Epaddi 9
Mukalelo Oziwilehu Wila Nili Mmasikuni Oomariha
1, 2. Ninziwa dhavi wila nili mmasikuni oomariha?
NINKAANA dhavi ebaribari yawila ninkala mmasikuni anfuna Omwene wa Mulugu ononga elabo eji ya olamulela wa omuthu? Niziwe dhavi wila nihaddamela vaddiddi nsaka ninfuna Mulugu ogomiha obure vina goi yotene?
2 Anamasunza a Yezu afuna aziwe dhilobo esi. Awene aahinvuza Yezu jivi egakalile “ezinddiyelo” ya ofiya waye na guru ya Omwene vina “ogoma wa elabo.” (Mateu 24:3) Yezu wahakula modheela ologamo deretu mapadduwo na mikalelo dhinthekenya elabo esene dhigalabile vamodhavi yawila dhilagihe wila nlogo na athu nihivolowa “nsaka nomariha,” ‘masiku oomariha’ a elabo eji. (Daniyel 11:40; 2 Timóteo 3:1, NM) Mu nsaka nthino ninowoonaga ezinddiyelo eji ena dhipaddi dhinjidhene? Indde, ninowoonaga vaddiddi!
Koddo Dha Elabo Yotene
3, 4. Koddo dha vyaka zana dhivirile dhinliganela dhavi na nivuhulo na Yezu?
3 Yezu wahibaza ologa wila ‘nlogo ninere owana koddo na nlogo niina omwene na omwene mwina.’ (Mateu 24:7) Yaka ya 1914 elabo yahivolowa mu koddoni ejene evolotxilemo dhilabo vamodha na mamwene na mukalelo wathiyanilani na koddo koddovi eji ehinathi. Mwa ononelamo ejene, anamaleba mapadduwo atxemerhile okala Koddo Enddimuwa. Eji yali koddo yoroma ya mukalelo obu mmapadduwoni, koddo yoroma ya elabo yotene. Anyakoddo na apaizano 20.000.000 ahikwa, muthengo munddimuwa vaddiddi opitha mu koddoni dha munddunimwa.
4 Koddo Yoroma Ya Elabo Yotene yali mutonyo wa omaromo wa masaka omariha. Yezu walogile wila eji vamodha na mapadduwo mena agakalile “goyi dhoroma.” (Mateu 24:8) Eji yali ebaribari, vowila Koddo Yanawili Ya Elabo Yotene yahaapa athu vaddiddi, anyakoddo vamodha na apaizano 50.000.000 ahikwa. Mu vyaka zana dha 20, okwaranya athu 100.000.000 ahipiwa mu koddoni, muthengo obu ogataganyihiwa vamodhavi onokwaranya dila nai athu akwile mwari mwa vyaka 400! Oku okoneya onddimuwa wa olamulela wa omuthu!
Onamoona Wina
5-7. Onamoona gani wina oliwo wawila ninkalawo mmasakani omariha?
5 Yezu wahekamo dhilobo dhiina esene dhigeeddilena masiku oomariha: ‘Mmimburoni minjene munere opadduwa othekenyeya wa elabo, viredda dhoraveya [dhizini], dala.’ (Luka 21:11) Eji enoliganana deretu mapadduwo oromana 1914, vowila onokalaga winjiva wa goi esene dhitotiwe na ntowa nthi.
6 Othekenyeya wa elabo onddimuwa, aba mapadduwo ankoseya wili wili, anongaga dhigumi dhinjidhene. Musipanyola bahi wapile athu 20.000.000 bigafarela Koddo Yoroma Ya Elabo Yotene—athu ena anañgananiha wila athu 30.000.000 ahikwa. Eredda ya SIDA ehaapa athu matxikwi mazana menjene nanda musogorhovi enela wapa athu ena matxikwi na matxikwi. Kadda yaka athu matxikwi na matxikwi anokwa na dhiredda dha murima, câncro na dhiredda dhiina. Athu ena matxikwi na matxikwi anokwa na eredda ya dala, ejene empa vañgono vañgono. Mohaganyedha ‘anyakavalo a Apokalipsi’ na koddo dhawa, otuweya wa dhoja vamodha na dhizini dhinovugulaga muthengo munddimuwa wa murala wa athu oromana yaka ya 1914.—Ovuhulela 6:3-8.
7 Yezu vina wahibaza ologa winjiva wa opanga, opanga obu ompadduwa mu dhilabo dhotene. Iyene ologile dhahi: “Obure onere othabwa mpaka olaliha okwela wa athu enjene.”—Mateu 24:12.
8. Nivuhulo nili va 2 Timóteo kapitulu 3 ninliganana dhavi na nsaka nthino?
8 Mowenjedha, nivuhulo na Bibilia nahibaza ologa ofudheya wa mweeddelo okwene onooneya mwilaboni motene ovanene: “Masaka omariha aner’odhana dhawopiha. Athu anere okala anamakumbela vawa, anamajiwa murima na kobiri, anamagaya, anamavithukulela. Anere omveyiha Mulugu, wasadduwela amambalawa; kanaziwege otamalela, oriha dhileveliwe Mulugu. Aner’okala awuma murima, ahinthiddeya myeddo, anamamagedha akwawa, ahinwodha winanela, awali, amwiddani a dhapama dhotene. Aner’okala anamasadduwela ahinovelela elo, atweyile mento n’ovithithimiha, amageyile n’ojavo elabo opitha omukurumuwela Mulugu. Anere woneyágana ekalelo yomuriha Mulugu, oku akoddaga guru ya nroromelo elimo . . . Athu abure, anamanyengetha, anere othabwaga okala abure.” (2 Timóteo 3:1-13) Esi dhotene dhinopadduwa banigoona na mentwehu.
Elobo Yina
9. Txini yapadduwile odhulu ejene yaliganina oroma wa masaka omariha a elabo ya vati?
9 Ohikala elobo yina ejene yenjedhile goi mu vyaka esile. Eligananaga na oroma wa masaka omariha yaka ya 1914, ohipadduwa elobo yina ejene yikile nlogo na athu mu ngovini enddimuwa vaddiddi. Mudhidhene obule, ninga munlogela nivuhulo na nivuru nomariha na Bibilia yapadduwile ji eji: “Novenya, wirimu otatamuwa koddo. Migeli [Kristu na guru ya odhulu] na anju aye araba koddo na nowa ejo [Satana]. Nowa na anju aye [adomonyo] awana na awene, vano kàwodhile. Dhahene kathiyiwe vina okala wirimu. Nowa ejo enddimuwa ji nowa yawale enromoliwa munyengethi, satana enakwekwethela mubureni athu etene, evokeliwe mwilaboni vamodha na anju aye.”—Ovuhulela 12:7-9.
10, 11. Nlogo na athu nipakeleyi dhavi Satana muthamagihedheliwe velaboni ya vati vamodha na adomonyo aye?
10 Dhodhavodha dha murala wa athu dhali dhivi? Nivuhulona ninodhowavi: “Mulaveya nyuwo muli mwilaboni, muli mbara, vowi satana oulupelani n’owali onddimuwa, aziwaga wi ohalilena malabo mañgonovi.” Indde, Satana onoziwa wila olamulela waye onowaddamela omagomo, noona onokosa guru vaddiddi wila aapothotxe athu wa Mulugu, iyene vamodha na elabo yaye ehinathi otolotxiwa. (Ovuhulela 12:12; 20:1-3) Dhothanddiwa esi dha omuyani dhihivirigana vaddiddi sabwani dhahilabihedha na mukalelo wabure ofuru wawa wa osakula! Velaboni ya vati vanokalaga mikalelo dhabure vaddiddi sabwa ya nipakelo nawa, makamaka oromana 1914!
11 Kintikiniha wila Yezu wahibaza ologa mwaha wa nsaka nthino: “Dhinere woneya dhopadduwa dhintxutxa, vamodha na vizinddyelo dhinddimuwa dhindha wirimu.”—Luka 21:11.
Ogoma Wa Olamulela Wa Athu Na Wa Adomonyo Oli Vakukuvi
12. Nivuhulo gani nimodha nomariha nihalile mwa mavuhulo anfuna osorihiwa elabo eji ehinathi ogoma?
12 Mavuhulo mangasi a Bibilia anfuna osoriheya Mulugu ahinathi otolotxa elabo eji? Mañgonovi bahi! Nimodhana mwa oomariha nili va 1 Tesalónika 5:3, nthene ninloga dhahi: ‘Oku bagaloga murenddele na muthiddeeleyo, na rurumutxa ntowa ninela wafanya kakamwe.’ (The New English Bible) Eji enlagiha wila omagomo wa elabo eji onarome ‘bagaloga.’ Elabo ehinathi othaga woona magomo anela ofiya s’ohijeedheliwa, oku athu afwaseyelaga murenddele na muthiddeeleyo obwene onjeedhelani.
13, 14. Mudhidhi gani wa goi obazile Yezu ologa, ki onagome dhavi?
13 Onovuvuruwawo mudhidhi wa elabo eji enañganeliwa na Satana. Mohigoneela enela ofiya omagomo wa mudhidhi wa goi walogile Yezu wila: “[Goi] dhinere othabwa-wene; kadhinoneyaga oromana omaromelo wa elabo ofiyedha ddabuno, kadhinoneye vina.”—Mateu 24:21.
14 Mutompi wa “goyi dha malabo abo” obe ‘goi enddimuwa’ enakale Armageddo koddo ya Mulugu. Bu mudhidhi obule ologile namavuhulela Daniyel vanfuna Mulugu “watxila, vina wagomiha amwene aba otene.” Eji enfuna etapulele ogoma wa olamulela wa athu ahinimugayela Mulugu. Venevo olamulela waye wa Omwene ovenyedha odhulu onela wañganela kakamwe dhilobo dhotene dha athu. Daniyel ohibaza ologa wila olamulela wa omwene txipo kunathiyedhiwe “malogo mena.”—Daniyel 2:44; Ovuhulela 16:14-16.
15. Txini enapadduwele nipakelo na Satana vamodha na adomonyo aye?
15 Mudhidhene obo nipakelo na Satana vina na adomonyo ninela ogoma. Dhothanddiwa dha omuyani esile dhisadduwile dhinela otolotxiwa kakamwe wila ‘dhinanyengethege viina athu a mwilaboni.’ (Ovuhulela 12:9; 20:1-3) Muya esi dhihimala othongeliwa okwa nanda dhinjeedhela otolotxiwa. Onakale woboliwa onddimuwa vaddiddi wa nlogo na athu wila nifuruliwe mu nipakeloni nawa novirigana!
Bani Anaviluwe? Bani Anakoodde Oviluwa?
16-18. Bani anaviluwe omagomo wa elabo eji, nanda bani ahinaviluwe?
16 Othonga wa Mulugu ogasorihedhiwa elabo eji, bani anaviluwe? Bani anakoodde oviluwa? Bibilia onlagiha wila abale anfuna olamulela wa Mulugu anela obareliwa nanda baviluwa. Abale ahinfuna olamulela wa Mulugu kanabareliwe mbwenye anela otolotxiwa vamodha na elabo ya Satana.
17 Gano dh’olelana 2:21, 22 onloga dhahi: “Anfwara magano [abale aniwelela olamulela wa Mulugu] arabelaga obure bubure, anojavo elabo; oku avuti [abale ankoodda wiwelela olamulela wa Mulugu] na apaddu atomoliwaga mwilaboni, arayiliwaga.”
18 Vina Masalmo 37:10, 11 onloga dhahi: “Mudhidhi muñgonovi, mvuti oner’orimela . . . Vano akurumuwi aner’okala anya a elabo, aner’ojavo murenddele munddimuwa.” Versikulu 29 enowenjedha: “Athu apama aner’okala anya a elabo, akalegemo masiku etene.”
19. Nlago gani ninfanyeelihu wiwelela?
19 Ninofanyeela wiwelela nlago na Masalmo 37:34, nthene ninloga dhahi: “Omuroromele Nabuya, weddege mudila mwaye; iyene onouthithimiha auvahaga elabo, onowoniha otolotxiwa wa athu abure.” Maversikulu 37 na 38 anloga dhahi: “Mwañgané muthu woriheya, orave dhinkosiye, vowi muthu woweddeyana onobala ziza ninddimuwa-nene. Vano athegi anere otolotxiwa etene, ziza nawa ninere ogomihiwa.”
20. Ninlogela eni wila masaka aba ankalihuwo boziva?
20 Enopangarhaza vaddiddi, indde, enohagalaliha oziwa wila txibarene Mulugu onotanaala nanda yawila mohigoneela onela ogomiha obure wotene vamodha na goiya! Ezivilani oziwa wila ohaliwo mudhidhi muñgonovi wa osoriheya mavuhulo aba oothithimiheya!
[Foto vanikukuni 20]
Bibilia ohibaza ologa mapadduwo abene agakosile epaddi ya “ezinddiyelo” ya masiku oomariha
[Foto vanikukuni 22]
Mohigoneela, va Armageddo, abale ankoodda wiwelela olamulela wa Mulugu anela otolotxiwa. Abale aniwelela anela oviluwela mwilaboni eswa yoligana