Kapitulu Tanu Na Tharu
‘Owana Na Makuru A Muya Dhabure’
1. Ninfanyeela eni ozuzumela merelo a muya dhabure?
ATHU enjene anobedda yubuwelo yawila ohikala muya dhabure. Mbwenye eji kayo elobo yoteyiha. Masiki akala athu anorumeela obe kanrumeela, muya dhabure dhihikalawo txibarene, nanda muya esi dhinowawooniha goi athu otene. Anamebedha a Yehova kanlupiwa. Mwa txibarene, ba awene anfuniwetxa. Murumiwi Paulo ohinilaga mwaha wa ebaribari eji bagaloga dhahi: “Iyo kanin’wana na athu, nin’wana na muya dhabure dhihinoneya, na onddimuwa, owodha, dhineddiha elabo ejino ya mwiddimani.” (Éfeso 6:12) Mu nsaka nehu makuru a muya dhabure dhinothabwavi wawooniha athu goi sabwani Satana ohithamagihiwa odhulu, nanda ohikaana owali onddimuwa, aziwaga wila ohalilena malabo mañgonovi.—Ovuhulela 12:12.
2. Ninawodhe dhavi opemberha kani yosadduwela muya dhina guru opitha athu?
2 Enowodheya opemberha kani yosadduwela makuru a muya dhina guru opitha athu? Indde, mbwenye eji enawodheye nigamukuluvela Yehova kakamwe. Ninofanyeela onvuruwana vina wiwelela Nzu naye. Modheela okosa ejene, iyo podi orabela oputhuwa omaningoni, oputhula mweddelo wehu, vina mmubuweloni, ninga munakoseyela abale anañganeliwa na Satana.—Tiago 4:7.
Alamuleli A Elabo Wumburoni Wa Odhulu
3. Satana onafarafara ani na otabala vaddiddi, nanda onkosa dhavi?
3 Mowooneya, Yehova ononitapulela mukalelo oli elabo ninga munwodheliye woona ovenyedha odhulu, sabwani wenewale iyene oli wumburoni onwodhiye woona deretu. Iyene ohinvaha murumiwi Joau yowoona ejene entonyiwa Satana ninga “nowa enddimuwa yawopiya, yofila ninga motho.” Iyene wanfuna omedha Omwene wa Mesiya wa Mulugu mwabaaleliwani wene odhulu yaka ya 1914. Sabwa ya okoodda owodha okosa ejilene, Satana wahitatamula ofarafariwa wotabala vaddiddi mowasadduwela eemeleli a Omwene obule, abene ankala velaboni ya vati. (Ovuhulela 12:3, 4, 13, 17) Satana agarabile dhavi koddo eji? Agarabile modheela eemeleli aye a athu.
4. Bani onvaha malamulelo a omuthu guru, ki iyo niziwile dhavi ejene?
4 Vasogorhova Joau wahilagihiwa enama yana misorho mitanu na mili na manyaga kumi, enama ena olamulela “wowathonga athu a mahimo otene, malogo, vilogelo na a vilabo dhotene.” Enama eji entapulela malamulelo a elabo yotene ya politika. Joau wahipangiwa wila “nowa ejile enddimuwa [Satana Ddiabo] emuthiyedha enama ejo guru dhaye, mpaddo n’omwinya waye.” (Ovuhulela 13:1, 2, 7) Indde, Satana ddinvaha malamulelo a omuthu guru vina mpaddo. Dhaene, ninga mwalebeli murumiwi Paulo, “dhineddiha elabo” txibarene si ‘muya dhabure dhihinoneya, na onddimuwa mmimburoni dha odhulu,’ esene dhinañganela malamulelo a omuthu. Otene anfuna omwebedha Yehova anofanyeela ononelamo deretu ntapulelona na ejene txibarene.—Luka 4:5, 6.
5. Alamuleli a politika a nsaka na ovanene angumanihedhiwa eni?
5 Masiki alamuleli enjene a politika vanlogani wila anyarelijiau, kuli elabo eniwelela nlamulelo na Yehova obe omwiwelela oddule omuthomiliye ninga Mwene, Yezu Kristu. Otene anowadelavi okala vampaddoni vawa. Nsaka na ovanene, ninga munlagihedha muselu oli va Ovuhulela, ‘muya dhinira matikiniho’ dhinowagumanihedha alamuleli a elabo yotene “koddo ya siku nddimuwa na Mulugu, mwinya wa guru dhetene,” va Harmagedón.—Ovuhulela 16:13, 14, 16; 19:17-19.
6. Enfuneyela eni okala pasope wila nirabele olibihedhiwa okamihedha elabo ya Satana?
6 Masiku otene, egumi ya athu enopakeliwa na magudulano a politika, makalelo a athu, mpinddu, vina magudulano a relijiau abene ammwalaniha murala wa athu. Mmagudulanoni mwene mpu, wili wili athu anokamihedha na mazu obe na merelo mpaddi obuwene osakulilani, na nlogo nawa, ziza nawa, gatha ya elogelo obe gatha ya athu abene anakamihedhani. Masiki akala athuya kali kakamwe mmagudulanoni, wili wili awene anokamihedha mpaddi mmodha obe mwina. Mbwenye peno muthu gani obe elobo gani enkamihedhani, bani txibarene onimukamihani? Txibarene Bibilia onloga dhahi: ‘Elabo yotene eli mmadani mwa satana.’ (1 Joau 5:19) Ki muthu onawodhe dhavi orabela opupurutxiwa vamodha na athu ena otene? Onawodhe bahi modheela okamihedhaga kakamwe Omwene wa Mulugu vina modheela okooddaga wene okosa mpaddi wa magudulano a elabo.—Joau 17:15, 16.
Dhosaringele Dha Muthu Wabure
7. Otxenjerha wa Satana onooneya dhavi mwa olabihedha waye relijiau ehili ya ebaribari?
7 Mmasakani otene a okalawo wa nlogo na athu, Satana ohilabihedha ofarafara wa ologeliwa obwalu vina wa woonihiwa goi wila aapupurutxe athu mu webedhani webaribari. Iyene vina ohilabihedha marhe mena ooviteya—oshagela vina dhosaringele. Na otxenjerha iyene ohawika athu enjene mwiddimani modheela relijiau ehili yebaribari, bagakosiha wubuwela wila anomulaba Mulugu. Sabwa ya okoodda omuziwa Mulugu deretu vina sabwa ya okoodda okwela ebaribari, txino awene anoddenguwela merelo a singaningo a relijiau obe wuma milomo na merelo ootikiniha. (2 Tesalónika 2:9, 10) Mbwenye iyo ninolagiwa wila naakalele txenjewa masiki abale aaligi na iyo mu webedhani webaribari, “athu ena anere orabela nroromelo àfwaraga anamasunziha awota, arumelaga masunziho ópela malago, andhana satana.” (1 Timóteo 4:1) Ejene egapadduwile dhavi?
8. Satana onwodha dhavi onimaga mu relijiauni ehili ya ebaribari masiki akala ninomwebedha Yehova?
8 Na osaringele, Ddiabo onopura dhowobana dhehu. Ninowawovavi athu? Akala ninowawovavi, txino iyo podi opemberhiwa nigadideliwaga na amudhi obe na amwaddamani wila nikamihedhe merelo aromile na relijiau ehili ya ebaribari. Ninovikonya? Akala ninovikonya, txino ninosilidheya nigalagiwaga obe akala athu ena kanrumeela dhubuwelo dhinihuna. (Gano dh’olelana 15:10; 29:25; 1 Timóteo 6:3, 4) Othiya wogolela moonelo wehu wila wiwanane na yotagiha ya Kristu, txino iyo podi wavuruwanaga abale ‘annaddela dhinfunihu’ modheela ologa wila okalela omwengesavi Bibilia vina okala muthu waderetu onowakwana. (2 Timóteo 4:3) Satana kanlaza peno akala nihivolowa mu relijiauni yina obe akala ninfara relijiau yehu, enfunitxiye jawila nihimwebedhege Yehova na mukalelo onfuniye modheela Nzu naye vina nikuru naye.
9. Na osaringele, Satana onlabihedha dhavi ogonihana wila asorihe esile dhinfuniye?
9 Satana vina onowakwekwetha athu na oshaga, wila ape dhifunelo dhawa na makalelo abure. Iyene ohikosa ejene na efunelo ya ogonihana. Sabwa ya okoodda mweddelo wa Bibilia, athu enjene mwilaboni anoona ogonihana wa athu ahitelanile ninga ovega wofanyeela obe mukalelo wa otonyihedha yawila awene ahunuwa. Kito abale atelanile? Enjene anoraruwa. Masiki akala va mateloni awa aweneya anororomelana, athu enjene anotamela omwalana obe othiyana wila akalege na muthu mwina. Ofuna wa dhosaringele dha Satana kwa wakwekwethela athu okalelagawo dhoziva ovanene, wathukulela athu opwazaga esile dhinfuna wapadduwela awene, vina dhinfuna wapadduwela athu ena musogorho, vina makamaka ejile enfuna opadduwela wandana wawa na Yehova vina Mwana waye.—1 Korinto 6:9, 10; Galásia 6:7, 8.
10. Satana onlabihedha eni wila apupurutxe mweddelo wehu mowiwanana na oraruwa vina otimbwini?
10 Efunelo yina yobaaliwana ja ovega. Ovega ogakala waderetu, podi ovumiha maningo vina mubuwelo, nanda podi okosiha murima okala thukuthu. Ki iyo ninkosa dhavi akala na osaringele Satana onolabihedha midhidhi dha ovuma wila atamele othawaniha mubuwelo wehu na mubuwelo wa Mulugu? Motagiha, nihiziwa wila Yehova onowidda oraruwa vamodha na otimbwini. Mafilme, programa dha televizau, obe dhisangu dhigalagihaga dhilobo esi, iyo ninowañganavi s’ohikosa elobo? Vina kobuwelaga wila, Satana onela osasanyedha wila dhilobo esi dhithabwegevi onyakuwawa vowila mudhidhi wa ofugeliwa waye mmuti onowaddamela, sabwani “athu abure, anamanyengetha, anere othabwaga okala abure; oku anyengethaga, anganyengethiwa vina.” (2 Timóteo 3:13; Ovuhulela 20:1-3) Noona mudhidhi wotene ninofanyeela oviwañganela wila nirabele mobuwelo a Satana.—Wita 6:13; Masalmo 11:5; Roma 1:24-32.
11. Na mikalelo gani dhigamageyilena muthu agahikale mento, masiki oddule onziwa ebaribari mwaha wa ologa na muya?
11 Iyo vina ninoziwa wila abale ankosa merelo merelovi a ologa na muya—wombeza makaga, okwiri, obe otamela ologa na abale akwile—athu aba babure vamentoni va Yehova. (Olibiha 18:10-12) Na wubuwelaga ejene, kaninfanyela wubuwela wafiyedha aliba oddoddobelela, nanda txibarene kaninatxemerhe awene wila adhe vatakulu vehu wila akose merelo awa a odomonyo. Mbwenye nigahavuruwana awene koobudduwa mu televizauni yehu obe mu Interneti? Masiki txipo vahinarumeelihu osasanyiwa na namungu onlabihedha masalapitho, ninofanyeela ommagela nyenye piri mmononi, nubuwelaga wila piri eji enela ombarela mwanaya? Niziwaga wila Bibilia onokona watwa athu mento na muniya, nigahathiya aliba muniya onikosela masalapitho?—Galásia 5:19-21.
12. (a) Jibo dhinlabihedhiwa dhavi wila dhinithukulele otanaalela mwaha wa dhubuwelo dhinziwihu wila sabure? (b) Mwabalelo wa muthu, nthithina, obe mulogelo waye onlagiha dhavi wila muthu onowatamaala abale ana egumi enkona Yehova? (c) Txini enfuniwihuna wila nirabele onyengethiwa na dhosaringele dha Satana?
12 Bibilia onloga wila dhoraruwa vina dhilobo dhotene dhonyakuwa kadhinfanyeela nne oromoliwa (na dhifunelo dhonyakuwa) vari vehu. (Éfeso 5:3-5) Ki dhilobo esi dhigakala mu jiboni ejene yibiwe na oyesa, ejene ena ddungu? Ninela oroma otagihaga jibo esene dhinthithimiha ogonihana s’ohikalavo matelo, oja mirobwe dhinnonga mubuwelo, vamodha na merelo mena oothega? Obe venevo vanziwihu wila kaninfanyeela otagiha mukalelo onkalawo athu abene ankosa dhilobo ninga esene, ninofuna wila athu aniladdanihege na awene modheela otagihaga mwabalelo wawa, nthithi nawa, obe mulogelo wawa? Satana onothiddihedha mabasa marhe oviteya vaddiddi mwa wameza athu wila atanaalelege na mukalelo waye wovirigana! (2 Korinto 4:3, 4) Wila nirabele onyengethiwa na dhosaringele dha Satana, ninofanyeela orabela othukuleya na elabo. Ninofanyeela wawubuwelaga abale ‘aneddiha elabo ejino ya mwiddimani’ nanda niwane na guru mosadduwela nipakelo nawa.—1 Pedro 5:8.
Oovikomene Wila Nikale Apemberhi
13. Muthu muthuvi wa iyo onwodha dhavi opemberha elabo eji enlamulela Satana, masiki na dhohakwana dhehu?
13 Ahinathi okwa, Yezu wahapanga arumiwi aye dhahi: “Magani murima, miyo ddipuranya elabo.” (Joau 16:33) Awene vina agahiwodha okala apemberhi. Vyaka 60 musogorhomwa, murumiwi Joau wahileba dhahi: “Txibarene onrumela wi Yezu kristu ddi Mwana Mulugu, onowodha okona elabo.” (1 Joau 5:5) Nroromelo nthi ninlagihiwa modheela wiwelela nlamulo na Yezu vina okuluvela Nzu na Mulugu, ninga mwakoseli Yezu. Txini yina enfuneya? Enfuneya jawila nihinyanyale mulogo obwene ona Kristu ninga Musorhoya. Nigathega, ninofanyeela otxinuwa na murima wotene vina otamela nlevelelo na Mulugu modheela mukutho wa Yezu. Na mukalelo obu, panawodhihu vina opemberha, masiki banina dhohakwana na dhojomba dhehu.—Masalmo 130:3, 4.
14. Kengesa Éfeso 6:13-17, nanda kalabihedha mavuzoya vamodha na maleboya alebiwe mu ddimani mpu ninga nipara na makani wila opuremo kadda etagano ya vipano esi dha omuyani.
14 Wila niwodhe opemberha, ninofanyeela othukula ‘vipano dhinivahile Mulugu,’ banigakoodda opwaza nne ngafuna epano modha. Kanfugule Bibilia wawo va Éfeso 6:13-17, nanda kengesa ejile entapulela vipanodha. Venevo, modheela wakula mavuzo ali mutxiddo, koona mukalelo onawodhiwe opuramo nibarelo ninvaha kadda epano.
“Ebaribari eukaleleni papaseko muyununi”
Masiki akala txino ovanene ninoziwa ebaribari, osunzaga vina otanaalelaga ebaribari ya Bibilia vamodha na otugumanaga, onnibarela dhavi? (1 Korinto 10:12, 13; 2 Korinto 13:5; Filipi 4:8, 9)
“Olígana murima oukaleleni yabalo ya mujila enuvunani”
Oligana oku munyaya bani? (Ovuhulela 15:3)
Kaladdaniha mukalelo omputhuleya muthu mpaddi wa omuyani, agathiya ofwara magano ooligana a Yehova. (Olibiha 7:3, 4; 1 Samuwel 15:22, 23)
‘Olaleya muthaka wa murenddele oukaleleni sapato dhothamagana mukoddoni’
Nimbareleya dhavi nigalabihedhaga manyalo ehu wila nidhowe nalogege na athu mwaha wa mivaho dha Mulugu esene dhinkaaniha murenddele? (Masalmo 73:2, 3; Roma 10:15; 1 Timóteo 5:13)
“Nroromelo nukaleleni ebarelo”
Nigakaana nroromelo noliba, ninakose eni athu ena agatamelaga onitotela waganyedha obe wova? (2 Amwene 6:15-17; 2 Timóteo 1:12)
“Ovulumutxiwa oukaleleni txapewa wa mujila”
Njeedhelo na ovulumutxiwa ninwodha dhavi omukamiha muthu orabela omagiwa na ozuzumela bure okaana dhilobo? (1 Timóteo 6:7-10, 19)
“Supadda na muya wokoddela”
Dila dhotene ninfanyeela okuluvelaga eni nigawanaga na esile dhinfuna obuddugela epaddi yehu ya omuyani, obe omuyani wa athu ena? (Masalmo 119:98; Gano dh’olelana 3:5, 6; Mateu 4:3, 4)
Elobo gani yina enfuneya wila nipemberhe mu koddoni ya omuyani? Eji enfanyeela olabihedhiwa na mudhidhi mungasi? Mwa oderetu wa ani? (Éfeso 6:18, 19)
15. Niwodhe dhavi owana mu koddoni eji ya omuyani?
15 Ninga anyakoddo a Kristu, nili mu nikuruni nddimuwa vaddiddi na anyakoddo abene anraba koddo ya omuyani. Nigakala txenjewa nanda banilabihedha deretu vipano dhinivahile Mulugu, iyo kaninavoreyiwe obe kaninapiwe mu koddonimwene mpu. Othiya eji, ninela owodha walibiha adhari akwihu a Mulugu. Ninela okala ovisasanyedha owana, banigamwadha bili yaderetu ya Omwene wa Mesiya wa Mulugu, nlamulelo na odhulu nthene ninidda Satana na otabala vaddiddi.
Osakulela
• Anamebedha a Yehova anfanyeelela eni okoodda okosa mpaddi mmagudulanoni a elabo?
• Sivi dhosaringele dhiina dhinlabihedha Satana wila aatolotxe Akristu mpaddi wa omuyani?
• Vipano dha omuyani dhinivahile Mulugu dhinnibarela dhavi mu koddoni ya omuyani?
[Mafoto vanikukuni 76]
Malogo anogumanihedhiwa Harmagedón