Shimbi Yamuchiali
33 Wano e maliji a yiwape waze Mose mutu wa Zambi wamwenemwene awahishile no A-Izalele, muze te kanda achifwa. 2 Iye yamba ngwenyi:
“Yehova yeza ku Sinai,
iye yatemuka kuli ayo chize ku Sere.
Yapanguluka ni uhenya wenyi chize ku chifuchi cha ku mulundu wa Parane,
iye wapwile hamuwika ni kumi lia tununu lia asandu.
Ku kwoko lienyi lia utata kwapwile tujita jenyi.
3 Iye wazangile atu jenyi;
asandu je eswe kali mu moko je;
ayo te kanatwame ku molu je;
yaputuka kupanjika maliji je.
4 (Mose katwaha usongwelo, katwaha shimbi
ngwe chikungulwila cha Yakomba.)
5 Iye kapwile mwanangana mu Yeshurene
muze miata ja atu alikungulwile
hamwe ni minyachi yeswe ya A-Izalele.
6 Rupene atwame ni mwono, kanda afwa,
Chipwe malunga jenyi kanda atepuluka.”
7 Iye yawahisa Yunda ni maliji wano ngwenyi:
“Yehova, panjika liji lia Yunda,
mufunyise mukachi ka atu jenyi.
Kwoko lienyi liakalila yuma yize niyenyi,
mukwase kukumba akwa-kole jenyi.”
8 Hakutwala kuli Levi iye yamba ngwenyi:
“Tumimi ye ni Urimi ye, yili ya yoze washishika kuli yena,
yoze wasele mu cheseko ku Masa.
Walitachikile nenyi hakamwihi ni meya a Meripa.
9 Mutu yoze wambile kuli yisemi jenyi ngwenyi: ‘Chishi kunuzanga.’
Iye kavulamine mandumbu jenyi,
yalengulula ana jenyi.
Mumu ayo kakawile maliji je,
kononokene usendo we.
10 Ayo alongese Yakomba yiyulo ni upatwilo we
ni Izalele mu Shimbi ye.
Ayo alambule insensu ya vumba lipema kuli yena
ni mulambu wamuundu ku chilumbilo che.
11 Yehova, wahisa kama tachi jenyi,
wahilila nawa ni milimo ya moko jenyi.
Makuna molu ja waze akumukatukila
hanga waze akumuvwila kole achine kulimika nenyi nawa.”
12 Kuli Mbenjamine iye yamba ngwenyi:
“Yoze azanga kuli Yehova, atwame kanawa hakamwihi nenyi;
iye mamufunga tangwa lieswe,
iye matwama hakachi ka yipaya yenyi.”
13 Hakutwala kuli Yosefwe yamba ngwenyi:
“Chifuchi che achiwahise kuli Yehova
ni yuma yipema ya mwilu
ni mume ni meya a mu mashima a hashi,
14 ni yuma yipema yize yakusoka mumu lia mwalwa
ni mbuto yipema ya ha kakweji ni kakweji,
15 ni yuma yipema chinji ya ku milundu yikulu
ni yuma yipema ya ku milundu ya mutolo
16 ni yuma yipema ya hashi ni yize yinazalisaho
ni utayizo wa yoze wasolokele ku chiputa.
Yino yeswe yize ha mutwe wa Yosefwe,
yize ha mutwe wa yoze hanasakula hakachi ka mandumbu jenyi.
17 Uhenya wenyi uli ngwe wa mwana mutangu wa ngombe,
mbinga jenyi jili ngwe mbinga ja ngombe wa mu yambu.
Mbinga jacho makashinjika najo atu,
eswe hamuwika ndo ku masongo a hashi.
Ayo kapwa kumi lia tununu a Eframe,
ni tununu a Manase.”
18 Hakutwala kuli Zapulone iye yamba ngwenyi:
“Wahilila yena Zapulone mu kutuhuka che,
wahilila yena Yisaka mu mbalaka je.
19 Ayo makatambika atu ku mulundu.
Kwenako makalambula yitapo ya ululi.
Mumu makachiza upite unji mu tulunga-lwiji,
upite wahengama mu masekeseke.”
20 Kuli Ngate iye yamba ngwenyi:
“Kawaha yoze matohwesa njiza ya Ngate.
Iye kakupomba ngwe ndumba
yoze halilulieka hanga alie kwoko, ewa mutwe wa yoze makwata.
21 Iye makasakula chihanda chitangu,
kwenako makafungila chihanda cha mukwa-kuyula.
Akwa-lutwe ja atu, makalikunga.
Iye makalila ululi wa Yehova,
ni yiyulo ni upatwilo wenyi hali A-Izalele.”
22 Hakutwala kuli Ndane iye yamba ngwenyi:
“Ndane kali mwana wa ndumba.
Iye makakatuka ku Mbashane ni kutumbuka.”
23 Hakutwala kuli Napatali iye yamba ngwenyi:
“Napatali kanawahilila ni utayizo wa Yehova.
Kanazale too ni yiwape yenyi.
Hinga chifuchi cha ku chitokelo ni cha ku uto.”
24 Hali Ashe iye yamba ngwenyi:
“Ashe amuwahise ni ana.
Apemene kuli mandumbu jenyi,
Ulisa molu jenyi ni maji a olevwe.
25 Yajilo ye muyikapwa ya utale ni unengu,
Yena mukatwama kanawa matangwa eswe a mwono we.
26 Kukushi Zambi wamwenemwene ngwe wa Yeshurene,
yoze wakuzomboka mu malilu hanga akukwase,
yoze wakuzomboka mu malelwa mu wanangana wenyi.
27 Zambi kali uchinyino chize ku matangwa akunyima.
Moko jenyi a mutolo kali mushi lia yena.
Iye makahuma akwa-kole kumeso je,
iye makamba ngwenyi: ‘Anongese!’
28 Izalele makatwama mu ukulungunga,
shima lia Yakomba mulikatwama ukawalio
mu chifuchi cha mbuto ni vinyu yaha
muze malilu makasotola mume.
29 Wawaha yena Izalele!
Iya yoze walifwa ni yena?
Ulamwino we wakukatuka kuli Yehova,
Iye kali lukepwe yoze wakukukwasa
ni katana wenyi wa wanangana.
Akwa-kole je makakuvwila woma.
Yena mukaliata ha mitanda yo.”