani ooroma? Eji enladdanihiwa dhavi na esile dhimpadduwela nlogo na athu ovanene?
• Akristu a ebaribari ana ofuru gani? Eji enthiyana dhavi na ejile enoona elabo ninga ofuru?
• Ekaleli eni ya makamaka vaddiddi orabela wandana wabure? Mothiyana na Adamu, ninrumeela dhogana gani dha ejile eli yabure?
14. Ofuru gani onddimuwa vaddiddi onajeedhela abale anthiddihedha mabasa mowakwanela nlago na Nzu na Mulugu ovanene?
[Mafoto vanikukuni 46]
Nzu na Mulugu ninolaga: “Kamurumele opeliwa malago: Wandana wabure, onononga meddelo apama”