Dhowakula dha Mabasa na Yeddelo Yehu ya Okristu
1-7 YA JULYU
MAFUMO A MAZU A MULUGU | KOLOSI 1-4
“Murule Omuttu Wenyu Wawale, Muttukule Ekalelo ya Muttu Muswa”
(Kolosi 3:5-9) Paní makalelo enyu otene, alí vimanya dha mwilaboni: ojeberuwa, oraruwa, vidhivi-dhivi, monlelo abure, ojiwa murima na muhaku, oli ekalelo yowebedha dha dhopaddutxiwa. 6 Dhetedhene esi dhinowatotela owali wa Mulugu athu animvanya. 7 Nyuwo vina wale, vàthiddiwenyu vimanya esi, mwedda dhawene. 8 Ddabuno tadhaní dhetene: owali, osilidhiwa, otakala murima, oruwana, ovadda mwano. 9 Kamulogelane dhawota. Txibarene nyuwo múrula omuthu wenyu wawale na mereloyá,
w11 15/3 10 ddima 12-13
Txelelá Muya W’elabo, Wakele Muya wa Mulugu
12 Merelo aga b’ekalelo gani? (Kengesa Kolosi 3:8-10, 13.) Dhawiriwa dha mwilaboni mpuno, dhinowattukulela attuyamo olodhowela vidhivi-dhivi dha maningo. (Gal. 5:19-21) Dhinttopa maningo a muttu kadhinoneya muttuya agakala mufuruni bahi, vidhivi-dhivi esi dhinttabwetxa woneya mukumuwani; ninga motagiha, akala Mukristu mukwehu ononipwaza, ononinyimula obe onologa bure na iyo. Dhinddeguweletxa murima wa muttu dhinoneya vina muttuya agakalavo yeka vatakulu. Enofuneya muttu-muttu wa iyo osaddeya murima waye. Nivikosege mavuzo ninga aba: ‘Mwari mwa myeri esi mitanu na mmodha dhivirile, ekalelo yaga y’Okristu ehisadduwa, obe ddihirava merelo abure peno mazu ovadda mwano?’
13 Muya wa Mulugu ohikaana ewodhelo ya ‘orula omuttu wehu wa wale’, bunittukuliha ‘omuttu oswa.’ Orula omuttu obu wa wale onela oniwodhiha okaana ekalelo y’okwela vina okala muttu wa supaje. Ninela okaana murima wolevelana nihikweyaga ntxiga, vina nihikalaga attu a ttogorogo. Nigarula omuttu wa wale, ninotxelela “mazu owawa, osilidhiwa, owali, onyanyuwa, olava vina dhotakala dhotene.” Mohaganyedha, guru dhinkosihu wi nirule omuttu wa wale dhinonittukulela okala attu “aneddelana thagaraga.”—Ef. 4:31, 32.
(Kolosi 3:10-14) muthukula ekalelo ya muthu muswa, ondhowa onuwagavi, atamelaga oladdana na Mpaddutxi waye, ofiyedha omuziwa vawakwanela. 11 Ddabuno kinañganiwa vina okala mugrego, muyuda, mwineliwi, mopi, okala mwanawedda, muthu wa mmawani, mudhari, furu; onañganiwa ddi Kristu, onkala mmirimani mwehu notene. 12 Ddabuno nyuwo mulí nlogo na Mulugu; iyene ousakulani, onoukwelani. Nona thukulaní meddelo a thagaraga, ovyeviha, ofwasa, okurumuwa, ovilela. 13 Muvilelagane, mulevelelagane dila dhetene dhinthegelana nyuwo. Muthu-muthu amulevelele mukwaye n’ekalelo euleveleleni Nabuya [Yehova]. 14 Enpitha dhetene eso, okwelana; vowi okwelana onowakwaniha wiwanana wa athu.
w13 15/9 21 ddima 18-19
Weyo Ohimala Ottukula Omuttu Oswa?
18 Wi Mazu a Mulugu abaale milima mmirimani mwehu, enofuneya iyo omwengesaga wili-wili Bibilia vina osunza dhinengesihu. Attu enjene anomwengesa Bibilia mudhidhi na mudhidhi vina anofiyedha oziwa dhinloga Bibiliyayá. Kunatti onfwanyaga muttu mmabasani olaleya, omoniwe wi iyeneya ohikaana enonelo ya Bibilia? Akalawo ena anfiyedha oromola malebo a mBibilianimwa. Awene ahikaana ononelamo wa mazu a Mulugu; anoweddana mwigumini mwawa esile dhinziwani. Enajombela txini? Wi Mazu a Mulugu aninyowele vina anisaddule, enofuneya iyo ‘oteputxelaga otakulu’ wa murima wehu; kuloga, ogawelana na akwihu. (Gal. 6:6) Enofuneya vina oveda mudhidhi wi ninanelege esile dhinsunzihu. Ahikalawo mavuzo ofuna ovivuza: ‘Ddihikana nikuluvelo wi ddinsunza-wene mazu a Mulugu? Ddihimala ononelamo wi eji jili ebaribariya? Mwigumini mwaga ddinovirihamo dhinsunzemi, vina ddinowona ninga masunziho a ttima anfwanyelimi waromolelamo attu akwaga? Ddinozinddiyela wi Yehova mwinyene onologa na miyo? Otanalela mavuzo aba onela onikamihedha opigela mazu a Yehova mmirimani mwehu. Omukwela wehu Muttanddi onela winjivavi. Mazu aba agadhala mmurimani mwehu, ninela osaddula merelo ehu.—Gano 4:23; Luka 6:45.
19 Wengesa vina otanalela Mazu a Mulugu onela oniwodhiha ovisaddula; ovisaddula oku kunarutxe sabwani, ‘ninela owodha orula ekalelo ya muttu wawale nittukulaga ekalelo ya muttu muswa, kuloga, okaana eziwelo yebaribari ejuwene ennittukulela merelo maswa.’ (Kol. 3:9, 10) Kinrutxa iyo okakela Mazu a Mulugu mwigumini mwehu; yofuneyayá ja osunzaga vina otolaga niparana-niparana na mazu aba. Yopurelamoya jawi ninela okala Akristu okoddela vina osuweya murima niwaralelaga onyanyala dhubuwelo dha Satana.
Nipepese Mafumo a Omuyani
(Kolosi 1:13, 14) Ddi iyene onivunele guru dha eddima, onimwalihedhe mumweneni mwa Mwanaye wokweleya. 14 Odduyá, n’ovilevela waye onóbola, onilevelela dhothega dhehu.
it-3 412 ddima 2-4
Omwene wa Mulugu
“Mumweneni mwa Mwanaye Wokweleya.” Anamafwara a Yezu adhile ononelamo wi Namasunziha wawa ‘ogilati omononi woja wa Mulugu,’ muvirele malabo kumi Yezuyá bali wirimu; awene anonelemo vattikitteliwani muya wokoddela nsaka na mattanga a Pentekoste wa 33 N.K. (Mer 1:8, 9; 2:1-4, 29-33) Tti nsakanene nttile nitiwe “nipagano niswa”; nipagano ntti, nahakosiha okala nikuru niswa, “nlogo na muya wokoddela”, ofiyedha oromoliwaga Izrayel womuyani.—Aheb 12:22-24; 1Ped 2:9, 10; Gal 6:16.
Vowi iyene ohimala ogilati omononi woja wa Babe, ddabuno ddi iyene oli Musoro wa mutugumano. (Ef 5:23; Aheb 1:3; Fil 2:9-11) Malebo anowoniha wi anamafwara aye ahivahiwa mabasa okala amwene omuyani, nsaka na Pentekoste wa 33 N.K. Murumiwi Paulo alebelaga Akristu oroma akala o Kolosi, wahiloga wi Yezu Kristu ohimala operekeliwa omwene: “Ddi iyene [Mulugu] onivunele guru dha eddima, onimwalihedhe mumweneni mwa Mwanaye wokweleya.”—Kol 1:13; kang’ananiha na Mer 17:6, 7.
Olamulela wa Kristu witiwe labo na Pentekoste wa 33 N.K., emeleli a omwene obu attu omuyani; nona egalogiwa wi onlamulela attu a nikuru na Izrayel womuyani, alí Akristu attikitteliwe muya wokoddela wi akale ana Mulugu. (Jo 3:3, 5, 6) Ana Mulugu aba agamala ottuviwa gari yawa ya okala odhulu, anakale amwene vamodha na Yezu, wirimu.—Ovuh 5:9, 10.
(Kolosi 2:8) Txenjerhaní, munaguleye na athu andhana mazu awota, ópela malago, abo kanedda na masunziho a Kristu; anfwara magano a athu, aneddiwana mwilaboni.
w08 15/8 28 ddima 9
Otapuleliwa wa Karta ya Galásia, Éfeso, Filipi na Kolosi
2:8—“Magano [gani] athu aneddiwana mwilaboni” addana Paulo? Iyene waddana dhotedhene dhili mwilaboni mwa Satana—vilobo dhinziwiwetxa peno dhinkuluveliwetxa, dhinkalelawo attu, obe dhinazuzumiha. (1 Joau 2:16) Mwari mwa esuwene ninofwanyamo, mazu ópela malago, na kapeladha dhonyengetta dha mwilaboni.
8-14 YA JULYU
MAFUMO A MAZU A MULUGU | 1 TESALÓNIKA 1-5
“Libihanina Murima, Mukamiyedhagane Muttu na Mukwaye”
(1 Tesalónika 5:11-13) Nona libihanina murima, mukamihedhagane ninga mulemelelinyu wira. 12 Anamudhi! Ninoulobani wi mwarihe abale anthidda mabasa vari venyu. Awene athomeliwe na Nabuya oweddihani, ousumululani. 13 Mwathithimihe, mwakwele mwaha wa mabasa anthiddani. Mweddegena murenddele vari venyu.
w11 15/6 26 ddima 12
“Mwarihe Abale Anthidda Mabasa Vari Venyu”
12 ‘Wira mabasa’ mmulogoni kahiye osunzihavi, ahikalamo mabasa mena menjene. Mazu aba, wira mabasa, ahilogiwa vina va nleboni na 1 Timóteo 3:4. Paulo ohiloga wi mwimeleli wa mutugumano onofwanyela oziwa “weddiha pama muralaye; anaye akale orumeya, oleleya.” “Weddiha pama” murala kahiye wasunzihavi ayima; onowiwanana vina na wimelela murala waye wi “anaye akale orumeya, oleleya.” Ndde, anddimuwa a mmulogoni anowimelela mulogoya, anowattukulela abali etene onfiyedha Yehova.—1 Tim. 3:5.
w11 15/6 28 ddima 19
“Mwarihe Abale Anthidda Mabasa Vari Venyu”
19 Weyo ogattuviwa mvaho osasanyedhiwewi, onakale dhavi? Onela olabagana mvaho obo wi wonihe ntamalelo nawo? Yehova vamodha na Yezu ahinivaha mvaho wa ttima vaddiddi, “alobwana anneddiha”. Marhe a weyo woniha wi onotamalela mvaho obu ku ovuruwanaga n’ofwaseya vaddiddi mudhidhi onkosa munddimuwa wa mulugo diskursu, ovilibihedhaga ovirihamo masunziho anlogiye. Enowodheya vina weyo woniha ntamalelo nawo mwari mwa ovaha dhowakula dhosasanyedheya deretu. Okamihedha mabasa animeleliwa na anddimuwa a mmulogoni, peno mabasa olaleya obe mabasa mena. Akala weyo ohivahiwa malago na munddimuwa wa mmulogoni, onkoddela nni odhowa omutamalela? Onkoddela nni osiba murala wa munddimuwa wa mulogo? Kudduwale; munddimuwa wa mmulogoni onlaba mparha-wili, onofuna waweddiha amudhaye vina onofuna okamihedha mulogo.
(1 Tesalónika 5:14) Amudhihu, ninowukokomezani: mwalage ahinfuna othidda mabasa, mwapangarhaze akukumuwile, mwalibihe murima ojeyile, mwavilelege athu otene.
“Nikwelagane . . . na Merelo na Ebaribari”
13 Wakamihedhe abale akukumuwile. Bibilia ononikokomeza dhahi “Mwalibihe murima ojeyile, mwavilelege athu otene.” (1 Tes. 5:14) Abali enjene aali okukumuwa musogorhomwa adha ovadda munroromeloni. Ena anofuna ovileliwa na nikamihedho n’okwela. Ninakamihedhe dhavi? Ninofanyela olabihedha Bibilia wi nakamihe attuya, nawobege wi nidhowe mmalaleyoni notene, obe wavuruwana. Kanubuwele wila abali na arogora ba ‘guru’ obe ‘bowobana.’ Mbwenye, ninofanyela ononelamo wila iyo notene dila dhina ninokaanaga guru, dila dhina ninowobanaga. Paulo wahiloga wila iyene wahobana. (2 Kor. 12:9, 10) Notene ninofuna nikamihedho vina olibihana muttu na mukwaye.
w15 15/2 9 ddima 16
Tagihani Oviyeviha na Supaje ya Yezu
16 Mazu ofwewa. Supaje enakanelihu akristu akwihu enonikosiha ‘wapangarhaza akukumuwile, wavilela athu otene.’ (1 Tes. 5:14) Mazu gani anfwanyelihu ologa wi nalibihena attu akwihu? Enowodheya iyo oridhiha murima wawa mwa wakamihedhaga navahaga ejile enajombela, vina wawubuwelaga. Nawaddelege ewodhelo enani vamodha na ttotto yawa. Nawubutxedhege wi Yehova onowattukulela wa Mwanaye, nawonihaga wi awene battima vamentoni vaye. (Joau 6:44) Nakuluvelihe wi Yehova onowakoya alabeli aye “ankukumuwa” peno “anwawiwa murima.” (Masal. 34:18) Mazu ehu ofwewa anowawaraliha vaddiddi abale anfuna nipangarhazo.—Gano 16:24.
Nipepese Mafumo a Omuyani
(1 Tesalónika 4:3-6) Enfuna Mulugu, jiji: mukale athu okoddela murima n’ekalelo eninfwanyelela iyene, muthawe ojebaruwa. 4 Muthu-muthu aziwe okoya mwili waye na murima woligana, woriheya. 5 Ahirumele weddihiwa na monlelo abure, ninga enira athu ahinimuziwa Mulugu.6 Ahikalewo muthu onimuthegela, onimpela malago mbale na dhabure esi, vowi Nabuya onomoniha goyi ole onira esidhá, ninga mmálele iyo owaddelani.
it-2 155 ddima 1
Oraruwa
Oraruwa, yowira yosegedha enimuttukulela muttu oburutxiwa mmulogoni w’Okristu. (1Kor 5:9-13; Aheb 12:15, 16) Murumiwi ohinonihedhamo wi Mukristu onraruwa onottegela maningo aye, sabwani iyene onlabana vyano dhimbaliha wi erena obure. Onotakaliha mpaddi waye womuyani n’ekalelo yottiyana-ttiyana, onotakaliha mulogo wa Mulugu, vina onovitotela goyi ya ottapula maredda antoteya sabwa ya mararuwo. (1Kor 6:18, 19) Onowapuja abali vina onotakaliha omuttu wawa (1Tes 4:3-7) sabwani (1) ononyakutxa vina onoveyiha dhokoddela, onowakoniha otene a mmulogoni (Aheb 12:15, 16), (2) onotakaliha omuttu wa mukwayeya onraruwaniye, agakala muziye, kanamukoddelele mamune obe mwadhiye nsaka ninateliye peno ninateliwiye, (3) onowatotela amudhaye ologiwa bure, vina (4) onowazuzumiha amambali a muttuya; akala otela obe oteliwa, onomukubanyiha mamune peno mwadhiye, vina onosegedha yubuwelo ya muttuya. Muttu onraruwa onopwaza malamulo a Mulugu; sabwani malamulo a Mulugu ahittiyana na malamulo a attu.—1Tes 4:8.
(1 Tesalónika 4:15-17) Nifwaraga masunziho a Nabuya, ninuwaddelani dhahi: iyo niliwo, ninakalewovi ofiyedha odha Nabuya, kaninathiyane na abale akwile wale. 16 Siku-ntho ninere wiwa nlamulo, nzu na anju, orúma wa parhaza wa Mulugu; mwinyene Nabuya onere otita odhulu. Venevo panarome ovenha múkwani abale akwile amuroromelaga Kristu. 17 Osogorhowa, iyo niliwo, niliví mwilaboni, ninere othukuleliwa wirimu mmuraboni vamodha na awene, nagumane na Nabuya. Dhahene ninere okalaga na Nabuya malabo etene.
w15 15/7 18-19 ddima 14-15
“Woboleliwa Wenyu Oli Vakuvi-kuvi”!
14 Txini enapadduweliwe nlogo na Mulugu Gog na Magog agalupela? Mateu na Marko ahiloga yopadduwa modhene: “[Mwana Muttu] onere waruma anju aye, àtugumanihe abale asakulileye mwilaboni mwetemwene, oromana komo mpaka komo yina.” (Marko 13:27; Mt. 24:31) Ogumanihiwa oku, kunaddiwana ogumanihiwa wa attikitteliwi; nne vina kavanaddiwana ottukuleliwa wirimu wa attikitteliwi abale ankalawovi ofiyedha masaka abano. (Mt. 13:37, 38) Attikitteliwi otene anattukuleliwe wirimu goyi enddimuwa ehinatti oroma. (Ovuh. 7:1-4) Ki ogumanihiwa oku oromole Yezu, waddana ogumanihiwa gani? Iyene waddana nsaka ninattuviwe attikitteliwe 144.000, nlivo nawa na odhowa wirimu. (1 Tes. 4:15-17; Ovuh. 14:1) Yawireya eji enapadduwe omamalelo wa obeddegela wa Gog na Magog. (Ezek. 38:11) Vasogorova, vanela woneya wakwanihedheya wa mazu aba a Yezu: “Abale ewananeyile na Mulugu, anere oñganimela mumweneni mwa Babawa ninga nzuwa.”—Mt. 13:43.
15 Kuloga onela okala “ottukuleliwa” wirimu wa attikitteliwi? Makapela menjene, Akristuyamo anubuwela wi anele ottukuleliwa wirimu. Onubuwela wi Yezu onelege woneya mudhidhi ogalamuleliye elabo. Mbwenye Bibilia onononihedhamo wi “ezinddiyelo ya Mwana-Muthu;” enoneye wirimu, vina Yezu oddo, onadhe “mmiraboni.” (Mt. 24:30) Dhologa esi dhobili dhinowoniha wi Yezu kanoniwe ninga muttu. Vina enoziweya wi ‘mwili wehu, oli nama na nikami, kunwodha wakeliwa mumweneni mwa Mulugu.’ Nona abale anfuna ottukuleliwa mumweneni, voroma vanela ofuneya osadduliwa, “Ejiyá enapadduwe vowaguva, ninga enira okapila wa mento, vanárume parhaza womariha.” (Kengesa 1 Korinto 15:50-53.) Nona, “ottukuleliwa wirimu” onlogiwa, kunnipipirhiha; attikitteliwi ororomeleya anatugumanihiwe mwari mwa mudhidhi mung’onovi.
15-21 YA JULYU
MAFUMO A MAZU A MULUGU | 2 TESALÓNIKA 1-3
“Dhawira dha Mvuti Dhinela Ovituliwa”
(2 Tesalónika 2:6-8) Nyuwo munoziwa enimbarela mvutiyá woneya nsaka naye nihinafiya: ekalawo enimurutxiha woneya mpaka nsaka naye nifiye. 7 Guru dhotikiniheya dh’obure dhiroma olaba. Dhinirani kadhinathi woneya vowakwanela; dhinodha woneya agavenyihiwavo ole onbarela mpaka ddabuno. 8 Venevo panoneye mvutiyá. Vano Nabuya Yezu oner’ompa n’omvudhela muya wa mwano mwaye, onomutolotxa vanadhiye na nthithimiho.
it-1 704 ddima 3
Omuttittimiha Mulugu
Veneva vahikala dhoviteya dhina, dhinttiyana kakamwe na “dhoviteya dha Mulugu”. Dhoviteya esi, “guru dhotikiniheya dh’obure”. Esidha kadhavituleliwe Akristu a masaka oroma, sabwani masaka a murumiwi Paulo, “guru [esi] dhotikiniheya dh’obure” dhali dhihinatti woneya deretu, mabasa awa ali ahinatti ovapeya, noona yanrutxa ozinddiyela. Masiki mmalele guru esi orukudha, woneyawa wanarutxela attu enjene sabwani merelo aye akala opyagela vina mabasa aye oneya ninga wamukosela Mulugu. Nakulu ali mabasa osaragundale, eteyile mwari mwa mutugumano w’ebaribari. Masaka a Paulo, yahizinddiyeleya wi guru esi dhihiroma wenjedha orukudha wawa, sabwani iyene ohiloga wi “guru dhotikiniheya dh’obure dhiroma olaba”; ekosihile guru esi ozinddiyeleya, yali yawi mmulogoni mw’Okristu mwahiroma witiwa malamulo agudulana na magano a Mulugu. Mbwenye makuru aba eta malamulo ottiyana na masuziho a Mulugu, anowaddamela nsaka nawa n’otolotxiwa, ntto ninakale nsaka na odha wa Yezu. Avanyi aba aneddihiwa na “guru” dha Satana, owodha wawa ogahinjivavi ofiyedha “wakwaranya abale ankuweliwa ‘amulugu’ obe vitagano dhokokoreliwa” (Gr., seʹba·sma). Mvanyi oddu wa Mulugu oneddihiwa na guru dh’oddomonyo, agahoneyana ekalelo enddimuwa yopela malago, vina agahatotela goyi abale agafunile omutagiha. Opyagela wa “guru [esi] dhotikiniheya” ogahavuwa ofiyedha woneya ninga omulabela mulugu wosarhapitta.—2Tes 2:3-12; kang’ananiha na Mt 7:15, 21-23.
(2 Tesalónika 2:9-12) Mvutiyá onere ofiya na guru dha satana, onowira masarhapitho otikiniha na guru dhopelana malago, dhinumiha milomo. 10 Onere olábana mikalelo dhetene dhabure, wi ànyengethe abale andhowa murimélani, vowi kafunile wakela n’okwela ebaribari yawodha wavuna.11 N’eji Mulugu onowarumela guru dhowapupurutxana wi arumele dhothambi. 12 Dhahene etene akoddile orumela ebaribari, aziveliwaga na dhovuta, anere okoniwa.
it-2 808 ddima 7
Ottambi
Yehova onottiya “mikalelo dhetene dhabure” oya mmirimani mwa attu ana meddelo opela malago wi “ànyengethe abale andhowa murimélani” sabwani awene anoruna muttaka wapama wa miselu dha Yezu Kristu. (2Tes 2:9-12) Ekalelo eji ya Yehova wattiya attu owalamela obure wawa, ehoneya mwari mwa ejile empadduwele Mwene Akab w’o Jeruzalemi. Anamavuhulela awota ahimpela malago Akab wi agahipembera koddo yafuniye owana na nlogo na Ramot-Galaad, mbwenye namavuhulela wa Yehova Mikeya, wahimpaga mwene Akab wi agahigonjihiwa. Ninga mwarowihedhiwe Mikeya, Yehova wahikosiha yottanddiwa yomuyani bikala “muya wothambi mwano mwa anamavuhulela” otene a Akab. Kuloga yottanddiwa eji yomuyani el’olabana guru dhaye, wi yakosihe anamavuhulela a Akab avuhulele dh’opela malago, sabwani jijuwene yafunani wi amwaddele Akab vina Akabeyá wafuna wi ewe mazu-ene abo. Otowa malago wa Akab ohimukosiha orumela dhottambi esi; mbwenye dhihimputtula-tti.—1Amwe 22:1-38; 2Map 18.
Nipepese Mafumo a Omuyani
(2 Tesalónika 1:7, 8) Oku iyo, vina nyuwo muntabuwa, anipangarhazaga. Esi dhinapadduwe vanadhe Nabuya Yezu odhulu, vamodha na anju aye aguru. 8 Iyene onere odha vari va elala ya motho, wi àkone na goyi abale akodda omuziwa Mulugu, ahinrumela Muthaka wa Nabuyehu Yezu.
it-1 149 ddima 8
Motho
Pedro ohiloga wi “erimu na elabo ya ovano dhinkoyiwa na nzu nakene na Mulugu, dhijyedhaga oddumeyiwa siku nomariha.” Mwari mwa yoleba eji na malebo mena, enozinddiyeleya wi kavanlogiwana motto-mottwene; apa vanfuna vanonihedhiwemo otolotxiwa mukala-kala. Mpulo wa masaka a Nowé kutolotxile elabo yodhulu nne ya vati, mbwenye watolotxile attu ovuru-vuru; yakakene jinapadduwe na odha wa Yezu Kristu vamodha na anju aye ana ewodhelo enladdanihiwa na motto ontototxa-mutototxelo; anju aba anatototxe atu awuma murima vamodha na dhawireyadha dha mwilaboni, dhinsegedha.—2Ped 3:5-7, 10-13; 2Tes 1:6-10; kang’ananiha na Isa 66:15, 16, 22, 24.
(2 Tesalónika 2:2) Kamujeriheye, agakalawo muthu onloga wi siku na Nabuya nifiya, ddipangiwé na nzu nidhile odhulu, ddiwalé dhilogiwaga, peno na mazu a mukartani, aniweya ninga owurumeleni ddi iyo.
it-1 402 ddima 6
Nzu Nidhile Odhulu
“Nzu Nidhile Odhulu”—N’ebaribari vina N’opela Malago. Nzu na Egrego pneuʹma (muya) nihiromoliwa n’ekalelo ya ttima enddimuwa vaddiddi mmaleboni mang’onovi a arumiwi. Ninga motagiha, nlebo na 2 Tesalónika 2:2 murumiwi Paulo ohatutela abalaye o Tesalónika wi anapeliwe malago vina anajeriheye, “agakalawo muthu onloga wi siku na Nabuya nifiya, ddipangiwé na nzu nidhile odhulu [kuloga: na “muya”], ddiwalé dhilogiwaga, peno na mazu a mukartani, aniweya ninga owurumeleni ddi iyo.” Enoziweya wi Paulo onloga muya addagana marhe a ovuwihana muselu-museluvi, ninga “mazu ologiwa” peno “karta.” Nona nivuru Commentary on the Holy Scriptures (Comentário Sobre as Escrituras Sagradas) na Lange (nik. 126), nihiloga mwaha wa nlebo ntti: ‘Apa murumiwi oddule afuna aziwihe mabasa a muya, muselu onlogiwa na muttu, dhologa dha namavuhulela.’ (Nitapuleliwe vina nigomihiwe na P. Schaff, 1976) Nivuru na Vincent: Word Studies in the New Testament, (Estudos de Palavras do Novo Testamento) nihiloga wi: “Mwa muya. Dhovuhulela dha muttu-muttu mmutugumanoni mwa Okristu, alogaga mazu ovudheleliwa na guru dha wirimu.” (1957, Vol. IV, nik. 63) Nona, mazu aba pneuʹma anamatapulela ena antapulela ninga “muya”, mbwenye ena antapulela ninga “muselu wa muya” (AT), “ologa dha musogorho” (BJ), “dhovudheleliwa” (D’Ostervald; Segond [Francês]), “dhologa dhovudheleliwa” (NM).
22-28 YA JULYU
MAFUMO A MAZU A MULUGU | TIMÓTEO 1-3
“Izo ya Wira Mabasa Apama”
(1 Timóteo 3:1) Enfuna miyo ologa, ebaribari: akala muthu onodheliwa mmurimani izo yokala bisku [mwimeleli wa mutugumano], entameliye japama.
w16.08 21 ddima 3
Weyo Onowona Ofuneya wa Owaralelavi Omulaba Wawo Mulugu?
3 Kengesa 1 Timóteo 3:1. Mazu a Egrego ‘ovilibihedha’, annoneliwamo ninga muttu onweta mono waye na guru wi afwanye elobo enfuniye ottidda. Mazu aba alogile Paulo, welela onihe wi owaralela mazu a Mulugu vanofuneya guru enddimuwa vaddiddi. Karoma omubuwela mbali onfuna omulabela venjene Yehova. Mbwenye iyeneya kahiye mudhari wokamihedha; venevo wubuwela wi onofuniwana wira dhinamuwodhihe ottomeliwa mabasa a mudhari wokamihedha mmulogoni. Agamala ottomeliwa mabasaya. Vasogorhova iyene onela ofuna vina ovilibihedha wi attomeliwe mabasa okala munddimuwa wa mulogo. Wi iyene attomeliwe mabasa aba otene, enofuneya okosa guru enddimuwa vaddiddi wi onihe ewodhelo yaye ya ottidda mabasa mmutugumanoni.
(1 Timóteo 3:13) Adiákono [adhari okamihedha] anthidda mabasawa mofwanyelela, anorihiwa, anowodha ologa dh’omuroromela Yezu Kristu ahitibelaga kove.
km 2/79 3 ddima 7
Abale “Anthidda Mabasawa Mofwanyelela”
7 Enowoneya wi dh’elabo dhihirutxa vaddiddi, nona Paulo aloga mazu awi abale “anthidda mabasawa mofwanyelela”. Kahiye wi Paulo waloga ohabana mpaddo mukapela. Iyene wafuna anonihedhemo wi adhari okamihedha “anthidda mabasawa mofwanyelela”, anorurihiwa na Yehova vamodha na Yezu, anorihiwa vina anokamihedhiwa na abali otene a mmulogoni. Mwa ologa ebaribari, adhari aba okamihedha “anthidda mabasawa mofwanyelela, anorihiwa, anowodha ologa dhomuroromela Yezu Kristu ahitibelaga kove.” Awene agattittimiha mabasa aba, anosibiwa venjene sabwa ya dhawira dhawa, anomvuwiha Yezu na mabasa awa apama, ahisisiguliwaga, vina anowodha ologa dha nroromelo nawa.
Nipepese Mafumo a Omuyani
(1 Timóteo 1:4) Athiye ozuzumela dhotagiha-tagiha, vina othabwiha welega mazina a makolo a wale. Eso dhintota opambihana bahi, kadhinlabela wakela na nroromelo dhitadile Mulugu.
it-2 196 ddima 6
Dhintota Opambihana
Ogilatela osunza vina opambiha makani oveveya enkala ninga otowa malago, ttabwa-ttabwa masaka abale alebile Paulo karta, amulebelaga Timóteo. Kiyali yofuneya welegelaga muddonddonddo wa ziza na attu wi vazinddiyeliwe azamani a muttu-muttu, sabwani masaka abale Mulugu kattiyaniha attu, peno ayuda obe amalabo; otene ali nikuru na mutugumano mmodha wa Akristu. (Gal 3:28) Welegeliwa wa ziza wahimala woniha wi Yezu odhile munihimoni na Davidi. Vina mwalebele Paulo wi Jeruzalemi agahitolotxiwa, kigagonele vaddiddi, muttette obule ogahitolotxiwa vamodha na dhawelegeliwadha dha Ayuda. Mulugu kakweyile. Nona, Paulo wela omulaga Timóteo wi anazuzumeletxe otamela oziwa vina welegela muddonddonddo wa muttu-muttu, afiyedhaga opambihagana sabwa ya miselu dhotowa basa, esuwene dhobaniha nroromelo na mutugumano. Muselu ologiwe mBibiliani ohimala wakwanela, muttu-muttu onosunza muselu obu baziwa ziza na Kristu, nttuwene nili na ttima vaddiddi mwigumini mwa akristu otene. Dhawelegeliwa dhina dhilebiwe mBibiliani dhinowoniha ebaribari ya muselu wa Bibilia, yoneyaga wi dhawelegeliwadha dhihipadduwa wene.
(1 Timóteo 1:17) Mwene wa masaka etene, Mulugu mmodha bahi, ohinkwa, ohinoneya, athithimihiwe, avuwihiwe, okala nokala-wene. Amen.
cl 12 ddima 15
“Onani! Oddu ddi Mulugu Wehu”
15 Nzina nina na nremezo ninvahiwa Yehova bahi, ttintti nawi, “Mwene wa masaka etene”. (1 Timóteo 1:17; Ovuhulela 15:3) Yehova onkuweleliwa nni mwene wa masaka etene? Enorutxa ononelamo yologa eji sabwani yubuwelo yehu kinna ewodhelo ya oziwa dhotedhene dhili Mulugu, mbwenye Yehova ddwa masaka etene, iyene kana omaromo—nne kanakane omagomelo. Masal 90:2 onttaka dhahi: “Myango dhihinathi okalawo, elabo na dhilimo dhihinathi woneya, nyuwo mulivi Mulugu okala n’okala-wene. Yehova txipo kaana omaromo, iyene ddwa masaka otene a mundduni. Noona agakuweliwa Mulugu wa “Malabo a Wale-wale”—okalawo waye kwa masaka ohelegeya, nne muttu mmodha obe elobo-txilobo ehinakalawo mwilabani! (Daniyel 7:9, 13, 22) Enowodheya iyo osadduwela guru yaye yokala Nabuya Wowodha-wodha?
29 YA JULYU–4 YA AGOSTO
MAFUMO A MAZU A MULUGU | 1 TIMÓTIO 4-6
“Omuttittimiha Mulugu Ohittiyana na Ozuzumela Dhorela”
(1 Timótio 6:6-8) Txibarene, omulaba Mulugu onomukalela nifumo ninddimuwa ole onfwaseya na enniye. 7 Pumwenemo! Nidhaga mwilaboni-mpuno, kanidhílena elo; nigadhowaga, kaninthukulamo elo. 8 Akala ninowona yoja na yowabala, nifwasena esi-wene.
w03 1/6 9 ddima 1-2
Wagalale N’esile Dhiniwe
Yamukosiha Paulo okala wohagalalene, yali yawi wanfwaseyana dhaniye. Wagalala na dhiniwe entapulela enni? Kuloga ofwaseyana dhiniwe. Malago aba anoligana na abale amwaddele Paulo mukwaye wa mmabasani olaleya, Timóteo; iyene wahiloga: “Txibarene, omulaba Mulugu onomukalela nifumo ninddimuwa ole onfwaseya na enniye. Pumwenemo! Nidhaga mwilaboni-mpuno, kanidhílena elo; nigadhowaga, kaninthukulamo elo. Akala ninowona yoja na yowabala, nifwasena esi-wene.”—1 Timóteo 6:6-8.
Nigenanelani malago aba, ninowonani wi Paulo oladdaniha ekalelo ya ofwaseyana dhinihu na omuttittimiha Mulugu. Alagihaga wila onorumela wi wagalala webaribari onda mwa omuttittimiha Mulugu, kuloga, ozuzumela voroma mabasa a Mulugu mwigumini mwehu, ottiya ozuzumela okanetxa mafumo obe dhorela. “Yoja na yowabala” dhali dhilobo dhamukamihedha odhowagavi bagamuttittimiha Mulugu. Mwa Paulo, yamukamihedha ofwaseyana dhaniye, yali ya omukuluvela Yehova masiki agumanagana makattamiho ottiyana-ttiyana.
(1 Timóteo 6:9) Abale anunlela orela, anogwela mmanyengethoni, anomageya na murega wa monlelo ebewene anpthula, anagwihedha athu murimelani, mutolowani.
g 6/07 6 ddima 2
Ozuzumela Orela—Onupatta Dhavi
Ebaribari wi attu enjene kankwa sabwa ya otameletxa dhorela. Mbwenye anodha oyelela egumi yawa mudhidhi ompupuruwani atamelaga wakwaniha efunelo yawa. Yina vina jawi attu aba antameletxa dhorela anokala ozuzuma-zuzuma sabwa ya makattamiho o’mabasani, anottamagiwa ttimarima sabwa ya ovuguweliwa kobiri, anotowiwa tturho, anowiwa opa musorho vina anonyowa—esi viredda dhinvugula vyaka dhokalawo wa muttu. Masiki muttuya one wi onofwanyela ozuzumela dhilitxi dha ttima, ovisaddulelawa onele omurutxa vaddiddi. Enodha opadduwa attuya ohikuluvelagana vamuralani, vina yubuwelo ya egumiya ya anawa enodha onongeya, pavakala osegedheya winjene. Txino enodha owodheya wogolela makattamiho mena, mbwenye eji enele ofuna guru endddimuwa vaddiddi. Mwebaribari, attu enji ajiwe murima na kobiri, “avitotela goi enddimuwa.”—1 Timóteo 6:10.
(1 Timótio 6:10) Txibarene nipara na obure wotene, kujiwa murima na kobiri. Athu ena ajeyilena, arimeliwa nroromelo, avitotela goyi enddimuwa.
g 11/08 6 ddima 4-6
Malago matanu na nimodha animuttukulela muttu ofwanya mperhe
Ninga musunzelihu omaromelo wa mutoma obu, ole wetene onzuzumeletxa dhorela akosaga ninga nipara n’okalawo waye, mohaganyedha onttamagela omuregani. Okalawo n’ekalelo yokala ottamagelavi dhorela, onosegedha; ottiya osegedhavi onomutotela muttuya magudulano menjene. Muttu onzuzumeletxa dhorela, kanakanela mudhidhi akwaye nne amudhaye. Ottiya ejuwenevi—olaba venjene vina ozuzumeletxa dhokalihawo onomukosiha muttu ohiwodha ogona. Kohelét 5:12 onologa wi, “Onfwaseyana dhiniye, onodheliwa nikove, mbwenye onzuzumela owugela dhorela kanwodha ogona.”—Tradução do Novo Mundo da Bíblia Sagrada.
Kobiri namapyagela, enomweddiha muttu zeru-zeru. Yezu Kristu ohiloga “dhoziva dha muhaku dha vimanya dhabure.” (Marko 4:19) Kuloga attu enjene anopeleya malago obuwelaga wi wagalala onda mwari mwa dhorela, mbwenye awene nne kanfiyedha wagalala. Sabwani anodheliwa ekaro ya ofunagavi dhina. ‘Onkwela kobiri, txipo kanziveliwa na egumeliye’ Kohelét 5:10.
Okwela kobiri onomuttukulela muttu osegedheya, okumuwa peno otota ngovi. (Gano 28:20) Dhinimuttukulela muttu wagalala sisi: okana ekalelo ya ovaha, okala namalevelela, ozuzumela merelo ankoddeliha omuttu, okwela, vina ozuzumela wira enfuna Mulugu.
Nipepese Mafumo a Omuyani
(1 Timóteo 4:2) Anere okwekwethiwa na agwarhagwambi, apidiwe nleba n’obure mmurimani mwawa na mujila wowotxa.
Mukalelo Onreeliha Mubuwelo Waderetu
17 Murumiwi Pedru ohileba dhahi: ‘Mukaanevi mubuwelo waderetu.’ (1 Pedro 3:16) Mubuwelo okalile vamentoni va Yehova Mulugu, nthi nreeliho nddimuwa vaddiddi. Kuli ninga mubuwelo wa athu enjene a nsaka na ovanene. Paulo ohaloga abale “apidiwe nleba n’obure mmurimani mwawa na mujila wowotxa.” (1 Timóteo 4:2) Mujila wowotxa onoddumeya maningo, ototavo nimbazi vina nthuha. Enjene ahikaana mubuwelo omalile-wene okwa, wa nimbazi vaddiddi vina ohiniwa opa, mpaka okooddaga olaga, ovaanya obe wiwa opa na manyazo obe muladdu wa elobo yabure ekosiwe. Enjene nsaka na ovanene anopwaza na osanzaya muladdu oniwani.
(1 Timóteo 4:13) Ojyedhaga odha waga, vilevelé wawengeselela atthu Bíbilia, wasunziha, watutela.
it-2 688 ddima 5-6
Wengesa Vattaddo
Mmutugumanoni. Masaka zana oroma, attu ana mapapi a malebo a Bibilia ali ang’onovi, nona wengesa vattaddo wanfuneya vaddiddi. Murumiwi Paulo wahikumbirha wi karta dhaye dhengesiwe mmatugumanoni m’Okristu, vina ohikumbirha wi milogo dhiperhengezelanege makartaya abale, dhawene attu a milogo dhetene agahengeseliwa karta dhalebiye. (Kol 4:16; 1Tes 5:27) Paulo ohimututela muzombwe Timóteo wi avilibihedhe “wawengeselela atthu Bíbilia, wasunziha, [vina] watutela.”—1Tim 4:13.
Wengesa wa vattaddo onofwanyela okosiwa na ttotto. (Aheb 2:2) Vowi wengesa wa vattaddo onkoseliwa wi attu ena apurelemo dhiniwani, anamengesaya anofwanyela ononelamo deretu-ene dhinengesani, agakosa dhawene anela orabela oromola yahafuniye ologa obe masunziho ahafuniye wi anamewaya ewe. Mowiwanana na nivuru na Ovuhulela 1:3, agari babale anengesa mavuhulo aba na lizu nowiweya nabaleya anvuruwana mazuya, avirihamo.