Dhowakula dha Mabasa na Yeddelo Yehu ya Okristu
4-10 YA MARSU
MAFUMO A MAZU A MULUGU | ROMA 12-14
“Mukwelanege N’ekalelo Y’obali”
(Roma 12:10) Mukwelanege n’ekalelo y’obali. Muzuzumelege othithimihana.
(it-1 59-60)
Supaje
Okwelana wobali (Egr., phi·la·del·phiʹa, kuloga “okwelana n’ekalelo y’obali”) okwela oku onofuniwana okala mmirimani mwa abali otene a mmulogoni wa Okristu. (Rom 12:10; Aheb 13:1; koona vina 1Ped 3:8.) Wandana onfwanyela okala mwari mwa mulogo, okale wofiyedhana, woliba, wowarala, dhahene ninga munkalela anamudhi. Enoziweya wi abali a mmulogoni anokwelana, mbwenye awene anofuniwana winjivihavi okwelana oku.—1Tes 4:9, 10.
Mazu Egrego phi·loʹstor·gos, anfuna atapulele ‘okwela venjene’ wa attu andanile vaddiddi ofiyedha ozivelagana muttu na mukwaye. Nipara nina tta mazu aba, sterʹgo, anlogiwetxa wi onihe okwela wobaliwana, wokala ninga attu abaliwe erugulu modhene. Murumiwi Paulo ohakokomeza Akristu wi akane elemelelo eji. (Rom 12:10) Paulo vina ohiloga wi masiku omariha attu “aner’okala awuma murima” (Egr., aʹstor·goi) ovirigana oku onere wattukulela okwa.—2Tim 3:3; Rom 1:31, 32.
(Roma 12:17-19) Onuthegelani, kammwirele yabure yakene. Tamelaní wira dhapama vamentoni va athu otene. 18 Egawodheya, mwandane na athu otene bari munwodhela nyuwo. 19 Amudhaga okweleya, kamwire dha ntxiga, mmuthiyedhe Mulugu ntxiganá, vowi m’Bíbiliani mulebiwe dhahi: “Ntxiga, mwinya ddi miyo; ddi miyo onimvaha muthu enimfwanyelela, onloga ddi Nabuya.”
w09 15/10 8 ddima 3
“Mwandane Na Athu Otene”
3 Kengesa Roma 12:17. Paulo ohitapulela wi onnittegela, kanimwirele yakakene, nawiyihedhe dhapama abale annirela dhabure. Malago aba anolaba vaddiddi ttabwa-ttabwa abale ankala takulu modhavi, nakulu aweneya ali ogaweyena mpaddi wa webedha. Akristu anofwanyela okalela mento merelo awa, anakane yeddelo ya wang’ana dhovonya dha attu na efunelo ya wiyiha n’ekalelo yakakene. Kayiwo yapama enda mwa ‘wiyihedhana obure na obure.’ Merelo ninga aba anttabwiha makaniya bahi.
w07 1/7 24-25 ddima 12-13
“Onuthegelani, Kammwirele Yabure Yakene”
12 Nikokomezo nina na Paulo niniwanana na mweddihedho wa waweddihana abali ehu na amalabo: “Onuthegelani, kammwirele yabure yakene.” Yologa eji ehoniha-wene ebaribariya mwa ejile yabazileyi ologa, yawi: “Thawaní obure”. Kito muttu onttawa dhavi obure, obe yotakala, nakulu mmirimani mwaye muhikala efunelo ya omwihedha obure muttu omuttegele? Abale ankosa dhahene kanttiyaniha esile dhilogiwe dhawi, “okwela wenyu kukalege wosarhapitha.” Omamalelowa Paulo ohiloga: “Tamelaní wira dhapama vamentoni va athu otene.” (Roma 12:9, 17) Niwodhe dhavi wira dhinruma mazu aba?
13 Paulo aromaga-wene walebela karta Akristu akala o Korinto, oromile oromola ofwara-fwariwa wa arumiwi. Iyene Ohiloga: “Vano ddinonamo wi Mulugu onithiya iyo arumiwi mburho womariha ninga athu athongeliwe opiwa; niriwe athu oveyihiwa mwilaboni, vamentoni va anju, vina va athu. . . . Niruwaniwaga, ninowakula na nriho; niddiwaga, ninovilela. Nigabiwaga, ninowakula n’ofwaseya. (1 Korinto 4:9-13) N’ekalelo yakakene, iyo oli Akristu a masaka abano ninowoniwa na attu a elabo ejino. Attu agonaga merelo apama ankosihu masiki mwari mwa opujiwa, anodha orugunutxa murima wawa bafiyedha ottittimiha muselu wehu.—1 Pedro 2:12.
(Roma 12:20, 21) Weyo ogamfwanya mwiddani wawo ovoliwe dala, omvahe yoja; agavoliwa nthona, omvahe yomwa Ogera dhahene, onomutota manyazo mwiddanawo. 21 Muhirumele ojiwa na obure; mupemberhe mobureni mwiraga dhapama.
w12 15/11 29 ddima 13
Mulevelelagane Muttu Na Mukwaye Muhikanelagana Ntxiga
13 Onokalawo mudhidhi ononiwe wi enofwanyela omukamihedha muttu owirele yabure wi avahe nttittimiho magano Okristu. Murumiwi Paulo ohileba: “Weyo ogamfwanya mwiddani wawo ovoliwe dala, omvahe yoja; agavoliwa nthona, omvahe yomwa Ogera dhahene, onomutota manyazo mwiddanawo. Muhirumele ojiwa na obure; mupemberhe mobureni mwiraga dhapama.” (Rom. 12:20, 21) Ofwaseya wawo mwari mwa oligiwa onodha okumula owali, masiki okalaga onddimuwene; venevo attu anela owodha osaddulela yeddelo yawa. Okurumuwa, ovilela—na supajeya—enkaneliwa muttu oddawile, enomukosiha okana efunelo ya osunza ebaribari ya mazu a Bibilia. Merelo okurumuwelana anowakosiha avazi osaddulela mweddelo wawa; masiki muladduya okale wekalelo yottiyana-ttiyana.—1 Ped. 2:12; 3:16.
Nipepese Mafumo a Omuyani
(Roma 12:1) Amudhaga, ddinoukokomezani na nthebwa na Mulugu wi muviperhekele iyene, mukale mukutho wamento, wokoddela, onimuzivela. Ekalelo yomwebedhana Mulugu vofwanyelela, jijiwene bahi.
lv-64 ddima 5-6
Nisakule Dhavi Mavego Ehu
5 Elobo jilobo enkosiwe mwigumini enowiwanana na omwebedha wawo Yehova. Mu kartani yalebeliye akudda Roma, Paulo wahilabihedha nzu na ntapulelo vaddiddi wila apamele ebaribari eji mwa eweleli akwaye. Wahakokomeza dhahi: “Muviperhekele iyene, mukale mukutho wamento, wokoddela, onimuzivela. Ekalelo yomwebedhana Mulugu vofwanyelela, jijiwene bahi.” (Roma 12:1) Maningo awo anotaganyiheya na musorho wawo, murima wawo vina guru dhawo. Dhotene esi onolabihedha ogamulabaga Mulugu. (Marko 12:30) Paulo onologa mabasa aba ankosiwa na egumi yotene ninga mukutho. Nzu nthi “mukutho” nihikaana nlago nili mwarimwa. Mutxiddo mwa Nlamulo na Mizé, Mulugu karumeela mukutho woddanarhi. (Onamakutha 22:18-20) Na mukalelo wakakene, akala mukutho womuyani wa Mukristu bovirigana, Mulugu onokoodda. Ejene empadduwa dhavi?
6 Paulo wahalaga Akristu o Roma: “Maningo enyu keddihiwege vina na yothega.” Paulo vina wahapanga ‘opa mabasa a maningo.’ (Roma 6:12-14; 8:13) Mundduni mwa karta eji, wahiperheka dhotagiha dha ‘mabasa a maningo.’ Mwaha wa nlogo na athu nothega ninowengesa dhahi: “Mulomo wawa onloga dholava, dhowawa.” “Myeddo dhawa dhinoluluvela othamagela wapa athu.” “Kanna murima womova Mulugu,” obe ‘yomova Mulugu kinonea vamentoni vawa.’ (Roma 3:13-18, Nipagano Nipya) Mukristu anotakaliha maningo aye agalabihedhaga ‘vyano,’ dhaye na merelo aba oothega. Motagiha, nsaka na ovanene akala Mukristu onowoona na pudha dhilobo dhonyakuwa ninga athu bali yovi obe onowañgana athu bagapiwa na otabala, iyene ‘onoperhekela mento aye yothega’ venevo batakaliha maningo aye otene. Webedha wotene onkosiye onkala mukutho ohili viina wokoddela, Mulugu kanrumeela. (Olibiha 15:21; 1 Pedru 1:14-16; 2 Pedru 3:11) Onoputhuleya vaddiddi sabwa ya ovega na dhabure!
(Roma 13:1) Muthu-muthu àkurumuwele abale athomeliwe othonga elabo, vowi anamathonga etene, vina abale aliwo ddabuno, wathomile ddi Mulugu.
w08 15/6 31 ddima 4
Otapuleliwa wa Nivuru na Roma
13:1—Enlogeliwani wi “anamathonga otene wathomile ddi Mulugu”? Alamuleli a elabo “wathomile ddi Mulugu” sabwani awene anlamulela na orumelihiwa waye, vina masaka a wale Mulugu wanattoma alamuleli. Ebaribari ya eji enoneya venevo vavuhulele Bibilia okalawo wa makuru menjene a alamuleli.
11-17 YA MARSU
MAFUMO A MAZU A MULUGU | ROMA 15-16
“Nikuluvele Olibihiwa vina Opangarhaziwa na Yehova”
(Roma 15:4) Dhetene dhilebiwe wale m’Bíbiliani, dhilebeliwé onisunziha, olibiha nroromelo nehu na guru, na ntidi, dhindhamo.
“Onlaní na Abale Anunla”
11 Muselu onloga okubanya wakubanyile Yezu sabwa ya okwa wa Lázaro, epaddi ya malebo ennipangarhaza vaddiddi eli Mmazuni a Mulugu. Muselu obo kayo rurumutxa sabwa “dhetene dhilebiwe m’Bíbiliani, dhilebeliwé onisunziha, olibiha nroromelo nehu na guru, na ntidi, dhindhamo.” (Roma. 15:4) Akala weyo onokubanya podi ofwanya nipangarhazo mmaleboni ninga aba:
▪ “Nabuya onoawaddamela ansuveya murima, onowalibiha anojeya.”—Masalmo 34:18, 19.
▪ “Vanthabwa miyo odhugudheya, opangaraza wenyu oddiridhiha murima”—Masalmo 94:19.
▪ “Nabuyehu Yezu Kristu okala waye, Mulugu Babihu, onikwele na nthebwa naye, onivahile nipangarhazo nindhowavi na ororomela onddimuwa, alibihe mirima dhenyu, awakwanihedheni wira, ologa dhetedhene dhili dhapama.”—2 Tesalónika 2:16, 17.
(Roma 15:5) Mulugu, oli guru, opangarhaza, auvahene gari y’oweddana murima mmodhene, mfwaraga yirile Yezu Kristu.
w16.04 14 ddima 5
“Ttiyani Wi Ovilela Wakwanihe Mabasaya”
5 Mmususele Yehova wi owaraliheni. Yehova ddi ‘Mulugu, oli guru, ompangarhaza.’ (Rom. 15:5) Ewodhelo ena Mulugu kahiye yononelamovi makattamiho annifwanya, iyene vina onononelamo dhinnijombela, dhinnivuluvyiha, iyene vina ohikana ewodhelo ya wona dha mmaningoni mwehu dhetene. Ona ewodhelo yoniwaraliha ddi Yehova bahi. “Onowira dhinunlela abale animuriha,” Bibilia onologa vina wi iyene “onovuruwana kutho dhawa, onoavuna.” (Masal. 145:19) Mulugu onakula dhavi malobelo ehu, wi awaralihe guru dhehu?
(Roma 15:13) Mulugu onvaha nroromelo, audhaliheni othaba, murenddele, nyuwo munimuroromela; onuwihe nroromelo nenyu na guru dha muya wokoddela.
w14 15/6 14 ddima 11
“Omukwele [Yehova] Mulugu Wawo”
11 Yehova ‘ononivaha njedhelo ninnidhaliha wagalala na ottugareya.’ (Rom. 15:13) Nipikirelo na Mulugu ninonivaha ewodhelo ya owadelelavi nroromelo nehu, masiki mwari mwa wehiwa. Attikitteliwi ‘ankala aweddeyanavi, masiki nena nokwa, anela ottuveliwa egumi yohimala wirimu.’ (Ovuh. 2:10) Aliba wiwananeyana a velaboni ya vati anela wakela maruriho apikireliwani a okala mparaizo. (Luka 23:43) Veneva ninlogavo nni, nigobuwela dhopikireliwa esi dhotene dhihinavonye? Kanintepuweliwa wagalala na murenddeleya nigonaga okwela wa Namavaha wehu odduwene onnivaha “dhapama dhetene na mivaho dhetene dhawakwana”?—Tia. 1:17.
Nipepese Mafumo a Omuyani
(Roma 15:27) Txibarene yanfwanyela wira dhahene: ayuda aavaha amalabo dhorela dha muya; ddabuno amalaboyá anowaperhekela mivaho dhowakamiyedhana musegedheyani mwawa.
w89 1/12 24 ddima 3
“Wehiwa wa Okwela Wawo W’ebaribari”
Enowoneya-wene wi Akristu abudduwa mwari mwa malogo ahikana mwaha wa osumulela sabwa ya dhorutxa dhottiyana-ttiyana dhafwanyiwani. Mwa dhotedhene eso, enkala ninga awene ahikana “mangawu” na Akristu akala o Jeruzalemi. Kawali o Jeruzalemi ovuwihedhiwe Amalabo miselu dhapama? Mazu a Paulo anonubutxa dhahi: “Ayuda aavaha amalabo dhorela dha muya; ddabuno amalaboyá anowaperhekela mivaho dhowakamiyedhana musegedheyani mwawa.”—Roma 15:27, Malebo Okoddela.
(Roma 16:25) Nimuthithimihe Mulugu! Iyene onowodha olibiha nroromelo nenyu, mfwaraga Muthaka Wapama wa Yezu Kristu, oulaleyileni miyo. Na Muthakayá iyene onowoniha dhatandileye, dhavubeyile mmurimani mwaye malabo na malabo-wene.
it-3 320 ddima 2
Oziwa dha Musogorho, Otadeliwa dha Musogorho
Mesiya obe Kristu, wali Beu yapikireliwe odduwene ogakosihile wi anamudhi otene a velaboni ya vati arurihiwe na nzina naye. (Gal 3:8, 14) Oromoliwa woroma wa “beu” eji ologiwe mmalele witeya osaringele wa mu Edeni, Abeli ahinatti obaliwa. (Wita 3:15) Eji epadduwile vyaka 4.000 “dhitadeliwe na Mulugu moviteyani” dhihinatti ofurumuliwa, dhotadeliwa esi dhahikana ezinddiyelo yawakwana ya odha wa “beu” yottikitteliwa. Mbwenye esidha dhali dhoviteya “dhavubeyile malabo na malabo-wene.”—Rom 16:25-27; Ef 1:8-10; 3:4-11.
18-24 YA MARSU
MAFUMO A MAZU A MULUGU | 1 KORINTO 1-3
“Weyo Oneddihiwa na Muya wa Mulugu obe Muya W’elabo?”
(1 Korinto 2:14) Muthu ohimwakelile muya wa Mulugu, kanwodha ononelamo dhebaribari dhinziwa muya wa Mulugu: onona ninga dhotaduwa, kannonelamo, vowi esidhá dhinpimiwa na muya bahi.
Txini Entapulela Okala Muttu ona Monelo Womuyani?
4 Muttu ona monelo womaningoni onubuwela dhavi? Muttu ona monelo womaningoni onorava dhokosa dhamwilaboni, dhintaganyiheya na omukumbela vaye. Paulo onotapulela mukalelo obu ninga “muya wabure onalabiha athu animusadduwela Mulugu napanovi.” (Éfeso 2:2) Mukalelo obu onowattukulela attu enji—wasaza abale anarija. Awene ankosa dhinubuwelani okala dhaderetu, kantanalela magano a Mulugu. Muttu womaningoni obe muttu ona monelo omaningoni onubuwela dhilobo dhomaningonivi, masaka menji onubuwela wi ettomo ena iyene, kobiri yaye, dhilobo dhamakamaka opitta dhilobo dhina.
5 Muttu ohina moonelo womuyani onokosa esile dhinloga Bibilia wi “dhinthopa maningo.” (Galásia. 5:19-21) Karta yoroma ya murumiwi Paulo yalebeliye abali o Korinto ohilebamo dhilobo dhinkosa muttu ona monelo womaningoni. Awene anokosa nsakulano na makuru-makuru, anowaraviha attu bakala asadduweli, anorumeela ottonga makani mmuttegoni, kana nriho na onddimuwa, vina asogorheli awa anowika oja na omwa vamburoni woroma. Muttu ona mubuwelo womaningoni kanwodha oliba agafwanyiwa yoweha wi akose eli yabure. (Gano. 7:21, 22) Juda wahileba wi attu ana elemelelo ya wunlela dha maningo anoyelela muya wa Yehova—Juda 18, 19.
(1 Korinto 2:15, 16) Vano ole omwakelile muya, onowodha othonga dhetene; iyene, kawo onwodha omuthonga. 16 “Pumwenemo: bani oziwile dhinubuwela Nabuya, wi awodhe omvaha malago?” Apo iyo nineddihiwana na zelu ya Kristu.
Txini Entapulela Okala Muttu ona Monelo Womuyani?
6 Mottiyana na muttu ona monelo womaningoni, muttu ona monelo omuyani onozuzumumela mandano aye na Mulugu. Iyene onottiya weddihiwa na muya wa Mulugu, vina onotamela ottukula meddelo a Yehova. (Éfeso 5:1) Onovilibihedha osunza mukalelo onubuwela Yehova vina onowona dhilobo ninga munoonela Yehova. Iyene onoziwa-wene wi Mulugu ohikalawo. Mottiyana na muttu wa monelo womaningoni, muttu ona yubuwelo yomuyani onowiwelela malamulo a Yehova vina onottiya wi eddihe egumi yaye. (Masalmo 119:33; 143:10) Onorabela “dhinthopa maningo” onovilibihedha okana “dhinbala muya.” (Galásia 5:22, 23) Wi ononelemo mowakwana-mwene sabwa ya muttu wa yubuwelo yomuyani, koona nladdaniho ntti: Muttu onziwa okosa marhondda, onkuweliwa munyamarhondda, n’ekalelo yakakene muttu onzuzumela omulabela Mulugu enologiwa wi muttu ona yubuwelo-yomuyani.
Txini Entapulela Okala Muttu ona Monelo Womuyani?
15 Niwodhe dhavi omutagiha Kristu? 1 Korinto ononitapulela wi ninofanyela okaana “zelu ya Kristu.” Roma 15:5 ononubutxa wi jofwanyela ‘weddana murima mmodhene nifwaraga yirile Kristu.’ Wila nikale ninga Kristu enofuneya osunza dhikosiliye. Yezu wanzuzumela wandana waye na Yehova opitta elobo yina. Omusaza Yezu ononikamihedha okala ninga Yehova. Noona jamakamaka osunza wubuwela ninga mobuwelela Yezu.
Nipepese Mafumo a Omuyani
(1 Korinto 1:20) Apa aziwetxi, anamasunziha, athu annona opimelela dha mwilaboni, aloge nni? Mulugu omala woniha wi onona wa vati, otaduwa.
it-3 480 ddima 1
Ononelamo
Ononelamo wa mw’ilaboni ohattukulela attuyamo oruna mvaho wa Mulugu olí Kristu, onaga ninga otaduwa; masiki alamuleli awa akalevi asogorheli a ttontto, ahifiyedha “omukomela [vapingirhizini] Nabuya mwene wovuwa.” (1Kor 1:18; 2:7, 8) Nona Mulugu oniha wi ononelamo wa mwilaboni otaduwa, mwa wavaha mabasa attu “awobana” adhile wagurumeliha vina watota manyazo aziwitxi; attu abo oniwa ninga ahana ttima, attu otanyiwa na malogo, mbwenye ahittidda mabasa Aye a ttima enddimuwa vaddiddi. (1Kor 1:19-28) Paulo wahawubutxedha Akristu o Korinto wi ‘onona wavati, na wa anamawodhaya a elabo’ ogahigomihiwa-mugomihedho; onona oku kuwali okule wa muselu wa arumiwi. (1Kor 2:6, 13) Iyene wahatutela Akristu o Kolosi wi arabele okorokiwa na masunziho ‘a filozofiya’ [phi·lo·so·phiʹas, kuloga, ojiwa murima na ononelamo wa attu] vina na masunzihoya a maveya abuwene antaganyihiwa na yeddelo ya attu.’—Kol 2:8; kang’ananiha na versu 20-23.
(1 Korinto 2:3-5) Ddifiya valinyu n’ekalelo ya muthu wawobana, wawova, wogurumela. 4 Ddilogaga na nyuwo: ddulaleyelagani muthaka, kaddithukulile mazu opyaga a aziwetxi; ddilaleyilé na guru dha muya, onwodha otomola murima. 5 Dhahene orumela wenyu kutibeleyile na onona wa athu, otibeliwe na guru dha Mulugu.
w08 15/7 27 ddima 6
Otapuleliwa wa Nivuru na Korinto
2:3-5. Enkala ninga Paulo bali o Korinto wanroma otanalela yafwanyeliye ologa na anamewa aye, sabwani elabo ejile yali mburo wa niparha na masunziho a filosofiya wa Agrego. Iyene kobanile nne vina kovile okosa mabasa avahiwiye na Mulugu. Na mukalelo wakakene iyo kanittiye wi dhopadduwa dha mwilaboni dhinovihe okosa mabasa a olaleya miselu dhapama. Nikane nikuluvelo nawi Yehova onela onikamihedha dhahene ninga mwamukamihedhiye Paulo.
25-31 YA MARSU
MAFUMO A MAZU A MULUGU | 1 KORINTO 4-6
“Emela Eng’onovi Enodhakuwiha Mugoddo Wotene”
(1 Korinto 5:1, 2) Mwetemwene muvuwa obure opadduwile vari venyu, obure wothabwa ohinereyaga nne mwa athu—ahinroromela. Okalawo mmodha wenyu, omuthukulile mwadhi babe, okala mwadhye. 2 Esidhá dhipadduwilevi, nyuwo munovithukulela, oku mfwanyelaga okubanya, omuthamagihamo oddo wirile dhabure eso.
(1 Korinto 5:4-8) Vanagumane nyuwo na nzina na Yezu Kristu Nabuyehu, miyo vina murima waga onakale wenewo. Nyuwo n’owodha wa Nabuyehu Yezu Kristu mmusugule oddoyá, akale wa satana, wi one goyi vatapano; siku nindha Nabuya, avuneye. 6 Nyuwo kamunna elo-wene y’ogayela! Kamunziwa wi emela eñgonovi enodhakuwiha mugoddo wotene? 7 Rayilani emela yawale enuvuddihani, mukale mukathe wubiwe na mugoddo muswa, ohinna emela, onjiwa va Paskwani. Txibarene Kristu oli Paskwa wehu, omala okuthiwa. 8 Nona kanije mathanga na mikathe dhinna emela yawale, eli yothega na dhabure dhotene; nijege na mikathe dhotowa emela, dhili murima wokoddela, webaribari.
(1 Korinto5:13) Nyuwo munofwanyela wasumulula abale ali mmutugumanoni. Nona ‘mmwigare mvuti mmutugumanoni mwenyu’
it-2 116
Emela
Murumiwi Paulo wahiloga nladdaniho nakakene mudhidhi walogiyena Akristu a mulogo w’o Korinto, eraga wi mulobwana wana mweddelo wonyakuwa aburutxiwemo mmulogoni, iyene ohivuza dhahi: “Nyuwo kamunziwa wi emela eñgonovi enodhakuwiha mugoddo wotene? Rayilani emela yawale enuvuddihani, mukale mukathe wubiwe na mugoddo muswa, ohina emela, onjiwa va Paskwani. Txibarene Kristu oli paskwa wehu ohimala okuthiwa.” Omamalelowa iyene ohinonihedha enladdana na “emela”: “Nona kanije mathanga na mikathe dhinna emela yawale, eli yothega na dhabure; nijege na mikathe dhotowa emela, dhili murima wokoddela, webaribari. (1Kor 5:6-8) Apa Paulo waloga nladdaniho na mattanga aja Ayuda a Mikatte Dhahakana Emela afwarelana na mattanga a Paskwa. Dhahene ninga emela eng’onovi endhakuwiha mugoddo wotene onubiwana mukatte, Mulogo onliganihiwa na maningo, ogahidha onyakuwa vamentoni va Yehova kowiliwa mulobwana oddule wana yeddelo yosumuleleya kavenyihiwemo mmulogonimwa. Awene anfuniwana omaguvela oburutxamo “emela” yali vari vawa, dhahene ninga yapadduwa na ana Izrayeli ya ohirumeliwa okalana emela vatakulu vawa mudhidhi wa mattanga a Paskwa.
it-3 544-545
Satana
Omperekela muttu ‘Satana wi mwili waye otolotxiwe’ kuloga nni?
Murumiwi Paulo wahalebela akristu a mulogo w’o Korinto, avahaga malago a omaguvela omuttamagihamo mmulogonimwa mulobwana wana murima wawuma, wirile yotakala ya ogona na mwadhi babe; Paulo ohileba: ‘Mmusugule oddoyá, akale wa Satana wi mwili waye otolotxiwe.’ (1Kor 5:5) Yologa eji ya osuguliwa mmulogoni, yali nlamulo, vowi awene anfwanyela-wene omuttamagihamo. (1Kor 5:13) Omperekela Satana, ogahimusukumiha mmulogoni, avolowaga mwilaboni mwa Satanaya oli mulugu vina mulamuleli wa elabo. Moligana na “emela eñgonovi” ‘endhakuwiha mugodo’ wa mukatte, mwili wa mulobwana oddu obe vidhivi-dhivi dha maningo aye dhantakaliha mulogo; oburutxiwamo mmulogoni, yaligana na otolotxa “mwili” vari vawa. (1Kor 5:6, 7) Nona Paulo aperhekela mmadani mwa Satana Himenewo na Alexandre, sabwani awene ankwekwetta mirima dha abali vina anrimeliha nroromelo nawa.—1Tim 1:20.
(1 Korinto 5:9-11) Mu kartani yina yulebeleni miyo, ddiwaddelani wi muheddege-wene na athu anjiwa murima na dhoraruwa. 10 Na mazu aga aba kaddafuna watonya etene a mwilaboni anjeberuwa, anna nrima, ambava, anebedha dhebewene; kokala dhawene, egafuneya nyuwo omwala mwilaboni. 11 Yafunemi ologa jowi muheddege na abali aní: nili akristu, oku bali ajeberuwi, aliba nrima, anamebedha dhebewene, anamaba, anamalezela, ambava. N’athu aba, kamuje vamodha.
lvs 241, Yowenjedha
Oburutxiwa Mmulogoni
Muttu agera yottega yottabwa, akodda otxinuwa, vina akoddaga ovirihamo magano a Yehova, kakale vina wa nikuru na Mulogo. Aburutxiwemo mmulogoni. Muttu omburutxiwa mmulogoni, iyo kaninlogana nne kanineddana vina. (1 Korinto 5:11; 2 Joau 9-11) Omburutxa muttu mmulogoni enobarela nzina na Yehova vina na mulogoya. (1 Korinto 5:6) Oburutxiwa mmulogoni merelo anamukamihedhe muttegiya otxinuwa bafiyedha omwiyelela Yehova dila yanawili.—Luka 15:17.
Kapitulu 3, ddima 19
Nipepese Mafumo a Omuyani
(1 Korinto 4:9) Vano ddinonamo wi Mulugu onitthiya iyo arumiwi mburo womariha, ninga athu athongeliwe opiwa; niriwé athu oveyihiwa mwilaboni, vamentoni va anju, vina athu.
w09 15/5 24 ddima 16
Anju—“Muya Dhinlaba Mabasa a Vattaddo”
16 Akristu anfwara-fwariwa, ali ninga ‘visangu-sangu vamentoni va anju.’ (1 Kor. 4:9) Anju aganona na merelo oliba murima vina nikalagavi munroromeloni, awene anohagalala vaddiddi; ottaba kunamalela agamona muttegi otxinuwile. (Luka 15:10) Yeddelo yoriheya ya ayana Akristu enowoniwa na anju. Bibilia ohiloga wi ‘nona, na esene-esi vina mwaha wa wariha anju muyana eke omusorho ezinddiyelo y’omukurumuwelana mamune.’ (1 Kor. 11:3, 10) Ndde, anju anottabela wawona ayana Akristu vina na alabeliya otene a Mulugu akosaga mabasa a Namadhulu-dhulu na nriho. Wiwelela oku onoligana na okule wa ana Mulugu a wirimu.
(1 Korinto 6:3) Kamunziwa wi iyo ninere wathonga anju? Ki dhavati apano dhinanirutxe dhavi?
it-2 674
Malamulo
Malamulo Avahiwe Anju. Ttima ya anju enopitta ya attu, mbwenye awene anowiwelela malamulo a Mulugu. (Aheb 1:7, 14; Masal 104:4) Yehova ohifiyedha omulamulela Satana oli mwiddani waye vina ohimukoddiha okosa dhilobo dhafuniye. (Job 1:12; 2:6) Arkanju Mikayel, ohikokorela vina ohittittimiha olamulela wa Yehova vowi onoziwa wi iyene Namattonga Munddimuwa; dhawireya esi dhoneyile venevo vakulanani na saringele Satana, Migeli ohigwadda dhahi: “Nabuya aukone!” (Juda 9; kang’ananiha na Zak 3:2.) Yehova ohinvaha muttittimihiwi Yezu Kristu onddimuwa wa wattonga anju otene. (Aheb 1:6; 1Ped 3:22; Mt 13:41; 25:31; Fil 2:9-11) Nona na olamula wa Yezu, Joau wahiperhengezeliwa mwanamukatti. (Ovuh 1:1) Karta ya 1 Korinto 6:3 murumiwi Paulo ohawaddela abali a Kristu wi anela ottomeliwa wattonga anju, enoneya ninga Paulo waloga mabasa anakamihedhani a otolotxa muya dhabure.