NSUZO 18
Ninawodhe Dhavi Wazinddiyela Akristu Ebaribari
Mwilaboni mwetemwene, attu matxikwi-na-matxikwi anologa wi ali Akristu. Mbwenye kahiyo otene aniwelela vina anfwara masunzihoya. Kito ninawodhe dhavi wazinddiyela Akristu ebaribari?
1. Txini entapulela okala Mukristu?
Okala Mukristu entapulela okala namafwara wa Yezu. (Kengesa Merelo 11:26.) Okala namafwara wa Yezu eniwanana na okosa eni? Mwinyene Yezu ohiloga: “Mugavirihamo mazu aga, munokala-wene anamasunza aga.” (Joau 8:31) Eji entapulela wi Mukristu webaribari onofwanyela wiwelela dhisunzihile Yezu. Dhotedhene dhasunziha Yezu vina dhakosiye dhanniwanana na nzu na Mulugu, na mukalelo wakakene dhotene dhinkosa vina dhinloga Akristu ebaribari, dhinofwanyela wiwanana na Bibilia.—Kengesa Luka 24:27.
2. Akristu ebaribari antonyihedha dhavi okwela?
Yezu wahiloga na anamafwara aye: ‘Mukwelanege dhahene ninga enukwelani miyo.’ (Joau 15:12) Yezu otonyihedhile dhavi wi wannakwela anamafwara aye? Iyene wannakamihedha, wanalibiha vina wantamela mudhidhi wa okala na awene. Mpaka ofiyedha walevela egumi yaye. (1 Joau 3:16) Mwa dhawene, Akristu ebaribari ottiya ologavi sabwa ya okwela, anotonyihedha na mazu vina na merelo wi anokwelana muttu na mukwaye.
3. Akristu ebaribari ankosa mabasa gani?
Yezu ohavaha mabasa a makamaka anamafwara aye. ‘Iyene oharuma olaleya muttaka wa Omwene wa Mulugu.’ (Luka 9:2) Mbwenye Akristu oroma kalaleya mmiburhonivi mwebedhiwa Mulugu, awene vina anlaleya mmimburoni mwafwanyeya attuya vina mmatakulu mwawa. (Kengesa Merelo 5:42; 17:17.) Masaka abano, Akristu ebaribari anolaleya ebaribari ya mBibiliani ahitanalaga onafwanyani attuya. Awene anowakwela attu, nona, anowagalala olabihedha mudhidhi na guru dhawa wi asunzihe attu miselu dha mBibiliani dhinvaha njedhelo vina nipangarhazo.—Marko 12:31.
KASUNZAVI
Koona ottiyana olivo wa Akristu ebaribari na abale ahinfwara dhisunzihile Yezu vina dhikosiliye.
4. Akristu ebaribari anotamela oziwa ebaribari ya mBibiliani
Akristu a masaka a mundduni anniwelela nzu na Mulugu
Kahiyo otene aniliwa Akristu, anona ninga elobo ya makamaka otamela ebaribari ya mBibiliani. Karumiha VIDIYU, mugamala mutanaalele nivuzo ntti.
Dhilobo gani dhinsunziha marelijiau mena anloga wi nili Akristu, dhittiyanile na esile dhisunzihile Yezu?
Yezu ohisunziha ebaribari ya Nzu na Mulugu. Kengesa Joau 18:37, mugamala mutanaalele nivuzo ntti:
Mowiwanana na dhisunzihile Yezu, ninawodhe dhavi “wazinddiyela Akristu ebaribari”?
5. Awene anlaleya ebaribari ya mBibiliani
Akristu a masaka a mundduni anlaleya miselu dhapama
Yezu ahineyelela wirimu wahattomela anamafwara aye mabasa anttiddiwavi mpaka masaka abano. Kengesa Mateu 28:19, 20 na Merelo 1:8, mugamala mutanaalele nivuzo ntti:
Miselu esi dhapama dhigalaleyiwe mmiburhoni dhing’onovi bahi? Midhidhi mingasi dhigalaleyiwe miselu esi?
6. Awene anovirihamo esile dhinsunzihani
Txini emukuluvelihile Tom oziwa wila wahafwanya Akristu ebaribari? Karumiha VIDIYU, mugamala mutanaalele mavuzo aba.
Mvidiyuni, txini yamukosihile Tom onyanyala marelijiau?
Txini yamukuluveliha Tom wi wahifwanya ebaribari?
Merelo, ahittiyana na mazu. Kengesa Mateu 7:21, mugamala mutanaalele nivuzo ntti:
Elobo gani yona Yezu okala yamakamaka—ejile enlogihu wi ninorumeela obe ejile entonyihedhihu na merelo?
7. Okwelana wawa kwebaribari
Akristu a masaka a mundduni ankwelana muttu na mukwaye
Akristu ebaribari ahika txibarene egumi yawa vangovini wi abarele abalawa? Karumiha VIDIYU, mugamala mutanaalele mavuzo aba.
Mvidiyuni, txini emukosihile Lloyd wika egumi yaye vangovini wi ambarele Mbalaye Johansson?
Weyo onona ninga ejile ekosile Lloyd enotonyihedha wi iyene Mukristu webaribari?
Kengesa Joau 13:34, 35, mugamala mutanaalele nivuzo ntti:
Anamafwara a Yezu (Akristu ebaribari) anaweddiha dhavi attu a elabo yina, vina abale ana ttebe yottiyana na yawa?
Awene anooniha dhavi ejuwene nsaka na koddo?
ATTU ENA ANLOGA WI: “Kintanala relijiau eliwe,—ya makamakaya omurumela Yezu bahi?”
Nlebo gani nigalagihile weyo nttuwene ninakamihedhe wazinddiyela Akristu ebaribari?
OGWADDELA
Akristu ebaribari anowiwelela enloga Bibilia, anotonyihedha okwela webaribari vina anolaleya miselu dhapama dha mBibiliani.
Kobuwela Dhisunziliwe
Dhotedhene dhinloga vina dhinkosa Akristu ebaribari dhiniwanana na eni?
Mikalelo gani dhinazinddiyeliha Akristu ebaribari?
Mabasa gani ankosa Akristu ebaribari?
TAMELÁ ONONELAMO DERETU
Kasunzavi sabwa ya nikuru na attu abuwene anivilibihedha ofwara yotagiha vina masunziho a Yezu Kristu.
Koona nipadduwo na muyana ottiyile okala mameri (freira) wa katolika, omamalelowa bafwanya “anamudhi omuyani ebaribari.”
“Elas respondiam às minhas perguntas por meio da Bíblia” (A Sentinela, 1.º de Abril de 2014)
Koona mukalelo ontonyihedha Akristu ebaribari okwela mwa abalawa anfuna nikamihedho.
Ajuda Humanitária a Irmãos em Áreas de Desastres—Excerto (3:57)
Katanaalela mwaha wa Akristu a wale vina a masaka abano, ankosa dhilobo dhilogile Yezu esuwene dhinazinddiyeliha ninga anamafwara aye.
“O que Identifica os Cristãos Verdadeiros?” (A Sentinela, 1.º de Março de 2012)