‘Miyo Ddinere Wedda Mwibaribarini Mwenyu’

1-3. (a) Iyo ninoona dhavi ebaribari ya mBibiliani? Kavaha yotagiha. (Koona foto eli omaromo.) (b) Ninasekeserhe nni mwari mwa mutoma obu?

MASAKA abano, attu enjene anogula elobo-elobovi agona wi kiyakalele, anowiyiha ogulani. Attu enjene agagula elobo-txilobo mwinternetini mohigonela-mwene anowiyiha. Anowiyiha sabwani eloboya kiyazivele obe ehinyongeya. Noona, namagulaya onokubirha wila attukule yina ekale obe onttukula kobiraye.

² Iyo txipo kaninjedhela okosa ejene na ebaribari ya mBibiliani. Nigaroma osunza ebaribari ya mBibiliani, kaninjedhela ‘oguliha’ obe ottiya. (Kengesa Gano 23:23; 1 Timóteo 2:4) Mutoma obule osunzilehu sumana evirile, kuloga nivedile mudhidhi wa osunza ebaribari. Ninga motagiha, nihittiya dhilobo dhaja mudhidhi wehu. Masunzo manddimuwa aganiranjulihile kobiri. Iyo vina nanfuna osaddulela wandana wehu na abale eddihuna, osaddulela mweddelo wehu na mereloya, obe otxelela elemelelo yehu na dhokosadha dhahamuzivela Yehova. Nigobuwela, ninoziwa wi kavali elo eyelelihu mwaha wonyanya esidha, opitta maruriho ankanihu mwaha wa oziwa ebaribari.

³ Yezu ohiloga musibo wa muliba marhondda wa myarha dha ttima. Mulobwana ole mufwanyeliye myarha dha ttima ohidhowa oguliha dhaye dhotene, mmaleliye wiyela wila agule myaradha. Myarha esi dha ttima dhinoladdanihiwa na ebaribari ya Omwene wa Mulugu. Yezu wahitonyihedha wila ebaribari eji jattima, noona attu enjene anokosa guru wila akane. (Mateu 13:45, 46) Musunzelihu ebaribari, kuloga ebaribari ya Omwene wa Mulugu vamodha na mafumoya otene a mBibiliani, nihileva dhotedhene wi nipurhanye ebaribari eji. Enanikosihe ohittiya ebaribari eji, ku odhowavi banigattittimiha. Mokubanyeya-mwene attu amulabela Yehova wale ahifiyedha ottiya omulabelawa. Iyo kaninfuna okosa ejuwene! Noona, ninofwanyela ofwara malago a mBibiliani vina ‘neddaga mwibaribarini.’ (Kengesa 3 Joau 2-4.) Eji entapulela wila nike vamburoni voroma ebaribari vina nivirihegemo mwigumini mwehu. Attu ‘anguliha’ ebaribari na mukalelo gani? Nikose nni wila nihigulihe-wene? Ninavilibihedhe dhavi ‘weddaga na ebaribari eji’?

ATTU ANFIYEDHA DHAVI ‘ONGULIHA’ EBARIBARI?

4. Attu ena a masaka a mundduni attiyile dhavi weddana ebaribari?

⁴ Nsaka na Yezu, attu ena asunza ebaribari anfiyedha ottiya weddanawa. Motagiha, mukosele Yezu nttikiniho na ojiha muttitti, enjene ahinfwara mpaka nikome na Mwinje wa Galileya. Mbwenye Yezu wahiloga elobo yatikinihile: “Mugakodda oja maningo a Mwana-Muthu, omwa nikami naye, kamunafwanye egumi yamukala-kala.” Ottiya omukumbirha wila atapulelemo elogiliye awene ahiloga: “Mazu aba athabwa orutxa! Onwodha wiwelelamo bani?” Txini epadduwile, “anamasunza aye enjene ahiyelela mundduni, kamfwarile vina.”​—Joau 6:53-66.

5, 6. (a) Attu ena masaka abano anttiya dhavi ebaribari? (b) Ebaribari enimurimela dhavi muttu?

⁵ Mokubanyiha-mwene, akalawo attu ena anttiya wedda mwibaribarini. Anttiyedha nni? Txino awene kanrumela matapulelo meena a malebo ali mBibiliani, dila dhina txino anonyimuwa obuwelaga wi mbali onsogorhela, dhinlogeye kadhinnoneyelamo. Anosilidhiwa vina agalagiwaga na malago a mBibiliani obe akala kaniwanana na muttu mmulogoni. Ena ansakula okala mpaddi wa asadduweli na attu ena annidda ebaribari. Noona anofiyedha obudduwa mmulogoni. (Ahebreu 3:12-14) Mbwenye kowiliwa awene amukuluvele Yezu egali yoriheya vaddiddi; egakosilani egaligana na ejile okosile Pedro! Yezu wahavuza akala anfuna odhowa vina. Pedro mohigonela owakula: “Nabuya, ninaye wa ani? Onna mazu andhana egumi yohimala, ddi nyuwo bahi.”​—Joau 6:67-69.

⁶ Akalawo ena anttiya ebaribari vang’ono-vang’no s’oziwa empadduwa. Attu anttiya ebaribari s’oziwa ankala ninga paporo onttukuliwa na neebe. Ottukuliwa oku Bibilia onkuwela ‘opupuruwa.’ (Ahebreu 2:1) Nigamona muttu ompupuruwa kahiyo wila onofuna opupuruwawa. Makaniya bawi muttuya onottiya omarho waye na Yehova oridha, na mudhidhi omarho oku onomurimela. Txini enakose iyo wila eji enanipadduwele?

TXINI ENANIKULUVELIHE WI KANINAGULIYE-WENE EBARIBARI ENIHU?

7. Txini enanikamihedhe ohiguliha ebaribari?

⁷ Wedda mwibaribarini entapulela wiwelela dhetene dhinloga Yehova. Ebaribari enofwanyela okala vamburoni voroma mwigumini mwehu vina ninofwanyela ofwara malago a mBibiliani mwa dhotedhene dhinkosihu. Mwene David wahimulobelela Yehova alogaga: ‘Ddinere wedda mwibaribarini mwenyu.’ (Masalmo 86:11) Nigona, iyene kalogile wila ddigawodha ddinele wedda mwibaribarini mwenyu, iyene wanfuna-wene wanddana na Yehova noona iyo vina nikose yakene. Nigahikane yimelelo yaderetu ninele wiyelela dhilobo esile dhattiyilehu muromilehu osunza ebaribari. Nona kanisakule yofwara. Ninofwanyela weddagana ‘ebaribari yotene.’ (Joau 16:13) Mutoma ovirile iyo nihisunza dhilobo tanu dhittiyile iyo wila nisunze ebaribari. Ovano ninfuna none wila kaninfwanyela wiyelela dhilobo esile dhittiyilehu.​—Mateu 6:19.

8. Enwodheya dhavi Mukristu opupuruwa agahilabihedhe deretu mudhidhi waye? Kavaha yotagiha.

⁸ Mudhidhi. Wila nihirimeliwe ebaribari enofwanyela olabihedha deretu mudhidhi wehu. Nigahikale pasope ninele onyonga mudhidhi mwinjene na mavego, woona televizau na interneti. Dhilobo esi masiki dhihikaletxe dhabure, makaniya bawi nigahikalele mento, kaninakanege mudhidhi wokosa mabasa a Yehova. Ndowe none empadduwele mwanamuyana dhahi onkuweliwa Emma.a (Koona yowenjedhedha.) Ovenyana wuhimani iyene wanziveliwa kavalo, waneddana mudhidhi mwinjene kavaloya. Mbwenye iyene wahifiyedha ononelamo wila weddana kavalo wanja mudhidhi waye, nona bobuwela wila enofwanyela okosa matxinjo. Emma wahisunza yotagiha ya murogorha dhahi onkuweliwa Cory Wells weddana kavalo vina.b (Koona yowenjedhedha.) Ovano Emma onolabihedha mudhidhi waye amulabelaga Yehova na amudhaye vina akwaye ali Anamoona. Wandana waye na Yehova ovadda, iyene ddowagalala sabwani onolabihedha deretu mudhidhi waye.

9. Empadduwa dhavi muttu wiyelela okwela dh’elabo?

⁹ Dhofuma dh’elabo. Akala ninofuna wedda mwibaribarini ninofwanyela wika dhilobo dhomaningoni vamburoni vomariha. Iyo ninoziwa wi omulabela Yehova elobo yamakamaka mwigumini mwehu, vina nihittiya dhilobo gwé wi nedde mwibaribarini. Mbwenye na mudhidhiya ninowawonaga attu bagagula mutxitto wa kobiri yinjene na dhofumihadha dhina gwé. Nigawonagana akwihu n’esene ninda wubuwela wi ninoyelela, venevo oroma otowiwa murenddele, omamalelowa oroma ozuzumelaga dh’elabo ottiya ozuzumela omulabela wehu Yehova. Eji ehimpadduwela Demas. Iyene ‘wankwela dhamwilaboni’ nona battiya mabasa akosiye na murumiwi Paulo. (2 Timóteo 4:10) Enkala ninga Demas wakweletxa dh’elabo ottiya omukwela Yehova. Obe wanasilila akwaye arelaga, iyene alabaga na Paulo. Txini ensunza iyo na ekosile Demas? Kaninfuna wiyelela okwela dhilobo dhomaningoni. Nigahikale pasope ninoroma okwela dhilobo dha mwilaboni ofiyedha orimeliwa okwela ebaribari.

10. Txini enfwanyelela iyo okalela pasope?

¹⁰ Wedda na amudhihu vamodha na amarhoya. Wila neddegevi mw’ibaribarini, kanittiye wila attu ahinimulabela Yehova anipupurutxe. Vasunzilehu ebaribari, wandana wehu na attu a vamuralani vehu vina akwehu ohitxinja. Attu ena anoriha dhinroromela iyo ena anopwaza. (1 Pedro 4:4) Txibarene iyo ninofuna waremeza attu a vamuralani vehu. Mbwenye ninofwanyela okalela pasope ninadhe okosa enimusilidha Yehova n’efunelo ya waziveliha awene. Ninofwanyela wubuwela enfanyeya va 1 Korinto 15:33, akwihu anofwanyela okala abale animulabela Yehova.

11. Txini enanikamihedhe orabela mubuwelo na merelo onyakuwa?

¹¹ Mubuwelo na merelo onyakuwa. Attu etene anedda mwibaribarini anofwanyela okala okoddela vina otxena vamentoni va Yehova. (Izaiya 35:8; kengesa 1 Pedro 1:14-16.) Notene musunzilehu ebaribari nihikosa matxinjo mwigumini wila nifware magano a mBibiliani. Mwa ena ehifuneya okosa matxinjo manddimuwa. Noona ninofwanyela okala txenjewa wila ninattiye egumi yokoddela ena iyo wi nittukule egumi yonyakuwa. Txini enanikamihedhe ohikosa obe ohiwona dhilobo dhonyakuwa? Kobuwela muttengo opitxile Yehova wila nikale okoddela. Iyene ohinivaha egumi ya mwanaye, Yezu Kristu! (1 Pedro 1:18, 19) Eji ehinikamihedha okala okoddela vamentoni va Yehova vina nirihaga guru dhaye.

12, 13. (a) Ekaleleni yaderetu oroma wubuwela mwaha ohinziveliwa Yehova yeddelo-yeddelovi? (b) Txini enasekeserhe iyo?

¹² Yeddelo na merelo animusilidha Mulugu. Enda opadduwa anamudhi awo, attu anlaba na weyo, na amarhoya awo, wukokela ofwara yeddelo obe merelo animusilidha Mulugu. Txini enanikamihedhe ohirumela ofwara yeddelo na merelo animusilidha Yehova? Ninofwanyela wubuwelaga mwahaya ohinziveliwa Yehova dhilemelelo esi. Egawodheya nipepese manivuru anloga mwaha wa dhilemelelodha. Nigatanaalelaga Malebo anloga mwaha onkoddihedha Yehova dhilobo esi, ninele okana ebaribari wila ‘ninotamela enimuzivela Nabuya.’ (Éfeso 5:10) Akala ninomuroromela-wene Yehova kaninawove attu.​—Gano 29:25.

¹³ Neddegevi mwibaribarini. Txini enanikamihedhe odhowavi banigedda mwibaribarini? Ninfuna none dhilobo ttaru.

OGANE WEDDA MWEBARIBARINI

14. (a) Odhowavi banigamusunza Bibilia onanikamihedhe dhavi ohittiya ebaribari? (b) Iyo ninfunelani okana ononelamo, malago na zelu?

¹⁴ Yoroma, odhowegevi bugamusunza Bibilia vina ovirihegemo dhinsunza weyo. Osakule labo na mudhidhiya wila osunzege. Ogakana elemelelo yosunza, onelege okwela ebaribari vina kunattiye-wene. Gano 23:23 onologa: ‘Gulani ebaribari’ veli-veli onologa vina wi nigule “ononelamo, malago, zelu.” Oziwavi ebaribari kinakwana. Ninofwanyela ovirihamo mwigumini mwehu. Ononelamo ononikamihedha wona wila dhetene dhisunzile iyo dhinottidda mabasa. Malago anonikamihedha wona onfwanyela iyo ovyogolela. Mudhidhi wotene ebaribari enonivaha zelu vina enonikamihedha wona etxinjile, wila iyo nisasanyedhe. Akala ninowona wila ninofuna otxinja elobo kanigonele zelu enele onikamihedha otxinjawa, sabwani Bibilia ddwa ttima vaddiddi opitta nddarhama.​—Gano 8:10.

15. Ebaribari enibarela dhavi ninga papaseko?

¹⁵ Yanawili, nidhowegevi banigavirihamo ebaribari mwigumini mwehu malabo otene. Bibilia onoladaniha ebaribari na papaseko wa munyakoddo. (Éfeso 6:14) Masaka a wale anyakoddo annimwabala papaseko agadhowaga mukoddoni wi akale nibarelo nawa. Mbwenye papasekoya wabarela egamuttiba muttuya. Akala yelomurherha kiyabarela. Papaseko wehu wa ebaribari onanikamihedhe dhavi? Akala ninottiddela ebaribari, enele onikamihedha orabela mubuwelo wabure vina ninele okosa dhosakula dhaderetu. Nigafwanyiwa magudulano obe dhoweha ebaribari ya mBibiliani enele onikamihedha okosa dhosakula dhaderetu. Nigona, munyakoddo txipo kanimudduwala papaseko agadhowaga mukoddoni, iyo vina kanimurule-wene papaseko wehu webaribari. Munyakoddo onokoya supadda mupapasekoni. Ovano ninfuna none mukalelo onasanze iyo.

16. Osunza ebaribari enanikamihedhe dhavi wedda mw’ibaribarinimwa?

¹⁶ Yaneraru, ovilibihedhe wasunziha attu ebaribari ya mBibiliani. Masaka mena Bibilia onoladdanihiwa na supadda. Ninga munyakoddo onttukula supadda wika vapapasekoni, iyo vina ninofwanyela ottiddela na mada meeli Nzu na Mulugu. (Éfeso 6:17) Enowodheya iyo notene okala anamasunza a eziwelo, “ninga namalaleya onribela murima ofiyana nzu n’ebaribari.” (2 Timóteo 2:15) Iyo nigamulabihedhaga Bibilia wila nasunzihe attu ena ebaribari, ninele okwela ebaribariya. Vina enele wenjedhedha efunelo yehu ya weddana ebaribari.

17. Ebaribari ekalelini ya ttima mwigumini mwawo?

¹⁷ Ebaribari nvaho wa Yehova. Eji enonikamihedha okana omarho na Babihu wa wirimu. Vina elobo ya ttima mwa iyo. Dhotene dhinisunzihiliye kumaromowa! Iyene ohinipikirhela onisunziha na mukalakala. Ninofwanyela ovaha ttima ebaribari esunzile iyo. Nidhowegevi ‘banigagula ebaribari vina nihigulihe-wene.’ Ninga David, weyo ompikirhele Yehova dhahi: ‘ddinere wedda mw’ibaribarini mwenyu.’​—Masalmo 86:11.