Nihivuneya na Ttagaraga ya Mulugu

1, 2. Roma 5:12 onnikamihedha dhavi?

ROMA 5:12 onloga: “Ovanya wa muthu mmodha bahi ovolotxa othega mwilaboni; othegawá ototelamo okwa, ddabuno okwa onomuthidda muthu-muthu, vowi etene athega.” Notene iyo, ninoziwa deretu versikulu eji, vina ninolabihedha nigamusunzihaga muttu Bibilia.

² Versikuluya eji enofanyeya dila dhinjene mmanivuruni aba, Txini Ensunziha Bibilia Txibarene? na Txini Ennisunziha Bibilia? Nigasunzihaga aima obe attu ena kapitulu 3, 5 na 6 dha manivuru aba, ninoziveliwa wengesa Roma 5:12. Txino ninolabihedhaga mabasa wi nakamihedhe oziwelamo ekooddeli elabo okala paraizu, enfunelihu yobolo, vina enkwelihu. Yoleba eji vina enonikamihedha wenjedhedha ntamaalelo nehu na vamirimani vina mandano ehu na Yehova. Enonikamihedha vina osakula omuhagalaliha obe ojeedhela wi anittuve dhetene dhilibeliye onivaha.

3. Dhottega dhehu dhinnubutxedha eni?

³ Yowunlihaya jowi notene nittega. Malabo menjene ninovonya. Na dhawenevi Yehova ddwa ttagaraga. Iyene onofuna onilevelela sabwani onoziwa wi nili attegi. (Masalmo 103:13, 14) Yezu ononubutxedha wi nikumbirhege nlevelelo wa Mulugu. (Luka 11:2-4) Nittiye wubuwela dhottega dhikosilehu mundduni nanda Yehova anilevelela. Ndoweni none mukalelo onnilevelela Yehova.

ONILEVELELA WA YEHOVA

4, 5. (a) Txini ennikamiha omunonelamo Roma 5:12? (b) “Mahala” ahimpimiya antapulela nni?

⁴ Kapitulu 6 ya nivuru na Roma, enonikamihedha oziwelamo marhe annilevelela Yehova dhottega dhehu. Va kapitulu 3 vanadda dhahi: “netene nili athegi”. Paulo vina ohileba: “Ovano Mulugu na nthebwa naye bahi owavulumutxa etene mahalene, àrumelaga Yezu Kristu wawobolela.” (Roma 3:23, 24) Mazu a Egrego anloga “mahala” anonubutxedha elobo yaderetu vaddiddi envaha muttu ahijeedhelaga wiyihedhiwa, obe ovahedhiwa yovi.

⁵ Namasunza dhahi ohiloga wila mazu a Egrego agalogaga dha mahala a Mulugu obe a Kristu, dila dhinjene entapulela esile dhikosilani wi avune attu muttegani vina mu okwani. Bibilia Malebo Okoddela wa Etxuwabo, onotapulela mazu aba a Egrego ninga “mahala” ahimpimeya. Ninfuna noone dhinirele Mulugu, vina empurelihumo mwa mahala aba ovanene, na njeedhelo ninnivahani na musogorho.

6. Bani anjavo dha mahala a Mulugu vina na mukalelo gani?

⁶ Sabwa ya ottega wa Adamu, ottega na okwa onowapatta attu otene aliwo. Nona Bibilia onologa dhahi: “na yothega ya muthu mmodha, okwa oawodha etene.” Masiki dhawene Yehova olabihedha mahala aye ahimpimeya wi atonyihedhe dila yowavunana attu otene mwa “muthu mmodha, Yezu Kristu.” (Roma 5:12, 15, 17) Moone! na “orumela wa muthu mmodha bahi onowakaliha etene athu oboleliwe mmuladduni mwawa.” Nanda onowavaha attu “egumi yohimala.”​—Roma 5:19, 21.

7. Mvaho wa Mulugu okaleleni waderetu vina wa mahala?

⁷ N’eji, kavo muttu omudideli Yehova wi anvahe mwanaye ninga yobolo. Ekosiliye, entonyihedha oderetu onddimuwa, ondhana dila enwodha onivuna muttegani vina mu okwani. Dhinikosele Mulugu na Yezu, kavo wa iyo wafanyeelela. Noona, ninowatamaalela vaddiddi mwa onikamihedha oleveleliwa dhottega dhehu vina okalawo na mukalakala! Nimulagihe Mulugu wi ninomutamaalela molabihedha egumi yehu ninga munfunela iyene.

NITAMALELE TTAGARAGA DHA MAHALA A MULUGU

8. Yubuwelo gani enfunihu orabela?

⁸ Notene ninoziwa wila Mulugu onofuna olevelela dhottega dhehu, masiki dhinddimuwadha. Bahito kanikosege dhilobo dhabure nanda nigayelaga wila, ‘Yehova onele onilevelela.’ Mu vyaka zana dhoroma masiki arumiwi baliwovi, wahikala attu obuwela dhawene. (Kengesa Juda 4.) Ddabuno iyo vina nivyang’anele wila ninakwekwetteye na merelo a attu ofiyedha wubuwelaga yakakene.

9, 10. Paulo na akwaye afuruliwe dhavi muttegani vina mu okwani?

⁹ Paulo wahawaddela Akristu wi jabure wubuwelaga yawila awene kokosagavi dhottega, Mulugu agahalevelela. Iyene wahapanga wila anyanyale mubuwelo obu sabwani aweneyá ‘ahikwa vamentoni va yottega.’ (Kengesa Roma 6:1, 2.) Iyene wafuna aloge eni?

¹⁰ Sabwa ya yobolo ya Mulugu, Paulo na Akristu eena aleveleliwa dhottega dhawa mu vyaka zana dhoroma. Yehova wahattikittela na muya waye wokoddela wi akale anaye. Awene agahidhowa olamulela na Kristu kokalavi ororomeleya. Koddi vowi awene àlivi velaboni ya vati, adhile dhavi “okwa vamentoni va yottega”? Paulo walabihedha ezinddiyelo alagihaga wila awene ahitxinja kakamwe mweddelo wawa. Iyene wahiloga wila mukweli Yezu, iyene wahivenyihiwa ninga muya ohinkwa. Noona “okwa kuna guru vina dhomuthidda.” Na monelo wakakene, yakalile ninga Akristu vina ahikwa. Mweddelo wawa wahisadduwa kakamwe sabwa awene anyanyala dhifunelo dhaanani. Oromana venevo, akosa guru wi amuhagalalihe Mulugu. Awene ‘akalawo ninga akwile vamodha na Yezu Kristu.’​—Roma 6:9, 11.

11. Iyo, nidhile dhavi “okwa vamentoni va yothega”?

¹¹ Kito iyo? Nikalile dhavi “okwa vamentoni va yothega”? Txino mundduni nihira dhottega dhinjene nihubuwelaga monelo wona Yehova merelo ehu. Nali ninga ‘adhari a ojeberuwa, na obure wotene’, kuloga dhahi, “adhari a yothega.” (Roma 6:19, 20) Ovano mwengeselihu mBibiliani marhe annifunana Mulugu wi nikalegewo, nihisaddula mweddelo wehu, nihiviperhekela iyene, vina nihibatiziwa. Ninofwanyeyana efunelo enddimuwa ya omwiwelela Yehova, nanda ninokosa enimuzivela. Ddabuno ‘kanili viina emeleli a yottega’ nili ‘anamalaba a mabasa ovulumutxa a Mulugu.’​—Roma 6:17, 18.

12. Dhosakula gani dhinkosa muttu-muttu?

¹² Masiki ovanene, nihikaanavi yosakula. Paulo ologile: “Nona maningo enyu akwa, keddihiwege viina na yothega, murumelaga enunlelani.” (Romans 6:12) Yosakulaya jiji: orumeela weddihiwa na yottega; obe onyanyala weddihiwa na yottega. Kavivuze: “Ddinottiya dhifunelo dhaga dhabure wunuwa dhifiyedhaga oddikosiha eli yabure? Obe ddigona dhawene ddinonyanyala momaguva?” Nikose dhilobo dhinimuhagalaliha Mulugu wi nilagihe otamaalela mahala aye ahinpimeya.

ENOWODHEYA OWANANA YOTTEGA

13. Ninkaana dhavi ekuluvelo wi iyo ninowodha wira dhapama?

¹³ Mu vyaka zana dhoroma attu eena a oKorinto ali ambava, angonihana alobwanavi, ajeberuwa, anamebedha dhosemiwa, vina anamalezela, mmuziwelani Yehova na dhinfuneye, awene osaddula mweddelo wawa. Ankaana manyazo na esile dhakosilani mundduni. (Roma 6:21; 1 Korinto 6:9-11) Akristu a akadda Roma anfuneyana osaddula mweddelo wawa vina. Paulo wahawaddela: “Kamuttiye vyano dha mwili wenyu olabela yottega; muviperhekele Mulugu, vowi nyuwo muli attu avenyile mukwani, aliwo n’egumi; vyano dhenyu dhilabe mabasa ovulumutxa a Mulugu.” (Roma 6:13) Paulo wahikaana ebaribari yawi akadda Roma awodha okosa dhapama wila alagihe ntamaalelo na mahala ahinpimeya a Mulugu.

14, 15. Nivivuze eni nanya?

¹⁴ Ovano vina dhinopadduwa. Txino abali na arogora eena àahikana mweddelo woligana na wa akadda Korinto. Vamuziwilani Mulugu aahisadduawa. Awene aali ninga ‘akupiwe mwa dhovirigana.’ Akala ninofuna omuhagalaliha Mulugu, notene iyo nittiye mweddelo wawale. Masiki ovanene, nilagihe yawi ninotamaalela mahala na oderetu ohimpimeya wa Mulugu. Ovano nihisakula owana na dhifunelo dhehu dhabure, oku banigalabihedha egumi yehu wi nimulabe Yehova.

¹⁵ Akwini, nirabele wira yottega enddimuwa ninga yera akadda Korinto. Kinkala odidela wira dhotakala, oku banigajedhela wi Mulugu onele onilevelela sabwa odhaleliwa mahala ahinpimeya, obe ttagaraga. Koddi niloge dhavi mwa yottega txino enoonihu ninga kayunuwiletxe? Ninosakula omwiwelelavi Yehova mwa dhilobo dhotene?​—Roma 6:14, 17.

16. Niziwe dhavi wila enokala orabela dhottega dhiina masiki dhikoddile olebiwa va 1 Korinto 6:9-11?

¹⁶ Nitanalele yalebile murumiwi Paulo. Olebile dhahi: “Miyo ddili muttu wawobana, mudhari wa yottega. Kaddinwodha ononelamo eniremi; kaddinira enfunemi, ddinira dhabure dhinkoddemi.” (Roma 7:14, 15) Masiki vakooddiye wira dhilobo dhilebiwe va 1 Korinto 6:9-11, Paulo wanrumeela wila wali muttegi. Iyene owanana dhilobo eso na sabwa yofuna omuhagalaliha Yehova. (Kengesa Roma 7:21-23.) Notene iyo nimutagihe Paulo, vina nikose kukuttu wi nimwiwelele Yehova.

17. Ninkoddela eni okala attu ahinpela malago?

¹⁷ Motagiha, iyo ninoziwa wi akala ninfuna nimulabe Yehova, nikale attu ahinpela malago. (Kengesa Gano 14:5; Éfeso 4:25.) Kanifuna okala ninga Satana oli ‘babi wottambi’. Vina ninoziwa wila Ananiya na mwadhiye akweli ottambi wanani. (Joau 8:44; Merelo 5:1-11) Mwadhawene, opela malago ohittiyana na ottambi. Akala ninofuna otamalela mahala a Mulugu, ninele vina ologa ebaribari mwa dhipaddi dhina.

18, 19. Okodda opela malago ontapulela eni?

¹⁸ Ohikalawo muttu ohinkuluveleya masiki akala kanzivala. Motagiha, Yehova wahapanga ana Izrayel: “Kamwiyelane, kammagedhane, kamupelane malago mwanya-mwanya.” Yakaleli eni yaderetu awene wiwelela nigano ntti? Yehova ononaddela dhahi: “Kalani athu okoddela murima vowi miyo ddili wokoddela murima.” (Onamakutha 19:2, 11) Masiki akala kaninzivala, wawaddela akwehu elobo ehili mwenemo, entapulela opela malago.

¹⁹ Motagiha, akala muttu onomwaddela muzugu waye obe akwaye omabasani wila iyeneya onofuna oworuwa mutanene sabwa onfuna adhowe osipitale. Oku ehili mwenemo. S’o bagalogela wila amaguvele oworuwa sabwa onfuna adhowe aredhe wego wolapela. Osipitale onaddaniye, onfuna agule kininu bahi. Muttu oddu, onloga ebaribari, obe onanyengetta akwaye? Yowakula jawila muttu oddu ohapela malago akwaye. Mudhidhi mwina attu anowanyengetta akwawa na efunelo yowajela obe ottawa osottottiwa. Iyo ninimuroromela Yehova ologile dhahi: “Kamupelane malago.” Yofuna yehu jokosa ejile enloga iyene wila jaderetu vina jonyaala.​—Roma 6:19.

20, 21. Akala ninotamaalela mahala ahinpimeya a Mulugu na mwanaye Yezu Kristu, txini enarabelihu?

²⁰ Pumwenemo, iyo ninorabela ojeberuwa, olezela, na dhottega dhiina dhawopiya. Ottiya ejuwenevi, ninorabele elobo-elobovi enimusiridha Yehova. Motagiha, Iyo kaninkalela okooddavi mararuwo, mbwenye ninokoodda vina mavego onyakuwa. Kahinkalela okoddavi olezela, mbweneye ninorabela omwa mpaka okaana evira-vira. Nigavilibihedha owana wi nitxatxame dhottega dhawopiha ninga esene, ninowodha.

²¹ Ninfuna nikose ninga mwalogeli Paulo: “Nona maningo enyu akwa, keddihiwege vina na yothega murumelaga enunlelani.” (Roma 6:12; 7:18-20) Ebaribariya jawila, kaninwodha orabela dhottega dhotene. Enziwehu jiji: nigavilibihedha ovifurula mu yottega eli yotene, ninolagiha wila ninotamaalela mahala ahinpimeya a Nabuya Mulugu na mwanaye Yezu Kristu.

22. Ninttuviwa elobo gani akala ninolagiha wi ninotamaalela-wene mahala ahinpimeya a Yehova?

²² Yehova olevelela dhottega dhehu, nanda iyene onele onilevelelavi. Ninotamaalela vaddiddi mahala aye ahinpimeya! Nivilibihedhe orebetta dhilobo dhinloga Yehova wi sabure, masiki akala attu eena kanoona ninga yottega. Elobo gani enanittuve Yehova akala ninorabela obure wotene? Paulo onowakula: “Ovano nyuwo moboliwe muthegani, mukalá emeleli a Mulugu, munofwanya milima dhinuvulumutxani, mpaka othidda egumi yohimala.”​—Roma 6:22.