Mukanda Utangu wa Samuele
19 Kulutwe, Saulu yalweza mwanenyi Jonata ni tuvumbi twenyi eswe nyonga lienyi lia kushiha Ndawichi. 2 Amu Jonata mwana wa Saulu te akuzanga chinji Ndawichi, yamutoweza ngwenyi: “Tata kanazange kukushiha. Kashika hamene chimene ukanyama. Ukaye ku chimwe chihela chahengama, ukaswameko. 3 Mungukaya ni kwendangana ni tata mu yambu hakamwihi ni haze mukapwa. Mungukahanjika ni tata hakutwala kuli yena, nyi ngwe mungunyingika chimwe chuma, mungukakulwezacho.”
4 Chocho, Jonata yahanjika yuma yipema kuli tato Saulu hakutwala kuli Ndawichi. Yamulweza ngwenyi: “Mwanangana, kunwatambile kulinga upi kuli Ndawichi, mumu iye kanulingile upi niumwe. Alioze, kanulingila yuma yipema chinji. 5 Iye kasele mwono wenyi mu ponde hanga ashihe Ka-Filistea, chocho Yehova yalamwina A-Izalele eswe kuli akwa-kole jo. Muze nwachimwene, yinuwahilila chinji. Mba mumu liaka nunazange kushiha Ndawichi ni kumwanga manyinga waze keshi chitela?” 6 Saulu yapanjika Jonata, yalishinga ngwenyi: “Ni mwono wa Yehova, chichi kumushiha.” 7 Mba Jonata yasanyika Ndawichi yamulweza maliji wano eswe. Jonata yatwala Ndawichi kuli Saulu, chocho Ndawichi yaputuka kukalakalila nawa Saulu ngwe chize apwile ni kulinga.
8 Hakupalika cha limwe shimbu, yikupwa nawa jita. Ndawichi yaya ni kwasa jita ni A-Filistea, yashiha anji a kuli ayo. A-Filistea waze asalile yachina.
9 Spiritu yipi ya kuli Yehova yiyiza hali Saulu. Iye te kanatwama mu zuwo ni kunga ku kwoko muze Ndawichi te anembi kalialia. 10 Saulu yazanga kupalakenya Ndawichi ku chikalakala ni kunga, alioze iye yalieha, chocho kunga yilinjila ku chikalakala. Ha ufuku wacho, Ndawichi yachina. 11 Kulutwe, Saulu yatuma ngendeshi ku zuwo lia Ndawichi hanga amutale-tale, amushihe chimene. Alioze pwo lienyi Mikale yamulweza ngwenyi: “Nyi kuwachinyine ufuku uno, hamene makushiha.” 12 Hazehene Mikale yakwasa Ndawichi kusunukina ha kapenda hanga achine. 13 Mikale yanda kaponya wa mu zuwo yamusa ha muhela ha chihela haze Ndawichi te akushachila mutwe. Yasaho chikuto cha wona wa pembe, yafuka kaponya wacho hina.
14 Saulu yatuma mikeji hanga anehe Ndawichi, alioze pwo yaalweza ngwenyi: “Iye kanayiji.” 15 Kashika, Saulu yafunyisa mikeji hanga atale Ndawichi, yaalweza ngwenyi: “Muzundulenu ni we muhela, numunehe kuno hanga ngumushihe.” 16 Muze anjilile, mikeji yawana kaponya wa mu zuwo ha muhela ni chikuto cha wona wa pembe ha chihela haze te hatamba kupwa mutwe wa Ndawichi. 17 Chocho, Saulu yahula Mikale ngwenyi: “Mumu liaka wangwonga chichize ni kukwasa mukwa-kole wami achine?” Mikale yakumbulula ngwenyi: “Iye kangwambanga ngwenyi, nyi chamukwashile kuchina, mangushiha.”
18 Ha shimbu liacho, Ndawichi yachina, yaliwana ni Samuele ku Rama. Yamulweza yuma yeswe yize Saulu amulingile. Chocho, iye ni Samuele yaya ku Naiote, yatwamako. 19 Ha kupalika cha mashimbu, Saulu yevwa ngwo: “Ndawichi kali mu Naiote ku Rama.” 20 Saulu yatuma mikeji fuji ni matambu hanga akwate Ndawichi. Muze ayo amwene aprofeta a makulwana kanaprofeteza aku Samuele te kanamana ni kwasongwela, spiritu ya Zambi yiyiza hali mikeji a Saulu, no yaputuka kuprofeteza.
21 Muze Saulu achivwile, hazehene yatuma mikeji akwo, alioze no yaputuka kuprofeteza. Saulu yatuma chizavu chamuchitatu no nawa yaputuka kuprofeteza. 22 Kusulaho, iye mwene yaya ku Rama. Muze ahetele ku shima linene liatwama ku Seku, yahula ngwenyi: “Samuele ni Ndawichi kulihi ali?” Yamukumbulula ngwo: “Ayo kali mu Naiote, ku Rama.” 23 Muze te Saulu anayi ku Naiote, mu Rama, spiritu ya Zambi yiyiza hali iye, yanunga ni kwenda ni kuprofeteza ndo muze ahetele ku Naiote, mu Rama. 24 Saulu yazula mazalo, yaputuka kuprofeteza kumeso ja Samuele, chocho yapomba hazehene uselesele tangwa lia muundu ni ufuku wamuundu. Kashika akwamba ngwo: “Shina Saulu neye hapwa profeta?”