Mukanda Utangu wa Mianangana
2 Muze te kwasala hakehe hanga Ndawichi afwe, yahana usongwelo uno kuli mwanenyi Solomone ngwenyi: 2 “Kwasala hakehe hanga ngufwe. Kashika, takama, pwako ni hamu. 3 Manununa yilakenyo yeswe mulinga kuli Yehova Zambi ye, enda mu majila jenyi, ononokena yiyulo yenyi, shimbi, upatwilo ni yiulwiso yenyi ngwe chize yili ya kusoneka mu mukanda wa Shimbi ja Mose. Nyi walinga chino, yuma yeswe ku mwono we muyenda kanawa kweswako muuya. 4 Mba Yehova mamanununa chilakenyo chize alingile hakutwala kuli yami ngwenyi: ‘Nyi ana je malinga yuma yipema, mashishika kuli yami ni mbunge yo yeswe ni mwono wo weswe, munyachi we muukayula A-Izalele ku miaka ya mutolo.’
5 “Chikwo nawa, unanyingika yize angulingile Joabe mwana wa Zeluia, ha kushiha miata aali a maswalale a mu Izalele, Abenere mwana wa Nere ni Amasa mwana wa Jetere. Iye kamwangine manyinga ha mashimbu a sambukila, kapihishile ni manyinga muya uze apwile nawo mu zalilo ni sapato jenyi. 6 Watamba kusopa mulonga wacho ni mana, kanda wecha lunga yono afwe ni sambukila.
7 “Alioze, watamba kusolola zango kuli ana ja Bazilai Ka-Ngiliate, ayo katamba kulia ku mesa ye, mumu kangukwashile muze nachinyine yayenu Absalome.
8 “Mutu mukwo kali Shimei mwana wa Ngera, Ka-Mbenjamine wa ku Mbahurime. Iye mwe wangushingile ha tangwa lize nayile ku Mahaneme, alioze muze nalitakanyine nenyi ku Yordau, yingulishinga mu jina lia Yehova ngwami: ‘Chichi kukushiha.’ 9 Haliapwila kanda umwecha chizechene, yena uli lunga wa mana, unanyingika yize watamba kulinga, kanda umwecha alifwile chakuhona kufweta mulonga wenyi.”
10 Mba Ndawichi yafwa, yamufunjila mu Mbonge ya Ndawichi. 11 Ndawichi kayulile mu Izalele ha miaka 40. Mu Heprone iye kayulile ha miaka 7, mu Yerusaleme yayula ha miaka 33.
12 Chocho Solomone yatwama ha ngunja ya tato Ndawichi, hakehe-hakehe wanangana wenyi yiukola.
13 Hakupalika cha amwe mashimbu, Adonija mwana wa Hagita, yaya ni kuhanjika ni Mbate-Shipa naye ya Solomone. Mbate-Shipa yamuhula ngwenyi: “Kwiza che cha sambukila?” Iye yakumbulula ngwenyi: “Ewa, cha sambukila.” 14 Chocho Adonija yamba ngwenyi: “Ngunazange kuhanjika ni yena.” Iye yamulweza ngwenyi: “Hanjika.” 15 Adonija yanunga ngwenyi: “Nunanyingika ngwenu, wanangana te muupwa wa yami ni A-Izalele eswe te che anazange, alioze hiwakatuka mu moko jami, hiwapwa wa mwana-kwetu, mumu uno we upale wa Yehova. 16 Alioze ngunazange kunwita chimwe chuma. Lisesa kanda nulituna kama.” Iye yamba ngwenyi: “Eta.” 17 Adonija yamba ngwenyi: “Lisesa, etenu kama kuli mwanangana Solomone hanga angwehe Abishaga Ka-Shuneme, apwe pwo liami. Nyi nwamwita, iye matayiza.” 18 Chocho Mbate-Shipa yamba ngwenyi: “Kushi mulonga, munguhanjika ni mwanangana.”
19 Mbate-Shipa yaya kuli Mwanangana Solomone hanga amulweze yize Adonija eta. Mwanangana yakatuka, yafulamana kumeso jenyi, mba yatwama cheka ha ngunja yenyi. Yeta hanga asele naye ngunja yikwo sali lia utata hanga atwameho, mba iye yatwama. 20 Iye yamba ngwenyi: “Ngunazange kunwita chimwe chuma. Alioze kanda nulituna kama.” Mwanangana yamukumbulula ngwenyi: “Mama muhasa kwita chuma cheswacho, mungukwahacho.” 21 Mbate-Shipa yamba ngwenyi: “Hana kama Abishaga Ka-Shuneme kuli yayenu Adonija hanga apwe pwo lienyi.” 22 Mwanangana Solomone yakumbulula naye ngwenyi: “Mumu liaka unechi Abishaga Ka-Shuneme hanga apwe pwo lia Adonija? Nyi nuli ni hamu lia kumwichila pwo, kwasala hakehe hanga numwichile wanangana, mumu iye kali yaya, chikwo nawa kakumukwasa kuli sasendote Abiatare ni Joabe mwana wa Zeluia.”
23 Chocho Mwanangana Solomone yalishinga mu jina lia Yehova ngwenyi: “Zambi angumwese lamba linji nyi chashihile Adonija mumu lia yuma yize eta. 24 Ngunalishinga mu jina lia Yehova yoze wangutwamisa ha ngunja ya tata Ndawichi ni kukolesa wanangana wami ngwe chize alakenyene, musono Adonija katamba kufwa.” 25 Hazehene, mwanangana Solomone yatuma Benaia mwana wa Jehoiada, yaya, yashiha Adonija.
26 Mwanangana yalweza sasendote Abiatare, ngwenyi: “Yako ku minda ye ku Anatote. Watamba kufwa, alioze chichi kukushiha musono mumu wambachile Mushete wa Mwene wami Yehova muze wapwile hamwe ni tata Ndawichi. Wakwashile nawa tata mu yipikalo yeswe yize iye apalikile.” 27 Chocho Solomone yachiza Abiatare ha mulimo wa usasendote uze Yehova amuhele hanga amanunune maliji waze Yehova ahanjikile ku Shilo hakutwala ku zuwo lia Eli.
28 Muze sango jahetele kuli Joabe, (Joabe kakwashile Adonija, alioze kakakwashile Absalome) iye yachinyina mu mbalaka ya Yehova, yakakaminya ku mbinga ja ku chilumbilo. 29 Chocho lusango yaheta kuli Mwanangana Solomone ngwo: “Joabe kachinyina mu mbalaka ya Yehova, kali sali lia chilumbilo.” Mba Solomone yalweza Benaia mwana wa Jehoiada ngwenyi: “Yako umushihe!” 30 Kashika, Benaia yaya ku mbalaka ya Yehova, yamba kuli Joabe ngwenyi: “Mwanangana kamba ngwenyi: ‘Tuhuka.’” Alioze Joabe yamukumbulula ngwenyi: “Ka! Chichi kutuhuka. Ngunazange kufwila muno.” Mba Benaia yatwala lusango kuli mwanangana ngwenyi: “Yino ye Joabe amba, chino che angukumbulula.” 31 Mwanangana yamulweza ngwenyi: “Linga yize anakwita, mushihe ni kumufunda; chiza hali yami ni hali akwa-zuwo lia tata mulonga wa manyinga waze Joabe amwangine chakuhona chitela. 32 Yehova mamufwetesa mulonga wa manyinga waze amwangine. Iye kashihile malunga aali a ululi, maswalale ajama kuhiana iye, chuma chize tata Ndawichi te kanyingikine. Malunga jacho kapwile wano: Abenere mwana wa Nere, kapitau ka maswalale A-Izalele ni Amasa mwana wa Jetere, kapitau ka maswalale a mu Yunda. 33 Alioze mulonga wa manyinga jo ukashate Joabe ni munyachi wenyi ku miaka yeswe. Sambukila ya Yehova yikapwe hali Ndawichi, hali munyachi wenyi, akwa-zuwo lienyi ni ha ngunja yenyi ku miaka ya mutolo.” 34 Chocho, Benaia mwana wa Jehoiada yafuna, yashiha Joabe, yamufunjila hakamwihi ni zuwo lienyi, mu puya. 35 Mwanangana yasa Benaia mwana wa Jehoiada mu chihela cha Joabe kapitau ka maswalale, mba mu chihela cha Abiatare, mwanangana yasamo sasendote Zadoke.
36 Chocho mwanangana yasanyika Shimei, yamulweza ngwenyi: “Tunga zuwo mu Yerusaleme hanga utwamemo, kanda ukatuka mu mbonge hanga uye ku chihela chikwo. 37 Tangwa lize mukatuka mu mbonge uzauke chitwetwe cha Kendrone, nyingika pundu ngwe, kumukafwa. Mulonga wa manyinga je muushata hali yena mwene.” 38 Shimei yakumbulula mwanangana ngwenyi: “Yuma yize nwamba yinalite. Yami kavumbi kenu, mungulinga yeswe yize yenu nwamba.” Chocho, Shimei yatwama mu Yerusaleme matangwa anji.
39 Alioze, hakupalika cha miaka yitatu, ndungo aali a Shimei yachina, yaya kuli Akishe mwana wa Maka, mwanangana wa Ngata. Muze Shimei evwile ngwo ndungo jenyi kali ku Ngata, 40 hazehene Shimei yalulieka chimbulu wenyi, yaya kuli Akishe ku Ngata ni kusaka ndungo jenyi. Muze Shimei afunyine ni ndungo jenyi, 41 atu yalweza Solomone ngwo: “Shimei katuhukanga mu Yerusaleme, kayanga ku Ngata. Alioze hafuna.” 42 Chocho, mwanangana yasanyika Shimei yamulweza ngwenyi: “Ngwami nalishingile mu jina lia Yehova ni kukutoweza ngwo: ‘Ha tangwa lize mutuhuka mu Yerusaleme uye ku chihela chikwo, pundu lume muufwa’? Ngwami yena wambile ngwe, ‘yuma yize mwanangana amba yinalite, munguyononokena’? 43 Mba mumu liaka kuwamanunwine chilakenyo chize walingile kumeso ja Yehova ni kukaula usongwelo uze nakuhele?” 44 Mwanangana yalweza Shimei ngwenyi: “Mu mbunge ye unanyingika kanawa upi weswe uze walingile kuli tata Ndawichi, kashika Yehova makuhilwisa upi weswe uze walingile. 45 Alioze, Mwanangana Solomone makamuwahisa, ngunja ya Ndawichi muyikakola kumeso ja Yehova ku miaka yeswe.” 46 Chocho mwanangana yatuma Benaia mwana wa Jehoiada hanga ashihe Shimei, chocho iye yaya yamushiha.
Mba wanangana wa Solomone yiununga ni kukola.