Dhowakula dha Mabasa na Yeddelo Yehu ya Okristu
3-9 YA JUNYU
MAFUMO A MAZU A MULUGU | GALÁSIA 4-6
“Masunziho a ‘Vizinddiyelo dha Mapadduwo’ Meeli”
(Galásia 4:24, 25) Esidhá dhinotonya elobo enddimuwene. Ayana aba eli anzinddyeliha Mapagano meli: Agar ontonya Nipagano, niriwe vamwangoni Sinai; anbaliwamo, ankala adhari. 25 Mwango Sinai, oli elabo y’o Arábia, onozinddyeliha muthethe w’o Jeruzalemi wa vati, oli mudhari wa malamulo vamodha na anaye.
it-1 63 ddima 3
Agar
Ninga mulogele murumiwi Paulo, Agar wali ninga tagiha yamuzinddiyeliha Izrayel wobaleliwamo, wewananihiwe na Yehova, na nipagano nitiwe Vamwangoni Sinai, nttuwene nattukulele okala ‘ana a mudharini’. Mbwenye ana Izrayel kawodhile ovirihamo Malamulo a nipagano ntti, sabwani ali nlogo n’ottega. Jijuwene ekoddile nlogo nttile okala nlogo nofuru, nifiyedhaga ottongeliwa okwa; nona ali adhari-wene. (Jo 8:34; Rom 8:1-3) Jeruzalemi wa masaka a Paulo onoladdanihiwa na Agar, sabwani muttette w’o Jeruzalemi wakalani wazinddiyelihiwa na nikuru na Izrayeli wobaleliwamo, wali mudharini vamodha na anayeya. Mbwenye akristu attikitteliwe muya, anoladdanihiwa na “Jeruzalemi wodhulu”, muyana onzinddiyelihiwa na Mulugu. Jeruzalemi oddu, onladdanihiwa na Sara oli muyana wofuru, vowi iyene txipo kakale mudharini. Wili-wili, vowi Izaki ohitxigiwa na Ejumayel, ana a “Jeruzalemi wodhulu”, afuruliwe na Mwana nibila, ahitxigiwa vina mmadani mwa ana Jeruzalemi wa mudharini. Masiki dhawenevi Agar na mwanaye ahittamagihiwa; ezinddiyelihaga okoddiwa wa Izrayel wobaleliwamo, abuwene akuweliwa nlogo na Yehova.—Gal 4:21-31; koona Jo 8:31-40.
(Galásia 4:26, 27) Oku Sara, oli furu, amutonyaga Jeruzalemi wodhulu. Iyene ddi mayihu. 27 Bibilia onloga dhahi: Thabá, weyo muyana wangomwa ohimbala! Koba thungurhu, weyo ohinonaga goyi dhomanini! Muyana opwehiwe, anaye ahinjiva opitha a ole olí na mamune.
w14 15/10 10 ddima 11
Kaana Nroromelo Nohittekenyeya Mumweneni
11 Ezinddiyelo ya nipagano na Abramu, yahakwanihedheya-wene mwigumini mwa adhuli aye venevo vattukulani Elabo Yopikireliwa, mbwenye Malebo anowoniha wi mpaddi mwina wa nipagano ntti ohikana makwanihedho mena a epaddi yomuyani. (Gal. 4:22-25) Ninga mulogele murumiwi Paulo, wakwanihedheya woroma wa nipagano ntti, bwa mwana wa Abramu, Kristu; mpaddi wanawili onaddiwana attikitteliwi 144.000. (Gal. 3:16, 29; Ovuh. 5:9, 10; 14:1, 4) Muyana onimbala mudhuli, ddi “Jeruzalemi wodhulu”—olí mpaddi wa nikuru na Yehova na wirimu, abuwene ali Akristu omuyani. (Gal. 4:26, 31) Mowiwanana na nipagano na Abramu, mudhuli obaliwe na muyana oddu, agahadhelana maruriho attu a nlogo na vati.
(Galásia 4:28-31) Nyuwo amudhaga, muli ana abaliwe na nroromeliho na Mulugu ninga Izaki. 29 Wale, mwana obaliwe na guru dh’o muthu, wanimwidda ole obaliwe na guru dha Muya [muya]. Ddabuno enopadduwa yakene. 30 Veneva Bíbilia onloga nni? Omwigare mudhari na mwanaye, vowi mwana mudhari kanwodha oja dha babe, agaweliwaga vamodha na mwana furu. 31 Apa, iyo amudhaga, kanilí ana a mudhari; nilí ana a mayihu wafuru.
Nipepese Mafumo a Omuyani
(Galásia 4:6) Enoniha wi nyuwo mulí anaye, jowi Mulugu ourumelani Muya [muya] wa Mwanaye, onloga mmurimani mwenyu: “Abbá”, entapula “Babani!”
w09 1/4 13
Weyo Onoziwa Nakulona?
Yezu amulobelelaga Yehova oromolele nni mazu aba awi “Abbá, Babani”?
Mazu aba a elogelo ya Aramayiko ’ab baʼʹ anotapuleliwa na dhologa bili, “Babani” obe “Hee Babani”. Yologa eji enfwanyeya dila ttaru mMaleboni; mazu alogiwe munlobeloni vina alogeliwe wi addiwena Babi wa wirimu, Yehova. Yologaya eji enfuna eninonihedhemo nni?
The International Standard Bible Encyclopedia (Enciclopédia Bíblica Padrão Internacional) ohiloga: “Masaka a Yezu, wahikala elemelelo ya ayima ologa mazu aba wi onihe nttittimiho nddimuwa vaddiddi narihanani ababiwa.” Eji yali elemelelo ya mwana osunza obebedha agalogaga na babe vina ali mazu oroma asunzihiwa aima ologa. Yezu ologile mazu aba amunlelaga Babe. Iyene walobele bali mmunddani mwa Jetsemani, mudhidhi obule wali mudhidhi waddameliwiye goi enddimuwa ya opiwana; nona iyene ohimunlela Yehova na mazu awi “abbá.”—Marko 14:36.
Nivurunene nttile nilogiwe vadhulu, ninologavi wi yologa eji “’Abbāʼ yalogeliwa omurihana Yehova, yali yologa yahalogiwa-wene masaka a Agrego, ataganyiheyile na akadda Roma; ehinaganyedheya jawi Ayuda ali nlogo nobuwela wi kinfwanyele omulobelela Mulugu niromolaga mazu Enamudhi.” Mbwenye, “Yezu’ . . . alogaga mazu aba munlobeloni mwaye welela onihe ebaribari yalogiliye yawi iyene Oli mumodhani na Babe”. Murumiwi Paulo ohileba dila bili yologa eji “Abbá”—dholeba esi dhobili dhinoniha wi Akristu oroma anromola vina mazu aba munlobeloni mwawa.—Roma 8:15; Galásia 4:6.
(Galásia 6:17) Oromana ddabuno mpaka osogorho, kaddinfuna onyonyiwa na muthu, vowi ddinoweddana mmaningoni mwaga manddasi, anoniha wi ddili mwimeleli wa Yezu Kristu.
w10 1/11 15
Weyo Onoziwa Nakulona?
Murumiwi Paulo afuna anonihedhemo eni valogileyi wi onoweddana mmanigoni mwaye “manddasi, anoniha wi mwimeleli wa Yezu Kristu”?—Galásia 6:17.
▪ Mazu aba a Paulo, anoneya ninga attu abale a nsaka n’oroma ahinonelamo n’ekalelo yottiyana-ttiyana. Nsaka nawale attu anlabana mujila, baviviha wi akakena manddasi atxedhiwi okoddoni, ambava eya mmiparhani na adhariya attawa. Muttu wakana manddasi aba, wali muttu wahakana-wene ttima vamentoni va attu ena.
Mbwenye keliwe wi attu otene akana makwadda, antanyiwa; nne, kahiye mwenemo. Akalawo attu avipamela manddasi aba n’efunelo ya ovoniha wi ddwa nlogo na ngana. Ninga yotagiha, Theological Dictionary of the New Testament (Dicionário Teológico do Novo Testamento) onloga wi, “akadda Síria annivika manddasi mmononi obe mukotti agadhowaga omwebedha mulugu wawa Hadad na Atargatis . . . Attu amwebedha Dióniziyu anpameliwa manddasi akala ninga ntaba.”
Anamapepesa enjene a masaka abano, anloga wi Paulo waloga na manddasi aniye abuwene atoteyile n’ovadiwa, masaka abale aliye misionario. (2 Korinto 11:23-27) Mbwenye enoneya ninga Paulo walogana osadduwa wa egumi yaye—kalogana makwadda ovadiwa ali mmaningoni mwaye—walogana yeddelo eswa y’Okristu yaniye.
10-16 YA JUNYU
MAFUMO A MAZU A MULUGU | ÉFESO 1-3
“Masasanyedho na Mabasa a Yehova”
(Éfeso 1:8, 9) Esodhá, iyene onivaha vawinjiva-vene vamodha na ononelamo, vina zelu yawakwana; 9 oniziwiha dhitadiliye n’ofuna waye moviteyani, eli ddima yapimeleliye mutanene opuliha na mada a Kristu.
it-3 554 ddima 6
Dhoviteya dha Mulugu
Omwene wa Mesiya. Dholeba dha Paulo dhinowoniha mwawakwana-mwene dhoviteya dha Mulugu dhili mmaddani mwa Kristu. Karta ya Éfeso 1:9-11, iyene ohilogavo mazu anoniha wi Mulugu “oniziwiha dhitadileye n’ofuna waye moviteyani”; ohenjedhedha: ‘Eji ddima yapimeleliye mutanene opuliha na mada a Kristu. Dhahene Mulugu onosongorhihedha omapulelo dha mwilaboni dhetene: nsaka nigafiya, onogumaniha dhodhula na dhavati, onothiya mmadani mwa Nameddiha mmodha bahi, oli Kristu. Mulugu wamala onithoma wi, n’oluwelana wehu na Kristu, iyo vina nigaweliwe dhorela dhaye bari mwatadele iyene.’
“Dhoviteya esi dha Mulugu” dhinotaganyiheya na olamulela vina Omwene wa Mulugu oli mmadani mwa Mesiya. “Dhodhulu” dhilogile Paulo, wawaddana anamakamihedha Omwene anakale wirimu vamodha na Kristu. “Dhavati” anaddiwana attu a malogo otene anfuna olamuleliwa na omwene wa wirimu. Yezu ohiloga na anamafwara aye: “Nyuwo muvahiwa ononelamo dhoviteya dha Omwene wa Mulugu”; welela anonihedhemo dhoviteya dha omwene obu.—Mr 4:11.
(Éfesio 1:10) Dhahene Mulugu onosogorhihedha omapulelo dha mwilaboni dhetene: nsaka nigafiya, onogumaniha dhodhulu na dhavati, onothiya mmadani mwa Nameddiha mmodha bahi, oli Kristu
w12 15/7 27-28 ddima 3-4
‘Yehova Iyenene’ Onowagumaniha Amudhaye
3 Mizé ohawaddela ana Izrayel dhahi: “Nabuya [Yehova] ddi Mulugu wehu, ddi Nabuya [Yehova] mmodha bahi.” (Olib. 6:4) Dhawira dha Yehova na mapikireloya aye, dhotedhene sawiwanana dhene. Nona, iyene “onosogorhihedha omapulelo dha mwilaboni dhetene: nsaka nigafiya,” Mwinyene ddi “Namediha mmodha bahi”—iyene onela okosa mabasa ogumaniha dhottanddiwa dhaye dhotene dha zelu. (Kengesa Éfeso 1:8-10.) Mabasa aba ogumaniha anela wakwaniha ttarho bili. Ttarho yoroma ja watugumanihedha attikitteliwi etene wirimu abuwene aneddihiwe na mwimeleli wawa womuyani, Yezu Kristu. Ttarho eji eromile o Pentekosti wa 33 N.K. nsakanene nttile ttiromile Yehova wagumaniha abale anattonge wirimu vamodha na Kristu. (Merelo 2:1-4) Vowi Akristu anokuweliwa aligani vamentoni va Mulugu sabwa ya mukutto wa Kristu, awene ahimala ozinddiyelihiwa izo y’okala “ana Mulugu.”—Rom. 3:23, 24; 5:1; 8:15-17.
4 Ttarho yanawili ja wasasanyedha abale anakale mParaizo velaboni ya vati abuwene agalamuleliwa na Omwene wa Mesiya. “Muthithi munddimuwa” onokosa mpaddi woroma wa nikuru ntti. (Ovuh. 7:9, 13-17; 21:1-5) Mudhidhi wa Vyaka Txikwi dh’Olamuleliwa, awene anela wiwananihiwa na attu matxikwi na matxikwi anavenyihiwe mukwani. (Ovuh. 20:12, 13) Kobuwela wiwanana onakalevo ovenyihiwa mukwani ogamala opadduwa! Omagomelo wa vyaka txikwi, “dhavati” dhinela ottukuleliwa muwehiwani womariha. Abale anafwanyiwena nroromelo anela okala velaboni ya vati akuweliwaga “ana Mulugu.”—Rom. 8:21; Ovuh. 20:7, 8.
Nipepese Mafumo a Omuyani
(Éfesio 3:13) Nona ddinoulobani wi muhundeye guru, monaga masoso anutabuwelanina miyo; vowi masosoyá, thima yenyu.
w13 15/2 28 ddima 15
Dhotedhenedha Esi Ttiyani wi Dhikale Ttima Yenyu
15 Nroromelo ninimukanelihu Mulugu, ninowattukulela abalihu ottittimihiwana. Paulo ohalebela Akristu a mulogo wa Éfeso: “Nona ddinoulobani wi muhundeye guru, monaga masoso anutabuwelanina miyo; vowi masosoyá, thima yenyu.” (Éfesio 3:13) Masoso a Paulo akale dhavi “thima” ya Akristu a mu Éfeso? Efunelo yana Paulo ya walabelavi Akristu akwaye, masiki na makattamiho ofwara-fwariwa, yahawoniha akristu a elabo ya Éfeso wi wiwanana onani ohikana ttima vina onddimuwa-wene. Kowiliwa Paulo wela okumuwa mufwara-fwariwani mpule, attu kagobuwele wi wandana wa akristu na Yehova, peno mabasa olaleya obe njedhelo nawa, dhotedhene s’otowa ttima? Ovilela wa Paulo ohattittimiha Akristu vina ohoniha wi okala namafwara wa Yezu vanofuneya guru enddimuwa vaddiddi.
(Éfesio 3:19) Munoziwa onikwela wa Kristu, ohinwodha ononeleyamo na muthu; munodhala dhorela dhotene dha Mulugu.
cl 299 ddima 21
“Wi Muziwe Onikwela wa Kristu”
21 Mazu a Egrego “oziwa” kuloga “oziwa ovirihamo elobo-txibo, ensunzihiwa.” Iyo nigakwelana dhahene ninga munikwele Yezu—ninela okaana murima wa watabuwelaga akwihu na guru dhetene, navahaga ejile enajombela na supaje yotene, nalevelelaga na murima wehu wetene—dhawene, panalogiwani wi nittidda okwela wa Kristu. ‘Ninofiyedha ononelamo okwela waye onnittukulela okana eziwelo’. Nihidduwaleni yologa eji: mudhidhi ontagiha iyo okwela wa Kristu, venevo panakale iyo vakuvi na ole ona mikalelo dhina Yezu, Mulugu wehu wokwela, Yehova.
17-23 YA JUNYU
MAFUMO A MAZU A MULUGU | ÉFESO 4-6
“Thukulani Vipano Dhinuvahani Mulugu”
(Éfeso 6:11-13) Thukulani vipano dhinuvahani Mulugu, wi muwodhe ovyamelelana opyaga wa satana. 12 Txibarene iyo kanin’wana na athu, nin’wana na muya dhabure dhihinoneya, na onddimuwa, owodha, dhineddiha elabo ejino ya mwiddimani. 13 Thukulani vipano dhinuvahani Mulugu, wi muwodhe ovivunana siku na koddo; mugamala owanana obure wotene, mukalevi awimelene.
Azombwe Muvikome—wi Muwodhe Owana na Ddiabo
MURUMIWI PAULO ohaladdaniha Akristu na anyakoddo. Iyo nili mukoddoni, mwiddani wehu ddwebaribari! Mbwenye koddoya ninwana na Satana vina adomonyo, awene kahiyo attu ninga iyo. Adomonyo aromile owana wale vina akaana eziwelo ya mukoddoni. Ninodha wubuwela wi kaninawodhe opemberha koddoya makamaka akala nili azombwe. Jowodheya azombwe opemberha koddo na mwiddani oddu wa ewodhelo? Ndde awene anowodha, awene anompemberha! Sabwaya? Sabwani awene anowakela nikamihedho na Yehova. Ottiya ejo awene ali ninga anyakoddo oswagihiwa vina ‘ahikaana dhipano dhowanana dhavahile Mulugu’ wi awodhe oraba koddo.—Kengesa Éfeso 6:10-12.
(Éfeso 6:14, 15) Kavenyani, mulibihe ebaribari! Ebaribari eukaleleni papaseko muyununi. Mweddegena oligana murima: olígana murima oukaleleni yabalo ya mujila enuvunani. 15 Mugalamuwele olaleya muthaka wa murenddele: olaleya muthaka oukaleleni sapato dhothamagana mukoddoni.
Azombwe Muvikome—wi Muwodhe Owana na Ddiabo
4 Moligana na papaseko, ebaribari ensunza iyo ya Nzu na Mulugu enonibarela na masunziho onyengetta. (Joau 8:31, 32; 1 Joau 4:1) Venevo vandowa iyo banigasunza ebaribari ya Nzu na Mulugu, ninowodha weddiha egumi yehu na magano a Mulugu obe nabale ‘ebarelo yavapetoni.’ (Masalmo 111:7, 8; 1 Joau 5:3) Ottiya ejuwene nigaziwa ebaribari ninele owodha ovibarela na amwiddani ehu.—1 Pedro 3:15.
7 Magano oligana a Yehova anobarela “murima,” wehu obe omuttu wehu wa mwari eladdanihiwaga na yabalo ejile ya vapetoni. (Gano 4:23) Munyakoddo txipo katxinja yabalo yaye na yabalo yina yotowa ttima. Na mukalelo wakakene, iyo kaninsaddula magano oligana a Yehova na meena anoona iyo wi bofwanyelela. Iyo kanina eziwelo yowakwana yobarelana murima wehu. (Gano 3:5, 6) Noona enofuneya wi mudhidhi-na-mudhidhi nombezege embarela murima wehu.
10 Vowi sapatto dha munyakoddo wa Roma dhannimukamihedha oraba koddo, na mukalelo wakakene sapatto dha nladdaniho dhabalile iyo dhinonikamihedha “olaleya muthaka wa murenddele.” (Izaiya 52:7; Roma 10:15) Masiki egalivi dhawene, olaleya onofuna oliba murima. Bo, wa vyaka 20, ohiloga: “Ddanova walaleya akwaga a oskola. Miyo ddankaana manyazo. Ddigang’ana mundduni kaddinziwa egali miyo. Ovano ddinowagalala walaleya akwaga.”
(Éfeso 6:16, 17) Thabwa-thabwa mukale ororomela: nroromelo nukaleleni ebarelo enthawanenyu mathere a motho anusugánina satana. 17 Muroromelege ovulumutxiwa: ovulumutxiwa oukaleleni txapewa wa mujila onvunenyuna musorho. Mweddegena nzu na Mulugu, nili supadda na Muya Wokoddela [muya wokoddela].
w18.05 29-31 ddima 13, 16, 20
Azombwe Muvikome—wi Muwodhe Owana na Ddiabo
13 Ovano Satana onvaviha “matterhe” gani wi awutorolena? Iyene onlabana ottambi wa ommagedha Yehova. Satana onfuna wi wubuwelege wi Yehova kanukwela vina kawo onziveliwa na weyo. Ida, ona vyaka 19 ohiloga: “Dila dhinjene miyo ddona wi Yehova oli wolapela vaddiddi na miyo, vina kanfuna wi miyo ddikale mukwaye.” Iyene onkosaga nni agavonaga dhawene? “Mattugumano elobo enlibiha nroromelo naga. Miyo ddigafiyawo ddangilati bahi kaddavaha yowakula ddubuwelaga wi kavo ogaziveliwe na dhowakula dhaga. Ovano miyo ddinosasanyedha deretu matugumano ddinowakula dila bili obe ttaru. Enorutxa mbwenye miyo ddinoziveliwa vaddiddi. Abalaga anoddilibiha vaddiddi. Dila dhotene ddimbudduwa mmatugumanoni ddiziwaga wi Yehova onoddikwela.”
16 Moligana na ‘txapewa wa nivuno’ ombarela ogogo wa munyakoddo, njedhelo na ofuneya ninobarela dhubuwelo dhehu. (1 Tesalónika 5:8; Gano 3:21) Njedhelo ninonikamihedha ozuzumela dhogana dha Mulugu nikoddaga wobana na masoso annigwela. (Masalmo 27:1, 14; Merelo 24:15) Mbwenye akala ninofuna wi njedhelo nehu ninivune, enofwanyela okala elobo yebaribari mwa weyo. Nimwabale “txapewa” wehu wa nivuno mmusorhoni, ottiya omuttiddela mmadani!
20 Murumiwi Paulo ohiloga wi Nzu na Mulugu eli ninga supadda. Yehova ohinivaha. Iyo ninofanyeela osunza olabihedha mazu otene wi nibarelena nroromelo nehu obe nisasanyedhe dhubuwelo dhehu. (2 Korinto 10:4, 5; 2 Timóteo 2:15) Onawodhe dhavi wogolela ewodhelo yawo? Sebastian ona vyaka 21, ohiloga: “Ddihileba maverso a kapitulo dhinengesa miyo Mbibiliani. Dhahene ddinosasanyedha maversu anziveliwa miyo vaddiddi.” Okosa ejuwene enoddikamihedha oziwa mobuwelo wa Yehova. Daniel ohenjedhedha: “Ddigakosaga wengesa waga wa Bibilia, ddinosakulela maversu anoona miyo wi anele wakamihedha attu anaziwa miyo. Ddihifiyedha oziwa wi attuya anowakula deretu agaziwa wi weyo onoziveliwa miselu dhili mBibilian vina onovilibihedha wi wakamihedhe.”
Nipepese Mafumo a Omuyani
(Éfeso 4:30) Muhimukubanyihe [Muhikubanyihe] Muya Wokoddela [muya wokoddela] wa Mulugu, oulibilenina iyene, aukaleleni nipathu-pathu siku na woboleliwa.
it-3 527 ddima 2
Wokoddela-koddela
Muya wokoddela. Guru yolaba ya Yehova, obe muya, oneddiha ddi iyene mwinya, iyene onowirana elobo-elobovi enfuniye. Bokoddela, bottittimiheya, botxena-txena; onlabana ddi Mulugu bahi. Nona ogaddiwa “muya wokoddela” vina ‘muya wokoddela-koddela.’ (Masal 51:11; Lk 11:13; Rom 1:4; Ef 1:13) Muya onvahiwa muttu, onvahedhiwa wi akane ewodhelo ya ovikoddeliha obe ovitxeniha. Merelo otene onyakuwa obe otakala, ‘anokubanyiha’ muyaya. (Ef 4:30) Muya kahiye elobo enkakeya mmaningoni mwa muttu-muttu; obe nilogeni dhahi: kahiye wehu, muya obu, ezinddiyelo y’okoddela-koddela ya Mulugu, nona akalawo merelo ‘ankubanyiha’. Yotakala yotene eniriwa, ‘enobarela mabasa a muya.’ (1Tes 5:19) Yotakala eji egadegeliwavi wiriwa, enapadduwe jawi ‘muya wokoddela wa Mulugu onokubanyihiwa’, omamalelowa Mulugu onokala mwiddani wa mvutiya. (Iza 63:10) Onkubanyiha muya wa Mulugu, onovitotela segedho, sabwani ondda ofiyedha osutta muyayá; osutta muya wa Mulugu yottega yogurumeliha, Yezu ohiloga wi onsutta muya wa Mulugu, kanleveleliwa nne masaka abano, nne abo andawo.—Mt 12:31, 32; Mr 3:28-30; koona MUYA.
(Éfeso 5:5) Muziwe pama: muthu wanikwarhi, wojeberuwa, onothiddiwa milili (oli ninga muthu onawebedha amulugu), kanna mburo mumweneni mwa Kristu, mwa Mulugu.
it-1 179 ddima 5
Onddokowela Dh’elabo
Monlelo Abure Anobala Yottega. Onddokowela dh’elabo onowita ekalelo yobure, mmirimani mwa attu vina ononyowiha. Mulebi wa Bibilia Tiago, ohiloga wi obure oganyowela mmaningoni, onobala yottega. (Tia 1:14, 15) Murima wa muttu onzinddiyeleya mwari mwa merelo aye. Murumiwi Paulo ohiloga wi onddokowela dh’elabo kuloga wawebedha amulugu. (Ef 5:5) Muttu onddokowela elobo-txilobo, onozuzumela ejoya bikala ninga Mulugu waye, apwazaga mudhidhi ogamulabeliye Muttanddi.—Rom 1:24, 25.
24-30 YA JUNYU
MAFUMO A MAZU A MULUGU | FILIPI 1-4
“Kamugulugudheye na Elo-ene”
(Filipi 4:6) Kamugulugudheye na elo-ene. Makathamiho enyu, mumperekele Nabuya na malobelo, mmunlelaga, mmutamalelaga.
“Murenddele wa Mulugu . . . Onpitha Thontho ya Muthu”
10 Txini enanikamihedhe okala wohigulugudheya na “elo-ene” mbwenye banigatamela “murenddele wa Mulugu”? Mazu alebeli Paulo abali o Filipi, anloga wila kanove sabwa ya makattamiho annigwela, nilibele olobela. Nigadhugudheya, japama woona makattamihoya ninga gari ya malobelo. (Kengesa 1 Pedro 5:6, 7.) Ogamulobaga Yehova, kakaana ebaribari yawi onele wukamihedha. Kamutamaale dila dhetene dhinakeliwe mareliho aye. Kudduwale yawi Yehova okaana ewodhelo ya “wira mwetemwene esile dhinkwaranya vopitha dhinlobihu.”—Éfeso 3:20.
(Filipi 4:7) Dhahene murenddele wa Mulugu, onpitha thontho ya muthu, onere okoya mirima na mobuwelo enyu, vowi muli mumodhani na Yezu Kristu.
“Murenddele wa Mulugu . . . Onpitha Thontho ya Muthu”
7 Abali o Filipi mmalelani wengesa mazu alebile Paulo, awene onilemo dhavi? Txino awene ahubuwela ejile yampadduweli Paulo na Sila vina mukalelo okamihedhiwe awene na Yehova. Nsunziho gani nilogile Paulo va kartani ejo? Yosunzaya jawi: Kanove. Nilobelege, sabwani ninele wakela “murenddele wa Mulugu . . . onpitha thontho ya muthu.” Kito ejiya enfuna etapulele nni? Mabibilia meena antapulela dhahi ‘opitta dhubuwelo dhehu obe onowela vadhulu va dhubuwelo na dhogana dha muttu.’ N’eji enkala ninga Paulo aloga wi, “murenddele wa Mulugu” botikiniha vaddiddi opitta munubuwelihu. Mudhidhi ohinjedhihu okana marhe ogomihana makattamiho ehu, pavenevo vangomiha Yehova makattamihoya. Iyene onowodha okosa yahajeedhela iyo.—Kengesa 2 Pedro 2:9.
“Murenddele wa Mulugu . . . Onpitha Thontho ya Muthu”
16 Txini enanipadduwele nigakela “murenddele wa Mulugu onpitha thontho ya muthu”? Bibilia onloga wila onere “okoya” mirima na mobuwelo ehu. (Filipi 4:7) Nsaka nilogiwe mazu aba “okoya” aladdanihiwa na merelo a anyakoddo, kuloga wila nikuru na anyakoddo nisakuliwe wila nang’anele muttette vina nibarele. Akadda Filipi ahikoyiwa na makuru abo a anyakoddo. Awene anwodha ogona ottugareyene sabwa anziwa wila muttette wawa obareliwa na anyakoddo. Moligana, nigakaana “murenddele wa Mulugu” kanindhugudheya na elo-ene, sabwa murima wehu na dhubuwelodha dhinowodha ovuma. Ninoziwa yawi Yehova ononibarela vina efunelo yaye ja onona wosanzayene. (1 Pedro 5:10) Ejo enonirabeliha onyimuwa sabwa ya dhilobo dhinnidhugudha, obe onobaniha.
Nipepese Mafumo a Omuyani
(Filipi 2:17) Akala enofuneya wi ddipeliwe okala mukutho, ontaganyihiwa na mukutho wa ororomela wenyu, ddinoziveliwa, ddinothaba vamodha na nyuwo mwetene.
it-3 123 ddima 6
Mukutto
Mukutto waperekiwa na vinyu. Mukutto waperekiwa na vinyu, wakosiwa dila modhene yaperekiwa mikutto dhottiyana-ttiyana, mikotto esi dhaperekiwa mmalele ana Izrayel ovolowa mwilaboni yopikireliwa. (Oleb 15:2, 5, 8-10) Mukutto wa vinyu (“vinyu yolezeliha”), yattukuliwa vinyuyá, bikwakweliwa vebuwani. (Olib 28:7, 14; kang’ananiha na Obud 30:9; Oleb 15:10.) Murumiwi Paulo ohalebela dhahi Akristu o’Filipi: “Akala enofuneya wi ddipeliwe okala mukutho, ontaganyihiwa na mukutho wa ororomela wenyu, ddinoziveliwa, ddinothaba vamodha na nyuwo mwetene.” Apa mukutto obu walogiye, walogile ninga tagiha wi onihe efunelo eniye ya watabuwela Akristu akwaye. (Fil 2:17) Iyene ahinatti okwa, wahimulebela dhahi Timóteo: “Miyo ddihalilé vañgono n’oviperhekela okala mukutho; nsaka n’ofuruliwa waga nili vakuvi.”—2Tim 4:6.
(Filipi 3:11) wi miyo vina ddifiyedhe ovenya mukwani.
w07 1/1 26-27 ddima 5
“Ovenyihiwa Mukwani Woroma”—Onopadduwa!
5 Vowi attikitteliwi anoliganihiwa na “Izrayel wa Mulugu” awene anofuniwana ovitaganyiha na Yezu Kristu oli na nttittimiho naye wirimu, ‘wenewo onagumanani na Nabuya.’ (Galásia 6:16; 1 Tesalónika 4:17) Nipadduwo ntti ninkuweliwa “ovenyihiwa woroma” obe ‘omaguvela ovenyihiwa.’ (Filipi 3:10, 11; Ovuhulela 20:6) Mudhidhi obu wa ovenyihiwa woroma ogavira, mudhidhi onadhewo bwa ovenyihiwa mukwani wa attu matxikwi na matxikwi anakale na mukala-kala mParaizo, velaboni ya vati. Iyo ninofuniwana ovaha ttima “ovenyihiwa woroma” masiki akala nili attu anakale velaboni ya vati peno wirimu. Ovenyihiwa oku ompadduwa wuvi? Ompadduwa dhavi?