Onawodhe Dhavi Okana Murala Wowagalala?—Epaddi 1

Abale amalile otelana mwari mwa mudhidhi mung’onovi, anofuna wi wagalala wananina atelanaga odhowegevi. Ejo enowodheya. Akristu atelilena wale vina anivilibihedha ovirihamo magano a Bibilia, anoziwa wila ejo enowodheya.

1. Magano gani anavaha Bibilia amamuni?

Yehova ohimusakula mamuni wi akale musorho wa ntakulu. (Kengesa Éfeso 5:23.) Iyene onjedha wi dhogana dha mamuni dhakamihedhe anamudhi otene. Bibilia onloga: Nyuwo amamuni “mwakwelege awadhinyu.” (Éfeso 5:25) Ejo entapulela eni? Mamuni wokwela onomweddiha deretu mwadhiye vatakulu vina agakala na attu ena. Iyene onombarela, onokosa muli-mwetemwene wi amusapele mpaddi womaningoni. (1 Timóteo 5:8) Ottiya ejo, iyene onozuzumela makamaka epaddi yaye yomuyani. (Mateu 4:4) Motagiha, enowodheya iyene olobela vina omwengesa Bibilia na mwadhiye. Mulobwana onimweddiha mwadhiye na okwela, onolibiha mandano aye na Yehova.—Kengesa 1 Pedro 3:7.

2. Bibilia onavaha magano gani ateliwi?

Nzu na Mulugu ninloga wi muteliwi “amurihege mamune.” (Éfeso 5:33) Iyene onawodhe dhavi okosa ejoya? Onofwanyela ovaha ttima mikalelo dha mamunaye vina guru dhinkosiye wi amuzuzumele iyene vamodha na anawa. Enowodheya vina muteliwi otonyihedha nriho mwa okamihedha dhogana dha mamune vina ologa nofwaseya masiki akala mamuneya kahiyo Mukristu. Muteliwi kanfwanyela omulogaga bure mamune agakala na attu ena.

3. Atelani anawodhe dhavi olibiha matelo awa?

Bibilia onloga dhahi mwaha wa atelani: ‘Oheli anele okala nningo nimodha.’ (Mateu 19:5) Ejo entapulela wi awene anofwanyela ovilibihedha wi okwela onani muttu na mukwaye odhowegevi. Awene anakose ejuwene modhela okalaga vamodha mudhidhi mwinjene vina alogaga esile dhiniwamo awene nokwela. Mwigumini mwawa, kayiwo elobo elitxi yamakamaka—ottiya Yehova—vina murala wawa. Awene anofwanyela okala pasope wi anamwang’ane muttu mwina na efunelo ya okala na iyene.

KASUNZAVI

4. Mamuni—onofwanyela omukwela vina omweddiha deretu mwadhiye

VIDIYU: Nyuwo Amamuni Mwakwelege Awadhinyu na Ekalelo Envikwelinyu (9:53)

• Mamuni onatonyihedhe dhavi wi onomukwela mwadhiye vina onomweddiha deretu?

Kengesa Kolosi 3:12, mugamala mutanaalele nivuzo ntti:

• Mulobwana onatonyihedhe dhavi mikalelo esi?

5. Muteliwi—onofwanyela omukwela vina omuriha mamune

Bibilia onomukokomeza muteliwi wi amurihege mamune masiki akala Mukristu obe nne. Kengesa 1 Pedro 3:1, 2, mugamala mutanaalele nivuzo ntti:

• Akala mamunawo kanimulabela Yehova, weyo txibarene onofuna wi iyene amulabelege. Elobo gani egakamihedhile,—okala omulaleyelavi obe okala muteliwi wokwela, wofwaseya vina wa nriho? Sabwaya jani?

Muteli na muteliwi akalaga mumodhani anowodha okosa dhogana dhaderetu. Masaka mena, enodhaga opadduwa muteliwi ohirumelaga dhogana dha mamune. Ebaribari wi iyene onofwanyelela ovaha monelo waye, mbwenye ekale na mukalelo wofwaseya vina na nriho, anonelagamo wi Yehova ddunvahile mamuni muttorho wa okosa dhogana dhinakamihedhe anamudhi otene. Iyene onofwanyela okamihedha yogana ya mamune. Dhawene muteliwi onokosa epaddi yaye wi akamihedhe wagalala wa ntakulu. Kengesa 1 Pedro 3:3-5, mugamala mutanaalele nivuzo ntti:

• Yehova oniwamo dhavi muteliwi agamutonyihedhaga mamune nriho?

6. Enowodheya okwaranya makattamiho a matelo

VIDIYU: Atelani Anawodhe Dhavi Owaraliha Matelo Awa (5:44)

• Mvidiyuni, txini etonyihedhile wi atelani abale ahiroma ogawana?

• Akosile elobo gani wi alibihe matelo awa?

Kengesa 1 Korinto 10:24 na Kolosi 3:13. Mugamala wengesa malebo aba, mutanaalele nivuzo ntti:

• Magano aba anawodhe dhavi olibiha matelo?

Bibilia onloga wi ninofwanyela orihana muttu na mukwaye. Nriho nintapulela omweddiha muttu na oderetu vina na ofwaseya. Kengesa Roma 12:10, mugamala mutanaalele nivuzo ntti:

• Muteli na muteliwi anatonyihedhena nriho muttu mmodha agaroma? Onlogelani dhawene?

OGWADDELA

Enowodheya muteli na muteliwi wagalala agakwelanaga, agarihagana vina agavirihagamo magano a mBibiliani.

Kobuwela Dhisunziliwe

• Mamuni onawodhe dhavi okosa mpaddi waye wi matelo aye agalale?

• Muteliwi onawodhe dhavi okosa mpaddi waye wi matelo aye agalale?

• Akala weyo wamuteli obe wamuteliwi, magano gani a mBibiliani agalibihile matelo awo?

TAMELÁ ONONELAMO DERETU

Koona mukalelo onawukamihedhe okana murala wowagalala.

Enowodheya Okaana Wagalala Vamuralani Vawo (brochura)

Koona vidiyu entonyihedha mareliho a ovirihamo malago a Mulugu mwaha wa matelo.

Eu, você e Jeová (4:26)

Koona txini entapulela omuriha mwazambo wa ntakulu.

“Mulheres, porque devem aceitar o arranjo da chefia?” (A Sentinela, 15 de Maio de 2010)

Atelani aba awodhile dhavi okwaranya makattamiho orutxa—otaganyiha na omwalana wawa?

Reconstruímos o Nosso Casamento com a Ajuda de Deus (5:14)