Mavuzo Ankosa Anamengesa

Bani ali ang’aneli mumparhani mwa Ayuda? Nanda akosa mabasa gani?

Mwari mwa mabasa menji akosiwa na attu ena a nihimo na Levi abuwene  ahalianamakutta, mabasa mena ali olaba ninga ang’aneli. Wattoma ddi mwimeleli wa mparha. Namaleba wa Muyuda Philo ohileba ejile yakosa ang’aneli aba: “Ena wa [Alevita] aba emela vamusuwo wa vamavolowelo, ena emala mwari mwa mparha osogorho wa ebuwa wi amukoddihe muttu wahattomeliwe ofiyawo, masiki akala muttuya wakosela na pudha obe nne. Enaya anwera-wera mparhaya wila ang’anele. Mabasaya ali ottiyedhana, ena alaba na mattiyu enagu na mutana.”

Ang’aneli aba ali omala nawale wi akamihedhe Omuttegoni. Akadda Roma attiyile nikuru-nene ntti bahi okana masupadda.

Muziwitxi Joachim Jeremias, ohiloga: “Mazu alogile Yezu wila asisigulena abale adhile omuttidda, awi iyene wansunziha mumparhani malabo otene mbwenye awene kamuttidda (Mt. 26.55), anowoniha kakamwene wi abale adhile omuttidda ali ang’aneli a Mumparhani.” Namaleba wakakene onorumela wi abale arumiwe dila yoroma wila amuttidde Yezu, bang’aneli a mumparhani. (Jo. 7:32, 45, 46) Osogorhowa, ang’aneli vamodha na mwimeleli wawa ahirumiwa na Muttego wila adhowe aattidde arumiwi a Yezu vina enkala ninga bawene amburutile Paulo mpaka otakulu wa mparha.—Mer. 4:1-3; 5:17-27; 21:27-30.