Mukanda Wamuchiali wa Samuele
23 Wano e maliji a kasula a Ndawichi:
“Maliji a Ndawichi mwana wa Yese,
Maliji a lunga yoze anangamishine,
Yoze Zambi ya Yakomba awayishile,
Mukwa-kwimba kanawa miaso ya A-Izalele.
2 Spiritu ya Yehova yahanjikile kupalikila muli yami,
Maliji jenyi kapwile ha limi liami.
3 Zambi wa Izalele yahanjika,
Liwe lia Izalele yamba kuli yami ngwenyi:
‘Nyi yoze unayulu atu kali mukwa-ululi,
Mayula ni woma wa Zambi,
4 Kuyula chenyi chakupwa ngwe pangu lia chimene, muze tangwa liakupanguka,
Chimene chize kukushi malelwa niamwe.
Chili ngwe kutuhuka cha mwalwa muze vula hapatuka,
Yoze wakusokesa mwambu hashi.’
5 Chenacho liapwa zuwo liami kumeso ja Zambi.
Mumu iye kalingile ni yami usendo wa mutolo,
Usendo wacho wakulumbununa mu yimako-yimako, chikwo nawa, wakola.
Mumu unalumbunuka ulamwino wami weswe ni uwahililo wami weswe,
Kashika, makatatwisa zuwo liami.
6 Alioze, atu eswe amokomoko, kakwambila haze ngwe mingonga,
Yize keshi kuhasa kuyitukula ni moko.
7 Mutu yoze mayikwata,
Katamba kuzala chikungo ni chikundo cha kunga,
Katamba kuyocha pwilili ha chihela hazehene yili.”
8 Wano e majina a tujita a Ndawichi yitakame: Joshepe-Basebete, Ka-Takemone mwata wa maswalale atatu. Tangwa limwe kashihile malunga 800 ni kunga. 9 Yoze te wamuhata, kapwile Eleazare, mwana wa Ndodo, mwana wa Hoha. Iye kapwile umwe wa kuli tujita atatu yitakame waze apwile ni Ndawichi muze ayo asosombele A-Filistea. A-Filistea kalikungulwile hanga ase jita muze malunga a mu Izalele te hahiluka kunyima, 10 alioze Eleazare yamana nguu, yalamba A-Filistea ndo muze kwoko lienyi liahongele ni kukala mbe mumu lia kukwata katana. Chocho, ha tangwa lize, Yehova yaakwasa kukumba. Maswalale yakaula Eleazare hanga ande upite wa atu waze afwile.
11 Mba yikwiza Shama, mwana wa Agi wa ku Harara. Muze A-Filistea alikungulwile ku Lehi kuze kwapwile munda wa makunde, atu yachina mumu lia A-Filistea. 12 Alioze iye yamana mukachi ka munda, yaupulwila. Yashiha A-Filistea, chocho Yehova yaakwasa kukumba.
13 Hakachi ka miata 30, miata atatu yakatuka, yaya kuli Ndawichi ku chivwenge cha Ndulame ha mashimbu a kucha. Maswalale ja A-Filistea te hasa chilombo cho ku mungulunga wa Refane. 14 Ndawichi te kali ku chivwenge kuze te akuswama, maswalale ja A-Filistea te kali ku Mbeteleme. 15 Ndawichi yevwa usona, yamba ngwenyi: “Te muchiwaha chinji nyi nanwa kama meya a mu shima lize liatwama hakamwihi ni chikolo cha Mbeteleme!” 16 Chocho maswalale atatu yitakame yanjila ndusu ni hamu mu chilombo cha A-Filistea, yataha meya mu shima lize liatwama hakamwihi ni chikolo cha Mbeteleme, yaaneha kuli Ndawichi. Alioze Ndawichi kaanwine, yaamwanga kumeso ja Yehova. 17 Iye yamba ngwenyi: “Yehova, chikapwe kusuku ni yami kulinga chuma cha mutapu au! Kuchi te mungunwa manyinga ja atu waze asa mwono wo mu ponde?” Chocho iye katayijile kwanwa. Yino ye yuma yize maswalale atatu yitakame ja Ndawichi alingile.
18 Abishai yayo ya Joabe, mwana wa Zeluia, kapwile mwata wa chizavu chikwo cha maswalale atatu. Abishai kashihile malunga 300 ni kunga lienyi. Iye kapwile ni lufuma munji ngwe wa maswalale atangu atatu. 19 Chipwe ngwe kapwile mulemu chinji hakachi ka maswalale akwo atatu mu chizavu, ni kupwa mwata wo, nihindu iye kakahetele ha chihela cha maswalale atatu atangu.
20 Benaia mwana wa Jehoiada, kapwile lunga wa hamu, kalingile yuma yinji mu Kabzele. Kashihile ana aali ja Ariele Ka-Moape. Muze te kunanoko neve, yanjila mu shima lia meya yashiha ndumba. 21 Iye kashihile nawa Ka-Engitu munene, musuku chinji. Chipwe ngwe Ka-Engitu kapwile ni kunga, nihindu Benaia yalimika nenyi ni mutondo. Yatambula kunga lia Ka-Engitu, yamushiha nalio. 22 Yuma yino ye alingile Benaia mwana wa Jehoiada. Iye kapwile ni lufuma munji kuhiana maswalale atatu yitakame. 23 Chipwe ngwe kapwile ni lufuma munji kuhiana wa maswalale 30, nihindu iye kakahetele ha chihela cha maswalale atatu. Alioze Ndawichi yamutongola hanga apwe kafunga kenyi.
24 Asahele mwana-kwo ya Joabe, kapwile hakachi ka maswalale 30. Wano e majina ja maswalale akwo: Elehana, mwana wa Ndodo wa ku Mbeteleme, 25 Shama, Ka-Harode, Elika, Ka-Harode, 26 Heleze Ka-Pale, Ira, mwana wa Ikeshe wa ku Tekoa, 27 Abieza, Ka-Anatote, Mebunai, Ka-Husha, 28 Zalmone, Ka-Hoha, Maharai, Ka-Netofate, 29 Helebe mwana wa Bana, Ka-Netofate, Itaia, mwana wa Ribai wa ku Ngibia ya A-Mbenjamine, 30 Benaia, Ka-Piratone, Hidai wa ku yitwetwe ya Ngasha, 31 Abi-Albone, Ka-Arpa, Azmave, Ka-Baruma, 32 Eliapa, Ka-Salbone, ana ja Jashene, Jonata, 33 Shama, Ka-Harara, Ahiame, mwana wa Sharare, Ka-Harara, 34 Elifelete, mwana wa Ashebai, mwana wa Ka-Makata, Eliame mwana wa Ahitofele, Ka-Ngilo, 35 Hezrai, Ka-Karmela, Parai, Ka-Arpa, 36 Ingale, mwana wa Natane wa ku Zoba, Mbani, Ka-Ngate, 37 Zeleke, Ka-Amone, Nahari, Ka-Mberote, mukwa-kumbata yitwa ya jita ya Joabe mwana wa Zeluia, 38 Ira, Ka-Itri, Ngarebe, Ka-Itri, 39 ni Uriya, Ka-Hete, ayo eswe kapwile 37.