‘Weyo Onubuwela ninga Munubuwelela Mulugu’?

1, 2. Akristu ottikitteliwa ampurelamo eni agamwengesa Roma kapitulu 8?

TXINO nyuwo munowengesaga Roma 8:15-17 labo na wubuwela okwa wa Yezu. Versikulu esi dhinologa ononelamo onkaana Akristu ottikitteliwa wi akana njeedhelo na okalawo na mukalakala wirimu. Roma 8:1 onowawaddana attikitteliwi wi ali “mumodhani mwa Yezu Kristu.” Koddi Roma kapitulu 8 enaloga bahi abale attikitteliwe? Obe vina enowawaddana abale ana njeedhelo n’okala velaboni ya vati na mukalakala?

² Roma kapitulu 8 olebeliwe makamaka wa attikitteliwi. Awene ahakela “muya” ninga attu ‘anjeedhela wi Mulugu áakalihe anaye, awobolele mwa dhotakala dha mwili wawa.’ (Roma 8:23) Musogorho awene anele okala ana a Mulugu wirimu. Yehova oalevelela dhottega dhawa na mukutto operhekiliye. Iyene oawira attu omyala wi akale anaye.​—Roma 3:23-26; 4:25; 8:30.

3. Abale ana njeedhelo n’okala na mukalakala velaboni ya vati anfunela eni asunza kapitulu 8 ya Roma?

³ Munivuruni na Roma, Paulo onomulogamo muttu wahali muttikitteliwi, mbwenye woneya okala womyala vamentoni va Yehova. Oddoya ddi Abramu. Muttu oddu wakalilewo mundduni vaddiddi Yezu ahinatti operheka egumi yaye ninga yobolo. (Kengesa Roma 4:20-22.) Ovanene vina Yehova onowawoona Akristu ana njeedhelo na okala velaboni ya vati okala attu omyala murima. Awene vina anopurelamo malago ali va Roma kapitulu 8.

4. Nigengesaga Roma 8:21 nivuzo gani ninfunihu ovikosa nanya-nanya?

⁴ Va Roma 8:21 ninofwanya malibelo a Yehova anloga wi iyene onele odhana elabo eswa nanda attu otene anele ofuruleya muttegani vina mu okwani. Versikulu eji enloga wila attuya anele ojavo nifuruleyo n’okala ‘ana a Mulugu’. Weyo onovyona wamwinya mwilaboni ejo eswa? Ninfuna niloge enakosihu wi nifiye mwilabonimwa.

“OTAMELA DHINFUNA MWILI”

5. Elobo gani enloga Paulo eli va Roma 8:4-13?

⁵ Kengesa Roma 8:4-13. Va kapitulu 8 ya Roma, Paulo onowaloga attu a meeddelo meeli ottiyana: abale anfara “merelo a mwili” na abale “aneddihiwa na muya”. Attu enjene anubuwela ninga Paulo wawaddana abale ahali Akristu, na aali Akristu. Mbwenye apa Paulo walebela Akristu ‘ettaniwe.’ (Roma 1:6) Noona abale ‘eddihiwa na muya’ obe ‘eddihiwa na mwili’ otene aali Akristu. Kito aattiyani dhavi?

6, 7. (a) Bibilia agalogaga “mwili” mudhidhi mwina onfuna aloge eni? (b) Mazu aba “mwili” ali va Roma 8:4-13 anatapulela nni?

⁶ Bibilia agalogaga “mwili,” onaddana dhilobo dhottiyana-ttiyana. Mudhidhi mwina onaddana mwili-mwili wa maningo ehu. (Roma 2:28; 1 Korinto 15:39, 50) Mudhidhi mwina onaddana omudhi wa attu. Motagiha, Bibilia onologa wila Yezu wali wa ‘nihimo na David bari ekalelo yaye y’omwilini,’ nanda Paulo wahawittana Ayuda wi ali abalaye ‘o’mwilini.’​—Roma 1:3; 9:3.

⁷ Mazu anloga “aneddihiwa na dhinkola mwili,” ali va Roma 7:5 alogile murumiwi Paulo antapulela eni? Wi nifwanye yowakulaya ndoweni nengese Roma 7:5. Apa Paulo oleba: “Nsaka nedda iyo n’ekalelo y’omuthuvi, monlelo abure a mwili wehu atetedhiwa na malamulo, annifwanyiha okwa.” Apa Paulo ohitapulela wi attu aneddihiwa na “dhinfuna mwili,” babale antameletxa vina amfwara dhifunelo dhawa dha yottega, akosaga dhetene dhinfunani.

8. Paulo wafunelani washagiha Akristu wi attiye “weddihiwa na dhifunelo dha mwili”?

⁸ Paulo washagiheleni Akristu ottikitteliwa wi arabele “weddihiwa na dhinfuna mwili”? Nanda Akristu otene ovanene anfunelani mashagiho aba? Sabwani Mukristu ddi mukristu podi oroma ovipela malago bagafuna wi eddihiwege na dhifunelo dhaye dhomaningoni. Ninga otagiha, Paulo oleba wila abali eena o’Roma ali attu ‘alabela dhifunelo dhawa bahi.’ Mwa dhawene iyene waddana ojeberuwa, oja obe dhifunelo dhina dha mwili dhonani ninga saderetu mwigumini mwawa opitta dhilobo dhina. (Roma 16:17, 18; Filipi 3:18, 19; Juda 4, 8, 12) Movira wa mudhidhi, mmulogoni w’o Korinto mwahikala makattamiho a mbali ‘wamugoniha mwadhi babe.’ (1 Korinto 5:1) Mwebaribari, Akristu avyaka zana dhoroma anfuna nikamihedho na Paulo wila atxelele “weddihiwa na dhifunelo dha mwili.”—Roma 8:5, 6.

9. Txini ehilogiwe va Roma 8:6?

⁹ Mashagiho aba vina anolaba ovanene. Sabwani masiki muttu onimulaba Yehova mwa vyaka dhinjene, podi osadduwa baroma orumeela “weddihiwa na dhifunelo dha mwili.” Kito, apava Paulo wafuna aloge wi txipo kanubuwelege dhilobo ninga oja, otamela ganyo, ovega, obe oziveliwana muttu? Kahiyo mwenemo. Dhilobo esi kahiyo dhabure. Masiki Yezu wannaredha, wanja vina wannajiha attu eena. Iyene vina wanziwa wila onofuna ovuma. Nanda Paulo wahileba wila elobo enlibiha matelo ku ogonihana wa atelaniya.

10. Mazu aba anloga “otamela dhinfuna mwili” antapulela-wene eni?

¹⁰ Mazu a Paulo onloga, “otamela dhinfuna mwili” antapulela eni? Mazu a Egrego alogile Paulo antapulela otamela elobo na murima wotene. Muziwetxi dhahi ologile wila abale ampattiwa na mazu aba “attu antameletxa na ofuna, vina anlogetxa” dhilobo dhomaningoni. Awene anottiya wi dhifunelo esi dheddihege dhigumi dhawa.

11. Dhilobo gani dhili ninga dhamakamaka wa iyo?

¹¹ N’eji Akristu o’Roma anfuna ovipepesa wi aurele dhilobo dhafunetxani obe dhatameletxani. “Dhinfuna mwili” txini? Ovanene iyo vina ninofuna opepesa dhilobo dhinikaleli dhamakamaka. Motagiha, elobo gani enubuweletxa iyo obe enlogetxihu? Ninziveliwetxa okosa eni? Txino attu eena anakula wila anziveliwetxa omwa vinyu, osasanyedha numba yawa, ogula guwo dhiswa, okoya muhaku, obe ojavo ofuru wa malabo olaba. Dhilobodha esi kahiyo dhabure. Dhilobo ninga esene dhinopadduwa veli-veli. Nigela soo, Yezu vina wahisaddula manje bakala vinyu, Paulo wahimulibiha Timóteo wila ‘asomolege vinyu’ wi avulumuwe. (1 Timóteo 5:23; Joau 2:3-11) Masiki dhawene, Yezu na Paulo kattiya vinyu vamburoni vawa voroma. Ki iyo? Elobo gani enzuzumeletxa iyo mwigumini mwehu?

12, 13. Ekalelini yaderetu wang’anela dhilobo dhinfuna iyo ofwara?

¹² Paulo onnishagiha dhahi: “Onfwara dhinfuna mwili, ongomelana wukwani.” (Roma 8:6) Koddi ejiya entapulela eni? Kuloga wi akala ninodidela ofara “dhinfuna mwili,” ninele oyeleela mandano ehu na Yehova, nanda musogorho ninoyelela egumi yohimala. Kahiyo yaderetu opadduweliwa dhilobo ninga esi. Noona muttu podi otxinja. Onomubuwela mulobwana oddule w’o Korinto wana mweddelo yonyakuwa nanda attamagihiwa mmulogoni? Mmaleliye osaddeyiwa, wahittiya mweddelo waye wabure. Beyelela omulaba Yehova.​—2 Korinto 2:6-8.

¹³ Mulobwana oddu wali yotagiha yottabwa ya muttu ‘wafwara dhinfuna mwili,’ masiki vajedheliye otxinja mweddelo waye wabure. N’eji akala vahikala Mukristu onna mweddelo wabure, obe elemeelelo y’ofara dhinfuna mwili, podi otxinja. Nigobuwela malago anivahile murumiwi Paulo ninele owodha ottiya kakamwe mweddelo-bu-mweddelo oli wabure.

“OTAMELA DHINFUNA MUYA”

14, 15. (a) Paulo onnikokomeza wila nifwarege dhinfuna ni? b) Txini enkoodda otapulela “otamela dhinfuna muya”?

¹⁴ Paulo mmaleliye ologa makani a “otamela dhinfuna mwili,” iyene ohinaddela vina wila ‘ofwara dhinfuna muya onofwanyiha egumi, na murenddele.’ Eji jinjedhelihu ottuviwa nigadidelavi ofwara dhinfuna muya.

¹⁵ Porhe-porhe; “otamela dhinfuna muya” kintapulela wila muttuya kangumanana makattamiho. Kintapulela wila muttuya obuwelege obe alogege dha Yehova obe dha Bibiliavi bahi mudhidhi wotene. Motagiha emeleli a Mulugu a nsaka noroma ankalawo ninga attu eena. Awene anja, ammwa, antela anteliwa, ammaga murala, vina antamela ganyo.​—Marko 6:3; 1 Tesalónika 2:9.

16. Elobo gani yavahetxa ttima Paulo?

¹⁶ Masiki dhawene, Paulo na Akristu eena a vyaka zana dhoroma, kattiyile vamburoni voroma dhifunelo dhawa dhomaningoni. Motagiha, iyo ninoziwa wila Paulo wansasanya tenda bagaguliha. Mbwenye iyene kattittimihetxa mabasa aba opitta dhilobo dhomuyani. Elobo yavahiye ttima wali omulaba Mulugu. Iyene walibedhetxa olaleya na osunziha muttaka wapama. (Kengesa Merelo 18:2-4; 20:20, 21, 34, 35.) Abali enjene na arogoraya o’Roma anvilibihedha omutagiha Paulo, iyo vina nikose yakakene.​—Roma 15:15, 16.

17. Ninttuviwa eni akala ninofwara “dhinfuna muya”?

¹⁷ Egumi yehu enakale dhavi akala ninotameletxa omulaba Yehova? Roma 8:6 onroma ologa dhahi: “Ofwara dhinfuna muya onofwanyiha egumi na murenddele.” Okosa dhawene entapulela ottiya yubuwelo yehu wi yeeddihiwe na muya wa Mulugu, vina osunza wubuwela ninga munubuwela iyene. Nigakosa dhawene, Yehova onolibela onivaha egumi yosanzaya ovanene, musogorho egumi yohimala.

18. Ninwodha dhavi okana murenddele nigafwara “dhinfuna muya”?

¹⁸ Paulo wafuna atapulele eni valogiliye wila “ofwara dhinfuna muya” enonivaha murenddele? Attu otene anofuna murenddele ttabwa-ttabwa murenddele wa muyubuweloni, mbwenye anfwanyaya ali ang’onovi. Nimutamalele Yehova vowi iyo ninowodha okaana murenddele wa muyubuweloni. Ninowodha wimetxa murenddele na amudhi ehu, na abali a mmulogoni. Vowi nili attegi, mudhidhi mwina ninele okaana makani na abali obe arogora ehu. Egapadduwa dhawene, nifware malago a Yezu anloga dhahi: “Dhowá mwateyihane na mbalawoyá.” (Mateu 5:24) Nubuwele vina wila abalihu animwebedha Yehova, “Mulugu onvaha murenddele.”​—Roma 15:33; 16:20.

19. Murenddele gani onjavo iyo?

¹⁹ Nigafwara “dhinfuna muya” ninowodha okana murenddele na Mulugu. Namavuhulela Izaiya oleba: ‘Nyuwo Nabuya munowakoya abale anukokorelani, mulibela wavaha murenddele wamukalakala, sabwa awene anukuluvelani nyuwo.’​—Izaiya 26:3; kengesa Roma 5:1.

20. Txini enuttukulela otamalela malago alebiwe va Roma kapitulu 8?

²⁰ Peno ninjeedhela ovahiwa egumi yamukalakala velaboni ya vati, peno wirimu, notene ninopurelamo mazu ali va Roma kapitulu 8. Ninotamaalela vaddiddi wila Bibilia ononilibiha otamela omwebedha Yehova ottiya okuluvela dhifunelo dhehu nanya. Nihiziwa wila nigafwara “dhinfuna muya,” ninojavo mareliho ahinpimeya. Paulo ohileba: “Mulugu onnithambirhiha mvaho oli egumi yohimala, nikalaga mumodhani na Yezu Kristu Nabuyehu.”​—Roma 6:23.