NSUNZO 17

Yezu Wali Muttu wa Ekalelo Gani?

Yopidiwa

Nigasunzaga dhilobo dhikosile Yezu vina dhilogiliye bali velaboni ya vati, ninononelamo deretu mwaha wa omuttu waye. Ejo enonikamihedha okala ofiyedheya na iyene vina na Babe Yehova. Ninawodhe dhavi ononelamo? Vina ninamutagihe dhavi Yezu?

1. Yezu oladdanile dhavi na Babe Yehova?

Yezu ohikala vyaka dhinjidhene wirimu na Babe vina ohisunza dhilobo dhinji na iyene. Nona, Yezu onubuwela vina onkosa dhilobo ninga Yehova. (Kengesa Joau 5:19.) Mwebaribari, Yezu ohimutagiha Babe, ofiyedha ologa: ‘Oddonile miyo, omona Babani.’ (Joau 14:9) Mudhidhi ondowiwe bugasunza mwaha wa Yezu, onelege omuziwavi Yehova. Motagiha, wona mukalelo watanalela Yezu attu ena, enonittukulela wubuwela wi Yehova ononitanaala.

2. Yezu otonyihedhile dhavi wi onomukwela Yehova?

Yezu ohiloga: ‘Wi attu otene aziwe wila miyo ddinomukwela Babaga, ddinowiravi eddirumiliye.’ (Joau 14:31) Mudhidhi waliye velaboni ya vati, Yezu ohitonyihedha wi wannimukwela venjene Babe sabwa yovirihamo dhotedhene dhamurumiliye, masiki ekalaga yorutxa okosawa. Ottiya ejo, Yezu wanloga sabwa ya Babe vina wanakamihedha attu ena okala amarho a Mulugu.—Joau 14:23.

3. Yezu otonyihedhile dhavi wi onowakwela Attu?

Bibilia onloga wi Yezu ‘wanziveliwa okala na attu.’ (Gano 8:31) Yezu wannaweddiha attu otene na ekalelo yapama, iyene kàsakula attu afwanyeliye waweddiha noderetu obe nne. Ottiya ejo, iyene wanalibiha vina wali womala na wale wi akamihedhe. Matikiniho akosiliye katonyihedha guruvi dhaye bahi, mbwenye yantonyihedha vina wi iyene wannaweddela attu ttagaraga. (Marko 1:40-42) Mazu aye anvaha nipangarhazo vina njedhelo mwa abale otene ana murima wokurumuwa. Yezu wali womala nawale wila atabuwe vina akwe sabwani wanakwela attu. Iyene onowakwela makamaka abale anvirihamo masunziho aye.—Kengesa Joau 15:13, 14.

KASUNZAVI

Kasunza mikalelo dha Yezu. Koona vina marhe otonyihedha okwela mwa okala muttu wotapuwa mada ninga iyene.

4. Yezu onomukwela Babe

Yotagiha ya Yezu enonisunziha mukalelo wotonyihedha wi ninomukwela Mulugu. Kengesa Luka 6:12 vina Joau 15:10; 17:26. Ogamala wengesa malebo aba, katanaalela nivuzo ntti:

Ninawodhe dhavi omutagiha Yezu, vina olagiha wi ninomukwela Yehova?

Jesus praying. — Yezu wanimukwela vaddiddi Babe wa wirimu vina wanimulobelela malabo otene

5. Yezu onowatanala attu anfuna nikamihedho

Yezu wannika dhifunelo dha attu ena vamburoni voroma. Iyene wanlabihedha mudhidhi na guru dhaye wi akamihedhe attu masiki wolemene. Kengesa Marko 6:30-44, mugamala mutanaalele mavuzo aba:

Iyene otonyihedhile dhavi wi wannatanala attu? —Koona maversu 31, 34, 41, na 42.
Yezu wafunelani wakamihedha attu?—Koona versu 34.
Nihona wi iyene wannimutagiha Babe, ejo enisunziha eni mwaha wa Yehova?
Ninawodhe dhavi wazuzumela attu ninga mwakosela Yezu?

Yezu na matikiniho onowajiha attu owinjiva vaddiddi, na mikatte 5 na oba 2. Anamafwara aye àgawelaga dhoja alobwana, ayana vina ayima.

6. Yezu muttu wotapuwa mada

Iyene kaana dhilobo dhinji, mbwenye waangawa esile dhaniyena na attu ena, ohiloga wi iyo nikosege yakakene. Kengesa Merelo 20:35, mugamala mutanaalele nivuzo ntti:

Mowiwanana na mazu a Yezu, txini enanittabihe?

Karumiha VIDIYU, mugamala mutanaalele nivuzo ntti.

VIDIYU: Ovaha Onottabiha Opitta Ovahiwa—Yogwaddela (4:00)

Masiki akala kanina dhilobo dhinji, ninawodhe dhavi okala attu otapuwa mada?

Wanziwa?

Bibilia onsunziha wi nimulobelelege Yehova na nzina na Yezu Kristu. (Kengesa Joau 16:23, 24.) Nigakosa ejuwene, ninotonyihedha wi ninovaha ttima ejile enikoseli Yezu wi nikale amarho a Yehova.

ATTU ENA ANLOGA WI: “Mulugu kantanaala makattamiho a attu.”