NIPADDUWO 71
Mulugu Ohiroromeliha Paraizu
NTHI nladdaniho na paraizu txino ninga oddule wamulagihile Mulugu namavuhula Izaia. Izaia okalilewo mudhidhi muñgonovi mumaleli Jona.
Paraizu ontapulela “mundda” obe “parki.” Eji enowuwubutxedha elobo emalilihu woona mu nivuruni nthi? Eji enkaletxa ninga mundda wokoddela obule wakoseli Yehova Adamu na Eva, kayo? Mbwenye elabo yotene ya vati enela odha okala paraizu?
Yehova wahimpanga namavuhula waye Izaia wila alebe mwaha wa paraizu muswa oddo onda wa nlogo na Mulugu. Iyene ohiloga dhahi: ‘Minji na mabila anela okalawo vamodha na murenddele. Ana ñgombe na ana poddogoma anela oja vamodha, nanda aima añgono anela wakumbuza. Masiki mwana muñgono kanakosiwe yabure agavega waddamela nowa yowopiya.’
Athu enjene anela ologa: ‘Eji txipo kinda opadduwa. Dila dhotene velaboni ya vati vanokalaga makathamiho, nanda anelege okalawovi.’ Mbwenye kobuwela eji: Mukalelo gani wa mudhi wavahile Mulugu Adamu na Eva?
Mulugu wahawika Adamu na Eva mparaizu. Ji sabwa ya onvanya Mulugu bahi venevo vayelelilani mudhi wawa wokoddela, wuluvala vina okwa. Mulugu ohiroromeliha wila iyene onela ovaha nlogo nthile ninimukwela dhilobo dhotene esile dhiyeleeli Adamu na Eva.
Mparaizu muswa oddo onda kamunakale elobo enavoreye vina enatolotxe. Munela okala murenddele wowakwanela. Nlogo notene ninela okala na egumi vina osanzaya. Enakale wene ninga Mulugu mwafuneliye omaromo. Mbwenye musogorho ninela osunza mukalelo onfuna Mulugu okosa eji.
Izaia 11:6-9; Ovuhulela 21:3, 4.