• Enowodheya Weyo Okala Marho wa Yehova
    Kajavo Egumi Yamukalakala!—Kursu ya masunzo a Bibilia

    • Enowodheya Weyo Okala Marho wa Yehova

      Yehova onfuna wi weyo omuziwe mowakwana-mwene. Sabwaya jani? Venevo vagasunza weyo merelo aye, dhawira dhaye na mapikirelo aye, pavenevo vanenjive efunelo yawo ya okala marho waye. Enowodheya-wene weyo okala marho wa Mulugu? (Kengesa Masalmo 25:14.) Txini enfwanyeliwe okosa wi okale marho waye? Bibilia onowakula nivuzo ntti vina onowoniha wi jamalago vaddiddi otamela okala marho wa Yehova.

      1. Yehova onukumbirha okosa eni?

      ‘Mmususele Mulugu, iyene onowususelani.’ (Tiago 4:8) Eji entapulela eni? Yehova onfuna wi iyo nikale amarho aye. Akalawo attu anona ninga elobo yorutxa vaddiddi okala marho wa muttu ohinimonani; noona enowarutxa okala amarho a Mulugu, vowi kanimoona. Mbwenye munzuni naye, Bibilia, Yehova ohinaddela dhotedhene dhinfunihu oziwa wi nikale amarho aye. Wengesa nzu na Mulugu, enonikamihedha olibiha omarho wehu na Yehova masiki nihimonaga.

      2. Ekaleli eni yamalago okala marho wa Yehova?

      Kawo muttu onukwela onimpitta Yehova. Iyene onfuna wi weyo okale wohagalala vina omususele mudhidhi-mudhidhivi onfuniwe nikamihedho. Mazu aye anloga dhahi: ‘Ttiyaní mmadani mwaye dhetene dhinukattamihani, vowi ddi iyene onukoyani.’ (1 Pedro 5:7) Yehova oli womala-nawale mudhidhi wotene wi anikamihedhe, anipangarhaze vina anivuruwane ninga amarho aye.—Kengesa Masalmo 94:18, 19.

      3. Txini enfuna Yehova wi amarho aye akose?

      Yehova onowakwela attu otene, mbwenye iyene ‘onandana n’abale amvirihamo magano aye.’ (Gano 3:32) Yehova onfuna wi amarho aye avilibihedhe wira esile dhinooniye wi sapama vina orabela esile dhinooniye wi sabure. Akalawo attu ena anubuwela wi awene kanawodhe-wene ofwara magano a Yehova anttiyaniha dhabure na dhapama. Mbwenye Yehova ddwattagaraga. Iyene onomurumeela muttu-muttuvi onvirihamo magano aye vina onivilibihedha wi amuttittimihe.—Masalmo 147:11; Merelo 10:34, 35.

      KASUNZAVI

      Kasunzavi dhilobo dhina dhinauttukulele okala marho wa Yehova vina katamela oziwa yopurelamo ya okala marho waye.

      4. Abramu wali marho wa Yehova

      Nipadduwo na mBibiliani ninimuloga Abrahamu (onziwiwa vina na nzina na Abramu) ninoniziwiha ejile entapulela okala marho wa Mulugu. Kengesa nipadduwo ninimuloga Abramu va Wita 12:1-4. Mugamala mutanaalele mavuzo aba:

      • Txini ekumbirile Yehova wi Abramu akose?

      • Txini empikirheli Yehova?

      • Txini ekosile Abramu?

      5. Txini enfuna Yehova wi amarho aye akosege

      Iyo nigakaana marho wehu, ninojedha wi iyene onele okosaga dhinnizivela.

      • Dhilobo gani dhigaziveliwe weyo okoseliwa na amarho awo?

      Kengesa 1 Joau 5:3, mugamala mutanaalele nivuzo ntti:

      • Txini enfuna Yehova wi amarho aye akose?

      Wi nimwiwelele Yehova, jofuneya iyo osaddulela merelo ehu na ekaleloya yehu. Kengesa Izaiya 48:17, 18, mugamala mutanaalele nivuzo ntti:

      • Yehova onkumbirela eni wi amarho aye atxinje ekalelo yawa?

      Namalaba wa mabasa omaga oninvahedha mukwaye txapewa.

      Marho wapama onokamihedha vina onovaha malago aderetu. Yehova onakosela amarho aye yakakene

      6. Txini enakosela Yehova amarho aye?

      Yehova onowakamihedha amarho aye mmakattamihoni mwawa. Karumiha VIDIYU, mugamala mutanaalele nivuzo ntti.

      VIDIYU: Yehova Onoddikamihedha (3:20)

      • Muyana oddule olagihiwe mvidiyuni wantabuwa na dhubuwelo dhohifwanyelela. Yehova omukamihedhile dhavi?

      Kengesa Izaiya 41:10, 13, mugamala mutanaalele mavuzo aba:

      • Txini dhipikirhele Yehova wawirela amarho aye otene?

      • Weyo onubuwela wi enowodheya Yehova okala marho wawo waderetu? Sabwaya jani?

      Foto: Amarho ofiyedhana anokamihedhana. 1. Alobwana eli anokamihedhana otteba meza. 2. Muyana onimwaddela mukwaye dhinimudhugudha. 3. Mulobwana onimukamihedha mukwaye ovoreyeyile mweddo.

      Marho wapama onowuvaha nikamihedho mudhidhi onfuniwe. Yehova vina onele wukamihedha

      7. Wila nikale amarho a Yehova ninofwanyela ologa na iyene vina ovuruwana dhinlogiye

      Amarho eli agakaana elemelelo ya ologa vamodha, mandano awa anoliba. Kengesa Masalmo 86:6, 11, mugamala mutanaalele mavuzo aba:

      • Ninawodhe dhavi ologa na Yehova?

      • Yehova onloga dhavi na iyo?

      Foto: 1. Muyana onolobela. Seta modha eli vadhulu va musorho vaye, etonyaga odhulu. 2. Muyana onimwengesa Bibilia. Seta modha eli vamusorho vaye entonya mutxiddo.

      Nigalobelaga, ninloga na Yehova; iyene onologa na iyo modhela mazu aye ali mBibiliani

      ATTU ENA ANLOGA WI: “Kinwodheya okala marho wa Mulugu.”

      • Nlebo gani nigengesile weyo ninooniha wi enowodheya okala marho wa Yehova?

      OGWADDELA

      Yehova onfuna wi weyo okale marho waye vina iyene onele wukamihedha okala wofiyedheya na iyene.

      Kobuwela Dhisunziliwe

      • Yehova onakamihedha dhavi amarho aye?

      • Yehova onfunela eni wi amarho aye akose matxinjo mwigumini mwawa?

      • Weyo onubuwela wi jorutxa okala marho wa Yehova? Onubuwelela eni dhawene?

      Yogana

      TAMELÁ ONONELAMO DERETU

      Wandana wawo na Mulugu ompatta dhavi egumi yawo?

      “Jeová, O Deus Que Vale a Pena Conhecer” (A Sentinela, 15 de Fevereiro de 2003)

      Koona txini enfwanyeliwe okosa wi okale marho wa Mulugu.

      “Como Posso Tornar-me Amigo de Deus?” (Os Jovens Perguntam—Respostas Práticas, Volume 2, capítulo 35)

      Koona mukalelo ovuneyile muyana dhahi mwaha wa okala marho wa Yehova.

      “Eu Não Queria Morrer!” (A Sentinela, N.º 1 de 2017)

      Mwari mwa mavuzo aba, azombwe dhahi ahiloga dhiniwamo awene mwaha wa Yehova.

      Txini Entapulela Okala Marho wa Mulugu? (1:46)