NSUNZO 12
Txini Enawukamihedhe Odhowagavi Bugamusunza Bibilia?
Mohaganyedha omusunza Bibilia elobo yamakamaka enfwanyelela muttu okosa. Mbwenye, kahiyo yovevuwa. Mudhidhi mwina onodhaga wubuwela akala onele owodha odhowavi bugamusunza Bibilia. Ekalele eni yamakamaka odidelavi omusunza Bibilia? Txini enawukamihedhe okosa ejuwene masiki na makattamiho?
1. Omusunza Bibilia ekalele eni elobo yamakamaka?
‘Nzu na Mulugu ttolaba, ninowira enlogani.’ (Ahebreu 4:12) Omusunza Bibilia elobo yamakamaka, ononikamihedha ononelamo dhubuwelo dha Mulugu vina efunelo yaye na nlogo na attu. Na nikamihedho na Bibilia weyo onele osunza dhilobo dhiswa, okana egumi yottugareya vina okana njedhelo na musogorho. Ya makamakaya, onele wukamihedha okala marho wa Yehova. Bibilia onele otxinja egumi yawo ogadhowa omusunzagavi.
2. Wi okane egumi yowagalala, ekalaleleni yamakamaka ovaha ttima ensunziha Bibilia?
Ebaribari enfwanyeya mBibiliani eli ninga mafumo. Nona Bibilia agalogaga wi ‘Tamela ebaribari mbwenye kugulihe-wene.’ (Gano 23:23) Iyo nigavaha ttima ensunziha Bibilia, ninele ovilibihedha wi nihimuttiye omusunza—masiki nigagumanagana makattamiho.—Kengesa Gano 2:4, 5.
3. Yehova onawukamihedhe dhavi wi odhowegevi bugasunza?
Yehova, muttanddi wowodha-wodha vina ddimukwawo. Iyene onowuziwa opitta muttu mwina vina onofuna oukamihedha omuziwa. Yehova, ‘onowuvaha guru ya wirana dhinfuniye.’ (Kengesa Filipi 2:13.) Nona, masaka mena ogakumuwela omusunza Bibilia obe ogona wila enorutxa olabihedha mwigumini mwawo esile dhinsuziwe, iyene onele wukamihedha. Akala weyo onfuna nikamihedho na opemberha vina owanana dhorutxa, Yehova onele wuvaha. Kamulobelelegevi Yehova wi awukamihedhe odhowavi bugamusunza Bibilia.—1 Tesalónika 5:17.
KASUNZAVI
Koona marhe mena a odhowavi bugamusunza Bibilia masiki attu ena ahiziveliwagana. Yehova onele wukamihedha ohiyelela mundduni.
4. Katonyihedha wi nsunzo na Bibilia ttamakamaka mwa weyo
Masaka mena ninokanaga dhilobo dhinjidhene dhokosa ofiyedha wubuwela wi kanina mudhidhi wa omusunza Bibilia. Txini enawukamihedhe? Kengesa Filipi 1:10, mugamala mutanaalele mavuzo aba:
Txini dhinonamo weyo ninga “dhilobo dhamakamaka” mwigumini mwawo?
Onatonyihedhe dhavi wi nsunzo na Bibilia ttamakamaka mwa weyo?
Weyo ogaroma wika muyoboni mattaka ogamala wikamo malugu, maluguya kanamalelemo
Mbwenye weyo ogaroma wikamo malugu onele ohala mburo wowikamo mattaka bamalelamo. Na mukalelo wakakene, ogaroma “okosa dhilobo dhamakamaka” onele okana mudhidhi wa okosa dhilobo dhina
Omusunza Bibilia ononikamihedha wunuwa mpaddi womuyani—obe okana efunelo ya omuziwa Mulugu vina omwebedha. Kengesa Mateu 5:3, mugamala mutanaalele nivuzo ntti:
Ninakele mareliho gani nsunzo na Bibilia nigakala namakamaka mwigumini mwehu?
5. Kurumele attu ena wuttiyiha omusunza Bibilia
Enodhaga opadduwa attu ena ofuna wuttiyiha omusunza Bibilia. Koona yotagiha ya Francesco. Karumiha VIDIYU, mugamala mutanaalele mavuzo aba.
Nvidiyuni, amarho na anamudhi a Francesco ewilemo dhavi mudhidhi wawaddeliye esile dhasunziye?
Mareliho gani akeliliye sabwa ya ovilela?
Kengesa 2 Timóteo 2:24, 25, mugamala mutanaalele mavuzo aba:
Anamudhi na amarho awo anonamo dhavi esile dhinsunziwe?
Mowiwanana na maversu aba, txini enfwanyeliwe okosa akala muttu onosilidhiwa agawuwonaga bugamusunza Bibilia? Sabwaya?
6. Kakuluvela wi Yehova onele wukamihedha
Mudhidhi ondhowihu baniganfiyedhavi Yehova, efunelo yehu ya amwagalaliha enelege wunuwavi. Masiki dhawene, enodhaga okala elobo yorutxa okosa matxinjo mwigumini mwehu wi niwodhe okalawo mowiwanana na esile dhinziveliwana Yehova. Ogaviwamo dhawene, kuwiyelele mundduni. Yehova onele wukamihedha. Karumiha VIDIYU, mugamala mutanaalele mavuzo aba.
Nvidiyuni, matxinjo gani akosile Jim wila amwagalalihe Yehova?
Elobo gani eziveliwiletxe weyo munipadduwoni naye?
Kengesa Ahebreu 11:6, mugamala mutanaalele mavuzo aba:
Yehova onakosela eni “abale animutamela”—obe abale anvilibihedha wi amuziwe vina amwagalalihe?
Weyo ononamo dhavi mukalelo oniwamo Yehova agawuwonaga okosaga guru wila omusunze Bibilia?
ATTU ENA ANLOGA WI: “Txini enuttukulela omusunza Bibilia na Anamoona a Yehova?”
Weyo ogalogile dhavi?
OGWADDELA
Ebaribari wi omusunza Bibilia kahiyo elobo yovevuwa, mbwenye okosa ejuwene enele wukamihedha ojavo egumi yamukalakala. Kamukuluvelegevi Yehova, iyene onele wureliha.
Kobuwela Dhisunziliwe
Ebaribari ya Bibilia ekalele eni nifumo mwa weyo?
Weyo onatoyihedhe dhavi wi onovaha ttima “dhilobo dhamakamaka”?
Enfuneyelani omukumbirhaga Yehova nikamihedho wi odhowegevi omusunzaga Bibilia?
TAMELÁ ONONELAMO DERETU
Kengesa mikalelo minai dhakamihedhile attu ena olabihedha deretu mudhidhi wawa.
“Como Aproveitar Bem Seu o Tempo” (Despertai!, Fevereiro de 2014)
Mamuni wa Grace kanonelamo sabwaya yafunela mwadhiye omulabela Mulugu. Koona nikamihedho nivahiwe Grace na Yehova.
Yehova Ononivaha Guru Yopemberana Makattamiho-makattamihovi (5:05)
Koona nikamihedho nakelile mamuni dhahi sabwa ya ovilela wa mwadhiye.
Dila dhina Anamoona a Yehova anomagedhiwa wi awene anomwadha mirala. Koddi ejo ebaribari?
“Será que as Testemunhas de Jeová Dividem ou Unem as Famílias?” (Mitoma dha mu jw.org)