Agari Babale Animwebedha ‘Mulugu Wohagalala’

1. Enlogeliwa nni wila Anamoona a Yehova nlogo nowagalala? (Koona foto eli omaromo.)

ANAMOONA A YEHOVA nikuru nowagalala. Masaka menjene, ali vamodha mmatugumanoni a mulogo, mmatugumani a murudda vina bagaredha mumodhani; mwetemwene mpo ankala owagalalene. Anwodha dhavi okana wagalala? Sabwaya jawi awene animulabela Yehova, ‘Mulugu wohagalala.’ Vina anovilibihedha omutagiha. (1 Timóteo 1:11; Masalmo 16:11) Yehova nipara nowagalala noona iyene onjedhela wila iyo nagalale, wila ejene epadduwe iyenene ononivaha dhilobo dhaderetu wila dhinagalalihe.​—Olibiha 12:7; Kohelét 3:12, 13.

2, 3. (a) Wagalala ontapulela nni? (b) Ekalele nni yorutxa okala ohagalala?

² Kito weyo? Oli muttu wohagalala? Okana wagalala ontapulela okala wottugareya vina oziveliwana egumi yawo. Bibilia onlagiha wila abale anrurihiwa na Yehova bankana wagalala webaribari. Masaka abano ekalele nni yorutxa okana wagalala?

³ Jorutxa sabwani ninofwanyiwa makattamiho menjene; ninga motagiha, okweliwa mwana mmudhi obe omona mmudhihu bagaburhutxiwa mmulogoni, wawona attu bagamwalana obe oyelela ganyo. Kinwodheya wagalala nigakalaga na attu ahiniwanana na iyo, nigaligiwaga, nigateyiwaga na akwihu oskola obe omabasani, vina nigafugeliwa mukamburha mwaha womulabela Yehova. Ofwanyiwa eredda ehiniwa murobwe, enonikubanyiha enitotelaga wubuweletxa. Mbwenye nigagumanana makattamiyo ninga abene enofuneya omubuwela Yezu Kristu oli muttu ‘owagalala vina Nabuya wa guru,’ iyene ononikwela vaddiddi okana efunelo yonikamihedha wi nagalale. (1 Timóteo 6:15; Mateu 11:28-30) Diskursu ya Vamwangoni ekosile Yezu, wahiloga mikalelo dhinanikamihedhe wagalala masiki nigafwanyiwa makattamiho mwilaboni ejino ya Satana.

WI NIFWANYE WAGALALA JOFUNEYA OLIBIHA MANDANO EHU NA YEHOVA

4, 5. Txini enfuneya wi nagalale?

⁴ Elobo yoroma elogile Yezu, jamakamaka. Enttaka dhahi: ‘Agari babale anzuzumela dhilobo dhomuyani vowi omwene wa Mulugu bwawa.’ (Mateu 5:3) Akala ninozuzumela dhomuyani, ninofwanyela omuziwa Yehova vina okumbirha nikamihedho naye. Ninamukumbirhe dhavi Yehova nikamihedho? Modhela omusunza Bibilia, ovirihamo esile dhinsunzihu mwigumini mwehu, na wika omwene wa Mulugu vamburoni voroma. Ottiddihedha mabasa dhilobo esi dhinonikamihedha ofwanya wagalala. Nroromelo nehu na musogorho ninkala noliba-nene. Nigafwanyiwa makattamiho, nubuwelege ‘njedhelo nehu na musogorho’ ninfwanyeya mBibiliani ninanikamihedhe ovilela makattimiho ehu.​—Tito 2:13.

⁵ Nigavilibihedha wagalala masiki nifwanyiwaga magudulano mwigumini mwehu, wandana wehu na Yehova onoliba. Murumiwi Paulo ohileba: ‘Ttabanivi mwa Nabuya. Ddilogile: agalalani!’ (Filipi 4:4) Wi nandane na Yehova enofuneya okana ononelamo onda wa iyene. Nzu na Mulugu ninologa: “Muliba gari ddule ofwanyile ononelamo, ogumelile eziwelo. Esidha sathima opitha parata, dhinompurihela munya opitha mddarhama.”​—Gano 3:13, 18.

6. Elobo yina enfwanyela iyo okosa wi nagalale jivi?

⁶ Akala nili attu owagalala, wi nidhowenavi wagalala oku nihittiye omusunza Bibilia. Omwengesavi kinakwana, Yezu ohiloga: “Ovano muziwa meddeloyá; mugavirihagamo, panafwanyenyu ojavo.” (Joau 13:17; kengesa Tiago 1:25.) Eji jofuneya mwa abale anzuzumela dhomuyani. Enwodheya dhavi wagalala oku dhipadduwaga dhilobo dhinnikubanyiha? Ndoweni none elobo yanawili elogile Yezu va Diskursu ya Vamwangoni.

MIKALELO DHINNIVA OHAGALALA

7. Enwodheya dhavi muttu onunla wagalala?

⁷ “Agari babale anunla, vowi aner’opangaraziwa.” (Mateu 5:4) Nivivuze, ‘Enwodheya dhavi wagalala oku nunlaga?’ Eji elogile Yezu kinattonya attu etene anunla. Atabala anowunla vina, sabwa ya makattamiho angumananina ‘masaka abano omariha’ andana “dhowopiha.” (2 Timóteo 3:1) Awene kanfuna osunza dha Yehova noona kanwodha wagalala. Versu eji enatonya abale anzuzumela dhomuyani. Awene anowiwopa muttu agakodda wiwa miselu dha Mulugu vina agakosaga dhilobo dhohifwanyelela. Anokubanya mwaha wokala attu ottega, vina sabwa ya wona dhilobo dhabure dhimpadduwa mwilaboni. Yehova onowiwa wunla wawa, wi akamihedhe ofwanye wagalala mwigumini, iyene onowalibiha na Nzu naye.​—Kengesa Ezekiyel 5:11; 9:4.

8. Okala muttu wokurumuwa enaukamihedhe dhavi wagalala?

⁸ “Agari babale ankurumuwa, vowi aner’okala anya a elabo.” (Mateu 5:5) Enwodheya dhavi muttu wokurumuwa wagalala? Attu ejene ali awali vina anamavittukulela ahinatti okala abalihu. Musunzelani ebaribari ahitxinja mweddelo wawa babala ‘omuttu oswa.’ Ddabuno awene ‘attu oviyeviha, ofwasa, okurumuwa, ovilela vina battagaraga.’ (Kolosi 3:9-12) Sabwa ya matxinjo akosilani akana murenddele, anowiwanana na abali awa, wagalala kunajombela. Nzu na Mulugu ninologa wila attu ninga abene anakale “anya a elabo.”​—Masalmo 37:8-10, 29.

9. (a) Yezu afuna ologe nni na mazu aba ‘anele okala anya a elabo’? (b) Enwodheya dhavi attu ‘ana dala na nttona’ wagalala?

⁹ Yezu afuna aloge nni na mazu aba ‘anere okala anya a elabo’? Afuna aloge wi anamafwara abale attikitteliwe, agaroma olamulela ninga amwene vina anamakutta panakalani anya a elabo. (Ovuhulela 20:6) Attu owinjiva ahinna njedhelo na wirimu anele okala anya a elabo agawodha ofwanya egumi yohimala. Awene anele okala attu owakwana, a murenddele vina ohagalala. Makuru aba meli babene alogiwe na Yezu dahi: “Agari babale ankwela dala na nthona wira enafunana Mulugu.” (Mateu 5:6) Awene anojedhela nsaka ninfuna otolotxiwa atabala otene vina ninawodhani wira mowakwana enafunana Mulugu. (2 Pedro 3:13) Mwilabo eswa, kaninonle vina sabwani makattamiho anele ogoma.​—Masalmo 37:17.

10. Ttagaraga entapulele nni?

¹⁰ “Agari babale aneddiwa thagaraga, vowi anele ofwanya thagaraga.” (Mateu 5:7) Weddiwa ttagaraga entapulele okana supaje vina okubanya muttu agatabuwaga. Okubanya enopitta ologa, ddinoukubanyedha. Enofwanyela okosa elobo-txilobo wi omukamihedhena muttuya.

11. Musibo wa Musamariya wapama onnisunziha nni?

¹¹ Kengesa Luka 10:30-37. Musibo wa Yezu mwaha wa Musamariya wapama enotonyihedha deretu entapulela okana ttagaraga. Musamariya oddule wahimukubanyedha vaddiddi muttu oddule watabuwa, okubanyawa, wahimuttukulela omukamihedha. Mmalele Yezu ologa musiboya, iyene ohenjedhedha: “Dhowa wirege yokokene.” Nivivuze: ‘Miyo ddinomusaza Musamariya oddule? Ddinomukubanyedha mwana mwaddamani waga? Muttu agatabuwaga ddinomukamihedha? Ddinokosaga elobo-txilobo wi ddimukamihedhe? Motagiha, enowodheya omukamihedha muttu owunuwelavo a mmulogoni, mamukwela obe muzombwe onkala na amambali ahili anamoona a Yehova? Enowodheya “wapangarhaza akukumuwile” antamela opamgarhaziwa?’​—1 Tesalónika 5:14; Tiago 1:27.

12. Ninajevo nni nigatonyihedha ttagaraga attu ena?

¹² Okala muttu wa ttagaraga enodhana wagalala. Na mukalelo gani? Nigakanelaga ttagaraga attu, ninel’okala attu otapuwa mada, Yezu ohiloga dhahi; attu otapuwa mada bohagalala. Vina okosa ejoya enomwagalaliha Yehova. (Merelo 20:35; kengesa Ahebreu 13:16.) Mwene David ologa dhahi na attu abale antonyihedha ttagaraga: ‘Nabuya ononvuna vina onomukoya. Ononvaha mureddele mwilaboni.’ (Masalmo 41:2, 3) Iyo nigakala attu ana ttagaraga ninele okaneliwa ttagaraga na Yehova vina ninele okana wagalala ohingoma.​—Tiago 2:13.

ENLOGELIWA NNI WI ATTU “OKODDELA MURIMA” BOHAGALALA

13, 14. Ekalele nni yofuneya okana ‘murima wokoddela’?

¹³ Yezu ohiloga: “Agari babale okoddela murima, vowi anele omona Mulugu.” (Mateu 5:8) Muttu ona murima wokoddela, ohikana mubuwelo waderetu vina wotxena. Akala ninofuna orumeliwa na Yehova nikane mubuwelo wotxena.—Kengesa 2 Korinto 4:2; 1 Timóteo 1:5.

¹⁴ Ana murima wokoddela ahikana wandana wofiyedheyana na Yehova, mazu anloga: “Agari babale anfula dhabalo dhawa.” (Ovuhulela 22:14) Txini entapulela ‘ofula dhabalo dhawa’? Mwa epaddi ya attikitteliwi entapulela wi awene anoniwa na Yehova ninga otxena noona anele wakela egumi yohimala wirimu vina anele okana wagalala ohingoma. Mwa abale anakale velaboni yavati entapulela wila akana wandana na Yehova vina anoniwa ninga okoddela. Bibilia onloga wi “babale afulile dhabalo dhawa akoddelihaga na nikami na mwana nibila.”​—Ovuhulela 7:9, 13, 14.

15, 16. Attu a murima wokoddela ‘anomona Mulugu’ na mukalelo gani?

¹⁵ Yehova ohiloga: “Muthu onddona onokwa.” (Obudduwa 33:20) Enlogeliwani wi muttu ona murima wokoddela ‘onomona Mulugu’ oku versu elogaga wi onimona onokwa? Nelogelo ya Egregu ‘wona’ entapulela dhilobo gwé ninga motagiha, otanalela, ononelamo obe oziwelamo. ‘Omona Mulugu’ entapulela omuziwa vina onona mikalelo dhaye. (Éfeso 1:18) Yezu wantagiha mikalelo dha Mulugu, noona ohiloga: “Oddonile miyo omona Baba.”​—Joau 14:7-9.

¹⁶ Ottiya osunzavi mikalelo dhaye bahi, enowodheya vina “omona Mulugu” modhela otanalela mukalelo onnikamihedha iyene labo na labo. (Job 42:5) Vina ‘ninomona’ modhela wubuwela dhilobo dhamusogorho dhinfuniye onikosela, ovilibihedha okala wotxena, vina wororomeleya. Attikitteliwi anele omona Mulugu, agavenyihiwa wi akalege wirimu.​—1 Joau 3:2.

MASIKI NA MAKATTAMIHO ENOWODHEYA OKANA OHAGALALA

17. Attu okurumuwa murina anagalela nni?

¹⁷ Yezu ohiloga vina: “Agari babale anlabela osanzaya.” (Mateu 5:9) Nigakala attu anveda oteyihana na mbalihu nigakana magudulano ninele ohagalala. Pedro ohileba: “Athu anlabela murenddele vankalani, anowala beu mmurenddeleni.” (Tiago 3:18) Akala ohikana magudulano na abali obe muttu wa vamuralani vawo kamulobelele Yehova wi awukamihedhe ologa na iyene mosanzaya-mwene. Yehova onouvaha muya waye wotxena wi owukamihedhe otonyihedha mikalelo dha Mukristu, nanda weyo onele wagalala. Yezu ohoniha ttima yokala mmurenddeleni na abalihu mulogeliye: “Weyo ofunaga ohela mukutho, venevo ogobuwela wi mbalawo okana bima na weyo, romá othiya mivaho dhawo v’ebuwani, dhowá mwateyihane na mbalawoyá, ngamala wiyelele ohela mukutho.”​—Mateu 5:23, 24.

18, 19. Akristu ankalelani owagalala masiki agafwara-fwariwaga?

¹⁸ “Munrelihiwa ddi nyuwo, mugaruwaniwa, mugasosihiwa, mugamagedhiwa dhotakala dhotene thangwi yaga.” Mazu aba alogile Yezu antapulela nni? Iyene ohenjedhedha: “Hagalalaní thabaní vowi othuveliwa wenyu wirimu kunddimuwa-wene. Anamavuhulela vina asosihiwa nyuwo muhinathi.” (Mateu 5:11, 12) Arumiwi mukoddihedhiwani olaleya, “avenya mmuthegoni athabaga.” Awene kattabela mwaha wokoddihiwa olaleya. Mbwenye awene ahagalala sabwa yawi “Mulugu ohavaha thima y’ososeliwa” nzina na Yezu.​—Merelo 5:41.

¹⁹ Masaka abano nikuru na Yehova ninovilela masiki afwara-fwariwaga sabwa ya nzina na Yezu. (Kengesa Tiago 1:2-4.) Moligana na arumiwi, iyo kaninagalala n’ofwara-fwariwa. Mbwenye sabwa yoweddeyana wehu na Yehova, iyene ononilibiha wi nihiyelele mundduni. Ndoweni none empadduwele Henryk Dornik na mbalaye. Yaka ya 1944 mweri wa Agosto, awene ahittukuleliwa wutxedhiwani. Asupayi a wenewo ahiloga: “Kanfuna ottiya nroromelo nawa. Anziveliwa otabuwa.” Henryk ohiloga: “Miyo kaddaziveliwa ottabuwa, mbwenye oliba murima wi ddihirimeliwe nroromelo naga yanddagalaliha vaddiddi.” Iyene ohenjedhedha: “Olobela na murima wotene onoddikamihedha okala wofiyedheyana na Yehova, vina iyene Wanddikamihedha.”

20. Enlogeliwa nni wi ninokaana ohagalala nigamulabelaga ‘Mulugu wohagalala’?

²⁰ Yehova ‘Mulugu wohagalala,’ kannittiya masiki nifwara-fwariwaga, nigeddiwaga na amudhihu mwaha wokala munanoona, obe nigakala aredda, obe nigoluvala. (1 Timóteo 1:11) Ninohagalala nigobuwelaga dhopikirela dhikosile Yohova, Mulugu “ohinpela malago.” (Tito 1:2) Yehova onele wakwaniha dhilogiliye na mukalelo waderetu, kaninobuwele vina makatamiho angumanana iyo ddabuno. Mparaizu, Yehova onele onittuvela egumi yohimala vina ninele okana ohagalala wohigoma! Iyo ‘ninele ojavo murenddele onddimuwa.’—Masalmo 37:11.