‘Ovano Muziwa Meddeloyá; Mugavirihagamo, Panafwanyenyu Ojavo’

1. Onamakumbela vawa onlagiha attu mwilaboni onnipatta dhavi?

EKALELENI yorutxa olabihedha esile dhinsunzihu mBibiliani? Wila nikose eli yapama ninofwanyela oviyeviha. Masiku ‘abano omariha,’ jorutxa olagiha oviyeviha sabwani attu enjene “anamakumbela vawa, anamajiwa murima na kobiri, anamagaya, anamavithukulela,” vina ‘kanwodha winanela.’ (2 Timóteo 3:1-3) Iyo ninga emeleli a Mulugu ninoziwa wila jabure olagiha mikalelo esi; nigang’anaga dhimpadduwa enkala ninga attu anlagiha mikalelo dhabure banjavo elabo vina banfuma. (Masalmo 37:1; 73:3) Ninofwanyela ovivuza: ‘Ddinokosa guru ya wika dhojombeliwa dha attu ena vamburoni voroma? Attu ena anelege oddiriha ddigalagihaga oviyeviha?’ (Luka 9:48) Nigarava mweddelo wa elabo, kaninakane mandano ofiyedheya n’abali, na arogora ehu vina enele warutxiha attu ena ozinddiyela wila nili Akristu. Notene nigasunza dhotagiha dha emeleli a Mulugu, alagihile oviyeviha nigamala nitagiha oviyeviha wawa, ninele ojavo.

2. Mavuzo gani ananikamihedhe wubuwela ekosile emeleli ororomeleya a Mulugu a nsaka na mundduni?

² Txini yakamihedhile emeleli ororomeleya a Mulugu a nsaka na mundduni okana mandano ofiyedheya na iyene? Kito awene awodhile dhavi omuhagalaliha? Emeleliya awodha dhavi okosa eli yapama? Nigengesa dhotagiha dhawa mBibiliani vina nitanalela, enele olibiha nroromelo nehu.

TXINI ENALIBIHE NROROMELO NEHU

3, 4. (a) Yehova onnisunziha dhavi? (b) Enfuneyela nni okosa elobo yina opitta okanavi eziwelo wila nivaddihe nroromelo nehu?

³ Yehova ononivaha enfunehu wila nroromelo nehu nikale noliba-nene. Iyo ninakela malago vina maswagiho, modhela Bibilia, manivuru, website wehu, JW Broadcasting, na matugumano a mmulogoni vina matugumano a murudda. Yezu otapulela wila enofuneya okosa elobo yina opitta okana eziwelo. Iyene ohiloga: ‘Oja waga kuvirihamo enddifunana Mulugu oddirumile, kupuliha mabasaye.’​—Joau 4:34.

⁴ Okosa efunelo ya Mulugu, Yezu wona ninga oja. Yoja enovaddiha maningo. Dhawene ninga okosa efunelo ya Mulugu envaddihani nroromelo. Motagiha, wahiromaga obudduwa mmalaleyoni wolemene ngamala buwiyelela vatakulu wohagalalene?

5. Nigakana ononelamo ninjavo nni?

⁵ Nigakana elemelelo yokosa ennikumbirha Yehova, ninolagiha wila nihikana ononelamo. (Masalmo 107:43) Abale ana ononelamo anojavo mareliho menjene. ‘Kayiwo elobo yina enliganana. . . . Ononelamo onomukaliha oddule ofwanyile, aliba gari babale anziwa weddana.’ (Gano 3:13-18) Yezu wahawaddela dhahi anamasunza aye: ‘Ovano muziwa meddeloya, mugavirihamo panafwanyinyu ojavo.’ (Joau 13:17) Anamafwara a Yezu agahikana wagalala kokosa ejile yaddeliwani. Kottiddihedhaga mabasa masunziho vina yotagiha ya Yezu mwigumini mwawa.

6. Ninfwanyelela nni ottiddihedhaga mabasa esile dhinnisunziha Yehova?

⁶ Masaka abano vina, ninofwanyela ottiddihedhaga mabasa esile dhinsunzihu. Mesiri onokana eziwelo vina vipano dholabana. Agalabihedha eziwelo vamodha na dhipanodha na mukalelo wofwanyela panoniwiye wila mesiri waderetu. Masiki akala oromilena wale mabasaya aba, wila omesiriya woneye, iyeneya onofwanyela ottiddihedha mabasa dhisunziliye. Na mukalelo wakakene, vasunzilehu voroma-vene ebaribari nahagalala sabwa ya oroma ottiddihedha mabasa dhasunzihu. Mbwenye wila nikanegevi wagalala, ninofwanyela ottiddihedhaga mabasa mwigumini mwehu masiku otene esile dhinnisunziha Yehova.

7. Mwari mwa mutoma obu ninasunze nni?

⁷ Mwari mwa mutoma obu, ninele osunza dhilobo dhiganirutxihile olagiha oviyeviha. Vina ninele wasunza adhari ororomeleya a Mulugu a masaka a mundduni alagihile oviyeviha. Ninele wengesa mmaleboni dhapadduweli. Ottiya wengesavi ninfuna vina nitanalele dhikosilani vina nittiddihedhe mabasa mwigumini mwehu.

WAWONEGE ATTU OTENE NA MUKALELO MMODHENE

8, 9. Ninsunzavo nni na oviyeviha wa Paulo onfwanyeya va Merelo 14:8-15? (Koona foto eli omaromo.)

⁸ Mulugu onfuna wila ‘attu etene afiyedhe oziwa ebaribari wila avuneye.’ (1 Timóteo 2:4) Onawonamo dhavi attu ahinaziwa ebaribari? Murumiwi Paulo wannalaleya Ayuda ana eziwelo eng’onovi mwaha wa Yehova. Vina wannalaleya attu awebedha amulugu ottambi. Noona mabasa aba aheha oviyeviha wa Paulo. Na mukalelo gani?

⁹ Muleddoni mwaye woroma ninga misionario, Paulo wadhowile o Listra vamodha na Barnabé. Akadda licaônicos nlogo dhahi nakala wenewale awona Paulo na Barnabé ninga attu a makamaka vaddiddi, awene anfiyedha waromola na mazina a amulugu ottambi ninga Zeus na Hermes. Paulo na Barnabé akosile nni? Awene agahifiyedha wubuwela wila ninga kwatti dhina el’ofwarafwariwa, anfwanyela wakela nttittimiho nttile navahiwani? Kito oheli obuwela wila korumela nttittimiho nttile ogahakosiha attu enjene wiwa miselu dhapama? Kobuwela dhawene! Noona attamagela vari va muttitti akuwaga: “Akuni, munirela nni dhahene? Iyo vina nili athu, ninokwa ninga nyuwo!”​—Merelo 14:8-15.

10. Sabwaya jani Paulo na Barnabé kavyona ninga a makamakaya vari va nlogo nttile?

¹⁰ Paulo na Barnabé mulogelani, wila nili attu ninga nyuwo, afuna attapulele wi attu ohakwana. Mazu alogilani kiyatapulela wila awebedha amulugu ebedhiwa na nlogo nttile. Paulo na Barnabé arumiwe ninga amisionario na mwinyene Yehova. (Merelo 13:2) Awene attomiwe na muya wokoddela vina ahikana njedhelo nohagalaliya vaddiddi. Mbwenye dhotedhene eso kadhakosiha ovyona ninga a makamakaya. Awene ahaddela nlogo nttile wila otene agahakela gari yodhowa wirimu korumela miselu dhapama.

11. Nigalaleyaga ninawodhe dhavi olagiha oviyeviha ninga wa Paulo?

¹¹ Obu mukalelo woroma onanikamihedhe olagiha oviyeviha, ninga Paulo. Iyo kaninfwanyela ovyona ninga attu amakamakaya sabwa ya mabasa attomeliwehu a olaleya, abene ankamihedhiwehu na Yehova. Ninofwanyela ovivuza: ‘Ddinawona dhavi attu a mmuruddani mwaga? Ddinosilidhiwa na attu a malogo mena?’ Mwilaboni mwetemwene Anamoona a Yehova anovilibihedha watamela abale anfuna wiwa miselu dhapama. Ena anokosa guru ya osunza elogelo na elemelelo ya attu anoniwa ninga kana ttima, wila awodhe wakamihedha. Awene agalaleyaga kanivyona ninga a makamakaya. Mbwenye anovilibihedha wavuruwana wila awodhe wasunziha milesu Dhomwene.

NILOGEGE MAZINA A ATTU ENA MMALOBELONI MWEHU

12. Epafra olagihile dhavi wi wannazuzumela ena na murima wotene?

¹² Mukalelo mwina onfwanyelihu olagiha oviyeviha bwa wawika abalihu mmalobeloni mwehu, abene ‘akelile nroromelo na ttima ninga evahiwe iyo.’ (2 Pedro 1:1) Jijene yakosile Epafra. Bibilia onomuromola mulobwana oddu dila dhowakwana ttaru. Paulo valiye mukambura o Roma, iyene wahalebela mwaha wa Epafra Akristu ena akala Okolosi, dhahi: “Iyene kanlema owulobelelani.” (Kolosi 4:12) Epafra wannaziwa deretu abali vina wannatanala na murima wotene. Paulo wahimuromola iyene ninga ‘mfugeliwi mukwaye,’ mbwenye dhahikalawo dhilobo dhamukattamiha Epafraya. (Filémoni 23) Ottiya ozuzumela makattamiho aye, iyene wazuzumeletxa dhojombeliwa dha attu ena, wanfiyedha okosa elobo-txilobo wila akamihedhe. Mmalobeloni mwaye wanloga mazina a bali na arogora aye, ekosiliye yotagiha enfwanyelihu ofwara. Sabwani malobelo ahikana ewodhelo enddimuwa.​—2 Korinto 1:11; Tiago 5:16.

13. Ogalobelaga onawodhe dhavi omutagiha Epafra?

¹³ Ohinatti okosa nlobelo, kamubuwele muttu ogaziveliwiwe ologa nzina naye ogalobelaga. Kawubuwele amarho awo a mmulogoni obe amudhawo anaziwiwe wila anogumanana makattamiho. Txino awene anogumanagana makattamiho agafunaga okosa dhogana dhawa. Kalobelele vina abali ali dhipaddi dhina, olabihedhaga mazina awa anfwanyeya mu jw.org mpaddi wa “Testemunhas de Jeová Presas Por Causa de Sua Fé.” (Koona epaddi ya IMPRENSA > CASOS JURÍDICOS.) Kalobelele vina abale akweliwe amudhawa, aviluwile vari va ngovi obe koddo, vina ayelegi. Ahikalawo abali na arogora enjene antamela malobelo ehu. Nigawikaga attu ena mmalobeloni mwehu ninolagiha wila kaninzuzumeletxa dhojombeliwa dhehu bahi mbwenye ninozuzumela vina dhojombeliwa dha attu ena. (Filipi 2:4) Nikane abaribari yawi Yehova onovuruwana malobeloya.

‘KALÁ WOMALA NAWALE WILA OVURUWANE’

14. Enlogeliwani wi Yehova namavuruwana wapama oliwo?

¹⁴ Mukalelo mwina onfwanyelihu olagiha oviyeviha bwa wettekela maru ovuruwana. Tiago 1:19 ononaddela dhahi “muthu-muthu ethekele maru wiwa.” Yehova, Mulugu onziwa ovuruwana pama. (Wita 18:32; Josuwé 10:14) Ninga motagiha kona makani ali mu nivuruni na Obudduwa 32:11-14. (Kengesa.) Yehova kajedhela waddeliwa na Mizé yokosa, masiki dhawene iyene wahimuttiya Mizé ovaha monelo waye. Okalawo agawodhile okosa yakene, onvuruwana muttu ottegile mundduni nanda afwara monelo wa muttuya? Noona, onwodha ddi Yehova bahi, sabwani iyene onowavuruwana nofwaseya attu otene anlobela na nroromelo.

15. Nigavahaga nriho attu ena ninawodhe dhavi omutagiha Yehova?

¹⁵ Kavivuze: ‘Akala Yehova, Mulugu woviyeviha onavuruwana attu, ofiyedhile onvuruwana Abramu, Rakel, Josuwé, Manué, Eliya, Ezekiya, kinwodheya iyo okosa yakene? Ddigavuruwanaga dhinloga abali aga vina ddigafwarihedha malagoya ddinolagiha wila ddinowariha? Mmulogoni mwaga obe mwa amudhaga, okalawo muttu mmodha onfunemi onfwaseyela onvuruwana? Ddinarome okosa ejiya labo gani?’​—Wita 30:6; Anamathonga 13:9; 1 Amwene 17:22; 2 Mapadduwo 30:20.

‘NABUYA ONOWONA NTOWA NAGA NTTI’

16. Mwene David olagihile dhavi ovyanganela, varuwaniweyi na Simeyi?

¹⁶ Oviyeviha bunanikamihedhe ovyang’anela nigabeddiwaga obe nigateyiwaga. (Éfeso 4:2) Iyo ninofwanyavo yotagiha ya deretu ya muttu olagihile ovyang’anela mu nivuruni na 2 Samuwel 16:5-13. (Kengesa.) Mulobwana onkuweliwa Simeyi wa ziza na Mwene Sawul wahimbagela omuruwana David na emeleli aye. Davidiya wahimuttiya Simeyi ologa dhotedhene dhamudhugudha, iyene wahivilela nofwaseya oruwaniwa wotene. Kito David owodhile dhavi olagiha ovyang’anela? Yowakulaya ninfwanya va Masalmo kapitulu ya nouraru.

17. Txini emukamihedhile David ovyang’anela, iyo ninawodhe dhavi omutagiha?

¹⁷ David olebile kapitulu eji ya nouraru ya Masalmo mudhidhi watameliwiye na mwanaye Absalau wila ampe. Mudhidhene obo wafwara-fwariwa David na mwanaye bwakakene obageliwiye oruwaniwa na Simeyi, masiki na makattamiho abo otene iyene walivi wokurumuwa. Wawodha dhavi? Va Masalmo 3:5, ninowengesa elogile David: “Ddimukuwela Nabuya, iyene oddakula omwangoni waye onkaliye.” Iyo nigabeddiwaga obe nigateyiwaga ninofwanyela olobela ninga mwakoseli David. Yehova onele onivaha muya waye wila onikamihedhe ovilela. Onowodha ovyang’anela obe omulevelela muttu onuteya vina onubedda? Ohikana ebaribari wila Yehova onowona makattamiho otene angumanana weyo, yawi onele wukamihedha vina wureliha?

‘MWA MUTTU ENFUNEYETXAMO ONONELAMO’

18. Ninpurelamo nni nigattiddihedha mabasa malago a Yehova?

¹⁸ Yehova onoruriha guru dhehu nigavilibihedha okosa ejile enziwa iyo wila japama. Gano 4:7, malebo anloga: “Mwa muthu enfuneyetxamo ononelamo.” Eziwelo jindhana ononelamo, kuloga enopitta oziwa makani-makanivi. Ononelamo oku oniwanana na dhogana dhinkosihu. Masiki nyenyele dhihikana ononelamo, awene kanziwa dhilobo dhinjidhene, mbwenye anoddoddela dh’ovikalihana nsaka n’elimwe, ogakala muzogwe kunawona. (Gano 30:24, 25) Kristu onittaniwa “onona wa Mulugu,” masaka otene wankosa dhamuzivela Babe. (1 Korinto 1:24; Joau 8:29) Mulugu onele onittuva nigakala oviyeviha vina nigalagihaga ononelamo, nisakulaga okosa esile dhinziwehu wila sapama. (Kengesa Mateu 7:21-23.) Kakosa guru yokamihedha mulogo wawo okala mburo onwodha attu otene omulabela Yehova noviyeviha. Wila owodhe ottiddihedha mabasa ejile enziwiwe wi japama enofuneya mudhidhi vina ovilela. Mbwenye wila niwodhe okosa ejoya, enofuneya oviyeviha, vowi oviyevihawa onele onikamihedha ovanene vina musogorho.